0:00
/
1ܐܝܼܢܵܐ ܗَܘܹܐ ܠܵܗ̇ ܟܲܕ ܓ̰ܡܸܥܠܹܗ ܥܲܠܘܼܗܝ ܟܸܢܫܵܐ ܠܸܫܡܲܥܝܵܐ ܗܹܡܸܙܡܵܢ ܕܐܲܠܵܗܵܐ: ܘܗ̇ܘ ܟܸܠܝܵܐ ܗ݇ܘܵܐ ܥܲܠ ܣܸܦܬܵܐ ܕܝܵܡܵܐ ܕܓܹܢܣܲܪ. 2ܘܚܙܹܐܠܹܗ ܬܲܪ̈ܬܹܝ ܓܵܡ̈ܝܹܐ ܟܸܠܝܹܐ ܥܲܠ ܣܸܦܬܵܐ ܕܝܵܡܵܐ: ܐܝܼܢܵܐ ܨܲܝܵܕܹ̈ܐ ܐܣܝܼܩܹܐ ܗ݇ܘܵܘ ܡܸܢܵܝܗܝ ܘܚܲܠܘܼܠܹܐ ܗ݇ܘܵܘ ܓܲܪ̈ܕܵܝܗܝ. 3 ܘܐ݇ܣܸܩܠܹܗ ܥܲܠ ܚܕܵܐ ܡ̣ܢ ܓܵܡ̈ܝܹܐ: ܕܝܼܗ݇ܘܵܐ ܕܫܸܡܥܘܿܢ: ܘܒܸܥܠܹܗ ܕܠܵܒܸܠ ܗ݇ܘܵܐ ܠܵܗ̇ ܚܲܕَܟ̰ܵܐ ܡ̣ܢ ܒܸܪܙܵܐ: ܘܝܬܸܒ̣ܠܹܗ ܘܡܘܼܠܸܦܠܹܗ ܡ̣ܢ ܓܵܡܝܼ ܠܟܸܢܫܹ̈ܐ. 4ܘܟܲܕ ܫܬܸܩܠܹܗ ܡ̣ܢ ܗܲܡܙܲܡܬܹܗ: ܐَܡܝܼܪܹܗ ܠܫܸܡܥܘܿܢ: ܠܵܒܠܘܿܢ ܠܥܘܼܡܩܵܐ: ܘܕܪܹܝܡܘܿܢ ܓܲܪ̈ܕܵܘܟ̣ܘܿܢ ܠܨܲܝܕܵܐ. 5ܘܓ̰ܘܼܘܸܒܠܹܗ ܫܸܡܥܘܿܢ ܘܐَܡܝܼܪܹܗ: ܐܸܠܹܗ: ܪܵܒܝܼܝܼ: ܟܠܹܗ ܠܲܝܠܹܐ ܓ̰ܸܗَܠܲܢ: ܘܡܸܢܕܝܼ ܠܵܐ ܕܒܸܩܠܲܢ: ܐܝܼܢܵܐ ܒܚܵܬܸܪ ܕܗܹܡܸܙܡܵܢܘܼܟ ܒܸܬ ܕܵܪܸܢ ܓܲܪܕܵܐ. 6ܘܟܲܕ ܐܵܗܵܐ ܥܒܸܕܠܗܘܿܢ: ܕܒܸܩܠܗܘܿܢ ܢܘܼܢܹ̈ܐ ܒܘܼܫܵܝܝܼ ܪܵܒܵܐ: ܘܦܝܵܫܵܐ ܗ݇ܘܵܐ ܟ̰ܘܼܢܟ̰ܸܪܵܐ ܓܲܪܕܵܝܗܝ. 7 ܘܪܡܸܙܠܗܘܿܢ ܠܚܲܒ̣ܪ̈ܵܘܵܬܵܝܗܝ ܕܒܓܵܡܝܼ ܐܚܹܪَܬܵܐ: ܕܐܵܬܝܼ ܗ݇ܘܵܘ ܗܲܝܸܪܝܼ ܠܗ݇ܘܿܢ. ܘܐ݇ܬܹܐܠܗܘܿܢ ܡܸܠܝܵܝܠܗܘܿܢ ܬܸܪ̈ܘܵܝܗܝ ܓܵܡ̈ܝܹܐ: ܐܲܝܟܼ ܕܒܸܛܒܲܥܝܵܐ ܗ݇ܘܵܘ. 8ܐܝܼܢܵܐ ܟܲܕ ܚܙܹܐܠܹܗ ܫܸܡܥܘܿܢ ܟܹܐܦܵܐ: ܢܦܸܠܹܗ ܩܵܕَܡ ܒܘܼܪ̈ܟܵܟܹܐ ܕܝܼܫܘܿܥ: ܘܐَܡܝܼܪܹܗ: ܦܪܘܿܩ ܡܸܢܝܼ: ܣܵܒܵܒ ܐ݇ܢܵܫܵܐ ܚܲܛܵܝܵܐ ܝܘܸܢ: ܝܵܐ ܡܵܪܝܼ. 9ܣܵܒܵܒ ܕܥܘܼܓ̰ܵܒܵܐ ܕܒ̣ܝܼܩܘܼܗܝ ܗ݇ܘܵܐ ܘܠܟܠܵܝܗܝ ܐܵܢܝܼ ܕܥܲܡܹܗ: ܥܲܠ ܨܲܝܕܵܐ ܕܢܘܼܢܹ̈ܐ ܕܕܒܸܩܠܗܘܿܢ. 10ܘܗܲܕܟ̣ܵܐ ܐܘܼܦ ܠܝܲܥܩܘܿܒ̣ ܘܠܝܘܿܚܲܢܵܢ ܒܢܘܿܢܹ̈ܐ ܕܙܲܒ̣ܕܲܝ: ܕܝܼܗ݇ܘܵܘ ܫܵܪ̈ܝܼܟܹܐ ܕܫܸܡܥܘܿܢ: ܘܐَܡܝܼܪܹܗ ܝܼܫܘܿܥ ܠܫܸܡܥܘܿܢ: ܠܵܐ ܙܵܕܸܥܬ: ܡ̣ܢ ܐܵܕܝܼܵܐ ܒܢܲܝ̈ ܐ݇ܢܵܫܵܐ ܒܸܬ ܗܵܘܸܬ ܒܸܨܝܵܕܵܐ. 11ܘܟܲܕ ܡܘܼܬَܝܵܝܠܗܘܿܢ ܓܵܡ̈ܝܹܐ ܠܐܲܪܥܵܐ: ܫܒܸܩܠܗܘܿܢ ܟܠ ܡܸܢܕܝܼ: ܘܐ݇ܬܹܐܠܗܘܿܢ ܒܵܬَܪܹܗ. 12ܘܗَܘܹܐ ܠܵܗ̇ ܟܲܕ ܗ̇ܘ ܓܵܘ ܚܕܵܐ ܡ̣ܢ ܡܕܝܼܢܵܬܹ̈ܐ ܗ݇ܘܵܐ: ܗܵܐ: ܚܲܕَ ܐ݇ܢܵܫܵܐ ܕܡܸܠܝܵܐ ܓܸܪܒ̣ܵܐ: ܚܙܹܐܠܹܗ ܠܝܼܫܘܿܥ ܘܢܦܸܠܹܗ ܥܲܠ ܦܵܬܹܗ: ܘܦܲܪܦܸܠ ܗ݇ܘܵܐ ܒܝܹܗ: ܘܐܵܡܸܪ ܐܸܠܹܗ: ܡܵܪܝܼ: ܐܸܢ ܒܵܣܡܵܐ ܠܘܼܟܼ ܟܹܐ ܡܵܨܸܬ ܠܕܵܟ̣ܘܿܝܝܼ. 13ܘܦܘܼܫܛܵܠܹܗ ܐܝܼܕܹܗ: ܕܩܸܪܹܗ ܒܝܹܗ: ܘܐَܡܝܼܪܹܗ: ܒܸܒܣܵܡܝܼ ܝ݇ܠܵܗ̇: ܦܘܼܫ ܕܸܟ̣ܝܵܐ. ܘܕܲܪܣܵܥܲܬ ܐَܙܸܠܹܗ ܡܸܢܹܗ ܓܸܪܒ̣ܵܐ. 14ܘܦܩܸܕܠܹܗ ܕܠܐ݇ܢܵܫܵܐ ܠܵܐ ܐܵܡܪܸܬ: ܐܸܠܵܐ ܙܹܠَܐ ܡܲܚܙܝܼ ܓܵܢܘܼܟ ܠܟܵܗܢܵܐ: ܘܡܲܩܪܸܒ̣ ܡܒܵܕܵܠ ܕܕܵܟ̣ܵܝܬܘܼܟ: ܕܵܐܟ̣ܝܼ ܕܦܩܸܕܠܹܗ ܡܘܼܫܹܐ ܠܣܵܗܕܘܼܬܵܝܗܝ. 15ܘܦܠܸܛܠܵܗ̇ ܒܵܗَܣܹܗ ܒܘܼܫ ܙܵܘܕܵܐ: ܘܓ̰ܵܡܥܝܼ ܗ݇ܘܵܘ ܟܸܢܫܹ̈ܐ ܪܵܒܵܐ ܠܸܫܡܲܥܝܵܐ ܡܸܢܹܗ: ܘܠܸܦܝܵܫܵܐ ܒܘܼܣܡܹܐ ܡ̣ܢ ܡܲܪ̈ܥܵܝܗܝ. 16ܐܝܼܢܵܐ ܗ̇ܘ ܓܪܸܫܠܹܗ ܠܒܲܪܝܼܵܐ ܘܨܵܠܹܐ ܗ݇ܘܵܐ ܨܠܘܿܬܵܐ. 17ܘܗَܘܹܐ ܠܵܗ̇ ܒܚܲܕَ ܡ̣ܢ ܝܵܘܡܵܢܹ̈ܐ: ܟܲܕ ܡܵܠܘܿܦܹܐ ܗ݇ܘܵܐ ܗ̇ܘ: ܝܬܝܼܒܹܐ ܗ݇ܘܵܘ ܦܪ̈ܝܼܫܹܐ ܘܡܲܠܦܵܢܹ̈ܐ ܕܢܵܡܘܿܣܵܐ: ܕܐَܬܝܹܐ ܗ݇ܘܵܘ ܡ̣ܢ ܟܠܵܝܗܝ ܡܵܬܘܵܬܹ̈ܐ: ܕܓܠܝܼܠܵܐ ܘܕܝܼܗܘܼܕ ܘܕܐܘܿܪܸܫܠܸܡ: ܘܚܲܝܠܵܐ ܕܡܵܪܝܵܐ ܐܝܼܬ ܗ݇ܘܵܐ ܠܒܵܣܘܿܡܵܝܗܝ. 18ܘܗܵܐ: ܐ݇ܢܵܫܹ̈ܐ ܡܘܼܬَܝܹܠܗܘܿܢ ܒܫܘܝܼܬܵܐ ܚܲܕَ ܐ݇ܢܵܫܵܐ ܕܝܼܗ݇ܘܵܐ ܫܦܝܼ݇ܠܵܐ: ܘܒܵܥܝܼ ܗ݇ܘܵܘ ܕܡܲܥܒܸܪܝܼ ܡܲܬܒ̣ܝܼܠܹܗ ܩܵܕَܡܘܼܗܝ. 19ܘܟܲܕ ܠܵܐ ܡܨܹܐܠܗܘܿܢ ܕܵܐܟ̣ܝܼ ܡܲܥܒܸܪܝܼ ܠܹܗ: ܡ̣ܢ ܟܸܢܫܵܐ: ܐَܣܸܩܠܗܘܿܢ ܠܐܓܵܪܹܐ: ܘܟ̰ܘܼܢܒܸܠܗܘܿܢ ܐܸܠܹܗ ܥܲܡ ܫܘܝܼܬܹܗ ܡ̣ܢ ܫܟܘܼܪܹ̈ܐ ܠܒܹܝܦܲܠܓܵܐ ܩܵܕَܡ ܝܼܫܘܿܥ. 20ܘܟܲܕ ܚܙܹܐܠܹܗ ܗܲܝܡܵܢܘܼܬܵܝܗܝ: ܐَܡܝܼܪܹܗ: ܐ݇ܢܵܫܵܐ: ܫܒ̣ܝܼܩܹܐ ܝܢܵܐ ܐܸܠܘܼܟܼ ܚܛܝܼܵܬܘܼ̈ܟ. 21ܘܫܘܼܪܹܠܗܘܿܢ ܣܵܦܪܹ̈ܐ ܘܦܪ̈ܝܼܫܹܐ ܒܸܚܫܵܒ̣ܵܐ ܘܐܵܡܪܝܼ: ܡܵܢܝܼ ܝܠܹܗ ܐܵܗܵܐ ܕܗܲܡܙܘܼܡܹܐ ܝܠܹܗ ܓܘܼܕܵܦܹ̈ܐ: ܡܵܢܝܼ ܡܵܨܹܐ ܠܸܫܒ̣ܵܩܵܐ ܚܛܝܼܵܬܹ̈ܐ: ܫܒ̣ܘܿܩ ܡ̣ܢ ܐܲܠܵܗܵܐ ܒܢܲܦ̮ܫܹܗ. 22ܐܝܼܢܵܐ ܝܼܫܘܿܥ ܝܕܸܥܠܹܗ ܚܘܼܫܵܒ̣ܵܝ̈ܗܝ: ܘܓ̰ܘܼܘܸܒܠܹܗ ܘܐَܡܝܼܪܹܗ ܐܸܠܵܝܗܝ: ܡܘܼܕܝܼ ܒܸܚܫܵܒ̣ܵܐ ܝܬܘܿܢ ܒܠܸܒܵܘܟ̣ܘܿܢ. 23ܐܵܝܢܝܼ ܗܵܣܵܢܵܝܝܼ ܝ݇ܠܵܗ̇ ܠܹܐܡܵܪܵܐ: ܫܒ̣ܝܼܩܹܐ ܝܢܵܐ ܐܸܠܘܼܟܼ ܚܛܝܼܵܬܘܼ̈ܟ: ܝܲܢ ܠܹܐܡܵܪܵܐ: ܩܘܼܡَ ܚܕܘܿܪ. 24ܐܝܼܢܵܐ ܕܝܵܕܥܝܼܬܘܿܢ ܕܐܝܼܬ ܠܹܗ ܗܘܼܟܡܵܐ ܒܪܘܿܢܹܗ ܕܐ݇ܢܵܫܵܐ ܒܐܲܪܥܵܐ ܕܫܵܒܸܩ ܚܛܝܼܵܬܹ̈ܐ: ܐَܡܝܼܪܹܗ ܠܫܦܝܼܠܵܐ: ܐܸܠܘܼܟܼ ܒܹܐܡܵܪܵܐ ܝܘܸܢ: ܩܘܼܡَ: ܫܩܘܿܠ ܫܘܝܼܬܘܼܟ: ܘܙܹܠَܐ ܠܒܲܝܬܘܼܟ. 25ܘܕܲܪܣܵܥܲܬ ܩܸܡܠܹܗ ܩܵܕَܡ ܥܲܝܢܵܝ̈ܗܝ: ܘܫܩܝܼܠܵܠܹܗ ܗ̇ܝ ܕܥܲܠܘܼܗ̇ ܕܡܝܼܟ̣ܵܐ ܗ݇ܘܵܐ: ܘܐَܙܸܠܹܗ ܠܒܲܝܬܹܗ. ܟܲܕ ܫܲܒܘܼܚܹܐ ܠܐܲܠܵܗܵܐ. 26ܘܥܘܼܓ̰ܵܒܵܐ ܕܒܸܩܠܹܗ ܠܟܠ ܐ݇ܢܵܫܵܐ: ܘܫܵܒܚܝܼ ܗ݇ܘܵܘ ܠܐܲܠܵܗܵܐ: ܘܦܸܫܠܗَܘܿܢ ܡܸܠܝܹܐ ܙܕܘܿܥܬܵܐ: ܘܐܵܡܪܝܼ: ܕܚܙܹܐܠܲܢ ܐܸܕܝܘܿܡَ ܥܵܓ̰ܸܒܘܵܬ̈ܵܐ. 27ܘܒܵܬَܪ ܐܲܢܹܐ ܦܠܸܛܠܹܗ: ܘܚܙܹܐܠܹܗ ܚܲܕَ ܕܲܡܓ̣ܵܟ̰ܝܼ: ܫܸܡܹܗ ܠܹܘܝܼ: ܝܬܝܼܒ̣ܵܐ ܒܕܘܼܟܵܐ ܕܕܲܡܓ̣ܵܟ̰̈ܝܹܐ: ܘܐَܡܝܼܪܹܗ ܐܸܠܹܗ: ܬܵܐ ܒܵܬَܪܝܼ. 28ܘܫܒܸܩܠܹܗ ܟܠ ܡܸܢܕܝܼ: ܘܩܸܡܠܹܗ ܐَܙܸܠܹܗ ܒܵܬَܪܹܗ. 29ܘܥܒܸܕܠܹܗ ܩܵܐ ܕܝܹܗ ܠܹܘܝܼ ܒܒܲܝܬܹܗ ܐܲܪܚܘܼܬܵܐ ܓܘܼܪܬܵܐ ܘܐܝܼܬ ܗ݇ܘܵܐ ܟܸܢܫܵܐ ܪܵܒܵܐ ܕܕܲܡܓ̣ܵܟ̰̈ܝܹܐ: ܘܕܐ݇ܚܹܪ̈݇ܢܹܐ ܕܝܬܝܼܒܹܐ ܗ݇ܘܵܘ ܠܨܘܼܦܪܵܐ ܥܲܡܵܝܗܝ. 30ܘܛܘܼܪܛܸܡܠܗܘܿܢ ܣܵܦܪܹ̈ܐ ܘܦܪ̈ܝܼܫܹܐ: ܘܐܵܡܪܝܼ ܠܬܲܠܡܝܼܕܘܼ̈ܗܝ: ܩܵܡܘܿܕܝܼ ܥܲܡ ܕܲܡܓ̣ܵܟ̰̈ܝܹܐ ܘܚܲܛܵܝܹ̈ܐ ܒܹܐܟ̣ܵܠܵܐ ܝܬܘܿܢ ܘܒܸܫܬܵܝܵܐ. 31ܘܓ̰ܘܼܘܸܒܠܹܗ ܝܼܫܘܿܥ ܘܐَܡܝܼܪܹܗ ܐܸܠܵܝܗܝ: ܠܹܐ ܝܠܹܗ ܠܵܙܸܡ ܗܲܟܝܼܡ ܠܐܵܢܝܼ ܕܨܵܚ ܝܼܢܵܐ: ܐܸܠܵܐ ܠܐܵܢܝܼ ܕܡܸܪ̈ܥܝܹܐ ܝܢܵܐ. 32ܠܵܐ ܐَܬܹܐܠܝܼ ܕܩܵܪܸܢ ܠܙܲܕܝܼܩܹ̈ܐ: ܐܸܠܵܐ ܠܚܲܛܵܝܹ̈ܐ ܠܬܝܵܒ̣ܘܼܬܵܐ. 33ܘܐܵܢܝܼ ܐَܡܸܪܗܘܿܢ ܐܸܠܹܗ: ܩܵܡܘܿܕܝܼ ܬܲܠܡܝܼܕܹ̈ܐ ܕܝܘܿܚܲܢܵܢ ܟܹܐ ܨܵܝܡܝܼ ܪܵܒܵܐ: ܘܥܵܒ̣ܕܝܼ ܦܲܪ̈ܦܲܠܝܵܬܹ̈ܐ: ܘܗܲܕܟ̣ܵܐ ܐܘܼܦ ܕܦܪ̈ܝܼܫܹܐ: ܐܝܼܢܵܐ ܕܝܼܘܼܟ ܟܹܐ ܐܵܟ̣ܠܝܼ ܘܫܵܬܝܼ. 34ܘܝܼܫܘܿܥ ܐَܡܝܼܪܹܗ ܐܸܠܵܝܗܝ: ܡܵܨܹܝܬܘܿܢ ܕܡܲܨܝܸܡܝܼܬܘܿܢ ܠܒܢܘܿܢܹ̈ܐ ܕܓܢܘܼܢܵܐ: ܟܡܵܐ ܕܚܸܬܢܵܐ ܥܲܡܵܝܗܝ ܝܠܹܗ. 35ܐܝܼܢܵܐ ܒܸܬ ܐܵܬܝܼ ܝܵܘܡܵܢܹ̈ܐ ܟܲܕ ܦܵܐܹܫ ܫܩܝܼܠܵܐ ܚܸܬܢܵܐ ܡܸܢܵܝܗܝ: ܗ̇ܝܓܵܗ ܒܸܬ ܨܵܝܡܝܼ ܒܐܵܢܝܼ ܝܵܘܡܵܢܹ̈ܐ. 36ܘܐܘܼܦ ܐَܡܝܼܪܹܗ ܐܸܠܵܝܗܝ ܡܵܣܵܠܵܐ: ܐ݇ܢܵܫܵܐ ܠܹܐ ܦܵܪܸܛ ܥܵܪܵܝܬܵܐ ܡ̣ܢ ܓ̰ܘܼܠܵܐ ܚܲܕَܬܵܐ ܘܕܵܪܹܗ ܠܵܗ̇ ܥܲܠ ܓ̰ܘܼܠܵܐ ܒܸܠܝܵܐ: ܘܐܸܢ ܠܵܐ: ܒܸܬ ܟ̰ܲܢܟ̰ܸܪ ܠܚܲܕَܬܵܐ: ܘܥܵܪܵܝܬܵܐ ܕܡ̣ܢ ܚܲܕَܬܵܐ ܠܹܐ ܕܵܒ̣ܩܵܐ ܠܒܸܠܝܵܐ. 37ܘܐ݇ܢܵܫܵܐ ܠܹܐ ܕܵܪܹܗ ܚܲܡܪܵܐ ܚܲܕَܬܵܐ ܒܓܘܼܕܹ̈ܐ ܒܸܠܝܹ̈ܐ: ܘܐܸܢ ܠܵܐ: ܒܸܬ ܒܲܙܸܥ ܚܲܡܪܵܐ ܚܲܕَܬܵܐ: ܠܓܘܼܕܹ̈ܐ: ܘܗ̇ܘ ܒܸܬ ܬܵܦܸܟ: ܘܓܘܼܕܹ̈ܐ ܒܸܬ ܬܵܠܩܝܼ. 38ܐܸܠܵܐ ܚܲܡܪܵܐ ܚܲܕَܬܵܐ ܒܓܘܼܕܹ̈ܐ ܚܲܕَܬܹ̈ܐ ܟܹܐ ܕܵܪܝܼ. 39ܘܐ݇ܢܵܫܵܐ ܠܹܐ ܫܵܬܹܐ ܚܲܡܪܵܐ ܥܲܬܝܼܩܵܐ ܕܲܪܣܵܥܲܬ ܒܵܥܝܹܐ ܚܲܕَܬܵܐ: ܣܵܒܵܒ ܕܟܹܐ ܐܵܡܸܪ: ܥܲܬܝܼܩܵܐ ܒܘܼܫ ܒܵܣܝܼܡܵܐ ܝܠܹܗ.