1ܡܐܲܝܟܵܐ ܐܝܼܬ ܓܵܘܵܘܟܼܘܿܢ ܦܠܵܫܹ̈ܐ ܘܡܲܩܲܪ̈ܨܘܼܝܵܬܹܐ؛ ܠܹܐ ܝܢܵܐ ܡܐܲܟܼܵܐ؛ ܡ̣ܢ ܫܲܗ݇ܘܲܬܝܵܬܹ̈ܐ ܕܒܸܦܠܵܫܵܐ ܝܢܵܐ ܓܵܘ ܗܲܕܵܡܵܘ̈ܟܼܘܿܢ؛ 2ܫܲܗ݇ܘܘܼܬܹܐ ܝܬܘܿܢ ܘܠܲܝܬ ܠܵܘܟܼܘܿܢ؛ ܒܸܩܛܵܠܵܐ ܝܬܘܿܢ ܘܒܲܚܘܼܠܹܐ ܝܬܘܿܢ؛ ܘܠܹܐ ܡܵܨܝܼܬܘܿܢ ܕܡܵܛܝܼܬܘܿܢ؛ ܘܡܲܩܪܘܼܨܹܐ ܝܬܘܿܢ ܘܒܸܦܠܵܫܵܐ ܝܬܘܿܢ؛ ܠܲܝܬ ܠܵܘܟܼܘܿܢ؛ ܣܵܒܵܒ ܠܹܐ ܝܬܘܿܢ ܒܸܛܠܵܒܵܐ. 3ܒܸܛܠܵܒܵܐ ܝܬܘܿܢ ܘܠܹܐ ܝܬܘܿܢ ܩܵܒ݁ܘܿܠܹܐ؛ ܣܵܒܵܒ ܒܣܪܝܼܬܵܐ ܒܸܛܠܵܒܵܐ ܝܬܘܿܢ؛ ܕܬܲܪܣܝܼܬܘܿܢ ܫܲܗ݇ܘܲܬܝܵܬܵܘ̈ܟܼܘܿܢ. 4ܝܵܐ ܩܲܗܒܝܵܬܹ̈ܐ؛ ܠܹܐ ܝܬܘܿܢ ܒܝܼܕܲܥܝܵܐ ܕܡܲܚܲܒܬܹܗ ܕܐܵܗܵܐ ܥܵܠܡܵܐ ܕܸܫܡܸܢܵܝܘܼܬܵܐ ܝَܠܵܗ̇ ܠܟܸܣ ܐܲܠܵܗܵܐ؛ ܒܲܣ ܗ̇ܘ ܕܒܲܥܝܹܐ ܕܗܵܘܹܐ ܕܵܘܣܬܵܐ ܕܐܵܗܵܐ ܥܵܠܡܵܐ؛ ܕܸܫܡܸܢ ܝܼܠܹܗ ܠܐܲܠܵܗܵܐ. 5ܝܲܢ ܒܸܚܫܵܒܼܵܐ ܝܬܘܿܢ ܕܗܵܒܵܣ ܐَܡܝܼܪܹܗ ܟܬܵܒܼܵܐ؛ ܒܩܲܝܪܲܬ ܟܹܐ ܫܲܗ݇ܘܸܬ ܪܘܼܚܵܐ ܕܒܸܥܡܵܪܵܐ ܝܠܹܗ ܒܝܼܲܢ؛ 6ܐܝܼܢܵܐ ܫܵܦܵܩܲܬ ܒܘܼܫ ܙܵܘܕܵܐ ܒܝܼܵܗ݇ܒܼܵܐ ܝܠܹܗ. ܣܵܒܵܒ ܕܐܵܗܵܐ ܐَܡܝܼܪܹܗ؛ ܐܲܠܵܗܵܐ ܟܹܐ ܟܵܠܹܐ ܕܲܪܩܘܼܒܼܠ ܕܪ̈ܵܡܹܐ؛ ܘܠܡܵܟܝܼܟܼܹ̈ܐ ܟܹܐ ܝܵܗ݇ܒܸܠ ܫܵܦܵܩܲܬ. 7ܒܲܣ ܗ݇ܘܹܡܘܿܢ ܙܲܒܛ ܠܐܲܠܵܗܵܐ؛ ܐܝܼܢܵܐ ܩܘܼܡܘܿܢ ܠܕܲܪܩܘܼܒܼܠ ܕܣܵܛܵܢܵܐ؛ ܘܒܸܬ ܥܵܪܸܩ ܡܸܢܵܘܟܼܘܿܢ. 8ܘܩܲܪܒܸܢܘܿܢ ܠܟܸܣ ܐܲܠܵܗܵܐ؛ ܘܒܸܬ ܩܲܪܒܸܢ ܐܸܠܵܘܟܼܘܿܢ. ܕܵܟܹܡܘܿܢ ܐܝܼܕܵܬܵܘ̈ܟܼܘܿܢ؛ ܚܲܛܵܝܹ̈ܐ؛ ܩܵܕܫܘܿܢ ܠܸܒܵܘܵܬܵܘ̈ܟܼܘܿܢ؛ ܕܘܼܒܲܪܹ̈ܐ ܒܚܝܼܵܠ. 9ܦܘܼܫܘܿܢ ܒܚܲܫܵܐ؛ ܘܥܒܼܘܿܕܘܿܢ ܬܵܙܝܼ؛ ܘܒܟܹܡܘܿܢ؛ ܘܓܸܚܟܵܘܟܼܘܿܢ ܠܬܵܙܝܼ ܕܵܝܸܪ؛ ܘܚܲܕܘܼܬܵܘܟܼܘܿܢ ܠܥܵܘܩܵܢܵܐ. 10ܡܲܡܟܸܟܼܘܿܢ ܓܵܢܵܘܟܼܘܿܢ ܩܵܕ݇ܡ ܡܵܪܝܵܐ؛ ܘܒܸܬ ܡܵܪܸܡ ܠܵܘܟܼܘܿܢ. 11ܠܵܐ ܗܵܘܝܼܬܘܿܢ ܗܲܡܙܘܼܡܹܐ ܕܲܪܩܘܼܒܼܠ ܕܚܕܵܕܹ̈ܐ؛ ܐܵܚܘܿܢܘܵܬܝܼ̈؛ ܗ̇ܘ ܕܗܲܡܙܸܡ ܕܲܪܩܘܼܒܼܠ ܕܐܵܚܘܿܢܹܗ؛ ܝܲܢ ܕܵܝܸܢ ܠܐܵܚܘܿܢܹܗ؛ ܟܹܐ ܗܲܡܙܸܡ ܕܲܪܩܘܼܒܼܠ ܕܢܵܡܘܿܣܵܐ؛ ܘܟܹܐ ܕܵܝܸܢ ܠܢܵܡܘܿܣܵܐ. ܘܐܸܢ ܠܢܵܡܘܿܣܵܐ ܒܸܕܝܵܢܵܐ ܝܘܸܬ؛ ܠܹܐ ܝܘܸܬ ܥܵܒܼܕܵܢܵܐ ܕܢܵܡܘܿܣܵܐ؛ ܐܸܠܵܐ ܕܲܝܵܢܹܗ. 12ܚܲܕَ ܝܼܠܹܗ ܡܲܬܒܼܵܢܵܐ ܕܢܵܡܘܿܣܵܐ ܘܕܲܝܵܢܵܐ؛ ܗ̇ܘ ܕܡܵܨܹܐ ܕܡܲܚܹܐ ܘܬܵܠܸܩ. ܐܝܼܢܵܐ ܐܲܢ݇ܬ ܡܵܢܝܼ ܝܘܸܬ ܕܒܸܕܝܵܢܵܐ ܝܘܸܬ ܠܫܒܼܵܒܼܘܼܟܼ؛ 13ܬܹܡܘܿܢ ܐܵܕܝܼܵܐ ܐܲܚܬܘܿܢ ܕܒܹܐܡܵܪܵܐ ܝܬܘܿܢ؛ ܐܸܕܝܘܿ ܝܲܢ ܩܵܝܕܲܡܬܵܐ ܒܸܬ ܐܵܙܵܠ݇ܚ ܠܦܸܠܵܢ ܡܕܝܼܢ݇ܬܵܐ؛ ܘܒܸܬ ܦܵܠܚܵܚ ܬܵܡܵܐ ܚܕܵܐ ܫܹܢ݇ܬܵܐ؛ ܘܒܸܬ ܥܵܒܼܕܵܚ ܬܵܓ̰ܝܼܪܘܼܬܵܐ ܘܩܵܢܵܚ؛ 14ܐܲܚܬܘܿܢ ܕܠܹܐ ܝܲܕܥܝܼܬܘܿܢ ܕܩܵܝܕܲܡܬܵܐ. ܣܵܒܵܒ ܝܢܵܐ ܚܲܝܵܘ̈ܟܼܘܿܢ؛ ܐܸܠܵܐ ܐܸܢ ܗܵܘܓܵܐ ܕܚܲܕَܟ̰ܵܐ ܦܵܝܸܫ ܚܸܙܝܵܐ ܘܗ̇ܝܓܵܗ ܬܵܝܸܡ؛ 15ܡܒܵܕܵܠ ܕܐܵܡܪܝܼܬܘܿܢ؛ ܐܸܢ ܡܵܪܝܵܐ ܒܵܣܡܵܐ ܠܹܗ ܘܚܲܝܵܚ؛ ܒܸܬ ܥܵܒܼܕܵܚ ܐܵܗܵܐ ܝܲܢ ܗ̇ܝ. 16ܐܝܼܢܵܐ ܐܵܕܝܼܵܐ ܒܸܥܒܼܵܕܵܐ ܝܬܘܿܢ ܫܘܼܒܼܗܵܪܵܐ ܒܚܬܵܪܬܵܘܟܼܘܿܢ. ܟܠ ܗܲܕܟܼܵܐ ܫܘܼܒܼܗܵܪܵܐ ܒܝܼܫܵܐ ܝܠܹܗ. 17ܘܗ̇ܘ ܕܝܲܕܸܥ ܠܸܥܒܼܵܕܵܐ ܛܵܒܼܬܵܐ؛ ܘܠܵܐ ܥܵܒܸܕ ܠܵܗ̇؛ ܚܛܝܼܬܵܐ ܝَܠܵܗ̇ ܐܸܠܹܗ.