0:00
/
1ܘܩܸܡܠܗَܘܿܢ ܟܠܹܗ ܟܸܢܫܵܝܗܝ ܘܡܘܼܬَܝܹܠܗܘܿܢ ܐܸܠܹܗ ܠܟܸܣ ܦܝܼܠܵܛܘܿܣ. 2ܘܫܘܼܪܹܠܗܘܿܢ ܕܡܵܚܝܼ ܕܲܪ̈ܗܲܩܘܼܗܝ: ܘܐܵܡܪܝܼ: ܠܐܵܗܵܐ ܡܘܼܫَܟ̰ܸܚܠܲܢ ܡܲܚܠܘܼܛܹܐ ܠܛܵܝܸܦܲܢ: ܘܡܲܟܠܘܼܝܹܐ ܕܝܵܗَܒ̣ܵܚ ܚܲܪܓ̰ ܕܪܹܫܵܐ ܠܩܹܣܲܪ: ܘܒܹܐܡܵܪܵܐ ܒܘܼܬ ܕܓܵܢܹܗ: ܕܡܫܝܼܚܵܐ ܝܠܹܗ ܡܲܠܟܵܐ. 3ܐܝܼܢܵܐ ܦܝܼܠܵܛܘܿܣ ܒܘܼܩܸܪܹܗ ܡܸܢܹܗ: ܒܹܐܡܵܪܵܐ: ܐܲܢَܬ ܝܼܘܸܬ ܡܲܠܟܵܐ ܕܝܗَܘܼܕܵܝܹ̈ܐ: ܓ̰ܘܼܘܸܒܠܹܗ ܘܐَܡܝܼܪܹܗ ܐܸܠܹܗ: ܐܲܢَܬ ܒܹܐܡܵܪܵܐ ܝܘܸܬ. 4ܘܐَܡܝܼܪܹܗ ܦܝܼܠܵܛܘܿܣ ܠܓܘܼܪ̈ܵܢܹܐ ܕܟܵܗܢܹ̈ܐ ܘܠܟܸܢܫܵܐ: ܐܵܢܵܐ ܡܸܢܕܝܼ ܗܲܓ̰ܲܬ ܠܹܐ ܝܘܸܢ ܡܵܫَܟ̰ܘܼܚܹܐ ܥܲܠ ܕܐܵܗܵܐ ܐ݇ܢܵܫܵܐ. 5ܐܝܼܢܵܐ ܐܵܢܝܼ ܚܘܼܠܸܢܗܘܿܢ ܘܐَܡܸܪܗܘܿܢ: ܕܫܓܸܫܠܹܗ ܠܛܵܝܸܦܲܢ: ܟܲܕ ܡܵܠܘܿܦܹܐ ܝܠܹܗ ܒܟܠܵܗ̇ ܝܼܗܘܼܕ: ܘܫܘܼܪܹܐܠܹܗ ܡ̣ܢ ܓܠܝܼܠܵܐ ܘܗܲܠ ܠܲܐܟ̣ܵܐ. 6ܐܝܼܢܵܐ ܦܝܼܠܵܛܘܿܣ ܟܲܕ ܫܡܸܥܠܹܗ: ܒܘܼܩܸܪܹܗ: ܕܐܸܢ ܐ݇ܢܵܫܵܐ ܓܠܝܼܠܵܐ ܝܠܹܗ. 7ܘܟܲܕ ܝܕܸܥܠܹܗ ܕܡ̣ܢ ܬܚܘܿܬ ܗܘܼܟܡܵܐ ܕܗܹܪܘܿܕܸܣ ܝܼܗ݇ܘܵܐ. ܫܘܼܕܸܪܹܗ ܠܟܸܣ ܗܹܪܘܿܕܸܣ: ܣܵܒܵܒ ܕܓܵܘ ܐܘܿܪܸܫܠܸܡ ܝܼܗ݇ܘܵܐ ܒܐܵܢܝܼ ܝܵܘܡܵܢܹ̈ܐ. 8ܘܗܹܪܘܿܕܸܣ ܟܲܕ ܚܙܹܐܠܹܗ ܠܝܼܫܘܿܥ: ܚܕܹܠܹܗ ܪܵܒܵܐ: ܣܵܒܵܒ ܕܒܸܒܥܵܝܵܐ ܗ݇ܘܵܐ ܠܸܚܙܵܝܹܗ ܡ̣ܢ ܙܲܒ̣ܢܵܐ ܪܵܒܵܐ: ܣܵܒܵܒ ܕܫܸܡܥܝܵܐ ܗ݇ܘܵܐ ܒܘܼܬ ܕܝܼܹܗ ܪܵܒܵܐ ܡܸܢܕܝܵܢܹ̈ܐ: ܘܒܗܹܒ̣ܝܼ ܗ݇ܘܵܐ ܕܡܸܢܕܝܼ ܢܝܼܫܲܢܩܵܐ ܒܸܬ ܚܵܙܹܐ ܗ݇ܘܵܐ ܥܒ̣ܝܼܕܵܐ ܡܸܢܹܗ. 9ܘܗܹܡܸܙܡܵܢܹ̈ܐ ܪܵܒܵܐ ܒܘܼܩܸܪܹܗ ܡܸܢܹܗ. ܐܝܢܵܐ ܗ̇ܘ ܓ̰ܘܼܘܵܒ ܠܵܐ ܡܘܼܕܸܪܹܗ ܐܸܠܹܗ. 10ܐܝܼܢܵܐ ܒܸܟܠܵܝܵܐ ܗ݇ܘܵܘ ܓܘܼܪ̈ܵܢܹܐ ܕܟܵܗܢܹ̈ܐ ܘܣܵܦܪܹ̈ܐ: ܘܒܙܲܪܒ ܡܵܚܝܼ ܗ݇ܘܵܘ ܕܲܪ̈ܗܲܩܘܼܗܝ. 11ܘܗܹܪܘܿܕܸܣ ܡܘܼܣܠܹܠܹܗ: ܗ̇ܘ ܘܣܲܪ̈ܒܵܙܘܼܗܝ: ܘܟܲܕ ܡܲܣܚܘܼܪܹܐ ܡܘܼܠܒܸܫܠܹܗ ܓ̰ܘܼ̈ܠܹܐ ܣܡܘܼܩܹ̈ܐ: ܘܡܘܼܕܸܪܹܗ ܠܟܸܣ ܦܝܼܠܵܛܘܿܣ. 12ܘܒܗ̇ܘ ܝܵܘܡܵܐ ܗَܘܹܐܠܗَܘܿܢ ܕܵܘܣܬܹ̈ܐ ܦܝܼܠܵܛܘܿܣ ܘܗܹܪܘܿܕܸܣ ܡܥܘܼܕܵܠܹܐ: ܣܵܒܵܒ ܕܸܫܡܸܢܵܝܗܝ ܘܼܬܵܐ ܐܝܼܬ ܗ݇ܘܵܐ ܡ̣ܢ ܩܵܕَܡܵܝܬܵܐ ܒܹܝܠܝ. 13ܘܩܪܹܐܠܹܗ ܦܝܼܠܵܛܘܿܣ ܠܓܘܼܪ̈ܵܢܹܐ ܕܟܵܗܢܹ̈ܐ ܘܠܪܹ̈ܫܵܢܹܐ ܘܠܛܵܝܸܦܵܐ. ܘܐَܡܝܼܪܹܗ ܐܸܠܝܼ: ܡܘܼܬَܝܹܠܵܘܟ̣ܘܿܢ ܠܟܸܣܠܝܼ ܐܵܗܵܐ ܐ݇ܢܵܫܵܐ ܐܲܝܟܼ ܕܡܲܕܘܼܪܹܐ ܝܠܹܗ ܛܵܝܸܦܵܐ. 14ܘܗܵܐ: ܐܵܢܵܐ ܨܘܼܚܨܹܠܝܼ ܐܸܠܹܗ ܩܵܕَܡ ܥܲܝܢܵܘ̈ܟ̣ܘܿܢ: ܘܗܲܓ̰ܲܬ ܡܸܢܕܝܼ ܠܵܐ ܡܘܼܫَܟ̰ܸܚܠܝܼ ܒܐܵܗܵܐ ܐ݇ܢܵܫܵܐ ܡ̣ܢ ܕܐܵܢܝܼ ܕܒܸܠܝܵܡܹܗ ܝܬܘܿܢ. 15ܐܸܠܵܐ ܐܘܼܦ ܠܵܐ ܗܹܪܘܿܕܸܣ: ܣܵܒܵܒ ܕܫܘܼܕܸܪܝܼ ܐܸܠܵܘܟ̣ܘܿܢ ܠܟܸܣܠܹܗ: ܘܗܵܐ: ܡܸܢܕܝܼ ܕܚܵܫܸܚ ܠܡܵܘܬܵܐ ܠܹܐ ܝܠܹܗ ܦܠܝܼܚܵܐ. 16ܒܲܣ ܒܸܬ ܬܲܥܠܡܸܢܹܗ ܘܒܸܬ ܫܵܪܸܢܹܗ. 17ܣܵܒܵܒ ܘܵܓ̰ܸܒ ܝܼܗ݇ܘܵܐ ܕܫܵܪܹܐ ܗ݇ܘܵܐ ܠܗ݇ܘܿܢ ܚܲܕَ ܒܥܹܐܕܵܐ. 18ܐܝܼܢܵܐ ܡܘܼܩܘܸܚܠܗܘܿܢ ܟܠܹܗ ܟܸܢܫܵܐ: ܘܐܵܡܪܝܼ: ܫܩܘܿܠ ܠܹܗ ܐܵܗܵܐ: ܘܫܪܝܼ ܠܲܢ ܠܒܲܪ ܐܲܒܵܐ. 19ܗ̇ܘ ܕܣܵܒܵܒ ܕܫܓ̣ܘܼܫܝܵܐ: ܘܩܸܛܠܵܐ: ܕܗَܘܹܐܠܹܗ ܓܵܘ ܡܕܝܼܢَܬܵܐ: ܕܸܪܝܵܐ ܗ݇ܘܵܐ ܓܵܘ ܒܹܝܬ ܐܲܣܝܼܪܹ̈ܐ. 20ܐܝܼܢܵܐ ܡܸܢَܕܪܸܫَ ܗܘܼܡܙܸܡܠܹܗ ܥܲܡܵܝܗܝ ܦܝܼܠܵܛܘܿܣ: ܟܲܕ ܒܵܥܝܹܐ ܗ݇ܘܵܐ ܕܫܵܪܹܐ ܠܝܼܫܘܿܥ. 21ܐܝܼܢܵܐ ܐܵܢܝܼ ܡܲܩܘܸܚܝܼ ܗ݇ܘܵܘ ܘܐܵܡܪܝܼ: ܙܩܘܿܦ ܠܹܗ: ܙܩܘܿܦ ܠܹܗ. 22ܐܝܼܢܵܐ ܗ̇ܘ ܓܵܗܵܐ ܕܬܠܵܬَ ܐَܡܝܼܪܹܗ ܐܸܠܵܝܗܝ: ܡܘܼܕܝܼ ܚܸܪܒܵܐ ܥܒ̣ܝܼܕܵܐ ܝܠܹܗ ܐܵܗܵܐ: ܡܸܢܕܝܼ ܗܲܓ̰ܲܬ ܕܚܵܫܚܵܐ ܠܡܵܘܬܵܐ ܠܵܐ ܡܘܼܫَܟ̰ܸܚܠܝܼ ܒܝܹܗ. 23ܒܲܣ ܒܸܬ ܬܲܥܠܡܸܢܹܗ ܘܫܵܪܸܢܹܗ. ܐܝܼܢܵܐ ܐܵܢܝܼ ܡܲܠܝܸܙܝܼ ܗ݇ܘܵܘ ܒܩܵܠܵܐ ܪܵܡܵܐ: ܘܛܵܠܒܝܼ ܗ݇ܘܵܘ ܕܦܵܐܹܫ ܙܩܝܼܦܵܐ. ܘܓܠܸܒܠܹܐ ܩܵܠܵܐ ܕܝܼܵܝ. 24ܘܦܝܼܠܵܛܘܿܣ ܦܩܸܕܠܹܗ ܕܗܵܘܝܵܐ ܗ݇ܘܵܐ ܡܲܛܠܲܒܵܝܗܝ. 25ܘܫܪܹܠܹܗ ܠܗ̇ܘ ܕܣܵܒܵܒ ܕܫܓ̣ܘܼܫܝܵܐ ܘܩܸܛܠܵܐ ܕܸܪܝܵܐ ܗ݇ܘܵܐ ܓܵܘ ܒܹܝܬ ܐܲܣܝܼܪܹ̈ܐ: ܗ̇ܘ ܕܛܠܸܒܠܗܘܿܢ: ܐܝܼܢܵܐ ܠܝܼܫܘܿܥ ܣܘܼܦܹܠܹܗ ܠܪܸܙܵܝܵܝܗܝ. 26ܘܟܲܕ ܠܵܒܘܿܠܹܗ ܗ݇ܘܵܘ: ܕܒܸܩܠܗܘܿܢ ܠܫܸܡܥܘܿܢ ܩܸܘܪܝܼܢܵܝܵܐ ܕܒܹܐܬܵܝܵܐ ܗ݇ܘܵܐ ܡ̣ܢ ܡܵܬܵܐ: ܘܡܘܼܬܸܒ̣ܠܗܘܿܢ ܥܲܠܘܼܗܝ ܙܩܝܼܦܵܐ ܕܛܵܥܸܢ ܗ݇ܘܵܐ ܒܵܬَܪܹܗ ܕܝܼܫܘܿܥ. 27ܘܒܹܐܬܵܝܵܐ ܗ݇ܘܵܐ ܒܵܬَܪܹܗ ܒܘܼܫܵܝܝܼ ܕܛܵܝܸܦܵܐ: ܘܒܲܟ̣ܬܵܬܹ̈ܐ ܕܒܸܥܒ̣ܵܕܵܐ ܗ݇ܘܵܐ ܬܵܙܝܼ ܘܒܸܠܝܵܝܵܐ ܥܲܠܘܼܗܝ. 28ܘܕܸܪܹܗ ܠܟܸܣܠܵܝܗܝ ܝܼܫܘܿܥ: ܘܐَܡܝܼܪܹܗ: ܒܢܵܬܹ̈ܐ ܕܐܘܿܪܸܫܠܸܡ: ܠܵܐ ܒܵܟ̣ܝܼܬܘܿܢ ܥܲܠܵܝܗܝ: ܐܝܼܢܵܐ ܥܲܠ ܓܵܢܵܘܟ̣ܘܿܢ ܒܟܹܡܘܿܢ ܘܥܲܠ ܒܢܘܿܢܵܘ̈ܟ̣ܘܿܢ. 29ܣܵܒܵܒ ܗܵܐ: ܒܹܐܬܵܝܵܐ ܝܢܵܐ ܝܵܘܡܵܢܹ̈ܐ ܕܒܝܼܵܝܗܝ ܒܸܬ ܐܵܡܪܝܼ: ܛܘܼܒ̣ܵܐ ܠܥܲܩܪ̈ܵܬܵܐ ܘܠܟܹܪَܣܵܬ̈ܵܐ ܕܠܵܐ ܝܠܸܕܠܗܘܿܢ: ܘܠܒܸܙܵܙܹ̈ܐ ܕܠܵܐ ܡܘܼܡܸܨܠܗܘܿܢ. 30ܗ̇ܝܓܵܗ ܒܸܬ ܫܵܪܝܼ ܠܹܐܡܵܪܵܐ ܠܛܘܼܪ̈ܵܢܹܐ: ܢܦܘܿܠܘܿܢ ܥܲܠܲܢ: ܘܠܪ̈ܘܼܡܝܵܬܹܐ: ܟܵܣܘܿܢ ܠܲܢ. 31ܣܵܒܵܒ ܐܸܢ ܒܩܲܝܣܵܐ ܬܲܠܝܼܠܵܐ ܐܲܢܹܐ ܒܸܥܒ̣ܵܕܵܐ ܝܢܵܐ: ܒܒܵܪܘܿܙܵܐ ܡܘܼܕܝܼ ܒܸܬ ܗܵܘܹܐ. 32ܘܦܸܫܠܗَܘܿܢ ܡܘܼܬَܝܹܐ ܥܲܡܹܗ ܬܪܹܝ ܐ݇ܚܹܪ̈݇ܢܹܐ ܥܵܒ̣ܕܵܢܹ̈ܐ ܕܒܝܼܫܵܬܹ̈ܐ: ܕܦܵܝܫܝܼ ܩܛܝܼܠܹ̈ܐ. 33ܘܟܲܕ ܐ݇ܬܹܐܠܗܘܿܢ ܠܚܕܵܐ ܕܘܼܟܬܵܐ ܕܦܝܵܫܵܐ ܝ݇ܠܵܗ̇ ܩܪܝܼܬܵܐ ܩܲܪܩܲܦܬܵܐ: ܙܩܸܦܠܗܘܿܢ ܐܸܠܹܗ ܬܵܡܵܐ: ܘܠܐܵܢܝܼ ܥܵܒ̣ܕܵܢܹ̈ܐ ܕܒܝܼܫܵܬܹ̈ܐ: ܚܲܕَ ܡ̣ܢ ܝܲܡܝܼܢܹܗ ܘܚܲܕَ ܡ̣ܢ ܣܸܡܵܠܹܗ. 34ܐܝܼܢܵܐ ܝܼܫܘܿܥ ܐَܡܝܼܪܹܗ: ܒܵܒܵܐ: ܫܒ̣ܘܿܩ ܠܗ݇ܘܿܢ: ܣܵܒܵܒ ܕܠܹܐ ܝܢܵܐ ܒܝܼܕܵܥܝܵܐ ܡܘܼܕܝܼ ܒܸܥܒ̣ܵܕܵܐ ܝܢܵܐ. ܘܦܘܼܠܹܠܗܘܿܢ ܠܓ̰ܘܼܠܘܼ̈ܗܝ: ܘܕܪܹܠܗܘܿܢ ܥܲܠܵܝܗܝ ܦܸܫܟܵܐ. 35ܐܝܼܢܵܐ ܟܠܹܐܠܹܐ ܛܵܝܸܦܵܐ ܒܸܚܝܵܪܵܐ. ܘܡܲܣܚܸܪܝܼ ܗ݇ܘܵܘ ܒܝܹܗ ܐܘܼܦ ܓܘܼܪ̈ܵܢܹܐ: ܘܐܵܡܪܝܼ: ܠܐ݇ܚܹܪ̈݇ܢܹܐ ܡܘܼܚܹܠܹܗ: ܡܲܚܹܐ ܠܓܵܢܹܗ: ܐܸܢ ܐܵܗܵܐ ܝܠܹܗ ܡܫܝܼܚܵܐ ܓܘܼܒ̇ܝܹܗ ܕܐܲܠܵܗܵܐ. 36ܘܡܵܣܚܸܪܝܼ ܗ݇ܘܵܘ ܒܝܹܗ ܐܘܼܦ ܣܲܪ̈ܒܵܙܹܐ: ܒܹܐܬܵܝܵܐ ܠܟܸܣܠܹܗ: ܡܲܝܬܘܼܝܹܐ ܐܸܠܹܗ ܚܵܠܵܐ. 37ܘܒܹܐܡܵܪܵܐ: ܐܸܢ ܐܲܢَܬ ܝܼܘܸܬ ܡܲܠܟܵܐ ܕܝܼܗَܘܼܕܵܝܹ̈ܐ: ܡܲܚܝܼ ܓܵܢܘܼܟ. 38ܐܝܼܢܵܐ ܐܝܼܬ ܗ݇ܘܵܐ ܐܘܼܦ ܟܬܵܒ̣ܵܐ ܟܬܝܼܒ̣ܵܐ ܠܥܸܠܸܠ ܡܸܢܹܗ: ܒܠܸܫܵܢܵܐ ܕܝܵܘܢܵܝܹ̈ܐ ܘܕܪܗَܘܿܡܵܝܹܐ ܘܕܥܸܒ̣ܪ̈ܵܝܹܐ: ܐܗܐ ܝܠܹܗ ܡܲܠܟܵܐ ܕܝܗَܘܼܕܝ̈ܐ. 39ܘܚܲܕَ ܡ̣ܢ ܕܐܵܢܝܼ ܥܵܒ̣ܕܵܢܹ̈ܐ ܕܒܝܼܫܵܬܹ̈ܐ ܕܬܸܠܝܹܐ ܗ݇ܘܵܘ ܥܲܡܹܗ: ܓܵܕܸܦ ܗ݇ܘܵܐ ܥܲܠܘܼܗܝ ܘܐܵܡܸܪ: ܐܸܢ ܐܲܢَܬ ܝܼܘܸܬ ܡܫܝܼܚܵܐ: ܦܵܨܝܼ ܓܵܢܘܼܟ ܘܐܸܠܲܢ. 40ܓ̰ܘܼܘܸܒܠܹܗ ܗ̇ܘ ܐ݇ܚܹܪ݇ܢܵܐ: ܘܢܓ̰ܸܘܼܠܹܐ ܒܝܹܗ: ܘܐَܡܝܼܪܹܗ: ܐܘܼܦ ܡ̣ܢ ܐܲܠܵܗܵܐ ܠܹܐ ܝܘܸܬ ܒܸܙܕܵܥܝܵܐ: ܕܐܘܼܦ ܐܲܢَܬ ܒܐܵܗܵܐ ܕܝܼܘܵܢ ܝܼܘܸܬ: 41ܘܐܲܚܢܲܢ ܒܗܵܩܘܼܬܵܐ: ܣܵܒܵܒ ܐܲܝܟܼ ܕܚܵܫܚܝܼ ܥܵܡ̈ܠܲܢ ܩܵܒܘܿܠܹܐ ܝܘܵܚ: ܐܝܼܢܵܐ ܐܵܗܵܐ ܡܸܢܕܝܼ ܚܸܪܒܵܐ ܠܹܐ ܝܠܹܗ ܥܒ̣ܝܼܕܵܐ. 42ܘܐَܡܝܼܪܹܗ: ܝܼܫܘܿܥ: ܕܟ̣ܘܿܪܝܼ: ܐܝܼܡܲܢ 43ܕܐܵܬܸܬ ܒܡܲܠܟܘܼܬܘܼܟ. ܐܵܡܸܪ ܐܸܠܹܗ ܝܼܫܘܿܥ: ܬܪܘܿܨܵܐ ܒܹܐܡܵܪܵܐ ܝܘܸܢ ܐܸܠܘܼܟܼ: ܕܐܸܕܝܘܿܡَ ܥܲܡܝܼ ܒܸܬ ܗܵܘܸܬ ܓܵܘ ܦܲܪܕܲܝܣܵܐ. 44ܐܝܼܢܵܐ ܐܲܝܟܼ ܣܵܥܲܬ ܕܐܸܫܸܬ ܝܼܗ݇ܘܵܐ: ܘܗَܘܹܐܠܹܗ ܚܸܫܟܵܐ ܥܲܠ ܟܠܵܗ̇ ܐܲܪܥܵܐ ܗܲܠ ܣܵܥܲܬ ܕܐܸܬܫܲܥ. 45ܘܫܸܡܫܵܐ ܚܒܹܠܹܐ: ܘܣܸܬܪܵܐ ܕܗܲܝܟܠܵܐ ܦܸܫܠܹܗ ܟ̰ܘܼܢܟ̰ܸܪܵܐ ܡ̣ܢ ܒܹܝܦܲܠܓܹܗ. 46ܘܡܘܼܩܘܸܚܠܹܗ ܝܼܫܘܿܥ ܒܩܵܠܵܐ ܪܵܡܵܐ: ܘܐَܡܝܼܪܹܗ: ܒܵܒܵܐ: ܒܐܝܼܕܘܼ̈ܟ ܣܵܦܘܿܝܹܐ ܝܘܸܢ ܪܘܼܚܝܼ. ܐܵܗܵܐ ܐَܡܝܼܪܹܗ: ܘܣܘܼܦܵܝܠܹܗ ܓܵܢܹܗ. 47ܘܟܲܕ ܚܙܹܐܠܹܗ ܩܸܢܛܪܘܿܢܵܐ ܡܸܢܕܝܼ ܕܗَܘܹܐܠܹܗ: ܫܘܼܒܸܚܠܹܗ ܠܐܲܠܵܗܵܐ: ܒܹܐܡܵܪܵܐ: ܒܬܪܘܼܨܬܵܐ ܐܵܗܵܐ ܐ݇ܢܵܫܵܐ ܙܲܕܝܼܩܵܐ ܗ݇ܘܵܐ. 48ܘܟܠܵܝܗܝ ܟܸܢܫܹ̈ܐ ܕܝܼܗ݇ܘܵܘ ܓ̰ܸܡܥܝܹܐ ܠܐܵܗܵܐ ܚܙܵܝܬܵܐ: ܟܲܕ ܚܙܹܐܠܗܘܿܢ ܡܸܢܕܝܼ ܕܗَܘܹܐܠܹܗ: ܕܸܪܗܘܿܢ ܒܸܡܚܵܝܵܐ ܥܲܠ ܨܲܕܪܵܝܗܝ. 49ܘܟܸܠܝܹܐ ܗ݇ܘܵܘ ܡ̣ܢ ܪܸܚܩܵܐ ܟܠܵܝܗܝ ܝܵܕܥܵܢܘܼ̈ܗܝ: ܘܒܲܟ̣ܬܵܬܹ̈ܐ ܕܝܼܗ݇ܘܵܘ ܐَܬܝܹܐ ܥܲܡܹܗ ܡ̣ܢ ܓܠܝܼܠܵܐ: ܘܒܸܚܙܵܝܵܐ ܗ݇ܘܵܘ ܐܲܢܹܐ. 50ܘܗܵܐ: ܚܲܕَ ܐ݇ܢܵܫܵܐ ܕܫܸܡܹܗ ܝܵܘܣܸܦ: ܪܵܐܝܝܼܟܵܪ: ܡ̣ܢ ܪܵܡܬܵܐ ܡܕܝܼܢَܬܵܐ ܕܝܼܗܘܼܕ: ܐ݇ܢܵܫܵܐ ܛܵܒ̣ܵܐ ܘܙܲܕܝܼܩܵܐ. 51ܐܵܗܵܐ ܠܹܐ ܗ݇ܘܵܐ ܬܸܒܥܝܵܐ ܠܪܸܙܵܝܵܝܗܝ ܘܠܦܘܼܠܚܵܢܵܝܗܝ: ܕܒܸܣܦܵܪܵܐ ܗ݇ܘܵܐ ܠܡܲܠܟܘܼܬܵܐ ܕܐܲܠܵܗܵܐ. 52ܐܵܗܵܐ ܐَܬܹܐܠܹܗ ܠܟܸܣ ܦܝܼܠܵܛܘܿܣ: ܘܛܠܸܒܠܹܗ ܦܲܓ̣ܪܹܗ ܕܝܼܫܘܿܥ. 53ܘܡܘܼܨܠܹܠܹܗ: ܘܟܘܼܪܸܟ̣ܠܹܗ ܒܟܸܬܵܢ: ܘܡܘܼܬܸܒ̣ܠܹܗ ܓܵܘ ܒܹܝܬ ܩܒ̣ܘܼܪܵܐ ܢܩܝܼܪܬܵܐ ܒܟܹܐܦܵܐ: ܗ̇ܝ ܕܗܵܠܵܐ ܐ݇ܢܵܫܵܐ ܠܹܐ ܗ݇ܘܵܐ ܡܘܼܬܒ̣ܵܐ ܓܵܘܘܼܗ̇. 54ܘܝܵܘܡܵܐ ܕܗܵܕܲܪܬܵܐ ܗ݇ܘܵܐ: ܘܫܲܒܬܵܐ ܒܸܙܪܵܩܵܐ ܗ݇ܘܵܐ. 55ܘܐ݇ܬܹܐܠܗܘܿܢ ܒܵܬَܪܹܗ ܒܲܟ̣ܬܵܬܹ̈ܐ: ܐܵܢܝܼ ܕܐَܬܝܹܐ ܗ݇ܘܵܘ ܥܲܡܹܗ ܡ̣ܢ ܓܠܝܼܠܵܐ: ܘܚܸܙܝܵܠܗܘܿܢ ܠܩܲܒ̣ܪܵܐ: ܘܕܵܐܟ̣ܝܼ ܦܸܫܠܹܗ ܡܘܼܬܒ̣ܵܐ ܦܲܓ̣ܪܹܗ. 56ܘܕܸܪܗܘܿܢ ܗܘܼܕܸܪܗܘܿܢ ܒܸܣܡܹ̈ܐ ܘܗܹܪ̈ܘܿܡܹܐ: ܘܒܫܲܒܬܵܐ ܫܠܹܠܗܘܿܢ ܐܲܝܟܼ ܦܘܼܩܕܵܢܵܐ.