1ܘܠܡܲܠܲܐܟܼܵܐ ܕܥܹܕܬܵܐ ܕܓܵܘ ܣܲܪܕܝܼܣ؛ ܟܬܘܿܒܼ؛ ܐܲܢܹܐ ܒܹܐܡܵܪܵܐ ܝܠܹܗ ܗ̇ܘ ܕܐܝܼܬ ܠܹܗ ܫܲܒܼܲܥ ܪ̈ܘܼܚܹܐ ܕܐܲܠܵܗܵܐ؛ ܘܐܵܢܝܼ ܫܲܒܼܥܵܐ ܟܵܘܟܼܒܼܹ̈ܐ؛ ܒܝܼܕܲܥܝܵܐ ܝܘܸܢ ܠܦܘܼܠܚܵܢܘܼܟܼ؛ ܕܫܸܡܵܐ ܐܝܼܬ ܠܘܼܟܼ ܕܚܵܝܵܐ ܝܘܸܬ؛ ܘܡܝܼܬܵܐ ܝܘܸܬ. 2ܥܒܼܘܿܕ ܫܵܗܲܪܬܵܐ؛ ܘܢܛܘܿܪ ܠܐܲܢܹܐ ܡܸܢܕܝܵܢܹ̈ܐ ܐَܚܹܪ̈݇ܢܹܐ؛ ܐܵܢܝܼ ܕܗܵܙܸܪ ܝܼܗ݇ܘܵܘ ܠܸܡܝܵܬܵܐ؛ ܣܵܒܵܒ ܠܵܐ ܡܘܼܫَܟ̰ܸܚܠܝܼ ܠܦܘܼܠܚܵܢܘܼ̈ܟܼ ܕܬܘܼܡܸܡܹܐ ܩܵܕ݇ܡ ܐܲܠܵܗܵܐ ܕܝܼܝܼ. 3ܒܲܣ ܕܟܼܘܿܪ ܕܵܐܟܼܝܼ ܫܩܸܠܘܼܟܼ ܘܫܡܸܥܠܘܼܟܼܼ؛ ܘܢܛܘܿܪ ܘܬܲܘܸܒ. ܘܐܸܢ ܗܲܕܟܼܵܐ ܠܵܐ ܥܵܒܼܕܸܬ ܫܲܗܲܪܬܵܐ؛ ܒܸܬ ܐܵܬܸܢ ܥܲܠܘܼܟܼ ܐܲܝܟܼ ܓܹܢܵܒܼܵܐ؛ ܘܠܹܐ ܝܲܕܥܸܬ ܐܲܝܢܝܼ ܣܵܥܲܬ ܒܸܬ ܐܵܬܸܢ ܥܲܠܘܼܟܼ. 4ܐܸܠܵܐ ܐܝܼܬ ܠܘܼܟܼ ܚܲܕَܟ̰ܵܐ ܫܸܡܵܢܹ̈ܐ ܐܘܼܦ ܓܵܘ ܣܲܪܕܝܼܣ؛ ܐܵܢܝܼ ܕܠܵܐ ܛܘܼܡܐܸܢܘܿܢ ܠܠܒܼܘܼܫܵܝ̈؛ ܘܒܸܬ ܚܵܕܪܝܼ ܥܲܡܝܼ ܒܚܘܵܪܹ̈ܐ؛ ܣܵܒܵܒ ܕܚܫܝܼܚܹܐ ܝܢܵܐ. 5ܗ̇ܘ ܕܓܼܵܠܸܒ ܗܲܕܟܼܵܐ ܒܸܬ ܦܵܝܸܫ ܡܘܼܠܒܼܸܫܵܐ ܚܘܵܪܹ̈ܐ؛ ܘܠܹܐ ܓܵܪܕܸܢ ܫܸܡܹܗ ܡ̣ܢ ܕܗ̇ܘ ܟܬܵܒܼܵܐ ܕܚܲܝܹ̈ܐ؛ ܘܒܸܬ ܡܵܘܕܸܢ ܒܫܸܡܹܗ ܩܵܕ݇ܡ ܒܵܒܝܼ؛ ܘܩܵܕ݇ܡ ܡܲܠܲܐܟܼܘܼ̈ܗܝ. 6ܗ̇ܘ ܕܐܝܼܬ ܠܹܗ ܢܵܬܝܵܬܹ̈ܐ؛ ܫܲܡܸܥ ܡܘܼܕܝܼ ܪܘܼܚܵܐ ܒܹܐܡܵܪܵܐ ܝܠܹܗ ܠܥܹܕܵܬܹ̈ܐ. 7ܘܠܡܲܠܲܐܟܼܵܐ ܕܥܹܕܬܵܐ ܕܓܵܘ ܦܝܼܠܕܲܠܦܝܼܵܐ؛ ܟܬܘܿܒܼ؛ ܐܲܢܹܐ ܒܹܐܡܵܪܵܐ ܝܠܹܗ؛ ܗ̇ܘ ܩܲܕܝܼܫܵܐ؛ ܗ̇ܘ ܫܲܪܝܼܪܵܐ؛ ܗ̇ܘ ܕܐܝܼܬ ܠܹܗ ܩܕܝܼܠܵܐ ܕܕܵܘܝܼܕ؛ ܗ̇ܘ ܕܟܹܐ ܦܵܬܸܚ ܘܐ݇ܢܵܫܵܐ ܠܹܐ ܕܵܒܼܸܪ؛ ܘܟܹܐ ܕܵܒܼܸܪ ܘܐ݇ܢܵܫܵܐ ܠܹܐ ܦܵܬܸܚ؛ 8ܒܝܼܕܲܥܝܵܐ ܝܘܸܢ ܠܦܘܼܠܚܵܢܘܼ̈ܟܼ ܗܵܐ؛ ܝܸܗܒܼܸܠܝܼ ܩܵܕ݇ܡܘܼܟܼ ܬܲܪܥܵܐ ܦܬܝܼܚܵܐ؛ ܗ̇ܘ ܕܐ݇ܢܵܫܵܐ ܠܹܐ ܡܵܨܹܐ ܠܸܕܒܼܵܪܘܼܗܝ؛ ܕܚܲܕَܟ̰ܵܐ ܚܲܝܠܵܐ ܐܝܼܬ ܠܘܼܟܼܼ؛ ܘܢܛܸܪܘܼܟܼ ܠܗܹܡܸܙܡܵܢܝܼ؛ ܘܠܵܐ ܣܪܸܒܼܠܘܼܟܼ ܠܫܸܡܝܼ. 9ܗܵܐ؛ ܒܝܼܗ݇ܒܼܵܐ ܝܘܸܢ ܡ̣ܢ ܟܢܘܼܫܬܵܐ ܕܣܵܛܵܢܵܐ ܡܐܵܢܝܼ ܕܒܹܐܡܵܪܵܐ ܝܢܵܐ ܒܵܗ݇ܣ ܓܵܢܵܝܗܝ ܕܝܗ݇ܘܼܕܵܝܹ̈ܐ ܝܢܵܐ؛ ܘܠܹܐ ܝܢܵܐ؛ ܐܸܠܵܐ ܕܵܓܘܿܠܹܐ ܝܢܵܐ؛ ܗܵܐ؛ ܒܸܬ ܥܵܒܼܕܸܢܘܿܢ ܕܐܵܬܝܼ ܘܣܵܓܼܕܝܼ ܩܵܕ݇ܡ ܐܲܩܠܘܼ̈ܟܼ؛ ܘܝܲܕܥܝܼ ܕܐܵܢܵܐ ܩܲܡ ܡܲܚܸܒܸܢܘܼܟܼ. 10ܣܵܒܵܒ ܕܢܛܸܪܘܼܟܼ ܠܗܹܡܸܙܡܵܢ ܕܚܡܵܠܬܝܼ؛ ܐܘܼܦ ܐܵܢܵܐ ܒܸܬ ܢܵܛܪܸܢܘܼܟܼ ܡ̣ܢ ܣܵܥܲܬ ܕܓ̰ܘܼܪܵܒܵܐ ܕܝܼܠܹܗ ܗܕܝܼܪܵܐ ܠܹܐܬܵܝܵܐ ܥܲܠ ܟܠܵܗ̇ ܒܪܝܼܬܵܐ؛ ܠܓ̰ܵܪܘܿܒܹܐ ܠܐܵܢܝܼ ܕܒܸܥܡܵܪܵܐ ܝܢܵܐ ܥܲܠ ܐܲܪܥܵܐ. 11ܗܵܐ؛ ܒܹܐܬܵܝܵܐ ܝܘܸܢ ܓ̰ܲܠܕܹܐ. ܕܒܼܘܿܩ ܗ̇ܘ ܡܸܢܕܝܼ ܕܐܝܼܬ ܠܘܼܟܼܼ؛ ܕܐ݇ܢܵܫܵܐ ܠܵܐ ܫܵܩܸܠ ܬܵܐܓ̰ܘܼܟܼ. 12ܗ̇ܘ ܕܓܼܵܠܸܒ؛ ܒܸܬ ܥܵܒܼܕܸܢܹܗ ܣܛܘܼܢܵܐ ܒܗܲܝܟܠܵܐ ܕܐܲܠܵܗܝܼ؛ ܘܡܸܢَܕܪܸܫَ ܠܹܐ ܦܵܠܸܛ ܠܒܼܲܕܲܪ؛ ܘܒܸܬ ܟܵܬܒܼܸܢ ܥܲܠܘܼܗܝ ܫܸܡܵܐ ܕܐܲܠܵܗܝܼ؛ ܘܫܸܡܵܐ ܕܡܕܝܼܢ݇ܬܵܐ ܕܐܲܠܵܗܝܼ؛ ܐܘܿܪܸܫܠܸܡ ܚܲܕܬܵܐ؛ ܗ̇ܝ ܕܒܸܨܠܵܝܵܐ ܝَܠܵܗ̇ ܡ̣ܢ ܫܡܲܝܵܐ ܡ̣ܢ ܐܲܠܵܗܝܼ؛ ܘܠܫܸܡܵܐ ܕܝܼܝܼ ܗ̇ܘ ܚܵܕ݇ܬܵܐ. 13ܗ̇ܘ ܕܐܝܼܬ ܠܹܗ ܢܵܬܝܵܬܹ̈ܐ؛ ܫܲܡܸܥ ܡܘܼܕܝܼ ܪܘܼܚܵܐ ܒܹܐܡܵܪܵܐ ܝܠܹܗ ܠܥܹܕܵܬܹ̈ܐ. 14ܘܠܡܲܠܲܐܟܼܵܐ ܕܥܹܕܬܵܐ ܕܓܵܘ ܠܵܕܝܼܩܝܼܵܐ ܟܬܘܿܒܼ؛ ܐܲܢܹܐ ܒܹܐܡܵܪܵܐ ܝܠܹܗ ܗ̇ܘ ܐܵܡܹܝܢ؛ ܗ̇ܘ ܣܵܗܕܵܐ ܡܗܘܼܡܢܵܐ ܘܫܲܪܝܼܪܵܐ؛ ܗ̇ܘ ܫܘܼܪܵܝܵܐ ܕܒܪܝܼܬܵܐ ܕܐܲܠܵܗܵܐ؛ 15ܒܝܼܕܲܥܝܵܐ ܝܘܸܢ ܠܦܘܼܠܚܵܢܘܼ̈ܟܼ؛ ܕܠܵܐ ܚܲܝܡܵܐ ܝܘܸܬ ܘܠܵܐ ܩܲܝܪܵܐ. ܛܘܼܒܼܵܐ ܕܗܵܘܸܬ ܗ݇ܘܵܐ ܩܲܝܪܵܐ ܝܲܢ ܚܲܝܡܵܐ. 16ܒܲܣ ܣܵܒܵܒ ܕܦܲܫܘܼܥܵܐ ܝܘܸܬ؛ ܘܠܵܐ ܚܲܝܡܵܐ ܘܠܵܐ ܩܲܝܪܵܐ؛ ܒܸܬ ܓܵܣܸܢܘܼܟܼ ܡ̣ܢ ܦܘܼܡܝܼ. 17ܣܵܒܵܒ ܕܒܹܐܡܵܪܵܐ ܝܘܸܬ؛ ܕܵܘܠܲܬܡܲܢܕ ܝܼܘܸܢ ܘܙܝܼܕܵܐ ܝܘܸܢ؛ ܘܥܲܠ ܡܸܢܕܝܼ ܣܘܼܢܩܵܢܵܐ ܠܲܝܬ ܠܝܼ؛ ܘܠܹܐ ܝܘܸܬ ܒܝܼܕܲܥܝܵܐ ܕܐܲܢ݇ܬ ܝܼܘܸܬ ܙܲܒܘܼܢ؛ ܘܫܲܩܝܼ؛ ܘܡܸܣܟܹܢܵܐ؛ ܘܣܸܡܝܵܐ؛ ܘܫܘܼܠܚܵܝܵܐ؛ 18ܒܸܥܒܼܵܕܵܐ ܝܘܸܢ ܪܵܐܝܝܼ ܐܸܠܘܼܟܼ ܠܸܙܒܼܵܢܵܐ ܡܸܢܝܼ ܕܲܗܒܼܵܐ ܕܝܼܠܹܗ ܨܘܼܪܸܦܵܐ ܡ̣ܢ ܢܘܼܪܵܐ؛ ܕܗܵܘܸܬ ܕܵܘܠܲܬܡܲܢܕ؛ ܘܠܒܼܘܼܫܹ̈ܐ ܚܘܵܪܹ̈ܐ؛ ܕܦܵܝܫܸܬ ܡܘܼܠܒܼܸܫܵܐ؛ ܘܠܵܐ ܦܵܝܫܵܐ ܚܙܝܼܬܵܐ ܢܚܸܦܬܵܐ ܕܫܘܼܠܚܵܝܘܼܬܘܼܟܼ؛ ܘܡܲܠܗܵܡ ܠܸܫܝܵܦܵܐ ܥܲܠ ܥܲܝܢܘܼܟܼ؛ ܕܗܵܘܸܬ ܒܸܚܙܵܝܵܐ. 19ܐܵܢܵܐ ܠܟܠܵܝܗܝ ܕܐܵܢܝܼ ܕܡܲܚܸܒܸܢ ܟܹܐ ܡܲܢܟܼܸܣܸܢ؛ ܘܟܹܐ ܬܲܥܠܡܸܢ. ܒܲܣ ܐܘܘܿܪ ܒܩܲܝܪܲܬ؛ ܘܬܲܘܸܒ. 20ܗܵܐ؛ ܒܸܟܠܵܝܵܐ ܝܘܸܢ ܩܵܕ݇ܡ ܬܲܪܥܵܐ؛ ܘܬܲܩܬܘܼܩܹܐ ܝܘܸܢ. ܐܸܢ ܐ݇ܢܵܫܵܐ ܫܲܡܸܥ ܠܩܵܠܝܼ؛ ܘܦܵܬܸܚ ܬܲܪܥܵܐ؛ ܒܸܬ ܐܵܘܪܸܢ ܠܟܸܣܠܹܗ؛ ܘܒܸܬ ܐܵܟܼܠܸܢ ܚܵܪܲܡܫܵܐ ܥܲܡܹܗ؛ ܘܗ̇ܘ ܥܲܡܝܼ. 21ܗ̇ܘ ܕܓܼܵܠܸܒ݁ ܒܸܬ ܝܵܗ݇ܒܼܸܢܹܗ ܠܸܬܝܵܒܼܵܐ ܥܲܡܝܼ ܥܲܠ ܬܪܘܿܢܘܿܣ؛ ܕܵܐܟܼܝܼ ܕܐܘܼܦ ܐܵܢܵܐ ܓܼܠܸܒܠܝܼ؛ ܘܝܬܸܒܼܠܝܼ ܥܲܡ ܒܵܒܝܼ ܥܲܠ ܬܪܘܿܢܘܿܣܹܗ. 22ܗ̇ܘ ܕܐܝܼܬ ܠܹܗ ܢܵܬܝܵܬܹ̈ܐ؛ ܫܲܡܸܥ ܡܘܼܕܝܼ ܪܘܼܚܵܐ ܒܹܐܡܵܪܵܐ ܝܠܹܗ ܠܥܹܕܵܬܹ̈ܐ.