1ܣܵܒܵܒ ܕܐܵܗܵܐ ܐܘܼܦ ܐܲܚܢܲܢ؛ ܕܐܝܼܬ ܠܲܢ ܗܲܕܟܼܵܐ ܥܢܵܢܵܐ ܓܘܼܪܬܵܐ ܕܣܵܗܕܹ̈ܐ ܚܵܕܸܪ̈ܘܵܢܲܢ؛ ܫܵܪܵܚ ܡܸܢܲܢ ܟܠܵܝܗܝ ܝܘܼܩܪܹ̈ܐ؛ ܐܘܼܦ ܚܛܝܼܬܵܐ ܕܒܟܠ ܙܲܒܼܢܵܐ ܚܲܪܕܘܼܝܲܢ ܝܼܠܵܗ̇؛ ܘܒܚܡܵܠܬܵܐ ܪܵܚܛܵܚ ܠܐܵܗܵܐ ܐܵܓܼܘܿܢܵܐ ܕܡܘܼܬܒܼܵܐ ܝܠܹܗ ܩܵܕ݇ܡܲܢ؛ 2ܘܚܵܝܪܵܚ ܒܝܼܫܘܿܥ؛ ܪܹܫܵܐ ܕܡܲܟܡܸܠܵܢܵܐ ܕܗܲܝܡܵܢܘܼܬܲܢ؛ ܕܡܒܵܕܵܠ ܕܚܲܕܘܼܬܵܐ ܕܡܘܼܬܸܒܼܬܵܐ ܗ݇ܘܵܐ ܩܵܕ݇ܡܘܼܗܝ ܩܘܼܒܸܠܹܗ ܙܩܝܼܦܵܐ؛ ܟܲܕ ܡܲܣܠܘܼܝܹܐ ܠܢܚܸܦܬܵܐ؛ ܘܝܬܸܒܼܠܹܐ ܥܲܠ ܝܲܡܝܼܢܵܐ ܕܬܪܘܿܢܘܿܣ ܕܐܲܠܵܗܵܐ. 3ܒܲܣ ܚܙܹܐܡܘܿܢ ܟܡܵܐ ܩܘܼܒܸܠܹܗ ܡ̣ܢ ܚܲܛܵܝܹ̈ܐ؛ ܐܵܢܝܼ ܕܗ݇ܘܹܠܘܿܢ ܕܲܪܩܘܼܒܼܠ ܕܓܵܢܵܝ؛ ܕܠܵܐ ܣܵܩܕܝܼܬܘܿܢ ܘܠܵܐ ܦܵܝܫܵܐ ܪܦܝܼܬܵܐ ܓܵܢܵܘܟܼܘܿܢ. ܗܹܫ ܠܵܐ ܡܛܹܠܵܘܟܼܘܿܢ ܗܲܠ ܕܸܡܵܐ ܒܐܵܓܼܘܿܢܵܐ ܕܕܲܪܩܘܼܒܼܠ ܕܚܛܝܼܬܵܐ. 5ܘܢܫܹܠܵܘܟܼܘܿܢ ܠܢܲܨܝܼܗܲܬ؛ ܗ̇ܝ ܕܐܲܝܟܼ ܕܠܒܢܘܼܢܹ̈ܐ ܐَܡܝܼܪܵܗ̇ ܐܸܠܵܘܟܼܘܿܢ؛ ܒܪܘܼܢܝܼ؛ ܠܵܐ ܡܲܣܠܸܬ ܬܲܥܠܲܡܬܹܗ ܕܡܵܪܝܵܐ؛ ܘܠܵܐ ܣܵܩܕܸܬ ܐܝܼܡܲܢ ܕܦܵܝܫܸܬ ܡܘܼܢܟܸܣܵܐ ܡܸܢܹܗ؛ 6ܣܵܒܵܒ ܡ̇ܢ ܕܡܲܚܸܒ ܠܹܗ ܡܵܪܝܵܐ؛ ܟܹܐ ܬܲܥܠܸܡ ܠܹܗ؛ ܘܟܹܐ ܓ̰ܲܢܓ̰ܸܪ ܠܟܠ ܒܪܘܼܢܵܐ ܕܗ̇ܘ ܩܵܒܸ݁ܠ. 7ܒܲܣ ܩܵܒ݁ܠܘܿܢ ܬܲܥܠܲܡܬܵܐ؛ ܐܲܝܟܼ ܕܠܟܸܣ ܒܢܘܿܢܹ̈ܐ ܒܸܦܠܵܚܵܐ ܝܠܹܗ ܠܟܸܣܠܵܘܟܼܘܿܢ ܐܲܠܵܗܵܐ؛ ܣܵܒܵܒ ܐܲܝܢܝܼ ܝܠܹܗ ܒܪܘܼܢܵܐ ܕܠܵܐ ܬܲܥܠܸܡ ܠܹܗ ܒܵܒܹܗ؛ 8ܘܐܸܢ ܕܠܵܐ ܬܲܥܠܲܡܬܵܐ ܝܬܘܿܢ؛ ܗ̇ܝ ܕܒܝܼܵܗ̇ ܗ݇ܘܹܠܘܿܢ ܫܵܪ̈ܝܼܟܹܐ ܟܠܵܝܗܝ؛ ܒܲܣ ܒܝܼ̈ܟ̰ܹܐ ܝܬܘܿܢ ܘܠܵܐ ܒܢܘܼܢܹ̈ܐ. 9ܘܐَܚܹܪَܢܵܐ؛ ܐܝܼܬ ܗ݇ܘܵܘ ܠܲܢ ܒܵܒܵܘܵܬܹ̈ܐ ܕܒܸܣܪܵܐ ܬܲܥܠܡܵܢܹ̈ܐ؛ ܘܟܹܐ ܢܵܚܦܵܚ ܗ݇ܘܵܘ ܡܸܢܵܝܗܝ؛ ܒܲܣ ܟܡܵܐ ܒܘܼܫ ܘܵܓ̰ܸܒ ܝܼܠܵܗ̇ ܕܦܵܝܫܵܚ ܙܲܒܛ ܠܒܵܒܵܐ ܕܪ̈ܘܼܚܵܬܹܐ ܘܚܲܝܵܚ؛ 10ܣܵܒܵܒ ܐܵܢܝܼ ܠܚܲܕَܟ̰ܵܐ ܝܵܘܡܵܢܹ̈ܐ؛ ܐܲܝܟܼ ܕܒܵܣܡܵܐ ܗ݇ܘܵܐ ܠܗ݇ܘܿܢ؛ ܟܹܐ ܬܲܥܠܡܝܼ ܗ݇ܘܵܘ ܠܲܢ؛ ܐܝܼܢܵܐ ܗ̇ܘ ܠܚܵܝܪܲܢ؛ ܕܫܲܪܸܟܵܚ ܒܩܲܕܝܼܫܘܼܬܹܗ. 11ܟܠ ܬܲܥܠܲܡܬܵܐ ܒܙܲܒܼܢܘܼܗ̇ ܠܹܐ ܦܵܝܫܵܐ ܚܫܝܼܒܼܬܵܐ ܕܕܚܲܕܘܼܬܵܐ ܝَܠܵܗ̇ ܐܸܠܵܐ ܕܦܵܫܲܡܬܵܐ. ܐܝܼܢܵܐ ܒܚܲܪܬܵܐ ܛܥܘܼܢܝܵܬܹ̈ܐ ܕܫܠܵܡܵܐ ܘܕܙܲܕܝܼܩܘܼܬܵܐ ܟܹܐ ܝܵܗ݇ܒܼܵܐ ܠܐܵܢܝܼ ܕܒܝܼܵܗ̇ ܦܵܝܫܝܼ ܬܘܼܥܠܸܡܹܐ. 12ܣܵܒܵܒ ܕܐܵܗܵܐ ܐܝܼܕܵܬܵܘ̈ܟܼܘܿܢ ܫܘܼܢܫܸܠܹ̈ܐ ܘܒܘܼܪ̈ܟܵܟܵܘܟܼܘܿܢ ܪ̈ܵܥܠܵܢܹܐ ܡܲܩܘܹܡܘܿܢ؛ 13ܘܓ̰ܵܕܵܘܵܬܹ̈ܐ ܬܪ̈ܘܼܨܹܐ ܥܒܼܘܿܕܘܿܢ ܠܐܲܩܠܵܘ̈ܟܼܘܿܢ؛ ܕܗ̇ܘ ܕܝܼܠܹܗ ܣܲܩܲܬ ܠܵܐ ܩܵܠܸܒ̇؛ ܐܸܠܵܐ ܦܵܝܸܫ ܒܘܼܣܡܵܐ. 14ܪܚܘܿܛܘܿܢ ܒܵܬ݇ܪ ܫܠܵܡܵܐ ܥܲܡ ܟܠ ܐ݇ܢܵܫܵܐ؛ ܘܒܵܬ݇ܪ ܩܲܕܝܼܫܘܼܬܵܐ ܕܒܹܐ ܕܝܼܵܗ̇ ܐ݇ܢܵܫܵܐ ܠܡܵܪܲܢ ܠܹܐ ܚܵܙܹܐ. 15ܘܗܵܘܝܼܬܘܿܢ ܗܸܫܝܵܪ ܠܵܐ ܗ݇ܘܹܐ ܕܐ݇ܢܵܫܵܐ ܚܵܣܸܪ ܡ̣ܢ ܫܵܦܵܩܲܬ ܕܐܲܠܵܗܵܐ؛ ܝܲܢ ܠܵܐ ܗ݇ܘܹܐ ܕܥܸܩܪܵܐ ܕܡܪܵܪܹ̈ܐ ܡܲܓ̰ܝܸܢ ܘܚܲܙܕܸܓ ܠܵܘܟܼܘܿܢ؛ ܘܒܝܼܹܗ ܪܵܒܵܐ ܦܵܝܫܝܼ ܟ̰ܘܼܦܠܸܢܹܐ. 16ܝܲܢ ܠܵܐ ܗ݇ܘܹܐ ܕܗܵܘܹܐ ܐ݇ܢܵܫܵܐ ܓܵܘܵܘܟܼܘܿܢ ܕܙܲܢܵܝܵܐ ܘܟܵܦܘܿܪܵܐ؛ ܐܲܝܟܼ ܥܹܣܘܿ؛ ܕܒܚܕܵܐ ܡܹܐܟܼܘܼܠܬܵܐ ܙܘܼܒ݁ܢܵܠܹܐ ܒܘܼܟܼܪܘܼܬܹܗ؛ 17ܣܵܒܵܒ ܒܝܼܕܲܥܝܵܐ ܝܬܘܿܢ ܕܐܘܼܦ ܒܵܬ݇ܪ ܗܵܕܵܐ ܒܸܥܠܹܐ ܕܝܵܪܸܬ ܗ݇ܘܵܐ ܒܘܼܪܟܬܵܐ؛ ܘܦܸܫܠܹܗ ܡܘܼܣܠܝܼܵܐ؛ ܣܵܒܵܒ ܕܘܼܟܵܐ ܠܬܝܵܒܼܘܼܬܵܐ ܠܵܐ ܡܘܼܫَܟ̰ܸܚܠܹܐ؛ ܐܵܦܸܢ ܕܒܕܸܡܥܹ̈ܐ ܒܸܥܝܵܠܹܐ. 18ܣܵܒܵܒ ܠܵܐ ܐܬܹܠܵܘܟܼܘܿܢ ܩܘܼܪܒܵܐ ܠܛܘܼܪܵܐ ܕܦܵܝܸܫ ܕܩܝܼܪܵܐ ܘܕܒܸܩܝܵܕܵܐ ܒܢܘܼܪܵܐ؛ ܐܘܼܦ ܠܵܐ ܠܚܘܼܒܼܝܵܐ؛ ܘܠܚܸܫܟܵܐ؛ ܘܠܒܘܼܪܵܢ؛ ܘܠܵܐ ܠܩܵܠܵܐ ܕܩܵܪܢܵܐ؛ ܘܠܩܵܠܵܐ ܕܗܹܡܸܙܡܵܢܹ̈ܐ؛ ܗ̇ܘ ܕܐܵܢܝܼ ܕܫܡܸܥܠܗَܘܿܢ ܐܸܠܹܗ ܦܘܼܪܦܸܠܘܿܢ ܕܐَܚܹܪَܢܵܐ ܠܵܐ ܦܵܝܸܫ ܗܘܼܡܙܸܡܵܐ ܥܲܡܵܝܗܝ؛ 20ܣܵܒܵܒ ܠܹܐ ܡܵܨܝܼ ܗ݇ܘܵܘ ܠܩܵܒܘܿܠܹܐ ܡܸܢܕܝܼ ܕܦܸܫܠܹܗ ܦܩܝܼܕܵܐ؛ ܕܐܘܼܦ ܐܸܢ ܗܲܝܘܵܢ ܕܵܩܪܵܐ ܗ݇ܘܵܐ ܠܛܘܼܪܵܐ؛ ܦܵܝܫܵܐ ܗ݇ܘܵܐ ܪܓ̰ܝܼܡܬܵܐ. 21ܘܗܲܕܟܼܵܐ ܣܲܗܡܵܢܵܐ ܗ݇ܘܵܐ ܚܸܙܘܵܐ؛ ܕܡܘܼܫܹܐ ܐَܡܝܼܪܹܗ؛ ܪܵܒܵܐ ܒܸܙܕܲܥܝܵܐ ܝܘܸܢ ܘܪܲܬܪܘܼܬܹܐ ܝܘܸܢ. 22ܐܝܼܢܵܐ ܐܲܚܬܘܿܢ ܐܬܝܼܹܐ ܝܬܘܿܢ ܩܘܼܪܒܵܐ ܠܛܘܼܪܵܐ ܕܨܸܗܝܘܿܢ؛ ܘܠܡܕܝܼܢ݇ܬܵܐ ܕܐܲܠܵܗܵܐ ܚܲܝܵܐ؛ ܠܐܘܿܪܸܫܠܸܡ ܕܒܫܡܲܝܵܐ؛ ܘܠܪܸ̈ܒܘܵܬܵܐ ܕܡܲܠܲܐܟܼܹ̈ܐ؛ 23ܘܠܟܸܢܫܵܐ ܟܠܵܢܵܝܵܐ ܘܥܹܕܬܵܐ ܕܒܘܼܟܼܪܹ̈ܐ ܕܦܝܵܫܵܐ ܝܢܵܐ ܟܬܝܼܒܼܹܐ ܒܫܡܲܝܵܐ؛ ܘܠܐܲܠܵܗܵܐ ܕܲܝܵܢܵܐ ܕܟܠ؛ ܘܠܪ̈ܘܼܚܵܬܹܐ ܕܟܹܐܢܹ̈ܐ ܥܒܼܝܼܕܹܐ ܟܵܡܝܼܠ؛ 24ܘܠܝܼܫܘܿܥ ܢܵܘܸܢܓ̰ܝܼ ܕܕܝܵܬܹܩܹܐ ܚܲܕܬܵܐ؛ ܘܠܕܸܡܵܐ ܕܡܲܪܝܲܣܬܵܐ ܕܗܲܡܙܘܼܡܹܐ ܝܠܹܗ ܒܘܼܫ ܨܦܵܝܝܼ ܡܗ̇ܘ ܕܗܵܒܹܝܠ. 25ܗ݇ܘܹܡܘܿܢ ܗܸܫܝܵܪ ܕܠܵܐ ܕܡܲܚܦܸܠܝܼܬܘܿܢ ܡܗ̇ܘ ܕܗܲܡܙܘܼܡܹܐ ܝܠܹܗ. ܣܵܒܵܒ ܐܸܢ ܐܵܢܝܼ ܠܵܐ ܦܸܫܠܗَܘܿܢ ܦܘܼܨܝܹܐ ܟܲܕ ܡܘܼܚܦܸܠܘܿܢ ܡܗ̇ܘ ܕܗܘܼܡܙܸܡܠܹܗ ܒܐܲܪܥܵܐ؛ ܟܡܵܐ ܙܵܘܕܵܐ ܐܲܚܢܲܢ؛ ܐܸܢ ܡܲܚܦܸܠܵܚ ܡܗ̇ܘ ܕܗܘܼܡܙܸܡܠܹܗ ܥܲܡܲܢ ܡ̣ܢ ܫܡܲܝܵܐ؛ 26ܗ̇ܘ ܕܩܵܠܹܗ ܗ̇ܝܓܵܗ ܠܐܲܪܥܵܐ ܡܘܼܫܥܸܫܠܹܗ؛ ܐܝܼܢܵܐ ܐܵܕܝܼܵܐ ܩܘܼܘܸܠܵܐ ܝܠܹܗ؛ ܒܹܐܡܵܪܵܐ؛ ܡܸܢَܕܪܸܫَ ܚܕܵܐ ܓܵܗܵܐ ܐܵܢܵܐ ܒܸܬ ܡܲܫܥܸܫܸܢ؛ ܠܵܐ ܠܐܲܪܥܵܐ ܗܲܪ؛ ܐܸܠܵܐ ܐܘܼܦ ܠܫܡܲܝܵܐ. 27ܐܝܼܢܵܐ ܐܵܗܵܐ ܕܐَܡܝܼܪܹܗ؛ ܡܸܢَܕܪܸܫَ ܚܕܵܐ ܓܵܗܵܐ؛ ܡܲܕܘܼܥܝܹܐ ܝَܠܵܗ̇ ܫܲܚܠܲܦܬܵܐ ܕܐܵܢܝܼ ܕܦܝܵܫܵܐ ܝܢܵܐ ܫܥܝܼܫܹܐ؛ ܕܡܸܢܕܝܼܵܢܹ̈ܐ ܕܥܒܼܝܼܕܹܐ ܝܢܵܐ؛ ܕܥܲܪܩܸܠܝܼ ܐܵܢܝܼ ܕܠܹܐ ܦܵܝܫܝܼ ܫܥܝܼܫܹܐ. 28ܒܲܣ ܟܲܕ ܩܘܼܒܸܠܲܢ ܡܲܠܟܘܼܬܵܐ ܕܠܹܐ ܦܵܝܫܵܐ ܫܥܝܼܫܬܵܐ؛ ܕܵܒܼܩܵܚ ܫܵܦܵܩܲܬ ܕܒܝܼܵܗ̇ ܥܵܒܼܕܵܚ ܚܸܠܡܲܬ ܘܫܵܦܪܵܚ ܠܐܲܠܵܗܵܐ؛ ܒܢܟܼܸܦܬܵܐ ܘܒܙܕܘܼܥܬܵܐ. 29ܣܵܒܵܒ ܐܲܠܵܗܲܢ ܢܘܼܪܵܐ ܐܵܟܼܘܿܠܵܐ ܝܠܹܗ.