0:00
/
1ܘܗَܘܹܐ ܠܵܗ̇ ܒܵܬَܪ ܐܲܢܹܐ: ܒܸܚܕܵܪܵܐ ܗ݇ܘܵܐ ܗ̇ܘ ܓܵܘ ܡܕܝܼܢܵܬܹ̈ܐ: ܘܓܵܘ ܡܵܬܘܵܬܹ̈ܐ: ܡܲܟܪܘܼܙܹܐ ܘܡܲܫܚܘܼܕܹܐ ܡܲܠܟܘܼܬܵܐ ܕܐܲܠܵܗܵܐ: ܘܬܪܸܥܣܲܪܬܹܗ ܥܲܡܹܗ. 2ܘܒܲܟ̣ܬܵܬܹ̈ܐ ܐܵܢܝܼ ܕܦܸܫܠܗَܘܿܢ ܒܘܼܣܡܹܐ ܡ̣ܢ ܡܲܪ̈ܥܹܐ: ܘܡ̣ܢ ܪ̈ܘܼܚܹܐ ܒܝܼܫܵܬܹ̈ܐ: ܡܲܪܝܲܡ ܕܦܵܝܫܵܐ ܗ݇ܘܵܐ ܩܪܝܼܬܵܐ ܡܲܓ̣ܕܠܵܝܬܵܐ: ܗ̇ܝ ܕܫܲܒ̣ܥܵܐ ܕܲܝܘܹ̈ܐ ܦܠܸܛܠܗܘܿܢ ܡܸܢܵܗ̇. 3ܘܝܘܿܚܲܢܵܢ ܒܲܟ̣ܬܵܐ ܕܟܘܼܙܵܐ ܢܵܙܝܼܪܹܗ ܕܗܹܪܘܿܕܸܣ: ܘܫܘܿܫܲܢ: ܘܪܵܒܵܐ ܐ݇ܚܹܪ̈݇ܢܹܐ: ܐܵܢܝܼ ܕܟܹܐ ܥܵܒ̣ܕܝܼ ܗ݇ܘܵܘ ܠܗ݇ܘܿܢ ܚܸܠܡܲܬ ܡ̣ܢ ܡܸܢܕܝܵܝ̈ܗܝ. 4ܘܟܲܕ ܟܸܢܫܵܐ ܪܵܒܵܐ ܓ̰ܸܡܥܝܵܐ ܗ݇ܘܵܐ: ܘܡ̣ܢ ܟܠܵܝܗܝ ܡܕܝܼܢܵܬܹ̈ܐ ܐܵܬܝܼ ܗ݇ܘܵܘ ܠܟܸܣܠܹܗ: ܐَܡܝܼܪܹܗ ܒܡܵܣܵܠܵܐ. 5ܦܠܸܛܠܹܗ ܚܲܕَ ܙܲܪܥܵܢܵܐ ܠܸܙܪܲܥܝܵܐ ܒܲܪܙܲܪܥܹܗ. ܘܟܲܕ ܙܪܸܥܠܹܗ: ܐܝܼܬ ܗ݇ܘܵܐ ܕܢܦܸܠܹܗ ܥܲܠ ܡܲܪܙܵܐ ܕܐܘܼܪܚܵܐ: ܘܦܸܫܠܹܗ ܕܝܼܫܵܐ: ܘܐَܟܼܸܠܗܘܿܢ ܐܸܠܹܗ ܛܲܝܪܹ̈ܐ ܕܫܡܲܝܵܐ. 6ܘܐ݇ܚܹܪ݇ܢܵܐ ܢܸܦܠܹܗ ܥܲܠ ܟܹܐܦܵܐ: ܘܟܲܕ ܡܘܼܓ̰ܝܸܢܹܗ: ܕܠܲܝܬ ܗ݇ܘܵܐ ܠܹܗ ܬܲܠܝܼܠܘܼܬܵܐ: ܒܪܸܙܠܹܗ. 7ܘܐ݇ܚܹܪ݇ܢܵܐ ܢܦܸܠܹܗ ܓܵܘ ܟܸܬܘܹ̈ܐ: ܘܡܘܼܓ̰ܝܸܢܘܿܢ ܥܲܡܹܗ ܟܸܬܘܹ̈ܐ: ܘܚܢܸܩܠܗܘܿܢ ܐܸܠܹܗ. 8ܘܐ݇ܚܹܪ݇ܢܵܐ ܢܦܸܠܹܗ ܒܐܲܪܥܵܐ ܨܦܵܝܝܼ: ܘܡܘܼܓ̰ܝܸܢܹܗ: ܘܥܒܸܕܠܹܗ ܛܥܘܿܢܝܵܬܹ̈ܐ ܚܲܕَ ܒܡܵܐܐ. ܟܲܕ ܐܵܡܸܪ ܐܲܢܹܐ: ܡܲܩܘܸܚ ܗ݇ܘܵܐ: ܡ̇ܢ ܕܐܝܼܬ ܠܹܗ ܢܵܬܝܵܬܹ̈ܐ ܕܫܵܡܸܥ: ܫܵܡܹܥ. 9ܘܒܘܼܩܸܪܗܘܿܢ ܡܸܢܹܗ ܬܲܠܡܝܼܕܘܼ̈ܗܝ: ܡܘܼܕܝܼ ܝܠܹܗ ܐܵܗܵܐ ܡܵܣܵܠܵܐ. 10ܐܝܼܢܵܐ ܗ̇ܘ ܐَܡܝܼܪܹܗ ܐܸܠܵܝܗܝ: ܐܸܠܵܘܟ̣ܘܿܢ ܝܘܼܗَܒ̣ܵܐ ܝܠܹܗ ܠܝܼܕܲܥܝܵܐ ܣܸܪܹ̈ܐ ܕܡܲܠܟܘܼܬܹܗ ܕܐܲܠܵܗܵܐ: ܐܝܼܢܵܐ ܠܐ݇ܚܹܪ̈݇ܢܹܐ ܒܡܵܣܵܠܹ̈ܐ: ܕܟܲܕ ܚܵܙܝܼ ܠܵܐ ܚܵܙܝܼ: ܘܟܲܕ ܫܵܡܥܝܼ ܠܵܐ ܦܲܪܡܝܼ. 11ܐܝܼܢܵܐ ܐܵܗܵܐ ܝܠܹܗ ܡܵܣܵܠܵܐ. ܒܲܪܙܲܪܥܵܐ ܗܹܡܸܙܡܵܢ ܕܐܲܠܵܗܵܐ ܝܠܹܗ. 12ܘܐܵܢܝܼ ܕܥܲܠ ܡܲܪܙܵܐ ܕܐܘܼܪܚܵܐ: ܐܵܢܝܼ ܝܢܵܐ ܕܫܵܡܥܝܼ: ܗ̇ܝܓܵܗ ܟܹܐ ܐܵܬܹܐ ܐܵܟܹܠܩܲܪܨܵܐ ܘܫܵܩܸܠ ܗܹܡܸܙܡܵܢ ܡ̣ܢ ܠܸܒܵܝܗܝ: ܕܠܵܐ ܗܲܡܸܢܝܼ ܘܚܲܝܝܼ. 13ܘܐܵܢܝܼ ܕܥܲܠ ܟܹܐܦܵܐ: ܐܵܢܝܼ ܝܢܵܐ ܕܐܝܼܡܲܢ ܕܫܡܸܥܠܗَܘܿܢ: ܒܚܲܕܘܼܬܵܐ ܩܵܒ̇ܠܝܼ ܠܵܗ̇ ܠܗܹܡܸܙܡܵܢ: ܘܐܲܢܹܐ ܥܸܩܪܵܐ ܠܲܝܬ ܠܗ݇ܘܿܢ: ܕܙܲܒ̣ܢܵܐ ܝ݇ܠܵܗ̇ ܗܲܝܡܵܢܘܼܬܵܝܗܝ: ܘܒܥܕܵܢܵܐ ܕܓ̰ܘܼܪܵܒܵܐ ܟܹܐ ܩܵܠܒ̇ܝܼ. 14ܐܝܼܢܵܐ ܗ̇ܘ ܕܢܦܸܠܹܗ ܓܵܘ ܟܸܬܘܹ̈ܐ: ܐܵܢܝܼ ܝܢܵܐ ܐܵܝܢܝܼ ܕܫܵܡܥܝܼ: ܘܟܲܕ ܦܵܠܛܝܼ: ܒܚܲܡ ܘܒܕܵܘܸܠܬܵܐ ܘܒܫܲܗَܘܲܬܝܵܬܹ̈ܐ ܕܐܲܢܹܐ ܚܲܝܹ̈ܐ ܟܹܐ ܦܵܝܫܝܼ ܚܢܝܼܩܹܐ: ܘܛܥܘܿܢܝܵܬܹ̈ܐ ܠܹܐ ܡܲܡܛܝܼ. 15ܐܝܼܢܵܐ ܗ̇ܘ ܕܒܲܐܪܥܵܐ ܨܦܵܝܝܼ: ܐܵܢܝܼ ܝܢܵܐ ܐܲܝܢܝܼ ܕܒܠܸܒܵܐ ܨܸܦܝܵܐ ܘܨܦܵܝܝܼ ܟܹܐ ܫܵܡܥܝܼ ܗܹܡܸܙܡܵܢ ܘܕܵܒ̣ܩܝܼ ܠܵܗ̇: ܘܝܵܗَܒ̣ܝܼ ܛܥܘܿܢܝܵܬܹ̈ܐ ܒܚܡܵܠܬܵܐ. 16ܐ݇ܢܵܫܵܐ ܠܹܐ ܬܵܦܹܐ ܫܪܵܝܵܐ: ܘܟܵܣܹܐ ܠܵܗ̇ ܒܡܵܐܢܵܐ: ܝܲܢ ܡܲܬܸܒ̣ ܠܵܗ̇ ܬܚܘܿܬ ܫܘܝܼܬܵܐ: ܐܸܠܵܐ ܟܹܐ ܡܲܬܸܒ̣ ܠܵܗ̇ ܥܲܠ ܟ̰ܪܲܚܦܝܼ: ܕܐܵܢܝܼ ܕܥܵܒܼܪܝܼ ܚܵܙܝܼ ܒܲܗܪܘܼܗ̇. 17ܣܵܒܵܒ ܠܲܝܬ ܡܸܢܕܝܼ ܟܘܼܣܝܵܐ: ܕܠܵܐ ܦܵܐܹܫ ܓܸܠܝܵܐ. ܘܠܵܐ ܕܛܸܫܝܵܐ: ܕܠܵܐ ܦܵܐܹܫ ܝܕܸܥܝܵܐ ܘܐܵܬܹܐ ܠܐܲܫܟܵܪܵܐ. 18ܚܙܹܝܡܘܿܢ ܗܲܕܟ̣ܵܐ ܕܵܐܟ̣ܝܼ ܫܵܡܥܝܼܬܘܿܢ. ܣܵܒܵܒ ܡ̇ܢ ܕܐܝܼܬ ܠܹܗ: ܒܸܬ ܦܵܐܹܫ ܝܘܼܗَܒ̣ܵܐ ܐܸܠܹܗ: ܘܡ̇ܢ ܕܠܲܝܬ ܠܹܗ: ܐܘܼܦ ܗ̇ܘ ܕܚܵܫܸܒ̣ ܕܐܝܼܬ ܠܹܗ ܒܸܬ ܦܵܐܹܫ ܫܩܝܼܠܵܐ ܡܸܢܹܗ. 19ܘܐ݇ܬܹܐܠܗܘܿܢ ܠܟܸܣܠܹܗ ܝܸܡܹܗ ܘܐܵܚܘܿܢܘܵܬܘܼ̈ܗܝ: ܘܠܹܐ ܡܵܨܝܼ ܗ݇ܘܵܘ ܠܸܡܛܵܝܵܐ ܠܟܸܣܠܹܗ ܡ̣ܢ ܟܸܢܫܵܐ. 20ܐܸܡܪܘܿܢ ܐܸܠܹܗ؛ ܝܸܡܘܼܟ ܘܐܵܚܘܿܢܘܵܬܘܼ̈ܟ ܒܸܟܠܵܝܵܐ ܝܢܵܐ ܠܒܲܕܲܪ: ܘܒܸܒܥܵܝܵܐ ܠܸܚܙܵܝܘܼܟ. 21ܐܝܼܢܵܐ ܗ̇ܘ ܓ̰ܘܼܘܸܒܠܹܗ ܘܐَܡܝܼܪܹܗ ܐܸܠܵܝܗܝ: ܐܲܢܹܐ ܝܢܵܐ ܝܸܡܝܼ ܘܐܵܚܘܿܢܘܵܬܝܼ̈ ܐܵܢܝܼ ܕܫܵܡܥܝܼ ܗܹܡܸܙܡܵܢ ܕܐܲܠܵܗܵܐ: ܘܥܵܒ̣ܕܝܼ ܠܵܗ̇. 22ܘܗَܘܹܐ ܠܵܗ̇ ܒܚܲܕَ ܡ̣ܢ ܝܵܘܡܵܢܹ̈ܐ: ܘܐ݇ܣܸܩܠܹܗ ܠܓܵܡܝܼ: ܗ̇ܘ ܘܬܲܠܡܝܼܕܘܼ̈ܗܝ. ܘܐَܡܝܼܪܹܗ ܐܸܠܵܝܗܝ: ܥܵܒ̣ܪܵܚ ܠܡܲܪܙܵܐ ܐ݇ܚܹܪ݇ܢܵܐ ܕܝܵܡܵܐ: ܘܛܪܹܠܗܘܿܢ. 23ܘܟܲܕ ܒܸܛܪܵܝܵܐ ܗ݇ܘܵܘ ܕܡܸܟ̣ܠܹܗ: ܘܨܠܹܠܵܗ̇ ܒܘܼܪܵܢ ܕܦܵܘܚܵܐ ܥܲܠ ܝܵܡܵܐ: ܘܒܸܡܠܵܝܵܐ ܗ݇ܘܵܘ (ܡ̈ܝܼܵܐ): ܘܗَܘܹܐܠܗَܘܿܢ ܒܙܕܘܿܥܬܵܐ ܓܘܼܪܬܵܐ. 24ܘܐ݇ܬܹܐܠܗܘܿܢ ܠܟܸܣܠܹܗ ܡܘܼܪܥܸܫܠܗܘܿܢ ܐܸܠܹܗ: ܒܹܐܡܵܪܵܐ: ܪܵܒܝܲܢ: ܪܵܒܝܲܢ: ܒܸܬܠܵܩܵܐ ܝܘܵܚ. ܘܗ̇ܘ ܩܸܡܠܹܗ: ܘܢܓ̰ܸܘܼܠܹܗ ܒܦܵܘܚܹ̈ܐ ܘܒܠܲܦܹ̈ܐ ܕܡ̈ܝܼܵܐ: ܘܢܸܚܠܗܘܿܢ: ܘܗَܘܹܐܠܹܗ ܫܠܵܝܵܐ. 25ܘܐَܡܝܼܪܹܗ ܐܸܠܵܝܗܝ: ܐܲܝܟܵܐ ܝ݇ܠܵܗ̇ ܗܲܝܡܵܢܘܼܬܵܘܟ̣ܘܿܢ ܐܝܼܢܵܐ ܐܵܢܝܼ ܟܲܕ ܙܸܕܥܝܹܐ ܥܘܼܓ̰ܸܒܠܗܘܿܢ: ܘܐܵܡܪܝܼ ܚܲܕَ ܠܗ̇ܘ ܐ݇ܚܹܪ݇ܢܵܐ: ܝܵܐ ܪܲܒ: ܡܵܢܝܼ ܝܠܹܗ ܐܵܗܵܐ ܕܐܘܼܦ ܠܦܵܘܚܹ̈ܐ ܒܸܦܩܵܕܵܐ ܝܠܹܗ ܘܠܡ̈ܝܼܵܐ: ܘܡܲܨܝܘܼܬܹܐ ܝܢܵܐ ܐܸܠܹܗ. 26ܘܛܪܹܠܗܘܿܢ ܠܐܲܬܪܵܐ ܕܓܸܕܪ̈ܵܝܹܐ: ܕܝܼܠܹܗ ܒܡܲܪܙܵܐ ܐ݇ܚܹܪ݇ܢܵܐ ܠܒܲܪܩܘܼܒ̣ܠ ܕܓܠܝܼܠܵܐ. 27ܘܟܲܕ ܦܠܸܛܠܹܗ ܠܐܲܪܥܵܐ: ܬܦܸܩܠܹܗ ܒܝܹܗ ܚܲܕَ ܐ݇ܢܵܫܵܐ ܡ̣ܢ ܡܕܝܼܢَܬܵܐ: ܕܐܝܼܬ ܗ݇ܘܵܘ ܒܝܹܗ ܕܲܝܘܹ̈ܐ ܡ̣ܢ ܪܵܒܵܐ ܙܲܒ̣ܢܵܐ: ܘܓ̰ܘܼܠܹ̈ܐ ܠܹܐ ܠܵܒܸܫ ܗ݇ܘܵܐ: ܘܒܒܲܝܬܵܐ ܠܹܐ ܥܵܡܸܪ ܗ݇ܘܵܐ: ܐܸܠܵܐ ܓܵܘ ܒܹܝܬ ܩܒ̣ܘܼܪܹ̈ܐ. 28ܐܝܼܢܵܐ ܟܲܕ ܚܙܹܐܠܹܗ ܠܝܼܫܘܿܥ: ܡܘܼܩܘܸܚܠܹܗ ܘܢܦܸܠܹܗ ܩܵܕَܡܘܼܗܝ: ܘܒܩܵܠܵܐ ܪܵܡܵܐ ܐَܡܝܼܪܹܗ: ܡܵܐ ܠܘܼܟܼ ܡܸܢܝܼ: ܝܼܫܘܿܥ ܒܪܘܿܢܹܗ ܕܐܲܠܵܗܵܐ ܪܵܡܵܐ: ܒܸܒܥܵܝܵܐ ܝܘܸܢ ܡܸܢܘܼܟ: ܠܵܐ ܓ̰ܲܢܓ̰ܸܪܸܬ ܠܝܼ. 29ܣܵܒܵܒ ܕܦܘܼܩܸܕܠܹܗ ܠܪܘܼܚܵܐ ܛܲܡܹܐܐ ܠܸܦܠܵܛܵܐ ܡ̣ܢ ܕܗ̇ܘ ܐ݇ܢܵܫܵܐ: ܣܵܒܵܒ ܕܪܵܒܵܐ ܙܲܒ̣ܢܹ̈ܐ ܕܒ̣ܝܼܩܘܼܗܝ ܗ݇ܘܵܐ: ܘܟܹܐ ܦܵܐܹܫ ܗ݇ܘܵܐ ܐَܣܝܼܪܵܐ ܒܫܸܫܠܝܵܬܹ̈ܐ: ܘܒܩܵܘܕܹ̈ܐ ܦܵܐܹܫ ܗ݇ܘܵܐ ܢܛܝܼܪܵܐ: ܘܩܲܛܸܥ ܗ݇ܘܵܐ ܝܸܣܘܼܪ̈ܘܼܗܝ: ܘܦܵܐܹܫ ܗ݇ܘܵܐ ܠܘܼܒܠܵܐ ܡ̣ܢ ܕܲܝܘܵܐ ܠܒܲܪܝܼܵܐ. 30ܘܒܘܼܩܸܪܹܗ ܡܸܢܹܗ ܝܼܫܘܿܥ: ܡܘܼܕܝܼ ܝܠܹܗ ܫܸܡܘܼܟ: ܐܵܡܸܪ ܐܸܠܹܗ: ܠܓ̣ܝܘܿܢ: ܣܵܒܵܒ ܕܲܝܘܹ̈ܐ ܪܵܒܵܐ ܥܒܝܼܪܹ̈ܐ ܗ݇ܘܵܘ ܒܝܹܗ. 31ܘܦܘܼܪܦܸܠܗܘܿܢ ܒܝܹܗ: ܕܠܵܐ ܦܵܩܸܕ ܠܗ݇ܘܿܢ ܠܹܐܙܵܠܵܐ ܠܥܘܼܡܩܵܐ. 32ܐܝܼܢܵܐ ܐܝܼܬ ܗ݇ܘܵܘ ܬܵܡܵܐ ܒܲܩܪܵܐ ܕܚܙܘܼܪܹ̈ܐ ܪܵܒܵܐ ܕܒܸܪܥܵܝܵܐ ܒܛܘܼܪܵܐ: ܘܒܵܥܝܼ ܗ݇ܘܵܘ ܡܸܢܹܗ ܕܝܵܗَܒܸܠ ܠܗ݇ܘܿܢ ܕܲܣܬܘܼܪ ܕܥܵܒܼܪܝܼ ܒܝܼܵܝܗܝ: ܘܝܘܼܗَܒܼܸܠܹܗ ܕܲܣܬܘܼܪ ܐܸܠܵܝܗܝ. 33ܘܦܠܸܛܠܗܘܿܢ ܕܲܝܘܹ̈ܐ ܡ̣ܢ ܐ݇ܢܵܫܵܐ: ܘܥܒܼܸܪܗܘܿܢ ܒܚܙܘܼܪܹ̈ܐ: ܘܪܚܸܛܠܵܗ̇ ܒܲܩܪܵܐ ܠܫܸܢܵܐ ܠܐܸܠܬܸܚܬ ܒܝܵܡܵܐ: ܘܚܢܸܩܠܗܘܿܢ. 34ܐܝܼܢܵܐ ܟܲܕ ܚܙܹܐܠܗܘܿܢ ܪܵܥܝܹܐ ܡܸܢܕܝܼ ܕܗَܘܹܐܠܹܗ: ܥܪܸܩܠܗܘܿܢ ܘܗܘܼܩܹܠܗܘܿܢ ܓܵܘ ܡܕܝܼܢَܬܵܐ ܘܓܵܘ ܡܵܬܘܵܬܹ̈ܐ. 35ܘܦܠܸܛܠܗܘܿܢ ܕܚܵܙܝܼ ܡܸܢܕܝܼ ܕܗَܘܹܐܠܹܗ: ܘܐ݇ܬܹܐܠܗܘܿܢ ܠܟܸܣ ܝܼܫܘܿܥ: ܘܡܘܼܫَܟ̰ܸܚܠܗܘܿܢ ܠܐ݇ܢܵܫܵܐ ܕܦܠܸܛܠܗܘܿܢ ܡܸܢܹܗ ܕܲܝܘܹ̈ܐ ܠܒ̣ܝܼܫܵܐ ܘܡܵܪܹܐ ܐܵܕܵܒ̣: ܘܝܬܝܼܒ̣ܵܐ ܠܟܸܣ ܐܲܩܠܹ̈ܐ ܕܝܼܫܘܿܥ: ܘܙܕܸܥܠܗܘܿܢ. 36ܘܗܘܼܩܹܠܗܘܿܢ ܐܸܠܵܝܗܝ ܐܵܢܝܼ ܕܚܙܹܐܠܗܘܿܢ: ܕܵܐܟ̣ܝܼ ܦܸܫܠܹܗ ܒܘܼܣܡܵܐ ܗ̇ܘ ܐ݇ܢܵܫܵܐ ܕܲܝܘܵܢܵܐ. 37ܘܒܵܥܝܼ ܗ݇ܘܵܘ ܡܸܢܹܗ ܟܠܹܗ ܟܸܢܫܵܐ ܕܐܲܬܪܵܐ ܕܚܵܕܸܪ̈ܘܵܢܹܐ ܕܓܸܕܪܵܝܹܐ ܕܐܵܙܸܠ ܡ̣ܢ ܠܟܸܣܠܵܝܗܝ: ܣܵܒܵܒ ܕܙܕܘܿܥܬܵܐ ܓܘܼܪܬܵܐ ܕܒ̣ܝܼܩܵܝܠܵܗ̇. 38ܘܗ̇ܘ ܐܣܸܩܠܹܗ ܠܓܵܡܝܼ ܘܕܸܪܹܗ. ܐܝܼܢܵܐ ܗ̇ܘ ܐ݇ܢܵܫܵܐ ܕܦܠܸܛܠܗܘܿܢ ܡܸܢܹܗ ܕܲܝܘܹ̈ܐ ܒܵܥܝܹܐ ܗ݇ܘܵܐ ܡܸܢܹܗ ܕܠܟܸܣܠܹܗ ܗܵܘܹܐ ܗ݇ܘܵܐ. ܐܝܼܢܵܐ ܝܼܫܘܿܥ ܫܘܼܕܸܪܹܗ: ܘܐَܡܝܼܪܹܗ ܐܸܠܹܗ. 39ܕܘܼܪ ܠܒܲܝܬܘܼܟ: ܘܗܵܩܝܼ ܕܵܐܟ̣ܝܼ ܡܸܢܕܝܼ ܥܒܸܕܠܹܗ ܐܸܠܘܼܟܼ ܐܲܠܵܗܵܐ. ܘܐَܙܸܠܹܗ: ܘܡܲܟ̇ܪܸܙ ܗ݇ܘܵܐ ܒܟܠܵܗ̇ ܡܕܝܼܢَܬܵܐ ܡܸܢܕܝܼ ܕܥܒܸܕܠܹܗ ܐܸܠܹܗ ܝܼܫܘܿܥ. 40ܘܗَܘܹܐ ܠܵܗ̇ ܟܲܕ ܕܸܪܹܗ ܝܼܫܘܿܥ: ܩܘܼܒܸܠܹܗ ܟܸܢܫܵܐ: ܣܵܒܵܒ ܕܟܠܵܝܗܝ ܒܸܣܦܵܪܵܐ ܗ݇ܘܵܘ ܐܸܠܹܗ. 41ܘܗܵܐ: ܐَܬܹܐܠܹܗ ܚܲܕَ ܐ݇ܢܵܫܵܐ ܕܫܸܡܹܗ ܝܘܿܐܵܪܵܫ: ܪܹܫܵܐ ܕܟܢܘܼܫܬܵܐ: ܘܢܦܸܠܹܗ ܩܵܕَܡ ܐܲܩܠܹ̈ܐ ܕܝܼܫܘܿܥ: ܘܒܵܥܝܹܐ ܗ݇ܘܵܐ ܡܸܢܹܗ ܕܥܵܒܼܸܪ ܠܒܲܝܬܹܗ. 42ܣܵܒܵܒ ܒܪܵܬܵܐ ܝܼܚܝܼܕܵܝܬܵܐ ܐܝܼܬ ܗ݇ܘܵܐ ܠܹܗ ܐܲܝܟܼ ܒܲܪَܬ ܬܪܸܥܣܲܪ ܫܸܢܹ̈ܐ: ܘܒܸܡܝܵܬܵܐ ܗ݇ܘܵܐ. ܘܟܲܕ ܒܹܐܙܵܠܵܐ ܗ݇ܘܵܐ ܗ̇ܘ: ܟܸܢܫܵܐ ܪܵܒܵܐ ܒܸܚܠܵܨܹܗ ܗ݇ܘܵܐ. 43ܐܝܼܢܵܐ ܚܕܵܐ ܒܲܟ̣ܬܵܐ ܕܟܹܐ ܐܵܙܸܠ ܗ݇ܘܵܐ ܕܸܡܘܼܗ̇ ܬܪܸܥܣܲܪ ܫܸܢܹ̈ܐ: ܗ̇ܝ ܕܓܵܘ ܗܲܟܝܼܡܹ̈ܐ ܟܠܹܗ ܡܸܢܕܝܘܼܗ̇ ܚܘܼܪܸܓ̰ܠܵܗ̇: ܘܠܵܐ ܡܸܨܹܠܵܗ̇ ܕܡ̣ܢ ܚܲܕَ ܦܵܝܫܵܐ ܗ݇ܘܵܐ ܒܘܼܣܸܡܬܵܐ. 44ܐَܬܹܐܠܵܗ̇ ܡ̣ܢ ܒܵܬَܪܹܗ ܘܕܩܸܪܵܗ̇ ܒܫܸܦܘܼܠܵܐ ܕܓ̰ܘܼܠܹܗ: ܘܕܲܪܣܵܥܲܬ ܟܠܹܠܵܗ̇ ܡܲܓ̰ܪܵܝܬܵܐ ܕܕܸܡܘܼܗ̇. 45ܘܐَܡܝܼܪܹܗ ܝܼܫܘܿܥ: ܡܵܢܝܼ ܕܩܹܪܹܗ ܒܝܼܝܼ: ܘܟܲܕ ܟܠܵܝܗܝ ܣܵܪܒ̣ܝܼ ܗ݇ܘܵܘ: ܐَܡܝܼܪܹܗ ܐܸܠܹܗ ܟܹܐܦܵܐ ܘܐܵܢܝܼ ܕܥܲܡܹܗ: ܪܵܒܝܲܢ: ܟܸܢܫܹ̈ܐ ܡܲܠܝܘܼܨܘܼܟ ܝܼܢܵܐ ܘܒܸܚܠܵܨܵܐ ܝܢܵܐ: ܘܒܹܐܡܵܪܵܐ ܝܘܸܬ: ܡܵܢܝܼ ܕܩܸܪܹܗ ܒܝܼܝܼ. 46 ܐܝܼܢܵܐ ܝܼܫܘܿܥ ܐَܡܝܼܪܹܗ: ܐ݇ܢܵܫܵܐ ܕܩܸܪܹܗ ܒܝܼܝܼ: ܣܵܒܵܒ ܐܵܢܵܐ ܝܕܸܥܠܝܼ ܕܚܲܝܠܵܐ ܦܠܸܛܠܹܗ ܡܸܢܝܼ. 47ܐܝܼܢܵܐ ܒܲܟ̣ܬܵܐ ܟܲܕ ܚܙܹܠܵܗ̇ ܕܠܵܐ ܗَܘܹܐ ܠܵܗ̇ ܛܫܝܼܬܵܐ: ܐَܬܹܐܠܵܗ̇ ܒܸܪܓܵܕܵܐ ܘܢܦܸܠܵܗ̇ ܩܵܕَܡܘܼܗܝ: ܘܐَܡܝܼܪܵܗ̇ ܩܵܕَܡ ܟܠܹܗ ܛܵܝܸܦܵܐ ܒܘܼܬ ܐܲܝܢܝܼ ܗܲܓ̰ܲܬ ܕܩܸܪܵܗ̇: ܘܕܵܐܟ̣ܝܼ ܕܲܪܣܵܥܲܬ ܒܣܸܡܠܵܗ̇. 48ܐܝܼܢܵܐ ܗ̇ܘ ܐَܡܝܼܪܹܗ ܐܸܠܵܗ̇: ܒܪܵܬܵܐ: ܗܲܝܡܵܢܘܼܬܵܟ̣ܝ ܩܲܡ ܡܲܚܝܼܵܐ ܠܵܟ̣ܝ: ܙܹܠَܐܝ ܒܫܠܵܡܵܐ. 49ܘܗܵܠܵܐ ܗ̇ܘ ܗܲܡܙܘܼܡܹܐ: ܐَܬܹܐܠܹܗ ܐ݇ܢܵܫܵܐ ܡ̣ܢ ܓܘܼܪܵܐ ܕܟܢܘܼܫܬܵܐ: ܘܐَܡܝܼܪܹܗ ܐܸܠܹܗ: ܡܝܼܬܠܵܗ̇ ܒܪܵܬܘܼܟ: ܠܵܐ ܝܵܗَܒܸܬ ܙܲܗܡܲܬ ܠܡܲܠܦܵܢܵܐ. 50ܐܝܼܢܵܐ ܝܼܫܘܿܥ ܫܡܸܥܠܹܗ: ܘܓ̰ܘܼܘܸܒܠܹܗ ܐܸܠܹܗ: ܠܵܐ ܙܵܕܥܸܬ: ܗܲܪ ܗܲܡܸܢ: ܘܒܸܬ ܚܲܝܵܐ. 51ܘܟܲܕ ܥܒܼܸܪܹܗ ܠܒܲܝܬܵܐ: ܠܵܐ ܫܒܸܩܠܹܗ ܠܐ݇ܢܵܫܵܐ ܕܥܵܒܼܸܪ ܥܲܡܹܗ: ܫܒ̣ܘܿܩ ܡ̣ܢ ܠܫܸܡܥܘܿܢ ܘܠܝܲܥܩܘܿܒ̣ ܘܠܝܘܿܚܲܢܵܢ: ܘܠܒܵܒܵܐ ܕܒܪܵܬܵܐ ܘܠܝܸܡܘܼܗ̇. 52ܘܟܠܵܝܗܝ ܒܵܟ̣ܝܼ ܗ݇ܘܵܘ ܘܥܵܒ̣ܕܝܼ ܗ݇ܘܵܘ ܬܵܙܝܼ ܥܲܠܘܼܗ̇. ܐܝܼܢܵܐ ܗ̇ܘ ܐَܡܝܼܪܹܗ: ܠܵܐ ܒܵܟ̣ܝܼܬܘܿܢ: ܣܵܒܵܒ ܠܹܐ ܝ݇ܠܵܗ̇ ܡܝܼܬܬܵܐ: ܐܸܠܵܐ ܕܡܝܼܟ̣ܬܵܐ ܝ݇ܠܵܗ̇. 53ܘܓܵܚܟܝܼ ܗ݇ܘܵܘ ܒܝܹܗ: ܕܝܵܕܥܝܼ ܗ݇ܘܵܘ ܕܡܝܼܬܬܵܐ ܗ݇ܘܵܐ. 54ܐܝܼܢܵܐ ܗ̇ܘ ܕܒ̣ܝܼܩܵܠܹܗ ܒܐܝܼܕܘܼܗ̇: ܘܩܸܪܝܵܠܹܗ ܘܐَܡܝܼܪܹܗ: ܒܪܵܬܵܐ: ܩܘܼܡَܝ. 55ܘܕܸܪܵܗ̇ ܪܘܼܚܵܗ̇ ܘܕܲܪܣܵܥܲܬ ܩܸܡܠܵܗ̇: ܘܦܩܸܕܠܹܗ ܕܝܵܗَܒ̣ܝܼ ܠܵܗ̇ ܠܹܐܟ̣ܵܠܵܐ. 56ܘܥܘܼܓ̰ܸܒܠܗܘܿܢ ܐܲܒ̣ܵܗܵܘ̈ܗ̇: ܐܝܼܢܵܐ ܗ̇ܘ ܥܒ̣ܝܼܕܵܝܠܹܗ ܗܸܫܝܵܪ ܕܠܐ݇ܢܵܫܵܐ ܠܵܐ ܐܵܡܪܝܼ ܡܸܢܕܝܼ ܕܗَܘܹܐܠܹܗ.