1ܘܐَܡܸܪܹܗ ܐܵܓܹܪܦܘܿܣ ܠܦܵܘܠܘܿܣ؛ ܐܝܼܬ ܠܘܼܟܼ ܕܲܣܬܘܼܪ ܠܗܲܡܙܘܼܡܹܐ ܒܘܼܬܿ ܓܵܢܘܼܟܼ. ܗ̇ܝܓܵܗ ܦܵܘܠܘܿܣ ܦܘܼܫܛܵܠܹܗ ܐܝܼܕܹܗ؛ ܘܝܘܼܗ݇ܒܼܸܠܹܗ ܓ̰ܘܼܘܵܒ ܘܐܵܡܸܪ. 2ܥܲܠ ܟܠ ܡܸܢܕܝܼ ܕܦܝܵܫܵܐ ܝ݇ܘܸܢ ܡܸܚܝܵܐ ܕܲܪܗܲܩ ܡ̣ܢ ܝܗ݇ܘܼܕܵܝܹ̈ܐ؛ ܡܲܠܟܵܐ ܐܵܓܹܪܦܵܐ؛ ܒܸܚܫܵܒܼܵܐ ܝ݇ܘܸܢ ܓܵܢܝܼ ܛܘܼܒܼܵܢܵܐ ܕܩܵܕَܡܘܼܟܼ ܐܸܕܝܘܿܡ݇ ܗܕܝܼܪܵܐ ܝ݇ܘܸܢ ܠܝܼܵܗ݇ܒܼܵܐ ܓ̰ܘܼܘܵܒ؛ 3ܒܘܼܫ ܙܵܘܕܵܐ ܒܸܥܕܵܝܵܐ ܝܘܸܢ ܕܒܵܠܵܕ ܝܼܘܸܬ ܒܟܠܵܝܗܝ ܥܵܕܲܬܹ̈ܐ ܘܕܪ̈ܵܫܝܵܬܹܐ ܕܝܼܗ݇ܘܼܕܵܝܹ̈ܐ. ܣܵܒܵܒ ܕܐܵܗܵܐ ܒܸܒܥܵܝܵܐ ܝ݇ܘܸܢ ܡܸܢܘܼܟܼ ܕܒܡܲܪܝܵܟܼܬܵܐ ܕܒܹܢܵܐ ܫܵܡܥܸܬ ܠܝܼ؛ 4ܒܵܗ݇ܣ ܕܘܼܒܵܪ̈ܝܼ ܕܡ̣ܢ ܝܵܠܕ݇ܘܼܬܝܼ ܕܗ݇ܘܹܐܠܗܘܿܢ ܡ̣ܢ ܩܵܕ݇ܡܵܝܬܵܐ ܓܵܘ ܛܵܝܸܦܝܼ؛ ܘܓܵܘ ܐܘܿܪܸܫܠܸܡ؛ ܟܹܐ ܝܵܕܥܝܼ ܐܘܼܦ ܟܠܵܝܗܝ ܝܗ݇ܘܼܕܵܝܹ̈ܐ؛ 5ܐܸܢ ܒܵܣܡܵܐ ܠܗ݇ܘܿܢ ܕܝܵܗ݇ܒܼܝܼ ܣܵܗܕܘܼܬܵܐ؛ ܣܵܒܵܒ ܡ̣ܢ ܩܵܕ݇ܡܵܝܬܵܐ ܟܹܐ ܝܵܕܥܝܼ ܠܝܼ ܕܒܝܘܼܠܦܵܢܵܐ ܪܹܫܵܝܵܐ ܕܬܵܘܕܝܼܬܲܢ ܦܪܝܼܫܵܐ ܚܝܼܵܐ ܝܘܸܢ. 6ܘܐܵܕܝܼܵܐ ܥܲܠ ܗܹܒܼܝܼ ܕܩܘܼܠܵܐ ܕܗ݇ܘܹܐܠܹܗ ܠܐܲܒܼܵܗ̈ܵܬܲܢ ܡ̣ܢ ܐܲܠܵܗܵܐ ܒܸܟܠܵܝܵܐ ܝ݇ܘܸܢ ܘܦܝܵܫܵܐ ܝ݇ܘܸܢ ܕܝܼܢܵܐ؛ 7ܕܥܲܠ ܕܐܵܗܵܐ ܣܲܒܼܪܵܐ ܬܪܸܥܣܲܪ ܐܘܼܓ̰ܵܓܼܹ̈ܐ ܒܸܣܦܵܪܵܐ ܝܢܵܐ ܕܡܵܛܝܼ؛ ܒܚܸܠܡܲܬܹ̈ܐ ܚܵܒ̇ܛܵܢܹ̈ܐ ܕܐܝܼܡܵܡܵܐ ܘܠܲܝܠܹܐ؛ ܘܗܲܪ ܥܲܠ ܐܵܗܵܐ ܗܹܒܼܝܼ ܦܝܵܫܵܐ ܝ݇ܠܵܗ̇ ܡܚܝܼܬܵܐ ܕܲܪܗܲܩܝܼ ܡ̣ܢ ܐܝܼܕܵܐ ܕܝܼܗ݇ܘܼܕܵܝܹ̈ܐ؛ ܝܵܐ ܡܲܠܟܵܐ. 8ܕܵܐܟܼܝܼ ܒܸܕܝܵܢܵܐ ܝ݇ܬܘܿܢ ܕܡܸܢܕܝܼ ܝ݇ܠܹܗ ܠܵܐ ܠܗܲܡܘܼܢܹܐ ܐܸܢ ܡܲܩܸܡ ܐܲܠܵܗܵܐ ܡܝܼܬܹ̈ܐ؛ 9ܐܵܢܵܐ ܡܸܓ̰ܸܕ ܚܫܸܒܼܠܝܼ ܠܟܸܣ ܓܵܢܝܼ؛ ܕܘܵܓ̰ܸܒ ܝܼܗَܘܵܐ ܕܕܲܪ̈ܩܘܼܒܼܠܘܼܝܵܬܹܐ ܪܵܒܵܐ ܦܵܠܚܸܢ ܗَܘܵܐ ܕܲܪܩܘܼܒܼܠ ܕܫܸܡܹܗ ܕܝܼܫܘܿܥ ܢܵܨܪܵܝܵܐ. 10ܘܐܵܗܵܐ ܥܒܼܸܕܠܝܼ ܐܘܼܦ ܓܵܘ ܐܘܿܪܸܫܠܸܡ ܘܪܵܒܵܐ ܩܲܕܝܼܫܹ̈ܐ ܕܪܹܐܠܝܼ ܓܵܘ ܒܹܝܬ ܐܲܣܝܼܪܹ̈ܐ ܒܗܘܼܟܡܵܐ ܕܫܩܸܠܝܼ ܡ̣ܢ ܓܘܼܪ̈ܵܢܹܐ ܕܟܵܗܢܹ̈ܐ؛ ܘܟܲܕ ܦܵܝܫܝܼ ܗَܘܵܘ ܩܛܝܼܠܹܐ؛ ܝܘܼܗ݇ܒܼܸܠܝܼ ܚܲܒ̇ܪܝܼ ܥܲܠܵܝܗܝ. 11ܘܒܟܠܵܝܗܝ ܟܢܘܼܫܝܵܬܹ̈ܐ ܟܹܐ ܬܲܥܠܡܸܢ ܗَܘܵܐ ܠܗ݇ܘܿܢ ܪܵܒܵܐ ܓܵܗܹ̈ܐ؛ ܘܟܹܐ ܡܲܠܝܸܨܸܢ ܗَܘܵܐ ܠܗ݇ܘܿܢ ܠܸܓܕܵܦܵܐ ܒܫܸܡܹܗ ܕܝܼܫܘܿܥ؛ ܘܟܲܕ ܒܪܵܒܵܐ ܟܲܪܒܵܐ ܡܸܠܝܵܐ ܝ݇ܘܸܢ ܗَܘܵܐ ܥܲܠܵܝܗܝ؛ ܐܘܼܦ ܗܲܠ ܡܕܝܼܢܵܬܹ̈ܐ ܐ݇ܚܹܪ̈݇ܢܹܐ ܛܪܝܼܕܵܝܠܝܼ. 12ܘܟܲܕ ܒܹܐܙܵܠܵܐ ܝ݇ܘܸܢ ܗَܘܵܐ ܣܵܒܵܒ ܕܐܵܗܵܐ ܠܕܲܪܡܣܘܿܩ؛ ܒܗܘܼܟܡܵܐ ܘܒܕܲܣܬܘܼܪ ܕܓܘܼܪ̈ܵܢܹܐ ܕܟܵܗܢܹ̈ܐ؛ 13ܒܦܲܠܓܹܗ ܕܝܵܘܡܵܐ ܒܐܘܼܪܚܵܐ ܚܙܹܐܠܝܼ ܒܲܗܪܵܐ ܡ̣ܢ ܫܡܲܝܵܐ؛ ܝܵܐ ܡܲܠܟܵܐ؛ ܡܲܒܪܘܼܩܹܐ ܚܵܕܸܪ̈ܘܵܢܝܼ ܘܚܵܕܸܪ̈ܘܵܢܹܐ ܕܐܵܙܵܠ݇ܢܹ̈ܐ ܥܲܡܝܼ؛ ܒܘܼܫ ܒܲܗܪܵܢܵܐ ܡ̣ܢ ܒܲܗܪܵܐ ܕܫܡܫܵܐ. 14ܘܢܦܸܠܲܢ ܟܠܲܢ ܥܲܠ ܐܲܪܥܵܐ؛ ܘܫܡܸܥܠܝܼ ܩܵܠܵܐ ܟܲܕ ܐܵܡܸܪ ܐܸܠܝܼ؛ ܒܠܸܫܵܢܵܐ ܕܥܸܒܼܪ̈ܵܝܹܐ؛ ܫܵܐܘܿܠ؛ ܫܵܐܘܿܠ؛ ܩܵܡܘܿܕܝܼ ܒܸܛܪܵܕܝܼ ܝَܘܸܬ؛ ܥܲܣܩܵܐ ܝ݇ܠܵܗ̇ ܐܸܠܘܼܟܼ ܠܸܡܚܵܝܵܐ ܪܲܦܣܵܐ ܠܢܸܩܣܹ̈ܐ. 15ܘܐܵܢܵܐ ܐ݇ܡܸܪܝܼ؛ ܡܵܢܝܼ ܝَܘܸܬ ܡܵܪܝܼ؛ ܘܡܵܪܲܢ ܐَܡܸܪܹܗ؛ ܐܵܢܵܐ ܝ݇ܘܸܢ ܝܼܫܘܿܥ ܢܲܨܪܵܝܵܐ؛ ܗ̇ܘ ܕܐܲܢ݇ܬ ܒܸܛܪܵܕܵܐ ܝَܘܸܬ. 16ܘܐَܡܸܪܹܗ ܐܸܠܝܼ ܩܘܼܡ݇؛ ܘܟܠܝܼ ܥܲܠ ܐܲܩ̈ܠܵܬܘܼܟܼ؛ ܣܵܒܵܒ ܥܲܠ ܕܐܵܗܵܐ ܦܸܫܠܝܼ ܚܸܙܝܵܐ ܐܸܠܘܼܟܼ؛ ܕܡܲܩܸܡܸܢܘܼܟܼ ܚܸܠܡܲܬܟܵܪ ܘܣܵܗܕܵܐ ܕܡܸܢܕܝܼܵܢܹ̈ܐ ܕܚܙܹܐܠܘܼܟܼ ܡܸܢܝܼ؛ ܘܥܲܠ ܡܸܢܕܝܵܢܹ̈ܐ ܕܗܕܝܼܪܵܐ ܝܘܸܢ ܕܡܲܚܙܸܢܘܼܟܼ. 17ܘܒܸܬ ܦܵܨܸܢܘܼܟܼ ܡ̣ܢ ܛܵܝܸܦܵܐ ܕܝܗَܘܼܕܵܝܹ̈ܐ ܘܡ̣ܢ ܛܵܝܸܦܹ̈ܐ ܐَܚܹܪَ̈ܢܹܐ؛ ܕܫܵܕܘܿܪܘܼܟܼ ܝܼܘܸܢ ܠܟܸܣܠܵܝܗܝ؛ 18ܠܸܦܬܵܚܵܐ ܥܲܢܵܝ̈ܗܝ؛ ܘܕܵܝܪܝܼ ܡ̣ܢ ܚܘܼܒܼܝܵܐ ܠܒܲܗܪܵܐ؛ ܘܡ̣ܢ ܗܘܼܟܡܵܐ ܕܣܵܛܵܢܵܐ ܠܟܸܣ ܐܲܠܵܗܵܐ؛ ܕܩܵܒ̇ܠܝܼ ܦܘܼܚܵܠܵܐ ܕܚܛܵܗܹ̈ܐ؛ ܘܣܵܗܡܵܐ ܥܲܡ ܩܲܕܝܼܫܹ̈ܐ ܒܗܲܝܡܵܢܘܼܬܵܐ ܕܒܝܼܝܼ ܝ݇ܠܵܗ̇. 19ܣܵܒܵܒ ܕܐܵܗܵܐ؛ ܡܲܠܟܵܐ ܐܵܓܹܪܦܵܐ؛ ܠܵܐ ܗ݇ܘܹܐܠܝܼ ܒܠܵܐ ܡܲܨܝܲܬܬܵܐ ܠܚܸܙܘܵܐ ܫܡܲܝܵܢܵܐ. 20ܐܸܠܵܐ ܡܘܼܟܪܸܙܠܝܼ ܩܵܕ݇ܡܵܝܬܵܐ ܠܐܵܢܝܼ ܕܓܵܘ ܕܲܪܡܣܘܿܩ؛ ܘܕܓܵܘ ܐܘܿܪܸܫܠܸܡ؛ ܘܕܒܟܠܹܗ ܐܲܬܪܵܐ ܕܝܼܗܘܼܕ؛ ܘܐܘܼܦ ܠܛܵܝܸܦܹ̈ܐ ܡܘܼܟܪܸܙܠܝܼ؛ ܕܬܵܘܸܒܝܼ ܘܕܵܝܪܝܼ ܠܟܸܣ ܐܲܠܵܗܵܐ؛ ܘܥܵܒܼܕܝܼ ܦܘܼܠܚܵܢܹ̈ܐ ܚܫܝܼܚܹ̈ܐ ܠܬܝܵܒܼܘܼܬܵܐ. 21ܘܣܵܒܵܒ ܕܐܲܢܹܐ؛ ܕܒܼܝܼܩܠܗَܘܿܢ ܐܸܠܝܼ ܝܗ݇ܘܼܕܵܝܹ̈ܐ ܓܵܘ ܗܲܝܟܠܵܐ؛ ܘܒܵܥܝܼ ܗَܘܵܘ ܠܸܩܛܵܠܝܼ. 22ܐܝܼܢܵܐ ܐܲܠܵܗܵܐ ܗܘܼܝܸܪܝܼ ܝَܠܹܗ؛ ܘܒܸܟܠܵܝܵܐ ܝ݇ܘܸܢ ܗܲܠ ܐܵܗܵܐ ܝܵܘܡܵܐ؛ ܘܒܸܣܗܵܕܵܐ ܝ݇ܘܸܢ ܠܙܥܘܿܪܵܐ ܘܠܓܘܼܪܵܐ؛ ܟܲܕ ܡܸܢܕܝܼ ܠܹܐ ܝ݇ܘܸܢ ܒܹܐܡܵܪܵܐ ܠܒܼܲܕܲܪ ܡ̣ܢ ܐܵܢܝܼ ܕܢܒܼܝܼܹ̈ܐ ܘܡܘܼܫܹܐ ܐ݇ܡܸܪܗܘܿܢ ܕܗܕܝܼܪܵܐ ܝ݇ܢܵܐ ܕܗܵܘܝܼ؛ 23ܕܒܸܬ ܩܵܒܸ̇ܠ ܗَܘܵܐ ܚܲܫܵܐ ܡܫܝܼܚܵܐ؛ ܘܟܲܕ ܗܵܘܹܐ ܗَܘܵܐ ܩܵܕ݇ܡܵܝܵܐ ܕܩܝܵܡܬܵܐ ܡ̣ܢ ܡܝܼܬܹ̈ܐ؛ ܒܸܬ ܡܲܟܪܸܙ ܗَܘܵܐ ܒܲܗܪܵܐ ܠܛܵܝܸܦܵܐ ܘܠܡܸܠܲܬܹ̈ܐ. 24ܘܟܲܕ ܗܲܕܟܼܵܐ ܒܝܼܵܗ݇ܒܼܵܐ ܗَܘܵܐ ܓ̰ܘܼܘܵܒ؛ ܐَܡܸܪܹܗ ܦܹܗܸܣܛܘܿܣ ܒܩܵܠܵܐ ܪܵܡܵܐ؛ ܫܘܼܕܸܢܘܼܟܼ ܦܵܘܠܵܐ؛ ܪܵܒܵܐ ܝܠܝܵܦܵܐ ܩܲܡ ܥܵܒܼܸܕܠܘܼܟܼ ܕܫܲܕܸܢܸܬ. 25ܐܵܡܸܪ ܐܸܠܹܗ ܦܵܘܠܘܿܣ؛ ܠܵܐ ܫܘܼܕܸܢܝܼ؛ ܝܵܐ ܢܲܨܝܼܚܵܐ ܦܹܗܹܣܛܘܿܣ؛ ܐܸܠܵܐ ܗܹܡܸܙܡܵܢܹ̈ܐ ܕܫܪܵܪܵܐ ܘܕܨܵܠܝܼܠܘܼܬܵܐ ܗܲܡܙܘܼܡܹܐ ܝ݇ܘܸܢ. 26ܣܵܒܵܒ ܡܲܠܟܵܐ ܐܵܓܹܪܦܘܿܣ ܨܦܵܝܝܼ ܟܹܐ ܝܵܕܹܥ ܒܘܼܬܿ ܕܐܲܢܹܐ؛ ܕܒܒܸܣܬܵܝܘܼܬܵܐ ܗܲܡܙܘܼܡܹܐ ܝ݇ܘܸܢ ܩܵܕ݇ܡܘܼܗܝ؛ ܣܵܒܵܒ ܚܕܵܐ ܡܐܲܢܹܐ ܗܹܡܸܙܡܵܢܹ̈ܐ ܗܲܪ ܟܹܐ ܝܵܕܥܸܢ ܠܹܐ ܝ݇ܢܵܐ ܟܘܼܣܝܹܐ ܡܸܢܹܗ؛ ܕܠܹܐ ܝ݇ܢܵܐ ܦܝܼܫܹܐ ܥܒܼܝܼܕܹܐ ܒܛܸܫܘܵܐ. 27ܗܲܡܘܼܢܹܐ ܝَܘܸܬ؛ ܡܲܠܟܵܐ ܐܵܓܹܪܦܵܐ؛ ܠܢܒܼܝܼܹ̈ܐ؛ ܒܝܼܕܵܥܝܵܐ ܝ݇ܘܸܢ ܕܗܲܡܘܼܢܹܐ ܝَܘܸܬ. 28ܐَܡܸܪܹܗ ܐܸܠܹܗ ܡܲܠܟܵܐ ܐܵܓܹܪܦܘܿܣ؛ ܒܚܲܕَܟ̰ܵܐ ܡܸܢܕܝܼ ܒܸܥܒܼܵܕܵܝܼ ܝَܘܸܬ ܪܵܙܝܼ ܕܗܵܘܸܢ ܟܪܸܣܛܝܵܢܵܐ. 29ܘܦܵܘܠܘܿܣ ܐَܡܸܪܹܗ؛ ܒܵܥܹܝܢ ܗܘܼܵܐ ܡ̣ܢ ܐܲܠܵܗܵܐ؛ ܒܚܲܕَܟ̰ܵܐ ܘܒܪܵܒܵܐ؛ ܠܵܐ ܕܗܲܪ ܐܸܠܘܼܟܼ؛ ܐܸܠܵܐ ܐܘܼܦ ܠܟܠܵܝܗܝ ܐܵܢܝܼ ܕܒܸܫܡܵܥܝܼ ܝܢܵܐ ܐܸܕܝܘܿܡ ܕܗܵܘܝܼ ܐܲܝܟܼ ܕܝܼܝܼ؛ ܫܒܼܘܿܩ ܡ̣ܢ ܕܐܲܢܹܐ ܝܸܣܘܼܪܹ̈ܐ. 30ܘܩܸܡܠܹܗ ܡܲܠܟܵܐ؛ ܘܗܵܟܝܼܡ؛ ܘܒܲܪܢܝܼܩܹܐ؛ ܘܐܵܢܝܼ ܕܝܬܝܼܒܼܹܐ ܗܘܼܵܘ ܥܲܡܵܝܗܝ؛ 31ܘܟܲܕ ܦܠܸܛܠܗܘܿܢ ܡ̣ܢ ܬܵܡܵܐ؛ ܗܘܼܡܙܸܡܠܗܘܿܢ ܚܲܕ ܥܲܡ ܕܗ̇ܘ ܐَܚܹܪَܢܵܐ ܒܹܐܡܵܪܵܐ؛ ܡܸܢܕܝܼ ܕܚܵܫܸܚ ܠܡܵܘܬܵܐ ܝܲܢ ܠܝܸܣܘܼܪܹ̈ܐ؛ ܐܵܗܵܐ ܓܲܒܼܪܵܐ ܠܹܐ ܝܠܹܗ ܥܒܼܝܼܕܵܐ. 32ܘܐَܡܸܪܹܗ ܐܵܓܹܪܦܘܿܣ ܠܦܹܗܹܣܛܘܿܣ؛ ܟܹܐ ܡܵܨܹܐ ܗَܘܵܐ ܐܵܗܵܐ ܓܲܒܼܪܵܐ ܕܦܵܐܹܫ ܗܘܼܵܐ ܫܸܪܝܵܐ؛ ܐܸܢ ܒܚܵܨܹܗ ܕܩܹܣܲܪ ܠܵܐ ܗܵܘܹܐ ܗَܘܵܐ ܩܸܪܝܵܐ.