1ܘܟܲܕ ܚܸܪܹܗ ܦܵܘܠܘܿܣ ܒܟܢܘܼܫܝܵܐ ܕܝܗَܘܼܕܵܝܹ̈ܐ؛ ܐَܡܸܪܹܗ؛ ܓܲܒܼܪܹ̈ܐ ܐܲܚܘܿܢܘܵܬ̈ܝܼ؛ ܐܵܢܵܐ ܒܟܠܵܗ̇ ܐܸܢܝܲܬ ܛܵܒܼܬܵܐ ܚܕܝܼܪܵܐ ܝ݇ܘܸܢ ܩܵܕ݇ܡ ܐܲܠܵܗܵܐ ܗܲܠ ܐܵܗܵܐ ܝܵܘܡܵܐ. 2ܘܚܲܢܲܢܝܵܐ ܟܵܗܢܵܐ ܦܩܸܕܠܹܗ ܠܐܵܢܝܼ ܕܝܼܗَܘܵܘ ܟܸܠܝܹܐ ܒܕܸܦܢܹܗ؛ ܕܡܵܚܝܼ ܠܦܵܘܠܘܿܣ ܥܲܠ ܦܘܼܡܹܗ. 3ܘܦܵܘܠܘܿܣ ܐَܡܸܪܹܗ ܐܸܠܹܗ؛ ܐܲܠܵܗܵܐ ܒܸܬ ܡܵܚܹܐ ܐܸܠܘܼܟܼ ܝܵܐ ܓܘܼܕܵܐ ܡܘܼܚܸܘܸܪܵܐ. ܘܐܲܢ݇ܬ ܒܸܬܝܵܒܼܵܐ ܝَܘܸܬ ܠܸܕܝܵܢܝܼ ܐܲܝܟܼ ܕܒܢܵܡܘܿܣܵܐ؛ ܟܲܕ ܒܸܥܒܼܵܪܵܐ ܝَܘܸܬ ܥܲܠ ܢܵܡܘܿܣܵܐ؛ ܘܦܵܩܘܿܕܹܐ ܝَܘܸܬ ܕܡܵܚܝܼ ܠܝܼ؛ 4ܘܐܵܢܝܼ ܕܒܸܟܠܵܝܵܐ ܗَܘܵܘ ܬܵܡܵܐ ܐܵܡܪܝܼ ܐܸܠܹܗ؛ ܠܟܵܗܢܵܐ ܕܐܲܠܵܗܵܐ ܨܵܥܘܿܪܹܐ ܝَܘܸܬ؛ 5ܐܵܡܸܪ ܐܸܠܵܝܗܝ ܦܵܘܠܘܿܣ؛ ܠܵܐ ܝܕܸܥܠܝܼ؛ ܐܲܚܘܿܢܘܵܬ̈ܝܼ؛ ܕܟܵܗܢܵܐ ܝ݇ܠܹܗ؛ ܣܵܒܵܒ ܕܟܬܝܼܒܼܵܐ ܝ݇ܠܹܗ؛ ܠܪܹܫܵܐ ܕܛܵܝܸܦܘܼܟܼ ܠܵܐ ܗܲܡܙܸܡܸܬ ܒܝܼܫܬܵܐ. 6ܘܟܲܕ ܝܕܸܥܠܹܗ ܦܵܘܠܘܿܣ ܕܚܲܕ݇ ܣܵܡܵܐ ܙܲܕܘܼܩܵܝܹ̈ܐ ܗ݇ܘܵܐ؛ ܘܚܲܕ݇ ܣܵܡܵܐ ܦܪ̈ܝܼܫܹܐ؛ ܡܘܼܩܘܸܚܠܹܗ ܓܵܘ ܟܸܢܫܵܐ؛ ܓܲܒܼܪܹ̈ܐ ܐܲܚܘܿܢܘܵܬ̈ܝܼ؛ ܐܵܢܵܐ ܦܪܝܼܫܵܐ ܝ݇ܘܸܢ؛ ܒܪܘܿܢܵܐ ܕܦܪ̈ܝܼܫܹܐ؛ ܘܥܲܠ ܗܹܒܼܝܼ ܘܩܝܵܡܬܵܐ ܕܡܝܼܬܹ̈ܐ ܦܝܵܫܵܐ ܝ݇ܘܸܢ ܕܝܼܢܵܐ. 7ܘܟܲܕ ܐܵܗܵܐ ܐَܡܸܪܹܗ؛ ܢܦܸܠܗܘܿܢ ܚܲܕ݇ ܒܗ̇ܘ ܐ݇ܚܹܪ݇ܢܵܐ ܦܪ̈ܝܼܫܹܐ ܘܙܲܕܘܼܩܵܝܹ̈ܐ؛ ܘܦܸܫܠܵܗ̇ ܕܘܼܒܵܪ ܓ̰ܵܡܵܥܲܬ. 8ܣܵܒܵܒ ܙܲܕܘܼܩܵܝܹ̈ܐ ܟܹܐ ܐܵܡܪܝܼ؛ ܕܠܲܝܬ ܩܝܵܡܬܵܐ؛ ܘܠܵܐ ܡܲܠܲܐܟܹ̈ܐ؛ ܘܠܵܐ ܪܘܼܚܵܐ؛ ܐܝܼܢܵܐ ܦܪ̈ܝܼܫܹܐ ܟܹܐ ܡܵܘܕܝܼ ܒܬܸܪ̈ܘܵܝܗܝ. 9ܘܗ݇ܘܹܐܠܵܗ̇ ܡܲܩܘܲܚܬܵܐ ܓܘܼܪܬܵܐ؛ ܘܩܸܡܠܗ݇ܘܿܢ ܐ݇ܢܵܫܹ̈ܐ ܣܵܦܪܹ̈ܐ ܒܓܹܒܵܐ ܕܦܪ̈ܝܼܫܹܐ؛ ܘܡܲܩܪܸܨܝܼ ܗَܘܵܘ ܥܲܡܵܝܗܝ ܒܹܐܡܵܪܵܐ؛ ܠܹܐ ܝ݇ܘܵܚ ܡܲܫ݇ܟ̰ܘܼܚܹܐ ܡܸܢܕܝܼ ܣܸܪܝܵܐ ܒܐܵܗܵܐ ܓܲܒܼܪܵܐ؛ ܐܝܼܢܵܐ ܐܸܢ ܪܘܼܚܵܐ ܝܲܢ ܡܲܠܲܐܟܼܵܐ ܗܘܼܡܙܸܡܠܹܗ ܥܲܡܹܗ؛ ܡܘܼܕܝܼ ܐܝܼܬ ܒܐܵܗܵܐ؛ 10ܘܟܲܕ ܗ݇ܘܹܐܠܹܗ ܫܓܼܘܼܫܝܵܐ ܓܘܼܪܵܐ؛ ܙܕܸܥܠܹܗ ܪܲܒܐܲܠܦܵܐ ܕܩܵܘܡܵܐ ܦܵܫܚܝܼ ܠܦܵܘܠܘܿܣ؛ ܘܦܩܸܕܠܹܗ ܠܕܲܚܫܹ̈ܐ ܕܨܵܠܝܼ ܗَܘܵܘ ܫܵܩܠܝܼ ܠܹܗ ܒܚܲܝܠܵܐ ܡ̣ܢ ܒܹܝܦܲܠܓܵܝܗܝ؛ ܘܡܲܥܒܼܸܪܝܼ ܠܹܗ ܓܵܘ ܩܲܠܥܵܐ. 11ܘܟܲܕ ܗ݇ܘܹܐܠܹܗ ܠܲܝܠܹܐ؛ ܟܠܹܐܠܹܗ ܠܟܸܣܠܹܗ ܡܵܪܲܢ؛ ܘܐَܡܸܪܹܗ ܐܸܠܹܗ؛ ܚܲܠܸܢ ܓܵܢܘܼܟܼ؛ ܣܵܒܵܒ ܐܲܝܟܼ ܕܝܘܼܗَܒܼܸܠܘܼܟܼ ܣܵܗܕܘܼܬܵܐ ܐܸܠܝܼ ܓܵܘ ܐܘܿܪܸܫܠܸܡ؛ ܗܲܕܟܼܵܐ ܘܵܓ̰ܸܒ ܝ݇ܠܵܗ̇ ܐܸܠܘܼܟܼ ܕܐܘܼܦ ܓܵܘ ܪܗ݇ܘܿܡܹܐ ܝܵܗ݇ܒܼܸܬ ܣܵܗܕܘܼܬܵܐ. 12ܘܟܲܕ ܗ݇ܘܹܐܠܹܗ ܨܲܦܪܵܐ؛ ܓ̰ܡܸܥ ܗَܘܵܘ ܠܗَܘܿܢ ܐَܢܵܫܹ̈ܐ ܡ̣ܢ ܝܗ݇ܘܼܕܵܝܹ̈ܐ ܘܡܘܼܚܪܸܡܠܗܘܿܢ ܥܲܠ ܓܵܢܵܝܗܝ؛ ܟܲܕ ܐܵܡܪܝܼ ܕܠܹܐ ܐܵܟܼܠܝܼ ܗَܘܵܘ ܘܠܹܐ ܫܵܬܝܼ ܗܲܠ ܕܩܵܛܠܝܼ ܠܦܵܘܠܘܿܣ. 13ܐܝܼܢܵܐ ܗܵܘܝܼ ܗَܘܵܘ ܐܵܢܝܼ ܕܡܘܼܩܸܡܠܗ݇ܘܿܢ ܒܡܵܘܡܵܬܹ̈ܐ ܐܵܗܵܐ ܩܵܘܠܵܐ ܙܵܘܕܵܐ ܡ̣ܢ ܐܲܪܒܥܝܼ ܓܲܒܼܪܹ̈ܐ. 14ܘܐ݇ܬܹܐܠܗܘܿܢ ܠܟܸܣ ܟܵܗܢܹ̈ܐ ܘܠܟܸܣ ܚܘܵܪ̈ܕܸܩܢܹܐ؛ ܘܐܵܡܪܝܼ؛ ܚܸܪܡܵܐ ܡܘܼܚܪܸܡܠܲܢ ܥܲܠ ܓܵܢܲܢ؛ ܕܡܸܢܕܝܼ ܠܹܐ ܛܵܥܡܵܚ ܗܲܠ ܕܩܵܛܠܵܚ ܠܦܵܘܠܘܿܣ. 15ܘܐܵܕܝܼܵܐ ܡܲܕܸܥܡܘܿܢ ܐܲܚܬܘܿܢ ܘܟܸܢܫܵܐ ܕܪܵܐܝܝܼ ܠܪܲܒܐܲܠܦܵܐ؛ ܕܡܲܝܬܹܐ ܠܹܗ ܠܟܸܣܠܵܘܟܼܘܿܢ؛ ܐܲܝܟܼ ܕܐܸܢ ܒܵܥܹܝܬܘܿܢ ܕܬܲܦ̮ܬܸܫܝܼܬܘܿܢ ܒܘܼܫ ܬܲܡܵܡ ܠܫܘܼܠܹܗ؛ ܘܐܲܚܢܲܢ ܗܕܝܼܪܹܐ ܝ݇ܘܲܚ ܕܩܵܛܠܵܚ ܠܹܗ ܗܵܠܵܐ ܠܵܐ ܡܛܵܝܵܐ ܠܟܸܣܠܵܘܟܼܘܿܢ. 16ܘܫܡܸܥܠܹܗ ܒܪܘܿܢܵܐ ܕܚܵܬܹܗ ܕܦܵܘܠܘܿܣ ܐܵܗܵܐ ܒܘܼܨܵܐ؛ ܐ݇ܬܹܐܠܹܗ ܘܥܒܼܸܪܹܗ ܓܵܘ ܩܲܠܥܵܐ؛ ܘܗܘܼܩܹܐܠܹܗ ܠܦܵܘܠܘܿܣ. 17ܘܩܪܹܐܠܹܗ ܦܵܘܠܘܿܣ ܠܟܸܣܠܹܗ ܠܚܲܕ݇ ܡ̣ܢ ܩܸܢܛܪ̈ܘܿܢܹܐ؛ ܘܐَܡܸܪܹܗ ܐܸܠܹܗ؛ ܠܵܒܸܠ ܠܐܵܗܵܐ ܓ̰ܘܲܢܩܵܐ ܠܟܸܣ ܪܲܒܐܲܠܦܵܐ؛ ܣܵܒܵܒ ܐܝܼܬ ܠܹܗ ܡܸܢܕܝܼ ܕܐܵܡܸܪ ܐܸܠܹܗ. 18ܠܘܼܒܸܠܹܗ ܩܸܢܛܪܘܿܢܵܐ ܠܓ̰ܘܲܢܩܵܐ ܘܡܘܼܥܒܼܸܪܹܗ ܠܟܸܣ ܪܲܒܐܲܠܦܵܐ؛ ܘܐَܡܸܪܹܗ؛ ܦܵܘܠܘܿܣ ܐܲܣܝܼܪܵܐ ܩܪܹܐܠܹܗ ܐܸܠܝܼ؛ ܘܒܥܹܐܠܹܗ ܡܸܢܝܼ ܕܡܲܝܬ݇ܝܸܢ ܠܐܵܗܵܐ ܓ̰ܘܲܢܩܵܐ ܠܟܸܣܠܘܼܟܼ؛ ܕܐܝܼܬ ܠܹܗ ܡܸܢܕܝܼ ܕܐܵܡܸܪ ܐܸܠܘܼܟܼ. 19ܘܕܒܼܸܩܠܹܗ ܒܐܝܼܕܹܗ ܪܲܒܐܲܠܦܵܐ؛ ܘܓܪܸܫܠܹܗ ܠܚܲܕ݇ ܓܹܒܵܐ؛ ܘܒܘܼܩܸܪܹܗ ܡܸܢܹܗ؛ ܡܘܼܕܝܼ ܐܝܼܬ ܠܘܼܟܼ ܕܐܵܡܪܸܬ ܠܝܼ. 20ܘܐَܡܸܪܹܗ ܐܸܠܹܗ ܥܠܲܝܡܵܐ؛ ܝܗ݇ܘܼܕܵܝܹ̈ܐ ܥܒܼܝܼܕܹܐ ܝ݇ܢܵܐ ܪܵܐܝܝܼ ܕܛܵܠܒܝܼ ܡܸܢܘܼܟܼ ܕܩܵܝܕܲܡܬܵܐ ܡܲܨܠܸܬ ܠܹܗ ܦܵܘܠܘܿܣ ܠܟܸܢܫܵܐ؛ ܐܲܝܟܼ ܕܐܸܢ ܒܵܥܝܝܼ ܒܘܼܫ ܬܲܡܵܡ ܠܒܵܩܘܿܪܹܐ ܒܵܗ݇ܣܹܗ. 21ܐܝܼܢܵܐ ܐܲܢ݇ܬ ܠܵܐ ܡܲܨܝܸܬܸܬ ܐܸܠܵܝܗܝ ܣܵܒܵܒ ܙܵܘܕܵܐ ܡ̣ܢ ܐܲܪܒܥܝܼ ܐ݇ܢܵܫܹ̈ܐ ܡܸܢܵܝܗܝ ܒܸܣܦܵܪܵܐ ܝ݇ܢܵܐ ܐܸܠܹܗ ܒܒܘܼܨܵܐ؛ ܕܡܘܼܚܪܸܡܠܗ݇ܘܿܢ ܥܲܠ ܓܵܢܵܝܗܝ ܕܠܹܐ ܐܵܟܼܠܝܼ ܘܠܹܐ ܫܵܬܝܼ ܗܲܠ ܕܩܵܛܠܝܼ ܠܹܗ ܘܐܵܕܝܼܵܐ ܗܘܼܕܸܪܹܐ ܝ݇ܢܵܐ ܘܒܸܣܦܵܪܵܐ ܠܩܵܘܠܵܐ ܡܸܢܘܼܟܼ. 22ܘܪܲܒܐܲܠܦܵܐ ܫܘܼܕܸܪܹܗ ܠܗ̇ܘ ܓ̰ܘܲܢܩܵܐ؛ ܟܲܕ ܦܩܸܕܠܹܗ؛ ܠܐ݇ܢܵܫܵܐ ܠܵܐ ܐܵܡܪܸܬ ܕܐܲܢܹܐ ܡܘܼܕܸܥܠܘܼܟܼ ܐܸܠܝܼ. 23ܘܩܪܹܐܠܹܗ ܠܬܪܹܝ ܩܸܢܛܪ̈ܘܿܢܹܐ؛ ܘܐَܡܸܪܹܗ ܐܸܠܵܝܗܝ؛ ܗܲܕܪܗܘܿܢ ܬܪܹ̈ܝܡܵܐܐ ܕܲܚܫܹ̈ܐ ܕܐܵܙܠَܝܼ ܠܩܹܣܲܪܝܵܐ؛ ܘܫܲܒܼܥܝܼ ܪ̈ܵܟܵܒܼܹܐ ܘܬܪܹܝܡܵܐܐ ܕܵܪ̈ܝܵܢܹܐ ܕܪܘܼܡܚܹܐ. ܘܦܲܠܛܝܼ ܡ̣ܢ ܬܠܵܬ݇ ܣܵܥܲܬ ܒܠܲܝܠܹܐ. 24ܘܗܲܕܪܘܿܢ ܐܘܼܦ ܐܘܼ̈ܠܵܓܼܹܐ ܕܡܲܪܟܸܒܼܝܼ ܠܦܵܘܠܘܿܣ؛ ܕܡܲܡܛܝܼ ܠܹܗ ܣܵܠܵܡܲܬ ܠܟܸܣ ܦܝܼܠܸܟܣ ܗܵܟܝܼܡ. 25ܘܟܬܸܒܼܠܹܗ ܟܬܵܒܼܵܐ ܕܝܼܗ݇ܘܵܐ ܒܐܵܗܵܐ ܬܵܗܲܪ. 26ܩܠܵܘܕܝܼܘܿܣ ܠܘܼܣܝܼܘܿܣ ܠܟܸܣ ܦܝܼܠܸܟܣ ܗܵܟܝܼܡ ܢܲܨܝܼܚܵܐ؛ ܫܠܵܡܵܐ؛ ܠܐܵܗܵܐ ܓܲܒܼܪܵܐ ܕܒܼܸܩܠܗܘܿܢ ܝܗ݇ܘܼܕܵܝܹ̈ܐ ܐܲܝܟܼ ܕܩܲܛܠܝܼ ܠܹܗ؛ ܘܐ݇ܬܹܐܠܝܼ ܥܲܡ ܕܲܚܫܹ̈ܐ ܘܩܲܡ ܦܵܪܩܸܢܹܗ؛ ܟܲܕ ܝܠܸܦܠܝܼ ܕܪܗܘܿܡܵܝܵܐ ܝ݇ܠܹܗ؛ 28ܘܟܲܕ ܒܥܹܐܠܝܼ ܠܝܼܕܵܥܝܵܐ ܗܲܓ̰ܲܬ ܕܣܵܒܵܒ ܕܝܼܵܗ̇ ܒܸܡܚܵܝܵܐ ܗَܘܵܘ ܕܲܪܗܲܩܹܗ؛ ܩܲܡ ܡܲܨܠܸܢܹܗ ܠܟܸܢܫܵܝܗܝ. 29ܘܡܘܼܫ݇ܟ̰ܸܚܠܝܼ ܕܥܲܠ ܕܪ̈ܵܫܝܵܬܹܐ ܕܢܵܡܘܿܣܵܝܗܝ ܒܸܡܚܵܝܵܐ ܗَܘܵܘ ܕܲܪܗܲܩܹܗ؛ ܘܗܲܓ̰ܲܬ ܕܚܵܫܚܵܐ ܠܡܵܘܬܵܐ ܝܲܢ ܠܝܸܣܘܼܪܹ̈ܐ ܠܲܝܬ ܗَܘܵܐ ܠܟܸܣܠܹܗ. 30ܘܟܲܕ ܦܸܫܠܹܗ ܗܘܼܩܝܵܐ ܐܸܠܝܼ ܕܒܘܼܨܵܐ ܗܵܘܹܐ ܗَܘܵܐ ܥܲܠ ܕܐܵܗܵܐ ܐ݇ܢܵܫܵܐ؛ ܕܲܪܣܵܥܲܬ ܩܲܡ ܫܵܕܪܸܢܹܗ ܠܟܸܣܠܘܼܟܼ؛ ܘܦܩܸܕܠܝܼ ܠܡܵܚܝܵܢܹ̈ܐ ܕܲܪܗܲܩܹܗ ܕܗܲܡܙܸܡܝܼ ܩܵܕ݇ܡܘܼܟܼ ܡܸܢܕܝܼ ܕܥܲܠܘܼܗܝ؛ ܦܘܼܫ ܒܫܲܝܢܵܐ. 31ܗܵܝܓܵܗ ܕܲܚܫܹ̈ܐ؛ ܐܲܝܟܼ ܕܦܸܫܠܗَܘܿܢ ܦܩܝܼܕܵܐ؛ ܠܘܼܒܸܠܗܘܿܢ ܠܦܵܘܠܘܿܣ ܒܠܲܝܠܹܐ؛ ܘܩܲܡ ܡܲܝܬ݇ܝܼ ܠܹܗ ܠܐܲܢܛܝܼܦܵܛܪܘܿܣ. 32ܘܒܝܵܘܡܵܐ ܐ݇ܚܹܪ݇ܢܵܐ ܫܒܼܸܩܠܗ݇ܘܿܢ ܠܪ̈ܵܟܵܒܼܹܐ ܕܐܵܙܠ݇ܝܼ ܥܲܡܹܗ؛ ܘܐܵܢܝܼ ܕܸܪܗܘܿܢ ܠܩܲܠܥܵܐ. 33ܘܐ݇ܬܹܐܠܗܘܿܢ ܠܩܹܣܵܪܝܵܐ؛ ܘܝܘܼܗ݇ܒܼܸܠܗܘܿܢ ܟܬܵܒܼܵܐ ܠܗܵܟܝܼܡ؛ ܘܡܘܼܟܠܹܐܠܗܘܿܢ ܠܦܵܘܠܘܿܣ ܩܵܕ݇ܡܘܼܗܝ. 34ܘܟܲܕ ܩܪܹܐܠܹܗ ܐܸܓܲܪܬܵܐ؛ ܒܘܼܩܸܪܹܗ ܡܸܢܹܗ ܕܡܐܵܝܢܝܼ ܡܵܗܵܠ ܝܼܗَܘܵܐ؛ ܘܟܲܕ ܝܠܸܦܠܹܗ ܕܡ̣ܢ ܩܝܼܠܝܼܩܝܼܵܐ؛ 35ܐَܡܸܪܹܗ ܐܸܠܹܗ؛ ܒܸܬ ܫܵܡܥܸܢܘܼܟܼ ܐܝܼܡܲܢ ܕܐܵܬܝܼ ܡܵܚܝܵܢܹ̈ܐ ܕܕܲܪܗܲܩܘܼܟܼ. ܘܦܩܸܕܠܹܗ ܕܢܵܛܪܝܼ ܠܹܗ ܓܵܘ ܦܪܵܛܘܿܪܝܼܢ ܕܗܹܪܘܿܕܸܣ.