0:00
/
1ܐܝܼܢܵܐ ܗَܘܹܐ ܠܵܗ̇ ܒܫܲܒܬܵܐ: ܕܒܹܐܙܵܠܵܐ ܗ݇ܘܵܐ ܝܼܫܘܿܥ ܡ̣ܢ ܓܵܘ ܡܲܙܪܲܥܝܵܐ: ܘܬܲܠܡܝܼܕܘܼ̈ܗܝ ܫܲܠܓܝܼ ܗ݇ܘܵܘ ܒܘܼܠܹ̈ܐ: ܘܦܵܪܟ̣ܝܼ ܗ݇ܘܵܘ ܒܐܝܼܕܵܬܵܝ̈ܗܝ ܘܐܵܟ̣ܠܝܼ. 2ܐܝܼܢܵܐ ܐ݇ܢܵܫܹ̈ܐ ܡ̣ܢ ܦܪ̈ܝܼܫܹܐ ܐَܡܸܪܗܘܿܢ: ܩܵܡܘܿܕܝܼ ܒܸܥܒ̣ܵܕܵܐ ܝܬܘܿܢ ܡܸܢܕܝܼ ܕܠܹܐ ܝܠܹܗ ܒܕܲܣܬܘܼܪ ܠܸܥܒ̣ܵܕܵܐ ܒܫܲܒܬܵܐ. 3ܘܓ̰ܘܼܘܸܒܠܹܗ ܝܼܫܘܿܥ ܘܐَܡܝܼܪܹܗ ܐܸܠܵܝܗܝ: ܐܘܼܦ ܐܵܗܵܐ ܠܵܐ ܩܪܹܠܵܘܟ̣ܘܿܢ: ܡܸܢܕܝܼ ܕܥܒܸܕܠܹܗ ܕܵܘܝܼܕ ܟܲܕ ܟܦܸܢܹܗ: ܗ̇ܘ ܘܐܵܢܝܼ ܕܥܲܡܹܗ. 4ܕܵܐܟ̣ܝܼ ܥܒܸܪܹܗ ܠܒܲܝܬܹܗ ܕܐܲܠܵܗܵܐ: ܘܠܲܚܡܵܐ ܕܦܵܬܘܼܪܹܗ ܕܡܵܪܝܵܐ ܫܩܸܠܹܗ ܐܟܸܠܹܗ: ܘܝܘܼܗَܒܼܸܠܹܗ ܠܐܵܢܝܼ ܕܥܲܡܹܗ: ܗ̇ܘ ܕܠܹܐ ܗ݇ܘܵܐ ܒܕܲܣܬܘܼܪ ܠܹܐܟ̣ܵܠܵܐ ܐܸܠܵܐ ܠܟܵܗܢܹ̈ܐ ܒܢܲܦ̮ܫܵܝܗܝ. 5ܘܐَܡܝܼܪܹܗ ܐܸܠܵܝܗܝ: ܡܵܪܵܐ ܝܠܹܗ ܕܫܲܒܬܵܐ ܒܪܘܿܢܹܗ ܕܐ݇ܢܵܫܵܐ. 6ܘܗَܘܹܐ ܠܵܗ̇ ܒܫܲܒܬܵܐ ܐܚܹܪَܬܵܐ: ܥܒܸܪܹܗ ܠܟܢܘܼܫܬܵܐ ܘܡܵܠܸܦ ܗ݇ܘܵܐ. ܘܐܝܼܬ ܗ݇ܘܵܐ ܬܵܡܵܐ ܚܲܕَ ܐ݇ܢܵܫܵܐ ܕܐܝܼܕܹܗ ܕܝܲܡܝܼܢܵܐ ܒܪܝܼܙܬܵܐ ܗ݇ܘܵܐ. 7ܘܣܵܦܪܹ̈ܐ ܘܦܪ̈ܝܼܫܹܐ ܢܵܛܪܝܼ ܗ݇ܘܵܘ ܠܹܗ: ܐܸܢ ܒܵܣܸܡ ܗ݇ܘܵܐ ܒܫܲܒܬܵܐ: ܕܡܲܫَܟ̰ܚܝܼ ܕܵܐܟ̣ܝܼ ܕܡܵܚܝܼ ܗ݇ܘܵܘ ܕܲܪܗܲܩܹܗ. 8ܐܝܼܢܵܐ ܗ̇ܘ ܟܹܐ ܝܵܕܸܥ ܗ݇ܘܵܐ ܚܘܼܫܵܒ̣ܵܝ̈ܗܝ: ܘܐَܡܝܼܪܹܗ ܠܗ̇ܘ ܐ݇ܢܵܫܵܐ ܕܒܪܝܼܙܬܵܐ ܗ݇ܘܵܐ ܐܝܼܕܹܗ: ܩܘܼܡَ ܘܟܠܝܼ ܒܒܹܝܦܲܠܓܵܐ: ܘܩܸܡܠܹܗ ܘܟܠܹܠܹܗ. 9ܘܐَܡܝܼܪܹܗ ܐܸܠܵܝܗܝ ܝܼܫܘܿܥ: ܒܸܬ ܒܵܩܪܸܢ ܡܸܢܵܘܟ̣ܘܿܢ: ܒܕܲܣܬܘܼܪ ܝ݇ܠܵܗ̇ ܒܫܲܒܬܵܐ ܠܸܥܒ̣ܵܕܵܐ ܕܨܦܵܝܝܼ ܝܲܢ ܕܣܸܪܝܵܐ: ܓܵܢܵܐ ܠܡܲܚܘܼܝܹܐ: ܝܲܢ ܠܬܵܠܘܿܩܹܐ. 10ܘܚܸܪܹܗ ܚܵܕܸܪ̈ܘܵܢܘܼܗܝ ܒܟܠܵܝܗܝ: ܘܐَܡܝܼܪܹܗ ܠܗ̇ܘ ܐ݇ܢܵܫܵܐ: ܦܵܫܸܛ ܐܝܼܕܘܼܟ: ܘܥܒܸܕܠܹܗ ܗܲܕܟ̣ܵܐ: ܘܬܪܸܨܠܵܗ̇ ܐܝܼܕܹܗ. 11ܐܝܼܢܵܐ ܐܵܢܝܼ ܦܸܫܠܗَܘܿܢ ܡܸܠܝܹܐ ܚܸܡܬܵܐ: ܘܗܲܡܙܸܡܝܼ ܗ݇ܘܵܘ ܚܲܕَ ܥܲܡ ܕܗ̇ܘ ܐ݇ܚܹܪ݇ܢܵܐ: ܕܡܘܼܕܝܼ ܥܵܒ̣ܕܝܼ ܗ݇ܘܵܘ ܠܝܼܫܘܿܥ. 12ܐܝܼܢܵܐ ܗَܘܹܐ ܠܵܗ̇ ܒܐܵܢܝܼ ܝܵܘܡܵܢܹ̈ܐ: ܦܠܸܛܠܹܗ ܠܛܘܼܪܵܐ ܠܨܵܠܘܿܝܹܐ: ܘܬܵܡܵܐ ܡܘܼܥܒܸܪܹܗ ܠܲܝܠܹܐ ܒܨܠܘܿܬܹܗ ܕܐܲܠܵܗܵܐ. 13ܘܟܲܕ ܗَܘܹܐܠܹܗ ܝܵܘܡܵܐ: ܩܪܹܐܠܹܗ ܠܬܲܠܡܝܼܕܘܼ̈ܗܝ: ܘܓܘܼܒܹܠܹܗ ܡܸܢܵܝܗܝ ܬܪܸܥܣܲܪ: ܐܵܢܝܼ ܕܡܘܼܬܸܒ̣ܠܹܗ ܫܸܡܵܝܗܝ ܫܠܝܼܚܹ̈ܐ. 14ܫܸܡܥܘܿܢ: ܗ̇ܘ ܕܡܘܼܬܸܒ̣ܠܹܗ ܫܸܡܹܗ ܟܹܐܦܵܐ: ܘܐܲܢܕܪܹܐܘܿܣ ܐܵܚܘܿܢܹܗ: ܘܝܲܥܩܘܿܒ̣ ܘܝܘܿܚܲܢܵܢ: ܘܦܝܼܠܝܼܦܘܿܣ ܘܒܲܪ ܬܘܼܠܡܲܝ. 15ܘܡܲܬܲܝ ܘܬܐܘܿܡܵܐ: ܘܝܲܥܩܘܿܒ̣ ܒܪܘܿܢܵܐ ܕܚܲܠܦܲܝ: ܘܫܸܡܥܘܿܢ: ܕܦܝܵܫܵܐ ܝܠܹܗ ܩܸܪܝܵܐ ܛܲܢܵܢܵܐ. 16ܘܝܼܗܘܼܕܵܐ ܒܪܘܿܢܵܐ ܕܝܲܥܩܘܿܒ̣: ܘܝܼܗܘܼܕܵܐ ܣܟܲܪܝܘܿܛܵܐ: ܗ̇ܘ ܕܗَܘܹܐܠܹܗ ܣܵܦܝܵܢܵܐ. 17ܘܨܠܹܐܠܹܗ ܥܲܡܵܝܗܝ ܘܟܠܹܠܹܗ ܒܕܸܫܬܵܐ: ܘܟܸܢܫܵܐ ܪܵܒܵܐ ܕܬܲܠܡܝܼܕܘܼ̈ܗܝ: ܘܒܘܼܫܵܝܝܼ ܕܟܸܢܫܵܐ ܕܛܵܝܸܦܵܐ ܡ̣ܢ ܟܠܵܗ̇ ܝܼܗܘܼܕ: ܘܡ̣ܢ ܐܘܿܪܸܫܠܸܡ: ܘܡ̣ܢ ܡܲܪܙܵܐ ܕܝܵܡܵܐ ܕܨܘܿܪ ܘܕܨܲܝܕܘܿܢ: ܕܐ݇ܬܹܐܠܗܘܿܢ ܕܫܵܡܥܝܼ ܡܸܢܹܗ: ܘܕܦܵܝܫܝܼ ܒܘܼܣܡܹܐ ܡ̣ܢ ܡܲܪ̈ܥܵܝܗܝ. 18ܘܐܵܢܝܼ ܕܦܵܝܫܝܼ ܗ݇ܘܵܘ ܡܘܼܠܝܸܨܹܐ ܡ̣ܢ ܪ̈ܘܼܚܹܐ ܛܲܡܹ̈ܐܐ: ܘܦܸܫܠܗَܘܿܢ ܒܘܼܣܡܹܐ. 19ܘܟܠܹܗ ܟܸܢܫܵܐ ܒܸܒܥܵܝܵܐ ܗ݇ܘܵܘ ܠܸܕܩܵܪܵܐ ܒܝܹܗ: ܣܵܒܵܒ ܕܚܲܝܠܵܐ ܟܹܐ ܦܵܠܸܛ ܗ݇ܘܵܐ ܡܸܢܹܗ: ܘܠܟܠܵܝܗܝ ܟܹܐ ܒܵܣܸܡ ܗ݇ܘܵܐ. 20ܘܡܘܼܪܸܡܠܹܗ ܥܲܝܢܘܼ̈ܗܝ ܥܲܠ ܬܲܠܡܝܼܕܘܼ̈ܗܝ: ܘܐَܡܝܼܪܹܗ: ܛܘܼܒ̣ܵܐ ܐܸܠܵܘܟ̣ܘܿܢ ܡܸܣܟܹܢܹ̈ܐ: ܣܵܒܵܒ ܕܕܝܼܵܘܟ̣ܘܿܢ ܝ݇ܠܵܗ̇ ܡܲܠܟܘܼܬܵܐ ܕܐܲܠܵܗܵܐ. 21ܛܘܼܒ̣ܵܐ ܐܸܠܵܘܟ̣ܘܿܢ ܐܵܢܝܼ ܕܟܵܦܢܝܼ ܐܵܕܝܼܵܐ: ܣܵܒܵܒ ܕܒܸܬ ܣܲܒ̣ܥܝܼܬܘܿܢ: ܛܘܼܒ̣ܵܐ ܐܸܠܵܘܟ̣ܘܿܢ ܐܵܢܝܼ ܕܒܵܟ̣ܝܼ ܐܵܕܝܼܵܐ: ܣܵܒܵܒ ܕܒܸܬ ܓܵܚܟܝܼܬܘܿܢ. 22ܛܘܼܒ̣ܵܐ ܐܸܠܵܘܟ̣ܘܿܢ ܐܝܼܡܲܢ ܕܣܵܢܝܼ ܠܵܘܟ̣ܘܿܢ ܒܢܲܝ̈ܢܵܫܵܐ: ܘܦܵܪܫܝܼ ܠܵܘܟ̣ܘܿܢ: ܘܠܵܝܡܝܼ ܠܵܘܟ̣ܘܿܢ: ܘܦܵܠܛܝܼ ܫܸܡܵܘܟ̣ܘܿܢ ܐܲܝܟܼ ܒܝܼܫܹ̈ܐ: ܒܚܵܬܸܪ ܕܒܪܘܿܢܹܗ ܕܐ݇ܢܵܫܵܐ. 23ܚܕܹܐܡܘܿܢ ܒܗ̇ܘ ܝܵܘܡܵܐ ܘܦܨܘܿܚܘܿܢ: ܣܵܒܵܒ ܗܵܐ: ܗܵܩܵܘܟ̣ܘܿܢ ܙܸܕܠܹܗ ܒܫܡܲܝܵܐ. ܣܵܒܵܒ ܗܲܕܟ̣ܵܐ ܟܹܐ ܥܵܒ̣ܕܝܼ ܗ݇ܘܵܘ ܒܵܒܵܘܵܬܵܝ̈ܗܝ ܠܢܒ̣̈ܝܹܐ. 24ܐܝܼܢܵܐ ܘܵܝ ܐܸܠܵܘܟ̣ܘܿܢ ܕܵܘܠܬܲܡܲܢܕܹ̈ܐ: ܣܵܒܵܒ ܕܩܘܼܒܸܠܵܘܟ̣ܘܿܢ ܝܵܗَܒܲܠܬܵܐ ܕܠܸܒܵܘܟ̣ܘܿܢ. 25ܘܵܝ ܐܸܠܵܘܟ̣ܘܿܢ ܣܸܒ̣ܥܝܹ̈ܐ: ܣܵܒܵܒ ܕܒܸܬ ܟܵܦܢܝܼܬܘܿܢ: ܘܵܝ ܐܸܠܵܘܟ̣ܘܿܢ ܐܵܢܝܼ ܕܓܵܚܟܝܼ ܐܵܕܝܼܵܐ: ܣܵܒܵܒ ܕܒܸܬ ܒܵܟ̣ܝܼܬܘܿܢ ܘܒܸܬ ܥܵܒ̣ܕܝܼܬܘܿܢ ܬܵܙܝܼ. 26ܘܵܝ ܐܸܠܵܘܟ̣ܘܿܢ ܟܲܕ ܗܵܘܝܼ ܒܹܐܡܵܪܵܐ ܨܦܵܝܘܼܬܵܐ ܒܘܼܬ ܕܝܼܵܘܟ̣ܘܿܢ ܟܠܵܝܗܝ ܒܢܲܝ̈ܢܵܫܵܐ: ܣܵܒܵܒ ܗܲܕܟ̣ܵܐ ܟܹܐ ܥܵܒ̣ܕܝܼ ܗ݇ܘܵܘ ܒܵܒܵܘܵܬܵܝ̈ܗܝ ܠܢ̈ܒ̣ܝܹܐ ܕܲܓܵܠܹ̈ܐ. 27ܐܝܼܢܵܐ ܐܸܠܵܘܟ̣ܘܿܢ ܒܹܐܡܵܪܵܐ ܝܘܸܢ: ܠܐܵܢܝܼ ܕܒܸܫܡܲܥܝܵܐ ܝܢܵܐ: ܡܲܚܸܒܘܿܢ ܠܕܸܫܡܸܢܵܘ̈ܟ̣ܘܿܢ: ܘܥܒ̣ܘܿܕܘܿܢ ܨܦܵܝܘܼܬܵܐ ܠܐܵܢܝܼ ܕܣܵܢܝܼ ܠܵܘܟ̣ܘܿܢ. 28ܘܒܵܪܟ̣ܘܿܢ ܠܐܵܢܝܼ ܕܠܵܝܛܝܼܠܵܘܟ̣ܘܿܢ: ܘܨܲܠܹܝܡܘܿܢ ܥܲܠ ܕܐܵܢܝܼ ܕܥܵܒ̣ܕܝܼ ܠܵܘܟ̣ܘܿܢ ܒܹܨܘܼܪ. 29ܘܠܗ̇ܘ ܕܡܵܚܹܐ ܠܘܼܟܼ ܥܲܠ ܚܕܵܐ ܦܵܬܘܼܟ: ܡܲܕܸܪ ܐܸܠܹܗ ܐܘܼܦ ܗ̇ܝ ܐܚܹܪَܬܵܐ: ܘܡ̣ܢ ܡ̇ܢ ܕܫܵܩܸܠ ܥܵܒܵܝܘܼܟ: ܠܵܐ ܡܲܟܠܸܬ ܐܘܼܦ ܨܘܼܕܪܘܼܟ. 30ܠܟܠ ܕܛܵܠܸܒ ܡܸܢܘܼܟ ܗܲܒَܠ ܠܹܗ: ܘܡ̣ܢ ܡ̇ܢ ܕܫܵܩܸܠ ܕܕܝܼܘܼܟ: ܠܵܐ ܛܵܠܒܸܬ ܡܸܢَܕܪܸܫَ. 31ܘܕܵܐܟ̣ܝܼ ܕܒܵܥܹܝܬܘܿܢ ܕܥܵܒ̣ܕܝܼ ܐܸܠܵܘܟ̣ܘܿܢ ܒܢܲܝ̈ܢܵܫܵܐ: ܗܲܕܟ̣ܵܐ ܥܒ̣ܘܿܕܘܿܢ ܐܸܠܵܝܗܝ ܐܘܼܦ ܐܲܚܬܘܿܢ. 32ܣܵܒܵܒ ܐܸܢ ܡܲܚܸܒܝܼܬܘܿܢ ܠܐܵܢܝܼ ܕܡܲܚܸܒܝܼ ܠܵܘܟ̣ܘܿܢ: ܡܘܼܕܝܼ ܝ݇ܠܵܗ̇ ܡܸܢܬܵܘܟ̣ܘܿܢ: ܣܵܒܵܒ ܐܘܼܦ ܚܲܛܵܝܹ̈ܐ ܠܐܵܢܝܼ ܕܡܲܚܸܒܝܼ ܠܗ݇ܘܿܢ ܟܹܐ ܡܲܚܸܒܝܼ. 33ܘܐܸܢ ܥܵܒ̣ܕܝܼܬܘܿܢ ܨܦܵܝܘܼܬܵܐ ܠܐܵܢܝܼ ܕܥܵܒ̣ܕܝܼ ܨܦܵܝܘܼܬܵܐ ܐܸܠܵܘܟ̣ܘܿܢ: ܡܘܼܕܝܼ ܝ݇ܠܵܗ̇ ܡܸܢܬܵܘܟ̣ܘܿܢ: ܣܵܒܒ ܐܘܼܦ ܚܲܛܵܝܹ̈ܐ ܗܲܕܟ̣ܵܐ ܟܹܐ ܥܵܒ̣ܕܝܼ. 34ܘܐܸܢ ܝܵܗَܒ̣ܝܼܬܘܿܢ ܕܵܝܢܵܐ ܠܡ̇ܢ ܕܐܝܼܬ ܠܵܘܟ̣ܘܿܢ ܗܹܒ̣ܝܼ ܕܦܵܝܫܝܼܬܘܿܢ ܦܸܪܥܝܹܐ ܡܸܢܹܗ: ܡܘܼܕܝܼ ܝ݇ܠܵܗ̇ ܡܸܢܬܵܘܟ̣ܘܿܢ: ܐܘܼܦ ܚܲܛܵܝܹ̈ܐ ܠܚܲܛܵܝܹ̈ܐ ܟܹܐ ܝܵܗَܒ̣ܝܼ ܕܵܝܢܵܐ: ܕܚܲܕَ ܗܵܕܵܐ ܫܵܩܠܝܼ. 35ܐܝܼܢܵܐ ܡܲܚܸܒܘܿܢ ܠܕܸܫܡܸܢܵܘ̈ܟ̣ܘܿܢ: ܘܥܒ̣ܘܿܕܘܿܢ ܨܦܵܝܘܼܬܵܐ: ܘܗܲܒَܠܘܿܢ ܕܵܝܢܵܐ: ܘܠܵܐ ܩܲܛܥܝܼܬܘܿܢ ܗܹܒ̣ܝܼ ܕܐ݇ܢܵܫܵܐ: ܘܒܸܬ ܗܵܘܹܐ ܪܵܒܐ ܗܵܩܵܘܟ̣ܘܿܢ: ܘܒܸܬ ܗܵܘܹܝܬܘܿܢ ܒܢܘܿܢܹ̈ܐ ܕܪܵܡܵܐ: ܣܵܒܵܒ ܗ̇ܘ ܒܵܣܝܼܡܵܐ ܝܠܹܗ ܥܲܠ ܠܵܐ ܛܵܥܢܵܢܹ̈ܐ ܕܡܸܢܬܵܐ: ܘܥܲܠ ܒܝܼܫܹ̈ܐ. 36ܗَܘܹܝܡܘܿܢ ܡܪܲܚܡܵܢܹܐ: ܕܵܐܟ̣ܝܼ ܕܒܵܒܵܘܟ̣ܘܿܢ ܡܪܲܚܡܵܢܵܐ ܝܠܹܗ. 37ܠܵܐ ܕܵܝܢܝܼܬܘܿܢ: ܘܠܹܐ ܦܵܝܫܝܼܬܘܿܢ ܕܝܼܢܹܐ: ܠܵܐ ܥܵܒ̣ܕܝܼܬܘܿܢ ܓܘܼܢܵܗܟܵܪ: ܘܠܹܐ ܦܵܝܫܝܼܬܘܿܢ ܥܒ̣ܝܼܕܹܐ ܓܘܼܢܵܗܟܵܪ: ܫܪܹܝܡܘܿܢ: ܘܒܸܬ ܦܵܝܫܝܼܬܘܿܢ ܫܸܪܝܹܐ. 38ܗܲܒَܠܘܿܢ: ܘܒܸܬ ܦܵܐܹܫ ܝܘܼܗَܒ̣ܵܐ ܐܸܠܵܘܟ̣ܘܿܢ: ܒܟܝܵܠܬܵܐ ܨܦܵܝܝܼ: ܫܥܝܼܫܬܵܐ: ܕܝܼܫܬܵܐ: ܘܫܦܝܼܟ̣ܬܵܐ ܒܸܬ ܕܵܪܝܼ ܓܵܘ ܥܘܼܒܵܘܟ̣ܘܿܢ. ܣܵܒܵܒ ܕܒܗ̇ܝ ܟܝܵܠܬܵܐ ܕܟܵܝܠܝܼܬܘܿܢ ܒܸܬ ܦܵܐܹܫ ܟܝܼܠܵܐ ܐܸܠܵܘܟ̣ܘܿܢ. 39ܘܐܘܼܦ ܐَܡܝܼܪܹܗ ܐܸܠܵܝܗܝ ܡܵܣܵܠܵܐ: ܟܹܐ ܡܵܨܹܐ ܣܸܡܝܵܐ ܠܣܸܡܝܵܐ ܠܠܵܒܘܿܠܹܐ: ܬܸܪ̈ܘܵܝܗܝ ܓܵܘ ܓܘܼܒܵܐ ܠܹܐ ܢܵܦܠܝܼ؟ 40ܠܹܐ ܝܠܹܗ ܬܲܠܡܝܼܕܵܐ ܙܵܘܕܵܐ ܡ̣ܢ ܪܵܒܝܹܗ: ܐܝܼܢܵܐ ܟܠ ܐ݇ܢܵܫܵܐ ܕܝܼܠܹܗ ܡܘܼܟܡܸܠܵܐ ܒܸܬ ܗܵܘܹܐ ܐܲܝܟܼ ܪܵܒܝܹܗ. 41ܐܝܼܢܵܐ ܩܵܡܘܿܕܝܼ ܒܸܚܙܵܝܵܐ ܝܘܸܬ ܓܸܠܵܐ ܕܒܥܲܝܢܹܗ ܕܐܵܚܘܿܢܘܼܟ: ܘܩܵܪܝܼܬܵܐ ܕܒܥܲܝܢܘܼܟ ܠܹܐ ܝܘܸܬ ܒܸܚܙܵܝܘܼܗ̇. 42ܝܲܢ ܕܵܐܟ̣ܝܼ ܡܵܨܸܬ ܠܹܐܡܵܪܵܐ ܠܐܵܚܘܿܢܘܼܟ: ܐܵܚܘܿܢܝܼ: ܫܒ̣ܘܿܩ ܦܵܠܛܸܢ ܓܸܠܵܐ ܡ̣ܢ ܥܲܝܢܘܼܟ: ܟܲܕ ܩܵܪܝܼܬܵܐ ܕܒܥܲܝܢܵܐ ܕܝܼܘܼܟ ܠܹܐ ܝܘܸܬ ܒܸܚܙܵܝܘܼܗ̇: ܝܵܐ ܢܵܣܹܒ̣ ܒܐܲܦܹ̈ܐ: ܦܵܠܸܛ ܩܵܕَܡܵܝܬܵܐ ܩܵܪܝܼܬܵܐ ܡ̣ܢ ܥܲܝܢܘܼܟ: ܘܗ̇ܝܓܵܗ ܨܸܦܝܵܐ ܒܸܬ ܚܵܙܸܬ ܠܦܵܠܘܿܛܹܐ ܓܸܠܵܐ ܕܒܥܲܝܢܹܗ ܕܐܵܚܘܿܢܘܼܟ. 43ܣܵܒܵܒ ܠܲܝܬ ܐܝܼܠܵܢܵܐ ܨܦܵܝܝܼ ܕܥܵܒܸܕ ܛܥܘܿܢܝܵܬܹ̈ܐ ܚܸܪܒܵܐ: ܐܘܼܦܠܵܐ ܐܝܼܠܵܢܵܐ ܚܸܪܒܵܐ ܕܥܵܒܸܕ ܛܥܘܿܢܝܵܬܹ̈ܐ ܨܦܵܝܝܼ. 44ܣܵܒܵܒ ܟܠ ܐܝܼܠܵܢܵܐ ܡ̣ܢ ܛܥܘܼܢܝܵܬܘܼ̈ܗܝ ܟܹܐ ܦܵܐܹܫ ܝܕܸܥܝܵܐ: ܣܵܒܵܒ ܠܹܐ ܓܵܒܝܼ ܡ̣ܢ ܟܸܬܘܹ̈ܐ ܬܹܐܢܹ̈ܐ: ܘܐܘܼܦ ܠܵܐ ܡ̣ܢ ܣܲܢܝܵܐ (ܟܸܬܘܹ̈ܐ) ܩܵܛܦܝܼ ܥܲܢܒܹ̈ܐ. 45ܐ݇ܢܵܫܵܐ ܛܵܒ̣ܵܐ ܡ̣ܢ ܚܲܙܝܼܢܵܐ ܛܵܒ̣ܬܵܐ ܕܠܸܒܹܗ ܟܹܐ ܦܵܠܸܛ ܛܵܒ̣ܵܬܹ̈ܐ: ܘܐ݇ܢܵܫܵܐ ܒܝܼܫܵܐ ܡ̣ܢ ܚܲܙܝܼܢܵܐ ܒܝܼܫܬܵܐ ܟܹܐ ܦܵܠܸܛ ܒܝܼܫܵܬܹ̈ܐ: ܣܵܒܵܒ ܡ̣ܢ ܙܵܘܕܘܿܢܝܘܼܬܵܐ ܕܠܸܒܵܐ ܟܹܐ ܗܲܡܙܸܡ ܦܘܼܡܹܗ. 46ܘܩܵܡܘܿܕܝܼ ܒܸܩܪܵܝܝܼ ܝܬܘܿܢ: ܡܵܪܝܼ: ܡܵܪܝܼ: ܘܡܸܢܕܝܼ ܕܒܹܐܡܵܪܵܐ ܝܘܸܢ ܠܹܐ ܥܵܒ̣ܕܝܼܬܘܿܢ. 47ܟܠ ܐ݇ܢܵܫܵܐ ܕܐܵܬܹܐ ܠܟܸܣܠܝܼ ܘܫܵܡܹܥ ܗܹܡܸܙܡܵܢܝܼ̈ ܘܥܵܒܸܕ ܠܗ݇ܘܿܢ: ܒܸܬ ܡܲܕܥܸܢܵܘܟ̣ܘܿܢ ܠܡܘܼܕܝܼ ܟܹܐ ܕܵܡܹܐ. 48ܟܹܐ ܕܵܡܹܐ ܠܐ݇ܢܵܫܵܐ ܕܒܢܹܠܹܗ ܒܲܝܬܵܐ: ܘܚܦܸܪܹܗ ܘܡܘܼܥܡܸܩܠܹܗ: ܘܡܘܼܬܸܒ̣ܠܹܗ ܒܸܢܝܲܬ ܥܲܠ ܩܵܝܵܐ. ܐܝܼܢܵܐ ܟܲܕ ܗَܘܹܐ ܠܵܗ̇ ܣܵܝܠ: ܩܸܬܠܹܗ ܢܲܗܪܵܐ ܒܗ̇ܘ ܒܝܬܵܐ: ܘܠܵܐ ܡܨܹܐܠܹܗ ܕܡܲܫܥܸܫ ܗ݇ܘܵܐ ܠܹܗ: ܣܵܒܵܒ ܕܒܸܢܝܲܬܹܗ ܥܲܠ ܩܵܝܵܐ ܡܘܼܬܸܒ̣ܬܵܐ ܗ݇ܘܵܐ. 49ܐܝܼܢܵܐ ܗ̇ܘ ܕܫܵܡܸܥ ܘܠܵܐ ܥܵܒܸܕ: ܟܹܐ ܕܵܡܹܐ ܠܐ݇ܢܵܫܵܐ ܕܒܢܹܠܹܗ ܒܲܝܬܹܗ ܥܲܠ ܥܲܦܪܵܐ: ܕܠܵܐ ܒܸܢܝܲܬ: ܕܒܝܹܗ ܩܸܬܠܹܗ ܢܲܗܪܵܐ: ܘܕܲܪܣܵܥܲܬ ܢܦܸܠܹܗ: ܘܗَܘܹܐ ܠܵܗ̇ ܢܦܵܠܬܹܗ ܕܗ̇ܘ ܒܝܬܵܐ ܓܘܼܪܬܵܐ.