1ܘܚܙܹܠܝܼ ܡܲܠܲܐܟܼܵܐ ܕܒܸܨܠܵܝܵܐ ܡ̣ܢ ܫܡܲܝܵܐ؛ ܕܐܝܼܬ ܗ݇ܘܵܐ ܠܹܗ ܩܕܝܼܠܵܐ ܕܬܗܘܿܡܵܐ؛ ܘܫܹܫܸܠܬܵܐ ܓܘܼܪܬܵܐ ܒܐܝܼܕܹܗ. 2ܘܕܒܼܸܩܠܹܐ ܠܬܵܢܝܼܢܵܐ؛ ܗ̇ܘ ܚܘܼܘܹܐ ܥܲܬܝܼܩܵܐ؛ ܗ̇ܘ ܕܝܼܠܹܗ ܐܵܟܼܹܠܩܲܪܨܵܐ ܘܣܵܛܵܢܵܐ؛ ܘܐܣܸܪܹܗ ܐܲܠܦܵܐ ܫܸܢܹ̈ܐ؛ 3ܘܕܪܹܠܹܗ ܒܬܗܘܿܡܵܐ؛ ܘܕܒܼܸܩܠܹܐ ܘܡܚܹܠܹܐ ܡܵܘܗܪ ܥܲܠܘܼܗܝ؛ ܕܠܵܐ ܡܲܚܠܸܛ ܡܸܢَܕܪܸܫَ ܠܛܵܝܸܦܹ̈ܐ ܗܲܠ ܕܬܲܡܸܡܝܼ ܐܲܢܹܐ ܐܲܠܦܵܐ ܫܸܢܹ̈ܐ. ܐܝܼܢܵܐ ܒܵܬ݇ܪ ܐܲܢܹܐ ܠܵܙܸܡ ܝܼܠܵܗ̇ ܕܦܵܝܸܫ ܫܸܪܝܵܐ ܚܲܕَܟ̰ܵܐ ܙܲܒܼܢܵܐ. 4ܘܚܙܹܠܝܼ ܬܪ̈ܘܿܢܘܿܣܹܐ ܘܝܬܸܒܼܠܘܿܢ ܥܲܠܵܝܗܝ؛ ܘܕܝܼܘܵܢ ܦܸܫܠܵܗ̇ ܝܸܗܒܼܸܠܬܵܐ ܐܸܠܵܝܗܝ؛ ܘܠܓܵܢܵܬܹ̈ܐ ܕܦܸܫܠܗَܘܿܢ ܦܪܝܼܡܹܐ ܣܵܒܵܒ ܕܣܵܗܕܘܼܬܵܐ ܕܝܼܫܘܿܥ؛ ܘܣܵܒܵܒ ܕܗܹܡܸܙܡܵܢ ܕܐܲܠܵܗܵܐ؛ ܘܐܵܢܝܼ ܐ݇ܢܵܫܹ̈ܐ ܕܠܵܐ ܣܓܼܸܕܠܘܿܢ ܠܕܵܒܵܐ؛ ܘܠܵܐ ܠܨܲܠܡܹܗ؛ ܘܠܵܐ ܩܘܼܒܸܠܘܿܢ ܠܪܘܼܫܡܹܗ ܥܲܠ ܩܸܨܵܝ ܘܥܲܠ ܐܝܼܕܵܝ؛ ܘܚܹܝܠܘܿܢ ܘܥܒܼܸܕܠܘܿܢ ܡܲܠܟܘܼܬܵܐ ܥܲܡ ܡܫܝܼܚܵܐ ܐܲܠܦܵܐ ܫܸܢܹ̈ܐ. 5ܐܝܼܢܵܐ ܐܚܹܪ̈݇ܢܹܐ ܕܡܝܼܬܹ̈ܐ ܠܵܐ ܚܹܝܠܘܿܢ ܡܸܢَܕܪܸܫَ ܗܲܠ ܕܬܸܡܠܘܿܢ ܐܲܠܦܵܐ ܫܸܢܹ̈ܐ. ܐܵܗܵܐ ܝَܠܵܗ̇ ܩܝܵܡܬܵܐ ܗ̇ܝ ܩܵܕ݇ܡܵܝܬܵܐ. 6ܛܘܼܒܼܵܢܵܐ ܝܠܹܗ ܘܩܲܕܝܼܫܵܐ ܗ̇ܘ ܕܐܝܼܬ ܠܹܗ ܣܵܡܵܐ ܒܩܝܵܡܬܵܐ ܗ̇ܝ ܩܵܕ݇ܡܵܝܬܵܐ. ܥܲܠ ܕܐܵܢܝܼ ܡܵܘܬܵܐ ܕܬܪܹܝ ܠܲܝܬ ܠܹܗ ܗܘܼܟܡܵܐ؛ ܐܸܠܵܐ ܒܸܬ ܗܵܘܝܼ ܟܵܗܢܹ̈ܐ ܕܐܲܠܵܗܵܐ ܘܕܡܫܝܼܚܵܐ؛ ܘܒܸܬ ܥܵܒܼܕܝܼ ܡܲܠܟܘܼܬܵܐ ܥܲܡܹܗ ܐܲܢܹܐ ܐܲܠܦܵܐ ܫܸܢܹ̈ܐ. 7ܘܐܝܼܡܲܢ ܕܬܲܡܸܡܝܼ ܐܲܢܹܐ ܐܲܠܦܵܐ ܫܸܢܹ̈ܐ؛ ܒܸܬ ܦܵܝܸܫ ܫܸܪܝܵܐ ܗ̇ܘ ܣܵܛܵܢܵܐ ܡ̣ܢ ܒܹܝܬ ܢܛܘܼܪܬܹܗ. 8ܘܒܸܬ ܦܵܠܸܛ ܠܡܲܚܠܘܼܛܹܐ ܠܛܵܝܸܦܹ̈ܐ ܕܒܲܐܪܒܲܥ ܩܘܼܢܓ̰ܝܼܵܬܹ̈ܐ ܕܐܲܪܥܵܐ؛ ܠܓܘܼܓܼ ܘܠܡܵܓܼܘܿܓܼ؛ ܠܓ̰ܲܡܘܼܥܝܵܝ ܠܦܠܵܫܵܐ؛ ܐܲܢܹܐ ܕܡܸܢܝܵܢܵܝܗܝ ܐܲܝܟܼ ܣܹܠܵܐ ܕܝܵܡܵܐ. 9ܘܐَܣܸܩܠܘܿܢ ܥܲܠ ܦܸܬܝܘܼܬܵܐ ܕܐܲܪܥܵܐ؛ ܘܚܕܝܼܪܵܠܘܿܢ ܠܐܘܼܪܕܘܼܝ ܕܩܲܕܝܼܫܹ̈ܐ؛ ܘܠܡܕܝܼܢ݇ܬܵܐ ܡܘܼܚܸܒܬܵܐ؛ ܘܨܠܹܠܹܗ ܢܘܼܪܵܐ ܡ̣ܢ ܐܲܠܵܗܵܐ ܡ̣ܢ ܫܡܲܝܵܐ ܘܐَܟܼܝܼܠܵܝܠܹܐ. 10ܘܐܵܟܼܹܠܩܲܪܨܵܐ ܕܡܘܼܚܠܸܛܵܝܠܹܐ ܦܸܫܠܹܗ ܕܸܪܝܵܐ ܓܵܘ ܝܵܡܵܐ ܕܢܘܼܪܵܐ ܘܕܟܸܒܪܝܼܬ؛ ܐܲܝܟܵܐ ܕܝܼܗ݇ܘܵܘ ܐܘܼܦ ܕܵܒܵܐ ܘܢܒܼܝܼܵܐ ܕܵܓܵܠܵܐ؛ ܘܒܸܬ ܦܵܝܫܝܼ ܓ̰ܘܼܢܓ̰ܸܪܹܐ ܐܝܼܡܵܡܵܐ ܘܠܲܝܠܹܐ؛ ܠܥܵܠܡܹ̈ܐ ܕܥܵܠܡܹ̈ܐ. 11ܘܚܙܹܠܝܼ ܬܪܘܿܢܘܿܣ ܓܘܼܪܬܵܐ ܚܘܵܪܬܵܐ؛ ܘܠܗ̇ܘ ܕܝܼܗ݇ܘܵܐ ܝܬܝܼܒܼܵܐ ܥܲܠܘܼܗ̇؛ ܗ̇ܘ ܕܡ̣ܢ ܦܵܬܹܗ ܥܪܸܩܠܵܐ ܐܲܪܥܵܐ ܘܫܡܲܝܵܐ؛ ܘܕܘܼܟܬܵܐ ܠܵܐ ܡܫَܟ̰ܸܚܠܵܐ ܐܸܠܵܝܗܝ. 12ܘܚܙܹܠܝܼ ܠܡܝܼܬܹ̈ܐ؛ ܠܓܘܼܪܹ̈ܐ ܘܠܙܥܘܿܪܹ̈ܐ؛ ܒܸܟܠܵܝܵܐ ܩܵܕ݇ܡ ܐܲܠܵܗܵܐ؛ ܘܟܬܵܒܼܹ̈ܐ ܦܸܫܠܗَܘܿܢ ܦܬܝܼܚܹܐ. ܘܟܬܵܒܼܵܐ ܐَܚܹܪَܢܵܐ ܦܸܫܠܹܗ ܦܬܝܼܚܵܐ؛ ܗܚܘ ܕܝܼܠܹܗ ܕܚܲܝܹ̈ܐ؛ ܘܦܸܫܠܗَܘܿܢ ܕܝܼܢܹܐ ܡܝܼܬܹ̈ܐ ܡ̣ܢ ܕܐܵܢܝܼ ܕܝܼܗ݇ܘܵܘ ܟܬܝܼܒܼܹܐ ܓܵܘ ܟܬܵܒܼܹ̈ܐ؛ ܐܲܝܟܼ ܦܘܼܠܚܵܢܵܝ̈ܗܝ. 13ܘܝܸܗ݇ܒܼܸܠܵܐ ܝܵܡܵܐ ܡܝܼܬܹ̈ܐ ܐܵܢܝܼ ܕܓܵܘܵܗ̇؛ ܘܡܵܘܬܵܐ ܘܫܝܘܿܠ ܝܸܗܒܼܸܠܘܿܢ ܡܝܼܬܹ̈ܐ ܐܵܢܝܼ ܕܓܵܘܵܝ؛ ܘܦܸܫܠܗَܘܿܢ ܕܝܼܢܹܐ ܟܠ ܚܲܕَ ܐܲܝܟܼ ܦܘܼܠܚܵܢܵܝ̈ܗܝ. 14ܘܡܵܘܬܵܐ ܘܫܝܘܿܠ ܦܸܫܠܗَܘܿܢ ܕܸܪܝܹܐ ܓܵܘ ܕܗ̇ܝ ܝܵܡܵܐ ܕܢܘܼܪܵܐ. ܐܵܗܵܐ ܝܠܹܗ ܡܵܘܬܵܐ ܕܬܪܹܝ؛ ܗ̇ܝ ܝܵܡܵܐ ܕܢܘܼܪܵܐ. 15ܘܐܸܢ ܐ݇ܢܵܫܵܐ ܠܵܐ ܦܸܫܠܹܗ ܡܫَܟ̰ܝܼܚܵܐ ܟܬܝܼܒܼܵܐ ܓܵܘ ܟܬܵܒܼܵܐ ܕܚܲܝܹ̈ܐ؛ ܦܸܫܠܹܗ ܕܸܪܝܵܐ ܓܵܘ ܕܗ̇ܝ ܝܵܡܵܐ ܕܢܘܼܪܵܐ.