1ܬܹܡܘܿܢ ܐܵܕܝܼܐ؛ ܝܵܐ ܕܵܘܠܲܬܡܲܢܕܹ̈ܐ؛ ܘܲܠܘܸܠܘܿܢ ܘܒܟܹܡܘܿܢ ܥܲܠ ܕܲܪ̈ܕܹܐ ܕܒܹܐܬܵܝܵܐ ܝܢܵܐ ܥܲܠܵܘܟܼܘܿܢ. 2ܕܵܘܸܠܬܵܘܟܼܘܿܢ ܚܪܸܒܼܠܵܐ؛ ܘܓ̰ܘܼܠܵܘ̈ܟܼܘܿܢ ܦܸܫܠܗَܘܿܢ ܐܟܼܝܼܠܹܐ ܡ̣ܢ ܐܸܟܼܠܵܐ. 3ܕܲܗܒܼܵܘܟܼܘܿܢ ܘܣܹܐܡܵܘܟܼܘܿܢ ܓ̰ܘܼܢܓܸܢܹܐ؛ ܘܓ̰ܵܢܓܵܝ ܒܸܬ ܗܵܘܝܵܐ ܠܣܵܗܕܘܼܬܵܐ ܥܲܠܵܘܟܼܘܿܢ؛ ܘܒܸܬ ܐܵܟܼܠܵܐ ܒܸܣܪܵܘܟܼܘܿܢ ܐܲܝܟܼ ܢܘܼܪܵܐ. ܚܲܙܝܼܢܵܐ ܓ̰ܘܼܡܸܥܠܵܘܟܼܘܿܢ ܐܸܠܵܘܟܼܘܿܢ ܠܝܵܘܡܵܢܹ̈ܐ ܐَܚܵܪ̈ܵܝܹܐ. 4ܗܵܐ؛ ܗܵܩܵܐ ܕܦܵܥ̈ܠܹܐ ܕܚܨܸܕܠܘܿܢ ܐܵܪ̈ܥܵܬܵܘܟܼܘܿܢ؛ ܗ̇ܘ ܕܙܠܸܡܠܵܘܟܼܘܿܢ؛ ܡܲܩܘܘܼܚܹܐ ܝܠܹܗ؛ ܘܫܲܦܠܲܦܬܵܐ ܕܚܵܨܵܕܹ̈ܐ ܠܢܵܬܝܵܬܹ̈ܐ ܕܡܵܪܝܵܐ ܨܒܼܵܐܘܼܬ ܐܘܸܪܵܐ. 5ܥܒܸܕܠܵܘܟܼܘܿܢ ܒܘܼܣܵܡܵܐ ܥܲܠ ܐܲܪܥܵܐ؛ ܘܥܒܸܕܠܵܘܟܼܘܿܢ ܒܲܕܢܲܦ̮ܣܘܼܬܵܐ؛ ܘܬܘܼܪܣܹܠܵܘܟܼܘܿܢ ܠܸܒܵܘܵܬܘ̈ܟܼܘܿܢ ܐܲܝܟܼ ܠܝܵܘܡܵܐ ܕܦܪܵܡܬܵܐ. 6ܥܒܸܕܠܵܘܟܼܘܿܢ ܓܘܼܢܵܗܟܵܪ ܘܩܛܸܠܵܘܟܼܘܿܢ ܠܙܲܕܝܼܩܵܐ؛ ܘܠܵܐ ܩܸܡܠܹܗ ܠܕܲܪܩܘܼܒܼܠܵܘܟܼܘܿܢ. 7ܒܲܣ ܐܲܚܬܘܿܢ؛ ܐܵܚܘܿܢܘܵܬܝܼ̈؛ ܡܲܪܝܸܟܼܘܿܢ ܒܹܢܵܘܟܼܘܿܢ ܗܲܠ ܐَܬܵܝܬܹܗ ܕܡܵܪܝܵܐ. ܗܵܐ؛ ܐܲܟܵܪܵܐ ܟܹܐ ܣܵܦܸܪ ܠܡܲܗܨܘܼܠܹ̈ܐ ܡܝܘܼܩܪܹ̈ܐ ܕܐܲܪܥܵܐ؛ ܘܡܲܪܝܸܟܼ ܒܹܢܹܗ ܥܲܠܵܝܗܝ؛ ܗܲܠ ܕܩܵܒܸܠ ܡܸܛܪܵܐ ܗܵܪܘܵܫ ܘܣܹܘܵܕܬܵܐ. 8ܐܘܼܦ ܐܲܚܬܘܿܢ. ܡܲܪܝܸܟܼܘܿܢ ܒܹܢܵܘܟܼܘܿܢ؛ ܘܠܸܒܵܘܵܬܵܘ̈ܟܼܘܿܢ ܡܲܩܘܹܡܘܿܢ؛ ܣܵܒܵܒ ܩܘܼܪܒܸܢܬܵܐ ܝَܠܵܗ̇ ܐَܬܵܝܬܹܗ ܕܡܵܪܲܢ. 9ܠܵܐ ܬܵܢܚܝܼܬܘܿܢ ܚܲܕَ ܥܲܠ ܗ̇ܘ ܐَܚܹܪَܢܵܐ ܐܵܚܘܿܢܘܵܬܝܼ̈؛ ܕܠܵܐ ܦܵܝܫܝܼܬܘܿܢ ܕܝܼܢܹܐ. ܗܵܐ ܕܲܝܵܢܵܐ ܩܵܕ݇ܡ ܬܲܪܥܵܐ ܟܸܠܝܵܐ ܝܠܹܗ. 10ܠܛܘܼܦ̮ܣܵܐ ܕܐܘܼܠܨܵܢܹ̈ܐ ܘܕܡܲܪܝܲܟܼܬܵܐ ܕܒܹܢܵܐ؛ ܫܩܘܿܠܘܿܢ ܠܵܘܟܼܘܿܢ ܠܢܒܼ̈ܝܼܹܐ؛ ܐܵܚܘܿܢܘܵܬܝܼ̈؛ ܐܵܢܝܼ ܕܗܘܼܡܙܸܡܠܘܿܢ ܒܫܸܡܹܗ ܕܡܵܪܝܵܐ. 11ܗܵܐ؛ ܒܝܼܵܗ݇ܒܼܵܐ ܝܘܵܚ ܛܘܼܒܼܵܐ ܠܐܵܢܝܼ ܕܚܡܸܠܘܿܢ. ܫܡܸܥܠܵܘܟܼܘܿܢ ܚܡܵܠܬܹܗ ܕܐܝܼܘܿܒܼ؛ ܘܚܲܪܬܵܐ ܕܡܵܪܝܵܐ ܚܙܹܠܵܘܟܼܘܿܢ؛ ܣܵܒܵܒ ܡܪܲܚܡܵܢܵܐ ܝܼܠܹܗ ܡܵܪܝܵܐ ܘܡܪܲܦܪܸܦܵܢܵܐ. 12ܐܝܼܢܵܐ ܩܵܕ݇ܡ ܟܠܹܗ ܡܸܢܕܝܼ؛ ܐܵܚܘܿܢܘܵܬܝܼ̈؛ ܠܵܐ ܗܵܘܝܼܬܘܿܢ ܒܹܡܵܝܵܐ؛ ܠܵܐ ܒܫܡܲܝܵܐ؛ ܘܠܵܐ ܒܐܲܪܥܵܐ؛ ܐܘܼܦ ܠܵܐ ܒܡܵܘܡܵܬܵܐ ܐَܚܹܪ݇ܬܵܐ. ܐܸܠܵܐ ܗܵܘܝܵܐ ܗܹܐ ܕܝܼܵܘܟܼܘܿܢ ܗܹܐ؛ ܘܠܵܐ؛ ܠܵܐ؛ ܕܠܵܐ ܢܵܦܠܝܼܬܘܿܢ ܒܓܘܼܢܵܗܟܵܪܘܼܬܵܐ. 13ܐܸܢ ܐ݇ܢܵܫܵܐ ܡܸܢܵܘܟܼܘܿܢ ܗܵܘܹܐ ܒܐܘܼܠܨܵܢܵܐ؛ ܨܵܠܹܐ ܨܠܘܿܬܵܐ. ܐܸܢ ܚܵܕܹܐ؛ ܙܵܡܸܪ ܡܲܙܡܘܿܪܹ̈ܐ؛ 14ܐܸܢ ܡܸܪܥܝܵܐ ܝܠܹܗ؛ ܩܵܪܹܐ ܠܩܲܫܝܼܫܹ̈ܐ ܕܥܹܕܬܵܐ؛ ܘܨܵܠܝܼ ܥܲܠܘܼܗܝ؛ ܘܡܵܫܚܝܼ ܠܹܗ ܡܸܫܚܵܐ ܒܫܸܡܹܗ ܕܡܵܪܲܢ. 15ܘܨܠܘܿܬܵܐ ܕܗܲܝܡܵܢܘܼܬܵܐ ܒܸܬ ܡܲܚܝܼܵܐ ܠܹܗ ܗ̇ܘ ܕܝܼܠܹܗ ܡܸܪܥܝܵܐ؛ ܘܒܸܬ ܡܲܩܸܡ ܠܹܗ ܡܪܲܢ؛ ܘܐܸܢ ܚܛܝܼܵܬܹ̈ܐ ܥܒܼܝܼܕܵܐ ܝܠܹܗ؛ ܒܸܬ ܦܵܝܫܝܼ ܫܒܼܝܼܩܹܐ ܐܸܠܹܗ. 16ܐܝܼܢܵܐ ܗܵܘܝܼܬܘܿܢ ܡܵܘܕܘܿܝܹܐ ܓܢܵܗܵܘ̈ܟܼܘܿܢ ܚܲܕَ ܠܗ̇ܘ ܐَܚܹܪَܢܵܐ؛ ܘܗܵܘܝܼܬܘܿܢ ܨܵܠܘܿܝܹܐ ܚܲܕَ ܥܲܠ ܗ̇ܘ ܐَܚܹܪَܢܵܐ؛ ܕܦܵܝܫܝܼܬܘܿܢ ܒܘܼܣܡܹܐ. ܓܘܼܪܵܐ ܝܠܹܗ ܚܲܝܠܵܐ ܕܨܠܘܿܬܵܐ ܗ̇ܝ ܕܙܲܕܝܼܩܵܐ ܨܵܠܹܐ ܠܵܗ̇. 17ܐܹܠܝܼܵܐ ܒܲܪܢܵܫܵܐ ܗ݇ܘܵܐ ܚܵܫܘܿܫܵܐ ܐܲܝܟܼ ܕܝܼܲܢ؛ ܘܨܘܼܠܹܠܹܐ ܨܠܘܿܬܵܐ ܕܠܵܐ ܥܵܪܝܵܐ ܗ݇ܘܵܐ ܡܸܛܪܵܐ ܥܲܠ ܐܲܪܥܵܐ؛ ܘܠܵܐ ܥܪܹܠܵܐ ܬܠܵܬ݇ ܫܸܢܹ̈ܐ ܘܐܸܫܬܵܐ ܝܲܪ̈ܚܹܐ. 18ܘܡܸܢَܕܪܸܫَ ܨܘܼܠܹܠܹܐ؛ ܘܫܡܲܝܹ̈ܐ ܝܸܗܒܼܸܠܘܿܢ ܡܸܛܪܵܐ؛ ܘܐܲܪܥܵܐ ܝܸܗܒܸܠܵܐ ܡܲܗܨܘܼܠܘܼ̈ܗ̇. 19ܐܵܚܘܿܢܘܵܬܝܼ̈؛ ܐܸܢ ܐ݇ܢܵܫܵܐ ܡܸܢܵܘܟܼܘܿܢ ܚܵܠܸܛ ܡ̣ܢ ܣܲܪܲܣܬܘܼܬܵܐ؛ ܘܐ݇ܢܵܫܵܐ ܡܲܕܸܪܹܗ؛ 20ܝܲܕܸܥ ܕܗ̇ܘ ܕܡܲܕܸܪ ܠܚܲܛܵܝܵܐ ܡ̣ܢ ܚܸܠܛܘܼܢܝܘܼܬܵܐ ܕܐܘܼܪܚܹܗ؛ ܟܹܐ ܦܵܪܸܩ ܚܕܵܐ ܓܵܢܵܐ ܡ̣ܢ ܡܵܘܬܵܐ؛ ܘܟܹܐ ܟܵܣܹܐ ܒܘܼܫܵܝܘܼܬܵܐ ܕܚܛܝܼܵܬܹ̈ܐ.