1ܠܡܲܠܲܐܟܼܵܐ ܕܥܹܕܬܵܐ ܕܓܵܘ ܐܵܦܸܣܘܿܣ؛ ܟܬܘܿܒܼ؛ ܐܲܢܹܐ ܒܹܐܡܵܪܵܐ ܝܠܹܗ ܗ̇ܘ ܕܕܵܒܼܸܩ ܠܐܵܢܝܼ ܫܲܒܼܥܵܐ ܟܵܘܟܼܒܼܹ̈ܐ ܒܝܲܡܝܼܢܹܗ؛ ܗ̇ܘ ܕܒܸܚܕܵܪܵܐ ܝܠܹܗ ܒܒܹܝܦܲܠܓܵܐ ܕܐܲܢܹܐ ܫܲܒܼܥܵܐ ܩܲܢܕܝܼ̈ܠܹܐ ܕܕܲܗܒܼܵܐ؛ 2ܒܝܼܕܲܥܝܵܐ ܝܘܸܢ ܠܦܘܼܠܚܵܢܹ̈ܐ ܕܝܼܘܼܟܼ؛ ܘܠܓ̰ܵܦܵܐ ܘܠܚܡܵܠܬܵܐ ܕܝܼܘܼܟܼ؛ ܘܕܠܹܐ ܡܵܨܸܬ ܠܩܵܒܘܿܠܹܐ ܠܒܝܼܫܹ̈ܐ؛ ܘܓ̰ܘܼܪܸܒܠܘܼܟܼ ܠܐܵܢܝܼ ܕܒܓܵܢܵܝܗܝ ܒܹܐܡܵܪܵܐ ܝܢܵܐ ܕܫܠܝܼܚܹ̈ܐ ܝܢܵܐ؛ ܘܠܹܐ ܝܢܵܐ؛ ܘܡܘܼܫَܟ̰ܚܵܝܠܘܼܟܼ ܕܵܓܵܠܹ̈ܐ. 3ܘܚܡܵܠܬܵܐ ܐܝܼܬ ܠܘܼܟܼ ܘܩܘܼܒܸܠܘܼܟܼ ܕܫܸܡܝܼ؛ ܘܠܵܐ ܣܩܸܕܠܘܼܟܼ. 4ܐܸܠܵܐ ܐܝܼܬ ܠܝܼ ܡܸܢܕܝܼ ܥܲܠܘܼܟܼܼ؛ ܕܚܘܼܒܵܐ ܕܝܼܘܼܟܼ؛ ܗ̇ܘ ܩܵܕ݇ܡܵܝܵܐ؛ ܫܩܸܠܘܼܟܼ. 5ܒܲܣ ܕܟܼܘܿܪ ܡ̣ܢ ܐܲܝܟܵܐ ܢܦܸܠܘܼܟܼܼ؛ ܘܬܵܘܸܒ؛ ܘܠܦܘܼܠܚܵܢܹ̈ܐ ܩܵܕ݇ܡܵܝܹ̈ܐ ܥܒܼܘܿܕ. ܘܐܸܢ ܠܵܐ؛ ܒܹܐܬܵܝܵܐ ܝܘܸܢ ܥܲܠܘܼܟܼܼ؛ ܘܒܸܬ ܡܲܫܥܸܫܸܢ ܩܲܢܕܝܼܠܘܼܟܼ ܡ̣ܢ ܕܘܼܟܬܹܗ؛ ܐܸܢ ܠܵܐ ܬܲܘܸܒܸܬ. 6ܐܸܠܵܐ ܐܵܗܵܐ ܐܝܼܬ ܠܘܼܟܼܼ؛ ܕܒܸܣܢܵܝܵܐ ܝܘܸܬ ܠܦܘܼܠܚܵܢܹ̈ܐ ܕܢܝܼܩܠܝܼ̈ܛܘܿ؛ ܠܐܲܢܹܐ ܕܐܘܼܦ ܐܵܢܵܐ ܒܸܣܢܵܝܵܐ ܝܘܸܢ. 7ܗ̇ܘ ܕܐܝܼܬ ܠܹܗ ܢܵܬܝܵܬܹ̈ܐ؛ ܫܲܡܸܥ ܡܘܼܕܝܼ ܪܘܼܚܵܐ ܒܹܐܡܵܪܵܐ ܝܠܹܗ ܠܥܹܕܵܬܹ̈ܐ. ܠܗ̇ܘ ܕܓܼܵܠܸܒ؛ ܒܸܬ ܝܵܗ݇ܒܼܸܢ ܐܸܠܹܐ ܠܹܐܟܼܵܠܵܐ ܡ̣ܢ ܐܝܼܠܵܢܵܐ ܕܚܲܝܹ̈ܐ؛ ܗ̇ܘ ܕܝܼܠܹܗ ܓܵܘ ܦܲܪܕܲܝܣܵܐ ܕܐܲܠܵܗܵܐ. 8ܘܠܡܲܠܲܐܟܼܵܐ ܕܥܹܕܬܵܐ ܕܓܵܘ ܣܡܘܿܪܢܵܐ؛ ܟܬܘܿܒܼ؛ ܐܲܢܹܐ ܒܹܐܡܵܪܵܐ ܝܠܹܗ ܗ̇ܘ ܩܵܕ݇ܡܵܝܵܐ ܘܗ̇ܘ ܐ݇ܚܵܪܵܝܵܐ؛ ܗ̇ܘ ܕܡܝܼܬܵܐ ܗ݇ܘܵܐ ܘܚܹܝܠܹܐ؛ 9ܒܝܼܕܲܥܝܵܐ ܝܘܸܢ ܠܐܘܼܠܨܵܢܵܐ ܘܠܡܸܣܟܹܢܘܼܬܵܐ ܕܝܼܘܼܟܼ؛ ܐܝܼܢܵܐ ܕܵܘܠܲܬܡܲܢܕ ܝܼܘܸܬ؛ ܘܠܓܘܼܕܵܦܵܐ ܕܐܵܢܝܼ ܕܒܹܐܡܵܪܵܐ ܝܢܵܐ ܒܵܗ݇ܣ ܓܵܢܵܝܗܝ ܕܝܗ݇ܘܼܕܵܝܹ̈ܐ ܝܢܵܐ؛ ܘܠܹܐ ܝܢܵܐ؛ ܐܸܠܵܐ ܟܢܘܼܫܬܵܐ ܕܣܵܛܵܢܵܐ ܝܢܵܐ. 10ܙܵܕܥܸܬ ܡ̣ܢ ܕܐܲܢܹܐ ܕܗܕܝܼܪܵܐ ܝܘܸܬ ܠܩܵܒܘܿܠܹܐ ܚܲܫܵܐ. ܗܵܐ؛ ܗܕܝܼܪܵܐ ܝܠܹܗ ܐܵܟܼܹܠܩܲܪܨܵܐ ܠܸܕܪܵܝܵܐ ܡܸܢܵܘܟܼܘܿܢ ܓܵܘ ܒܹܝܬ ܢܛܘܼܪܬܵܐ؛ ܕܦܵܝܫܝܼܬܘܿܢ ܓ̰ܘܼܪܒܹܐ؛ ܘܒܸܬ ܗܵܘܹܐ ܠܵܘܟܼܘܿܢ ܐܘܼܠܨܵܢܵܐ ܥܸܣܪܵܐ ܝܵܘܡܵܢܹ̈ܐ. ܗ݇ܘܝܼ ܡܗܘܼܡܢܵܐ ܗܲܠ ܡܵܘܬܵܐ؛ ܘܒܸܬ ܝܵܗ݇ܒܼܸܢܘܼܟܼ ܬܵܐܓ̰ ܕܚܲܝܹ̈ܐ. 11ܗ̇ܘ ܕܐܝܼܬ ܠܹܗ ܢܵܬܝܵܬܹ̈ܐ؛ ܫܲܡܸܥ ܡܘܼܕܝܼ ܪܘܼܚܵܐ ܒܹܐܡܵܪܵܐ ܝܠܹܗ ܠܥܹܕܵܬܹ̈ܐ؛ ܗ̇ܘ ܕܓܼܵܠܸܒ ܠܹܐ ܦܵܝܸܫ ܙܠܝܼܡܵܐ ܡ̣ܢ ܕܗ̇ܘ ܡܵܘܬܵܐ ܕܬܪܹܝ. 12ܘܠܡܲܠܲܐܟܼܵܐ ܕܥܹܕܬܵܐ ܕܓܵܘ ܦܲܪܓܵܡܘܿܣ؛ ܟܬܘܿܒܼ؛ ܐܲܢܹܐ ܒܹܐܡܵܪܵܐ ܝܠܹܗ ܗ̇ܘ ܕܐܝܼܬ ܠܹܗ ܣܲܝܦܵܐ ܗ̇ܘ ܚܵܪܝܼܦܵܐ ܕܬܪܹܝ ܦܘܼܡܵܢܹ̈ܐ؛ 13ܒܝܼܕܲܥܝܵܐ ܝܘܸܢ ܐܲܝܟܵܐ ܟܹܐ ܥܵܡܪܸܬ؛ ܐܲܝܟܵܐ ܕܝܼܠܹܗ ܬܪܘܿܢܘܿܣ ܕܣܵܛܵܢܵܐ؛ ܘܕܒܼܝܼܩܵܐ ܝܘܸܬ ܒܫܸܡܵܐ ܕܝܼܝܼ؛ ܘܠܵܐ ܣܪܸܒܼܠܘܼܟܼ ܠܗܲܝܡܵܢܘܼܬܝܼ ܒܐܲܢܹܐ ܝܵܘܡܵܢܹ̈ܐ ܕܒܝܼܵܝܗܝ ܗ݇ܘܵܐ ܗ̇ܘ ܐܲܢܛܝܼܦܘܿܣ ܣܵܗܕܵܐ ܕܝܼܝܼ؛ ܗ̇ܘ ܡܗܘܼܡܢܵܐ ܕܝܼܝܼ؛ ܗ̇ܘ ܕܦܸܫܠܹܗ ܩܛܝܼܠܵܐ ܠܟܸܣܠܵܘܟܼܘܿܢ؛ ܐܲܝܟܵܐ ܕܟܹܐ ܥܵܡܸܪ ܣܵܛܵܢܵܐ. 14ܐܸܠܵܐ ܐܝܼܬ ܠܝܼ ܥܲܠܘܼܟܼ ܚܲܕَܟ̰ܵܐ. ܣܵܒܵܒ ܕܐܝܼܬ ܠܘܼܟܼ ܬܵܡܵܐ ܐܵܢܝܼ ܕܝܼܢܵܐ ܕܒܼܝܼܩܹܐ ܠܡܲܠܦܵܢܘܼܬܵܐ ܕܒܸܠܥܵܡ؛ ܕܡܘܼܠܸܦܠܹܐ ܠܒܵܠܵܩ ܠܸܕܪܵܝܵܐ ܬܘܼܪܩܵܠܵܐ ܩܵܕ݇ܡ ܒܢܲܝ̈ ܝܼܣܪܵܝܹܠ؛ ܠܹܐܟܼܵܠܵܐ ܕܸܒܼܚܹ̈ܐ ܕܨܲܢܲܡܹ̈ܐ؛ ܘܠܸܙܢܵܝܵܐ. 15ܗܲܕܟܼܵܐ ܐܝܼܬ ܠܘܼܟܼ ܐܘܼܦ ܐܲܢ݇ܬ ܐܵܢܝܼ ܕܝܼܢܵܐ ܕܒܼܝܼܩܹܐ ܠܡܲܠܦܵܢܘܼܬܵܐ ܕܢܝܼܩܠܝܼ̈ܛܘܿ ܗܲܪ ܒܐܵܗܵܐ ܬܵܗܵܪ. 16ܒܲܣ ܬܲܘܸܒ؛ ܘܐܸܢ ܠܵܐ؛ ܒܸܬ ܐܵܬܸܢ ܥܲܠܘܼܟܼ ܓ̰ܲܠܕܹܐ؛ ܘܒܸܬ ܦܵܠܫܸܢ ܥܲܡܵܝܗܝ ܒܣܲܝܦܵܐ ܕܦܘܼܡܝܼ. 17ܗ̇ܘ ܕܐܝܼܬ ܠܹܗ ܢܵܬܝܵܬܹ̈ܐ؛ ܫܲܡܸܥ ܡܘܼܕܝܼ ܪܘܼܚܵܐ ܒܹܐܡܵܪܵܐ ܝܠܹܗ ܠܥܹܕܵܬܹ̈ܐ. ܠܗ̇ܘ ܕܓܼܵܠܸܒ؛ ܒܸܬ ܝܵܗ݇ܒܼܸܢܹܗ ܡ̣ܢ ܡܲܢܢܵܐ ܗ̇ܘ ܕܝܼܠܹܗ ܛܸܫܝܵܐ؛ ܘܒܸܬ ܝܵܗ݇ܒܼܸܢܹܗ ܟܹܐܦܵܐ ܚܘܵܪܵܐ؛ ܘܥܲܠ ܟܹܐܦܵܐ ܫܸܡܵܐ ܚܵܕ݇ܬܵܐ ܟܬܝܼܒܼܵܐ؛ ܗ̇ܘ ܕܐ݇ܢܵܫܵܐ ܠܹܐ ܝܲܕܸܥ ܫܒܼܘܿܩ ܡ̣ܢ ܗ̇ܘ ܕܫܵܩܸܠ. 18ܘܠܡܲܠܲܐܟܼܵܐ ܕܥܹܕܬܵܐ ܕܓܵܘ ܬܹܐܘܿܛܝܼܪܵܐ؛ ܟܬܘܿܒܼ؛ ܐܲܢܹܐ ܒܹܐܡܵܪܵܐ ܝܠܹܗ ܒܪܘܼܢܹܗ ܕܐܲܠܵܗܵܐ؛ ܗ̇ܘ ܕܐܝܼܬ ܠܹܗ ܥܲܝܢܹ̈ܐ ܐܲܝܟܼ ܠܵܗܵܐ ܕܢܘܼܪܵܐ؛ ܘܐܲܩܠܘܼ̈ܗܝ ܟܹܐ ܕܵܡܝܼ ܠܢܚܵܫܵܐ ܡܘܼܒܪܸܩܵܐ؛ 19ܒܝܼܕܲܥܝܵܐ ܝܘܸܢ ܠܦܘܼܠܚܵܢܹ̈ܐ ܕܝܼܘܼܟܼ؛ ܘܠܚܘܼܒܵܐ ܘܠܗܲܝܡܵܢܘܼܬܵܐ ܘܠܚܸܠܡܲܬ ܘܐܘܼܦ ܠܚܡܵܠܬܵܐ ܕܝܼܘܼܟܼ؛ ܕܦܘܼܠܚܵܢܘܼ̈ܟܼ ܐَܚܵܪ̈ܵܝܹܐ ܪܵܒܵܐ ܝܢܵܐ ܡ̣ܢ ܩܵܕ݇ܡܵܝܹ̈ܐ. 20ܐܸܠܵܐ ܐܝܼܬ ܠܝܼ (ܡܸܢܕܝܼ) ܥܲܠܘܼܟܼܼ؛ ܣܵܒܵܒ ܕܫܒܼܸܩܠܘܼܟܼ ܠܗ̇ܝ ܒܲܟܼܬܵܐ ܐܝܼܙܒܸܠ؛ ܗ̇ܝ ܕܐܵܡܪܵܐ ܒܵܗ݇ܣ ܕܓܵܢܘܼܗ̇ ܢܒܼܝܼܬܵܐ؛ ܘܟܹܐ ܡܵܠܦܵܐ ܘܡܲܚܠܸܛܵܐ ܠܪܹ̈ܓܵܘܵܬܹܐ ܕܝܲܝܼ ܠܸܙܢܵܝܵܐ ܘܠܹܐܟܼܵܠܵܐ ܕܸܒܼܚܹ̈ܐ ܕܨܵܢܲܡܹ̈ܐ. 21ܘܝܸܗ݇ܒܼܸܠܝܼ ܐܸܠܵܗ̇ ܙܲܒܼܢܵܐ ܕܬܲܘܸܒܵܐ ܗ݇ܘܵܐ؛ ܘܠܹܐ ܝَܠܵܗ̇ ܒܸܒܲܥܝܵܐ ܠܬܲܘܘܼܒܹܐ ܡ̣ܢ ܙܵܢܝܘܼܬܘܼܗ̇. 22ܗܵܐ؛ ܒܸܬ ܕܵܪܸܢܵܗ̇ ܒܫܘܝܼܬܵܐ؛ ܘܠܐܵܢܝܼ ܕܥܵܒܼܕܝܼ ܩܲܗܒܘܼܬܵܐ ܥܲܡܵܗ̇؛ ܒܐܘܼܠܨܵܢܵܐ ܓܘܼܪܵܐ؛ ܐܸܢ ܠܵܐ ܬܲܘܸܒܝܼ ܡ̣ܢ ܦܘܼܠܚܵܢܘܼ̈ܗ̇؛ 23ܘܠܒܢܘܼܢܘܼ̈ܗ̇ ܒܸܬ ܩܵܛܠܸܢ ܒܡܵܘܬܵܐ؛ ܘܒܸܬ ܝܲܕܥܝܼ ܟܠܵܝܗܝ ܥܹܕܵܬܹ̈ܐ ܕܐܵܢܵܐ ܝܘܸܢ ܬܲܦ̮ܬܸܫܵܢܵܐ ܕܟܘܼܠܝܵܬܹ̈ܐ ܘܠܸܒܵܘܵܬܹ̈ܐ. ܘܒܸܬ ܝܵܗ݇ܒܼܸܢܵܘܟܼܘܿܢ ܠܟܠ ܚܲܕَ ܐܲܝܟܼ ܦܘܼܠܚܵܢܵܘ̈ܟܼܘܿܢ. 24ܐܝܼܢܵܐ ܐܸܠܵܘܟܼܘܿܢ ܒܹܐܡܵܪܵܐ ܝܘܸܢ؛ ܘܠܐܵܢܝܼ ܐܚܹܪ̈݇ܢܹܐ ܕܓܵܘ ܬܹܐܘܿܛܝܼܪܵܐ؛ ܟܠܵܝܗܝ ܐܵܢܝܼ ܕܠܲܝܬ ܠܗ݇ܘܿܢ ܐܵܗܵܐ ܡܲܠܦܵܢܘܼܬܵܐ؛ ܘܐܵܢܝܼ ܕܠܵܐ ܝܕܸܥܠܘܿܢ ܫܘܼܠܹ̈ܐ ܥܵܡܘܿܩܹ̈ܐ ܕܣܵܛܵܢܵܐ؛ ܐܲܝܟܼ ܕܒܹܐܡܵܪܵܐ ܝܢܵܐ؛ ܝܘܼܩܪܵܐ ܐَܚܹܪَܢܵܐ ܠܹܐ ܕܵܪܸܢ ܥܲܠܵܘܟܼܘܿܢ. 25ܐܝܼܢܵܐ ܗ̇ܘ ܕܐܝܼܬ ܠܵܘܟܼܘܿܢ؛ ܕܒܼܘܿܩܘܿܢ ܗܲܠ ܕܐܵܬܸܢ ܐܵܢܵܐ. 26ܘܗ̇ܘ ܕܓܼܵܠܸܒ؛ ܘܗ̇ܘ ܕܢܵܛܸܪ ܗܲܠ ܚܲܪܬܵܐ ܠܦܘܼܠܚܵܢܹ̈ܐ ܕܝܼܝܼ؛ ܒܸܬ ܝܵܗ݇ܒܼܸܢ ܐܸܠܹܗ ܗܘܼܟܡܵܐ ܥܲܠ ܛܵܝܸܦܹ̈ܐ؛ 27ܘܒܸܬ ܡܲܪܥܹܐ ܠܗ݇ܘܿܢ ܒܚܘܼܛܪܵܐ ܕܦܪܸܙܠܵܐ؛ ܘܐܲܝܟܼ ܡܵܐܢܵܐ ܕܦܲܚܪܵܐ ܒܸܬ ܦܵܝܫܝܼ ܛܘܼܚܛܸܚܹܐ؛ ܐܲܝܟܼ ܕܐܘܼܦ ܐܵܢܵܐ ܩܘܼܒܸܠܝܼ ܡ̣ܢ ܒܵܒܝܼ. 28ܘܒܸܬ ܝܵܗ݇ܒܼܸܢ ܐܸܠܹܗ ܠܟܵܘܟܼܒܼܵܐ ܕܨܲܦܪܵܐ. 29ܗ̇ܘ ܕܐܝܼܬ ܠܹܗ ܢܵܬܝܵܬܹ̈ܐ؛ ܫܲܡܸܥ ܡܘܼܕܝܼ ܪܘܼܚܵܐ ܒܹܐܡܵܪܵܐ ܝܠܹܗ ܠܥܹܕܵܬܹ̈ܐ.