1ܘܚܙܹܠܝܼ ܫܡܲܝܵܐ ܚܵܕ݇ܬܹ̈ܐ ܘܐܲܪܥܵܐ ܚܲܕ݇ܬܵܐ؛ ܣܵܒܵܒ ܗ̇ܝ ܫܡܲܝܵܐ ܩܵܕ݇ܡܵܝܬܵܐ ܘܐܲܪܥܵܐ ܩܵܕ݇ܡܵܝܬܵܐ ܐܙܸܠܘܿܢ؛ ܘܝܵܡܵܐ ܠܲܝܬ ܗ݇ܘܵܐ ܡܸܢَܕܪܸܫَ. 2ܘܠܗ̇ܝ ܡܕܝܼܢ݇ܬܵܐ ܩܲܕܝܼܫܬܵܐ؛ ܐܘܿܪܸܫܠܸܡ ܚܲܕܬܵܐ ܚܙܹܠܝܼ ܟܲܕ ܒܸܨܠܵܝܵܐ ܡ̣ܢ ܫܡܲܝܵܐ ܡ̣ܢ ܐܲܠܵܗܵܐ؛ ܗܘܼܕܸܪܬܵܐ ܐܲܝܟܼ ܟܵܠܬܵܐ ܣܘܼܩܸܠܬܵܐ ܠܓܲܒܼܪܘܼܗ̇. 3ܘܫܡܸܥܠܝܼ ܩܵܠܵܐ ܓܘܼܪܵܐ ܡ̣ܢ ܫܡܲܝܵܐ ܕܒܹܐܡܵܪܵܐ؛ ܗܵܐ؛ ܡܲܫܟܢܵܐ ܕܐܲܠܗܵܐ ܥܲܡ ܒܢܲܝ̈ܢܵܫܵܐ؛ ܘܒܸܬ ܫܵܪܹܐ ܥܲܡܵܝܗܝ؛ ܘܐܲܢܹܐ ܒܸܬ ܗܵܘܝܼ ܛܵܝܸܦܵܐ ܕܝܼܹܗ؛ ܘܐܲܠܵܗܵܐ ܒܓܵܢܹܗ ܥܲܡܵܝܗܝ ܒܸܬ ܗܵܘܹܐ ܠܐܲܠܵܗܵܝ؛ 4ܘܒܸܬ ܡܵܫܹܐ ܟܠ ܕܸܡܥ̱ܬܵܐ ܡ̣ܢ ܥܲܝܢܵܝ̈ܗܝ؛ ܘܡܵܘܬܵܐ ܠܹܐ ܗܵܘܹܐ ܡܸܢَܕܪܸܫَ؛ ܘܠܵܐ ܬܵܙܝܼ؛ ܘܠܵܐ ܡܲܩܘܲܚܬܵܐ؛ ܘܟܠ ܕܲܪܕ ܠܹܐ ܗܵܘܹܐ ܡܸܢَܕܪܸܫَ؛ ܣܵܒܵܒ ܕܫܘܼܠܹ̈ܐ ܩܵܕ݇ܡܵܝܹ̈ܐ ܥܒܸܪܘܿܢ. 5ܘܐَܡܝܼܪܹܗ ܗ̇ܘ ܕܝܼܗ݇ܘܵܐ ܝܬܝܼܒܼܵܐ ܥܲܠ ܬܪܘܿܢܘܿܣ؛ ܗܵܐ؛ ܠܟܠܵܝܗܝ ܒܸܥܒܼܵܕܵܐ ܝܘܸܢ ܚܵܕ݇ܬܹ̈ܐ. ܘܐَܡܝܼܪܹܗ؛ ܟܬܘܿܒܼ؛ ܣܵܒܵܒ ܐܲܢܹܐ ܗܹܡܸܙܡܵܢܹ̈ܐ ܡܗܘܼܡܢܹ̈ܐ ܘܫܲܪܝܼܪܹ̈ܐ ܝܢܵܐ. 6ܘܐَܡܝܼܪܹܗ ܐܸܠܝܼ؛ ܗ݇ܘܹܠܘܿܢ. ܐܵܢܵܐ ܝܘܸܢ ܐܵܠܲܦ ܘܬܵܘ؛ ܫܘܼܪܵܝܵܐ ܘܫܘܼܠܵܡܵܐ. ܠܗ̇ܘ ܕܝܼܠܹܗ ܨܸܗ݇ܝܵܐ ܐܵܢܵܐ ܒܸܬ ܝܵܗ݇ܒܼܸܢ ܡ̣ܢ ܥܲܝܢܵܐ ܕܡ̈ܝܼܵܐ ܚܵܝܹ̈ܐ ܚܘܼܪܵܝܝܼ. 7ܗ̇ܘ ܕܓܼܵܠܸܒ ܒܸܬ ܝܵܪܸܬ ܐܲܢܹܐ؛ ܘܒܸܬ ܗܵܘܸܢ ܐܸܠܹܗ ܐܲܠܵܗܵܐ؛ ܘܗ̇ܘ ܒܸܬ ܗܵܘܹܐ ܒܪܘܼܢܵܐ ܕܝܼܝܼ. 8ܐܝܼܢܵܐ ܠܙܵܕܘܿܥܘܹ̈ܐ؛ ܘܠܵܐ ܡܗܘܼܡܢܹ̈ܐ؛ ܘܟ̰ܘܼܦܠܸܢܹ̈ܐ؛ ܘܩܵܛܘܿܠܹ̈ܐ؛ ܘܙܲܢܵܝܹ̈ܐ؛ ܘܚܲܪ̈ܵܫܹܐ؛ ܘܣܵܓܼܕܵܢܹ̈ܐ ܕܨܵܢܲܡܹ̈ܐ؛ ܘܟܠܵܝܗܝ ܕܵܓܵܠܹ̈ܐ؛ ܣܵܡܵܝ (ܒܸܬ ܗܵܘܹܐ) ܓܵܘ ܕܗ̇ܝ ܝܵܡܵܐ ܕܝܼܠܵܗ̇ ܒܸܩܝܵܕܵܐ ܒܢܘܼܪܵܐ ܘܟܸܒܪܝܼܬ؛ ܗ̇ܝ ܕܝܼܠܵܗ̇ ܡܵܘܬܵܐ ܕܬܪܹܝ. 9ܘܐَܬܹܐܠܹܗ ܠܟܸܣܠܝܼ ܚܲܕَ ܡ̣ܢ ܕܐܲܢܹܐ ܫܲܒܼܥܵܐ ܡܲܠܲܐܟܼܹ̈ܐ ܕܐܝܼܬ ܠܗ݇ܘܿܢ ܐܲܢܹܐ ܫܲܒܼܥܵܐ ܦܝܼܵܠܲܐܣ̈؛ ܕܝܼܢܵܐ ܡܸܠܝܹܐ ܡܐܵܢܝܼ ܫܲܒܼܲܥ ܡܲܚܘܵܬܹ̈ܐ ܐَܚܵܪ̈ܵܝܹܐ؛ ܘܗܘܼܡܙܸܡܠܹܗ ܥܲܡܝܼ ܟܲܕ ܒܹܐܡܵܪܵܐ؛ ܬܵܐ؛ ܒܸܬ ܡܲܚܙܸܢ ܐܸܠܘܼܟܼ ܠܟܵܠܬܵܐ ܒܲܟܼܬܹܗ ܕܦܹܪܵܐ. 10ܘܠܘܼܒܠܸܢܹܐ ܒܪܘܼܚܵܐ ܥܲܠ ܛܘܼܪܵܐ ܓܘܼܪܵܐ ܘܪܵܡܵܐ؛ ܘܡܘܼܚܙܹܐ ܠܹܗ ܐܸܠܝܼ ܠܡܕܝܼܢ݇ܬܵܐ ܩܲܕܝܼܫܬܵܐ ܐܘܿܪܸܫܠܸܡ؛ ܒܸܨܠܵܝܵܐ ܡ̣ܢ ܫܡܲܝܵܐ ܡ̣ܢ ܐܲܠܵܗܵܐ؛ 11ܟܲܕ ܐܝܼܬ ܠܵܗ̇ ܬܸܫܒܘܿܚܬܵܐ ܕܐܲܠܵܗܵܐ؛ ܘܒܲܗܪܘܼܗ̇ ܟܹܐ ܕܵܡܹܐ ܠܟܹܐܦܵܐ ܪܵܒܵܐ ܛܝܼܡܵܢܵܐ؛ ܐܲܝܟܼ ܟܹܐܦܵܐ ܕܐܝܼܵܣܦܘܿܢ ܒܸܕܡܵܝܵܐ ܠܩܪܸܣܛܸܠܘܿܣ؛ 12ܕܐܝܼܬ ܠܵܗ̇ ܫܘܼܪܵܐ ܓܘܼܪܵܐ ܘܪܵܡܵܐ ܕܐܝܼܬ ܠܹܗ ܬܪܸܥܣܲܪ ܕܲܪ̈ܘܵܙܹܐ؛ ܘܒܕܲܪ̈ܘܵܙܹܐ ܬܪܸܥܣܲܪ ܡܲܠܲܐܟܼܹ̈ܐ؛ ܘܫܸܡܵܢܹ̈ܐ ܕܟܬܝܼܒܼܹܐ ܥܲܠܵܝܗܝ؛ ܐܲܢܹܐ ܕܝܼܢܵܐ ܫܸܡܵܢܹ̈ܐ ܕܬܪܸܥܣܲܪ ܐܘܼ̈ܓ̰ܵܓܹܐ ܕܒܢܲܝ̈ ܝܼܣܪܵܝܹܠ. 13ܡ̣ܢ ܡܲܕܢܚܵܐ ܬܠܵܬ݇ܐ ܕܲܪ̈ܙܘܵܙܹܐ؛ ܘܡ̣ܢ ܓܲܪܒܝܵܐ ܬܠܵܬ݇ܐ ܕܲܪ̈ܘܵܙܹܐ؛ ܘܡ̣ܢ ܬܲܝܡܢܵܐ ܬܠܵܬ݇ܐ ܕܲܪ̈ܘܵܙܹܐ؛ ܘܡ̣ܢ ܡܲܥ̱ܪܒܼܵܐ ܬܠܵܬ݇ܐ ܕܲܪ̈ܘܵܙܹܐ. 14ܘܠܫܘܼܪܵܐ ܕܡܕܝܼܢ݇ܬܵܐ؛ ܐܝܼܬ ܠܹܗ ܬܪܸܥܣܲܪ ܒܸܢܝܲܬܹ̈ܐ؛ ܘܥܲܠܵܝܗܝ؛ ܫܸܡܵܢܹ̈ܐ ܕܬܪܸܥܣܲܪ ܫܠܝܼܚܹ̈ܐ ܕܦܹܪܵܐ. 15ܘܗ̇ܘ ܕܗܲܡܙܘܼܡܹܐ ܗ݇ܘܵܐ ܥܲܡܝܼ؛ ܐܝܼܬ ܗ݇ܘܵܐ ܠܹܗ ܙܹܠܵܐ ܕܕܲܗܒܼܵܐ؛ ܕܡܵܫܸܚ ܗ݇ܘܵܐ ܠܡܕܝܼܢ݇ܬܵܐ ܘܠܕܲܪ̈ܘܵܙܘܼܗ̇ ܘܠܫܘܼܪܘܼܗ̇. 16ܘܡܕܝܼܢ݇ܬܵܐ ܟ̰ܗܵܪܓܘܼܫܵܐ ܡܘܼܬܸܒܼܬܵܐ ܗ݇ܘܵܐ؛ ܘܝܘܼܪܟܼܘܼܗ̇ ܟܡܵܐ ܕܐܘܼܦ ܦܸܬܘܘܼܗ̇. ܘܡܫܸܚܠܹܐ ܠܡܕܝܼܢ݇ܬܵܐ ܒܸܙܠܵܐ؛ ܬܪܸܥܣܲܪ ܐܲܠܦܹ̈ܐ ܐܸܣܛ̈ܕܵܘܵܬܵܐ؛ ܝܘܼܪܟܼܘܼܬܵܐ ܘܦܸܬܝܘܼܬܵܐ ܘܪܵܡܘܼܬܵܐ ܕܝܼܵܗ̇ ܒܵܪܵܒܵܪ ܝܼܢܵܐ. 17ܘܡܫܸܚܠܹܐ ܠܫܘܼܪܘܼܗ̇ ܡܵܐܐ ܘܐܲܪܒܥܝܼ ܘܐܲܪܒܲܥ ܡܫܘܼܚ̈ܝܵܬܵܐ ܕܝܲܡܝܼܢܹ̈ܐ ܕܒܲܪܢܵܫܵܐ؛ ܗ̇ܝ ܕܝܼܠܵܗ̇؛ ܕܡܲܠܲܐܟܼܵܐ. 18ܘܒܸܢܝܵܢܵܐ ܕܫܘܼܪܘܼܗ̇ ܐܝܼܵܣܦܝܼܣ ܝܼܗ݇ܘܵܐ. ܘܡܕܝܼܢ݇ܬܵܐ ܕܕܲܗܒܼܵܐ ܨܸܦܝܵܐ ܝَܠܵܗ̇؛ ܕܟܹܐ ܕܵܡܹܐ ܠܫܘܼܫܵܐ ܨܸܦܝܵܐ. 19ܘܒܸܢܝܲܬܹ̈ܐ ܕܫܘܼܪܵܐ ܕܡܕܝܼܢ݇ܬܵܐ ܒܟܠ ܟܹܐܦܵܐ ܛܝܼܡܵܢܵܐ ܣܘܼܩܠܹܐ ܝܢܵܐ. ܒܸܢܝܲܬ ܗ̇ܝ ܩܵܕ݇ܡܵܝܬܵܐ ܐܝܼܵܣܦܝܼܣ؛ ܗ̇ܝ ܕܬܲܪ̈ܬܹܝ ܦܝܼܪܘܼܙܵܐ؛ ܗ̇ܝ ܕܬܠܵܬ݇ ܟܵܠܝܼܕܘܿܢ؛ ܗ̇ܝ ܕܐܲܪܒܲܥ ܙܸܡܪܘܼܕ؛ 20ܗ̇ܝ ܕܚܲܡܸܫ ܠܵܥܠ؛ ܗ̇ܝ ܕܐܸܫܸܬ ܣܵܪܝܼܕܘܿܢ؛ ܗ̇ܝ ܕܫܲܒܼܲܥ ܥܲܩܝܼܩ؛ ܗ̇ܝ ܕܬܡܵܢܝܵܐ ܒܝܼܪܸܠ؛ ܗ̇ܝ ܕܐܸܬܫܲܥ ܛܘܼܦܵܐܕܝܼܘܿܢ؛ ܗ̇ܝ ܕܥܸܣܲܪ ܟܪܸܣܘܿܦܘܿܣܝܼܘܿܣ؛ ܗ̇ܝ ܕܚܲܕܸܥܣܲܪ ܗܘܼܝܵܐܩܝܼܢܬܘܿܣ؛ ܗ̇ܝ ܕܬܪܸܥܣܲܪ ܡܲܪܓ̰ܵܢ. 21ܘܐܲܢܹܐ ܬܪܸܥܣܲܪ ܕܲܪ̈ܘܵܙܹܐ ܬܪܸܥܣܲܪ ܡܲܪ̈ܓܵܢܝܵܬܹܐ ܝܢܵܐ؛ ܚܕܵܐ ܚܕܵܐ ܟܠ ܚܲܕَ ܡ̣ܢ ܕܲܪ̈ܘܵܙܹܐ ܡ̣ܢ ܚܕܵܐ ܡܲܪܓܵܢܝܼܬܵܐ ܗ݇ܘܵܐ. ܘܥܵܠܘܿܠܵܐ ܦܸܬܝܵܐ ܕܡܕܝܼܢ݇ܬܵܐ ܕܲܗܒܼܵܐ ܨܸܦܝܵܐ؛ ܐܲܝܟܼ ܫܘܼܫܵܐ ܫܲܦ̮ܩܵܢܵܐ. 22ܘܗܲܝܟܠܵܐ ܠܵܐ ܚܙܹܠܝܼ ܓܵܘܵܗ̇؛ ܣܵܒܵܒ ܡܵܪܝܵܐ ܐܲܠܵܗܵܐ ܐܲܚܝܼܕ ܟܠ ܗܲܝܟܠܘܼܗ̇ ܝܠܹܗ؛ ܘܗ̇ܘ ܦܹܪܵܐ. 23ܘܗ̇ܝ ܡܕܝܼܢ݇ܬܵܐ ܠܝܼܬ ܠܵܗ̇ ܣܘܼܢܩܵܢܵܐ ܕܫܸܡܫܵܐ؛ ܘܠܵܐ ܕܣܲܗܪܵܐ؛ ܕܝܵܗ݇ܒܼܝܼ ܒܲܗܪܵܐ ܓܵܘܵܗ̇؛ ܣܵܒܵܒ ܬܸܫܒܘܿܚܬܵܐ ܕܐܲܠܵܗܵܐ ܒܘܼܗ݇ܪܸܢܵܐ ܐܸܠܘܼܗ̇؛ ܘܫܪܵܝܘܼܗ̇ ܦܹܪܵܐ ܝܠܹܗ. 24ܘܒܸܬ ܚܵܕܪܝܼ ܛܵܝܸܦܹ̈ܐ ܒܝܼܸܕ ܒܲܗܪܘܼܗ̇؛ ܘܡܲܠܟܹ̈ܐ ܕܐܲܪܥܵܐ ܟܹܐ ܡܲܝܬ݇ܝܝܼ ܚܸܩܪܵܝ ܓܵܘܵܗ̇. 25ܘܕܲܪ̈ܘܵܙܘܼܗ̇ ܠܹܐ ܦܵܝܫܝܼ ܕܒܼܝܼܪܹܐ ܒܐܝܼܡܵܡܵܐ؛ ܣܵܒܵܒ ܕܠܲܝܠܹܐ ܠܹܐ ܗܵܘܹܐ ܬܵܡܵܐ. 26ܘܒܸܬ ܡܲܝܬ݇ܝܝܼ ܠܚܸܩܪܵܐ ܘܠܐܝܼܩܵܪܵܐ ܕܛܵܝܸܦܹ̈ܐ ܓܵܘܵܗ̇. 27ܘܠܹܐ ܐܵܘܸܪ ܓܵܘܵܗ̇ ܟ̰ܘܼ ܡܸܢܕܝܼ ܛܲܡܵܐܐ؛ ܘܗ̇ܘ ܕܥܵܒܼܸܕ ܛܲܡܐܘܼܬܵܐ ܘܕܵܓܵܠܘܼܬܵܐ؛ ܐܸܠܵܐ ܐܵܢܝܼ ܕܝܼܢܵܐ ܟܬܝܼܒܼܹܐ ܒܟܬܵܒܼܵܐ ܕܚܲܝܹ̈ܐ ܕܦܹܪܵܐ.