1ܘܡ̣ܢ ܒܵܬ݇ܪ ܚܲܡܫܵܐ ܝܵܘܡܵܢܹ̈ܐ ܨܠܹܐܠܹܗ ܚܲܢܲܢܝܵܐ ܓܘܼܪܵܐ ܕܟܵܗܢܹ̈ܐ ܥܲܡ ܚܘܵܪ̈ܕܸܩܢܹܐ؛ ܘܥܲܡ ܛܲܪܛܸܠܘܿܣ؛ ܚܲܕ݇ ܠܸܫܵܢܵܢܵܐ؛ ܘܡܘܼܕܸܥܠܗܘܿܢ ܠܗܵܟܝܼܡ ܥܲܠ ܦܵܘܠܘܿܣ. 2ܘܟܲܕ ܦܸܫܠܹܗ ܩܸܪܝܵܐ؛ ܫܘܼܪܹܐܠܹܗ ܛܲܪܛܹܠܘܿܣ ܠܸܡܚܵܝܵܐ ܕܲܪܗܲܩܹܗ؛ ܘܐܵܡܸܪ. 3ܪܵܒܵܐ ܫܲܝܢܵܐ ܗ݇ܘܹܐܠܹܗ ܐܸܠܲܢ ܒܣܵܒܵܒ ܕܝܼܘܼܟܼ؛ ܘܪܵܒܵܐ ܬܘܼܪ̈ܵܨܹܐ ܗ݇ܘܹܐܠܗܘܿܢ ܠܐܵܗܵܐ ܛܵܝܸܦܵܐ ܒܬܲܓܒܲܪܬܘܼܟܼ؛ ܘܕܵܝܸܡ ܒܟܠ ܕܘܼܟܵܐ ܩܵܒ̇ܘܿܠܹܐ ܝ݇ܘܲܚ ܒܟܠܵܗ̇ ܡܸܢܬܵܐ؛ ܝܵܐ ܢܲܨܝܼܚܵܐ ܦܝܼܠܸܟܣ. 4ܐܝܼܢܵܐ ܕܠܵܐ ܡܲܓ̰ܗ݇ܠܘܼܟܼ ܪܵܒܵܐ؛ ܒܸܒܥܵܝܵܐ ܝ݇ܘܸܢ ܡܸܢܘܼܟܼ ܕܫܵܡܥܸܬ ܠܲܢ ܒܡܲܟܝܼܟܼܘܼܬܘܼܟܼ ܒܗܹܡܸܙܡܵܢܹ̈ܐ ܟܸܪ̈ܝܹܐ. 5ܣܵܒܵܒ ܕܡܘܼܫ݇ܟ̰ܸܚܠܲܢ ܠܐܵܗܵܐ ܓܲܒܼܪܵܐ؛ ܡܲܚܪܸܒܼܵܢܵܐ؛ ܘܡܲܪܥܘܼܫܹܐ ܫܓܼܘܼܫܝܵܐ ܓܵܘ ܟܠܵܝܗܝ ܝܗ݇ܘܼܕܵܝܹ̈ܐ ܕܒܟܠܵܗ̇ ܐܲܪܥܵܐ؛ ܘܪܹܫܵܐ ܕܝܘܼܠܦܵܢܵܐ ܕܢܵܨܪ̈ܵܝܹܐ ܝ݇ܠܹܗ. 6ܘܠܗܲܝܟܠܲܢ ܒܥܹܐܠܹܗ ܠܸܫܚܵܡܵܐ؛ ܘܩܲܡ ܕܵܒܼܩܵܚܠܹܗ؛ ܒܸܒܥܵܝܵܐ ܝܘܲܚ ܕܕܵܝܢܲܚ ܠܹܗ ܐܲܝܟܼ ܢܵܡܘܿܣܲܢ. 7ܐܝܼܢܵܐ ܐَܬܹܐܠܹܗ ܠܘܼܣܝܼܘܿܣ ܪܲܒܐܲܠܦܵܐ ܥܲܡ ܚܲܝܠܵܐ ܪܲܒܵܐ ܘܫܩܝܼܠܹܗ ܡ̣ܢ ܝܼܕܲܢ ܘܫܘܼܕܸܪܹܗ ܐܸܠܹܗ ܠܟܸܣܠܘܼܟܼ. 8ܘܦܩܸܕܠܹܗ ܠܡܲܚܝܵܢܹܐ ܕܲܪܗܲܩܹܗ ܕܐܵܬܝܼ ܠܟܸܣܠܘܼܟܼ؛ ܘܟܲܕ ܒܵܩܪܸܬ ܠܹܗ ܡܵܨܹܬ ܝܵܠܦܸܬ ܡܸܢܹܗ ܥܲܠ ܟܠܵܝܗܝ ܐܵܢܝܼ ܕܒܸܡܚܵܝܵܐ ܝ݇ܘܲܚ ܕܲܪܗܲܩܹܗ. 9ܘܝܘܼܗ݇ܒܼܸܠܗ݇ܘܿܢ ܩܵܠܵܐ ܥܲܠܘܼܗܝ ܐܘܼܦ ܝܗ݇ܘܼܕܵܝܹ̈ܐ؛ ܟܲܕ ܒܹܐܡܵܪܵܐ ܕܐܲܢܹܐ ܗܲܕܟܼܵܐ ܝ݇ܢܵܐ. 10ܘܪܡܸܙܠܹܗ ܗܵܟܝܼܡ ܠܦܵܘܠܘܿܣ ܕܗܲܡܙܸܡ؛ ܘܓ̰ܘܼܘܸܒܠܹܗ ܦܵܘܠܘܿܣ ܘܐَܡܸܪܹܗ؛ ܡ̣ܢ ܪܵܒܵܐ ܫܸܢܹ̈ܐ ܒܝܼܕܲܥܝܵܐ ܝ݇ܘܸܢ ܕܝܼܘܸܬ ܕܲܝܵܢܵܐ ܕܐܵܗܵܐ ܛܵܝܸܦܵܐ؛ ܘܣܵܒܵܒ ܕܐܵܗܵܐ ܒܚܲܕܘܼܬܵܐ ܒܝܼܵܗ݇ܒܼܵܐ ܝ݇ܘܸܢ ܓ̰ܘܼܘܵܒ ܥܲܠ ܗܲܓ̰ܲܬ ܕܓܵܢܝܼ؛ 11ܟܲܕ ܟܹܐ ܡܵܨܸܬ ܠܝܼܕܵܥܝܵܐ ܕܠܲܝܬ ܠܝܼ ܙܵܘܕܵܐ ܡ̣ܢ ܬܪܸܥܣܲܪ ܝܵܘܡܵܢܹ̈ܐ ܕܐ݇ܣܸܩܠܝܼ ܠܐܘܿܪܸܫܠܸܡ ܠܸܣܓܼܵܕܵܐ. 12ܘܠܵܐ ܡܘܼܫ݇ܟ̰ܚܸܢܘܿܢ ܗܲܡܙܘܼܡܹܐ ܝܘܸܢ ܥܲܡ ܐ݇ܢܵܫܵܐ ܓܵܘ ܗܲܝܟܠܵܐ؛ ܘܐܘܼܦ ܠܵܐ ܒܸܫܓܼܵܫܵܐ ܠܟܸܢܫܵܐ؛ ܠܵܐ ܓܵܘ ܟܢܘܼܫܝܵܬܹ̈ܐ؛ ܘܠܵܐ ܓܵܘ ܡܕܝܼܢ݇ܬܵܐ؛ 13ܘܠܹܐ ܡܵܨܝܼ ܕܡܲܚܙܝܼ ܡܸܢܕܝܼ ܕܐܵܕܝܼܵܐ ܒܸܡܚܵܝܵܐ ܝ݇ܢܵܐ ܕܲܪܗܲܩܝܼ. 14ܐܝܼܢܵܐ ܐܵܗܵܐ ܡܵܘܕܘܿܝܹܐ ܝ݇ܘܸܢ؛ ܕܗܲܪ ܒܐܵܗܵܐ ܝܘܼܠܦܵܢܵܐ ܕܐܵܡܪܝܼ؛ ܒܝܼܵܗ̇ ܒܸܦܠܵܚܵܐ ܝ݇ܘܸܢ ܠܐܵܠܵܗܵܐ ܕܐܲܒܼܵܗܵܬ̈ܝܼ؛ ܟܲܕ ܗܲܡܘܼܢܹܐ ܝ݇ܘܸܢ ܠܟܠܵܝܗܝ ܕܝܼܢܵܐ ܟܬܝܼܒܼܹܐ ܒܢܵܡܘܿܣܵܐ ܘܒܢܒܼܝܼܹ̈ܐ. 15ܘܟܲܕ ܐܝܼܬ ܠܝܼ ܣܲܒܼܪܵܐ ܒܐܲܠܵܗܵܐ؛ ܗ̇ܝ ܕܐܘܼܦ ܐܲܢܹܐ ܒܓܵܢܵܝܗܝ ܒܸܣܦܵܪܵܐ ܝ݇ܢܵܐ؛ ܕܗܕܝܼܪܬܵܐ ܝ݇ܠܵܗ̇ ܕܗܵܘܝܵܐ ܩܝܵܡܬܵܐ ܡ̣ܢ ܡܝܼܬܹ̈ܐ؛ ܕܟܹܐܢܹ̈ܐ ܘܕܥܵܘܵܠܹ̈ܐ. 16ܣܵܒܵܒ ܕܐܵܗܵܐ ܐܘܼܦ ܒܹܐܟܼܵܠܵܐ ܝ݇ܘܸܢ ܓ̰ܵܦܵܐ ܕܐܸܢܝܲܬ ܕܟܼܝܼܬܵܐ ܗܵܘܝܵܐ ܠܝܼ ܩܵܕ݇ܡ ܐܲܠܵܗܵܐ ܘܩܵܕ݇ܡ ܒܢܲܝ̈ܢܵܫܵܐ ܒܕܵܝܸܡܘܼܬܵܐ. 17ܘܒܵܬ݇ܪ ܪܵܒܵܐ ܫܸܢܹ̈ܐ ܐ݇ܬܹܐܠܝܼ ܠܝܼܵܗ݇ܒܼܵܐ ܐܸܪܘܵܢܵܐ ܠܡܸܠܲܬܝܼ؛ ܘܢܸܕܪܹ̈ܐ. 18ܘܓܵܘܵܐ ܕܐܲܢܹܐ ܩܲܡ ܡܲܫ݇ܟ̰ܚܝܼ ܠܝܼ ܓܵܘ ܗܲܝܟܠܵܐ؛ ܟܲܕ ܕܵܟܼܘܿܝܹܐ ܝ݇ܘܸܢ ܗَܘܵܐ ܓܵܢܝܼ؛ ܠܵܐ ܥܲܡ ܟܸܢܫܵܐ ܘܐܘܼܦ ܠܵܐ ܒܫܓܼܘܼܫܝܵܐ. 19ܐܸܠܵܐ ܕܫܓܼܝܼܫܠܗَܘܿܢ ܐ݇ܢܵܫܹ̈ܐ ܝܗ݇ܘܼܕܵܝܹ̈ܐ ܕܐَܬܹܐܠܗَܘܿܢ ܡ̣ܢ ܐܵܣܝܼܵܐ؛ ܐܵܢܝܼ ܕܘܵܓ̰ܸܒ ܝܼܗَܘܵܐ ܕܟܵܠܝܼ ܗَܘܵܘ ܥܲܡܝܼ ܩܵܕ݇ܡܘܼܟܼ؛ ܘܡܵܚܝܼ ܗَܘܵܘ ܕܲܪܗܲܩ ܐܸܢ ܡܸܢܕܝܼ ܐܝܼܬ ܠܗ݇ܘܿܢ. 20ܝܲܢ ܐܵܢܝܼ ܒܓܵܢܵܝܗܝ ܐܵܡܪܝܼ؛ ܐܸܢ ܡܘܼܫ݇ܟ̰ܸܚܠܗ݇ܘܿܢ ܓܢܵܗܵܐ ܒܝܼܝܼ؛ ܐܝܼܡܲܢ ܕܟܠܹܐܠܝܼ ܩܵܕ݇ܡ ܟܢܘܼܫܝܵܐ. 21ܫܒܼܘܿܩ ܡ̣ܢ ܐܵܗܵܐ ܚܕܵܐ ܗܹܡܸܙܡܵܢ؛ ܕܡܘܼܩܘܸܚܠܝܼ ܟܲܕ ܒܸܟܠܵܝܵܐ ܝ݇ܘܸܢ ܗَܘܵܐ ܓܵܘܵܝܗܝ؛ ܥܲܠ ܩܝܵܡܬܵܐ ܕܡܝܼܬܹ̈ܐ ܦܝܵܫܵܐ ܝ݇ܘܸܢ ܕܝܼܢܵܐ ܐܸܕܝܘܿܡ݇ ܩܵܕ݇ܡܵܘܟܼܘܿܢ. 22ܐܝܼܢܵܐ ܦܝܼܠܸܟܣ؛ ܣܵܒܵܒ ܕܟܹܐ ܝܵܕܹܥ ܗَܘܵܐ ܠܐܵܗܵܐ ܐܘܼܪܚܵܐ ܒܡܸܠܝܘܼܬܼܵܐ؛ ܡܘܼܚܡܸܠܵܝܠܹܗ؛ ܟܲܕ ܐܵܡܸܪ؛ ܐܝܼܡܲܢ ܕܠܘܼܣܝܼܘܿܣ ܪܲܒܐܲܠܦܵܐ ܨܵܠܹܐ؛ ܒܸܬ ܩܲܛܥܸܢ ܒܹܝܠܵܘܟܼܘܿܢ. 23ܦܩܸܕܠܹܗ ܠܩܸܢܛܪܘܿܢܵܐ ܕܢܵܛܸܪܹܗ ܘܝܵܗܒܸܠܹܗ ܚܹܐܪܘܼܬܵܐ؛ ܘܠܵܐ ܡܲܟܠܹܐ ܡ̣ܢ ܐ݇ܢܵܫܹ̈ܐ ܕܓܵܢܹܗ ܡ̣ܢ ܠܸܥܒܼܵܕܹܗ ܚܸܠܡܲܬ. 24ܘܒܵܬ݇ܪ ܚܲܕَܟܡܵܐ ܝܵܘܡܵܢܹ̈ܐ؛ ܐ݇ܬܹܐܠܹܗ ܦܝܼܠܸܟܣ ܘܕܘܼܪܣܸܠܵܐ ܒܲܟܼܬܹܗ؛ ܕܝܼܗَܘܵܐ ܝܗ݇ܘܼܕܵܝܬܵܐ؛ ܘܩܪܹܐܠܗ݇ܘܿܢ ܠܦܵܘܠܘܿܣ؛ ܘܫܡܸܥܠܗَܘܿܢ ܡܸܢܹܗ ܥܲܠ ܗܲܝܡܵܢܘܼܬܵܐ ܕܡܫܝܼܚܵܐ. 25ܘܟܲܕ ܗܲܡܙܘܼܡܹܐ ܗَܘܵܐ ܥܲܡܵܝܗܝ ܒܘܼܬܿ ܙܲܕܝܼܩܘܼܬܵܐ؛ ܘܥܲܠ ܕܒܼܵܩܬܵܐ ܕܓܵܢܵܐ؛ ܘܥܲܠ ܕܝܼܘܵܢ ܕܝܼܠܵܗ̇ ܗܕܝܼܪܬܵܐ؛ ܦܸܫܠܹܗ ܡܸܠܝܵܐ ܙܕܘܿܥܬܵܐ ܦܝܼܠܸܟܣ؛ ܘܓ̰ܘܼܘܸܒܠܹܗ؛ ܐܵܕܝܼܵܐ ܙܹܠ݇؛ ܘܐܝܼܡܲܢ ܕܗܵܘܝܵܐ ܠܝܼ ܦܸܪܣܲܬ ܒܸܬ ܫܵܕܪܸܢ ܒܵܬ݇ܪܘܼܟܼ. 26ܣܵܒܵܒ ܒܸܚܫܵܒܼܵܐ ܗَܘܵܐ ܕܫܵܩܸܠ ܗَܘܵܐ ܪܸܫܘܲܬ ܡ̣ܢ ܦܵܘܠܘܿܣ؛ ܣܵܒܵܒ ܕܐܵܗܵܐ ܐܘܼܦ ܒܕܵܝܸܡܘܼܬܵܐ ܟܹܐ ܫܵܕܸܪ ܗَܘܵܐ ܡܲܝܬܹܐ ܠܹܗ ܘܗܲܡܙܸܡ ܗَܘܵܐ ܥܲܡܹܗ. 27ܘܟܲܕ ܬܘܼܡܸܡܠܗܘܿܢ ܐܸܠܹܗ ܬܲܪ̈ܬܹܝ ܫܸܢܹ̈ܐ؛ ܩܸܡܠܹܗ ܠܕܘܼܟܬܹܗ ܕܦܝܼܠܸܟܣ ܦܵܪܩܝܼܘܿܣ ܦܹܗܸܣܛܘܿܣ؛ ܘܦܝܼܠܸܟܣ ܕܕܵܪܹܗ ܗَܘܵܐ ܡܸܢܬܵܐ ܠܝܗ݇ܘܼܕܵܝܹ̈ܐ؛ ܫܒܼܸܩܠܹܗ ܠܦܵܘܠܘܿܣ ܐ݇ܣܝܼܪܵܐ.