0:00
/
1ܘܩܪܹܐܠܹܗ ܝܼܫܘܿܥ ܠܬܪܸܥܣܲܪ ܬܲܠܡܝܼܕܘܼ̈ܗܝ: ܘܝܘܼܗَܒܼܸܠܹܗ ܐܸܠܵܝܗܝ ܚܲܝܠܵܐ ܘܗܘܼܟܡܵܐ ܥܲܠ ܟܠܵܝܗܝ ܕܲܝܘܹ̈ܐ: ܘܡܲܪ̈ܥܹܐ ܠܒܵܣܘܿܡܹܐ. 2ܘܫܘܼܕܪܵܝܠܹܗ ܠܡܲܟܪܘܼܙܹܐ ܡܲܠܟܘܼܬܹܗ ܕܐܲܠܵܗܵܐ: ܘܠܒܵܣܘܿܡܹܐ ܡܸܪ̈ܥܝܹܐ. 3ܘܐَܡܝܼܪܹܗ ܐܸܠܵܝܗܝ: ܡܸܢܕܝܼ ܠܵܐ ܫܵܩܠܝܼܬܘܿܢ ܠܐܘܼܪܚܵܐ: ܠܵܐ ܩܵܛܝܼܵܐ: ܘܠܵܐ ܓ̰ܲܢܬܵܐ: ܘܠܵܐ ܠܲܚܡܵܐ: ܘܠܵܐ ܣܹܐܡܵܐ: ܘܠܵܐ ܬܲܪ̈ܬܹܝ ܨܘܼܕܪ̈ܵܬܹܐ ܗܵܘܝܼ ܠܵܘܟ̣ܘܿܢ. 4ܘܠܲܐܝܢܝܼ ܒܲܝܬܵܐ ܕܥܵܒܼܪܝܼܬܘܿܢ ܓܵܘܹܗ: ܬܵܡܵܐ ܦܘܼܫܘܿܢ: ܘܡ̣ܢ ܬܵܡܵܐ ܦܠܘܿܛܘܿܢ. 5ܘܠܡ̇ܢ ܕܠܵܐ ܩܵܒܠܝܼ ܠܵܘܟ̣ܘܿܢ: ܐܝܼܡܲܢ ܕܦܵܠܛܝܼܬܘܿܢ ܡܗ̇ܝ ܡܕܝܼܢَܬܵܐ: ܐܘܼܦ ܬܵܘܙ ܡ̣ܢ ܐܲܩܠܵܘ̈ܟ̣ܘܿܢ ܢܦܘܿܨܘܿܢ ܥܲܠܵܝܗܝ ܠܣܵܗܕܘܼܬܵܐ. 6ܘܦܠܸܛܠܗܘܿܢ: ܘܚܵܕܪܝܼ ܗ݇ܘܵܘ ܓܵܘ ܡܵܬܘܵܬܹ̈ܐ: ܘܡܲܫܚܸܕܝܼ ܗ݇ܘܵܘ ܘܒܵܣܡܝܼ ܗ݇ܘܵܘ ܒܟܠ ܕܘܼܟܵܐ. 7ܐܝܼܢܵܐ ܫܡܸܥܠܹܗ ܗܹܪܘܿܕܸܣ ܛܸܛܪܲܪܟܵܐ ܟܠܵܝܗܝ ܕܒܸܗܘܵܝܵܐ ܗ݇ܘܵܘ: ܘܦܸܫܠܹܗ ܥܘܼܓ̰ܒܵܐ: ܣܵܒܵܒ ܕܐܵܡܪܝܼ ܗ݇ܘܵܘ ܐ݇ܢܵܫܹ̈ܐ: ܝܘܿܚܲܢܵܢ ܩܝܼܡܵܐ ܝܠܹܗ ܡ̣ܢ ܓܵܘܵܐ ܕܡܝܼܬܹ̈ܐ. 8ܘܐ݇ܚܹܪ̈݇ܢܹܐ ܐܵܡܪܝܼ ܗ݇ܘܵܘ: ܕܐܹܠܝܼܵܐ ܦܸܫܠܹܗ ܚܸܙܝܵܐ: ܘܐ݇ܚܹܪ݇ܢܵܐ: ܕܢܒ̣ܝܼܵܐ ܚܲܕَ ܡ̣ܢ ܩܵܕَܡܵܝܹ̈ܐ ܩܝܼܡܵܐ ܝܠܹܗ. 9ܘܐَܡܝܼܪܹܗ ܗܹܪܘܿܕܸܣ: ܪܹܫܹܗ ܕܝܘܿܚܲܢܵܢ ܐܵܢܵܐ ܦܪܸܡܠܝܼ: ܐܝܼܢܵܐ ܡܵܢܝܼ ܝܠܹܗ ܐܵܗܵܐ ܕܐܲܝܟܼ ܕܐܲܢܹܐ ܒܸܫܡܲܥܝܵܐ ܝܘܸܢ ܒܵܗَܣܹܗ: ܘܛܸܥܠܹܗ ܠܸܚܙܵܝܹܗ. 10ܘܟܲܕ ܕܸܪܗܘܿܢ ܫܠܝܼܚܹ̈ܐ: ܗܘܼܩܹܠܗܘܿܢ ܐܸܠܹܗ ܟܠ ܡܸܢܕܝܼ ܕܥܒܸܕܠܗܘܿܢ. ܘܠܘܼܒܠܵܝܠܹܗ ܒܢܲܦ̮ܫܵܝܗܝ ܘܐَܙܸܠܹܗ ܠܚܕܵܐ ܡܕܝܼܢَܬܵܐ: ܕܦܵܝܫܵܐ ܩܪܝܼܬܵܐ: ܒܹܝܬ ܨܲܝܕܵܐ. 11ܐܝܼܢܵܐ ܟܸܢܫܹ̈ܐ ܟܲܕ ܝܕܸܥܠܗܘܿܢ: ܐَܙܸܠܗܘܿܢ ܒܵܬَܪܹܗ: ܘܩܘܼܒ̇ܠܵܝܠܹܗ: ܘܗܘܼܡܙܸܡܠܹܗ ܥܲܡܵܝܗܝ ܥܲܠ ܡܲܠܟܘܼܬܵܐ ܕܐܲܠܵܗܵܐ. ܘܠܐܵܢܝܼ ܕܣܢܝܼܩܹܐ ܗ݇ܘܵܘ ܥܲܠ ܒܵܣܵܡܬܵܐ ܒܘܼܣܸܡܠܹܗ. 12ܐܝܼܢܵܐ ܟܲܕ ܫܘܼܪܹܐܠܹܗ ܝܵܘܡܵܐ ܠܸܩܠܵܒܵܐ: ܐ݇ܬܹܐܠܗܘܿܢ ܬܪܸܥܣܲܪܬܹܗ: ܘܐܵܡܪܝܼ ܐܸܠܹܗ: ܫܵܕܸܪ ܠܟܸܢܫܹ̈ܐ: ܕܐܵܙܠَܝܼ ܠܡܵܬܘܵܬܹ̈ܐ ܕܚܵܕܸܪ̈ܘܵܢܲܢ ܘܠܩܸܫ̈ܠܵܓܹܐ: ܕܫܵܪܝܼ ܒܝܼܵܝܗܝ: ܘܡܵܫَܟ̰ܚܝܼ ܠܗ݇ܘܿܢ ܡܹܐܟ̣ܘܼܠܬܵܐ: ܣܵܒܵܒ ܠܲܐܟ̣ܵܐ ܒܕܘܼܟܵܐ ܚܵܪܵܒܵܐ ܝܘܵܚ. 13ܐܝܼܢܵܐ ܐܵܡܸܪ ܐܸܠܵܝܗܝ: ܗܲܒَܠܘܿܢ ܠܗ݇ܘܿܢ ܐܲܚܬܘܿܢ ܠܹܐܟ̣ܵܠܵܐ. ܐܝܼܢܵܐ ܐܵܢܝܼ ܐܵܡܪܝܼ: ܠܲܝܬ ܠܲܢ ܙܵܘܕܵܐ ܡ̣ܢ ܚܲܡܫܵܐ ܠܲܚܡܹ̈ܐ ܘܬܪܹܝ ܢܘܼܢܹ̈ܐ: ܡܵܓܲܪ ܕܐܵܙܵܠَܚ ܘܙܵܒ̣ܢܵܚ ܡܹܐܟ̣ܘܼܠܬܵܐ ܩܵܐ ܕܐܵܗܵܐ ܛܵܝܸܦܵܐ ܟܠܹܗ. 14ܣܵܒܵܒ ܕܗܵܘܝܼ ܗ݇ܘܵܘ ܐܲܝܟܼ ܚܲܡܫܵܐ ܐܲܠܦܹ̈ܐ ܐ݇ܢܵܫܹ̈ܐ. ܘܐَܡܝܼܪܹܗ ܠܬܲܠܡܝܼܕܘܼ̈ܗܝ: ܡܲܬܝܸܒ̣ܘܿܢ ܠܗ݇ܘܿܢ ܕܲܣܬܹ̈ܐ: ܚܲܡܫܝܼ ܒܕܲܣܬܵܐ. 15ܘܥܒܸܕܠܗܘܿܢ ܗܲܕܟ̣ܵܐ: ܘܡܘܼܬܝܸܒ̣ܠܗܘܿܢ ܠܟܠܵܝܗܝ. 16ܘܫܩܸܠܹܗ ܐܵܢܝܼ ܚܲܡܫܵܐ ܠܲܚܡܹ̈ܐ ܘܬܪܹܝ ܢܘܼܢܹ̈ܐ: ܘܚܸܪܹܗ ܒܫܡܲܝܵܐ: ܘܒܘܼܪܟ̣ܵܝܠܹܗ: ܘܩܨܹܠܹܗ: ܘܝܘܼܗَܒܼܸܠܹܗ ܠܬܲܠܡܝܼܕܘܼ̈ܗܝ ܕܡܲܬܒ̣ܝܼ ܠܟܸܢܫܹ̈ܐ. 17ܘܐَܟܼܸܠܗܘܿܢ ܟܠܵܝܗܝ ܘܣܒܹܥܠܗܘܿܢ: ܘܫܩܸܠܗܘܿܢ ܩܸܛܥܵܛܹ̈ܐ ܡܸܢܕܝܼ ܕܙܸܕܠܗܘܿܢ: ܬܪܸܥܣܲܪ ܩܘܼܦܹ̈ܐ. 18ܘܗَܘܹܐ ܠܵܗ̇: ܟܲܕ ܨܵܠܘܿܝܹܐ ܗ݇ܘܵܐ ܒܢܲܦ̮ܫܹܗ: ܬܲܠܡܝܼܕܘܼ̈ܗܝ ܥܲܡܹܗ ܗَܘܹܐܠܗَܘܿܢ: ܘܒܘܼܩܸܪܹܗ ܡܸܢܵܝܗܝ ܘܐَܡܝܼܪܹܗ: ܡܵܢܝܼ ܒܹܐܡܵܪܵܐ ܝܢܵܐ ܒܘܼܬ ܕܝܼܝܼ ܟܸܢܫܹ̈ܐ ܕܝܼܘܸܢ. 19ܓ̰ܘܼܘܸܒܠܗܘܿܢ ܘܐܵܡܪܝܼ ܐܸܠܹܗ: ܝܘܿܚܲܢܵܢ ܡܲܥ̱ܡܕܵܢܵܐ: ܘܐ݇ܚܹܪ̈݇ܢܹܐ: ܐܹܠܝܼܵܐ: ܘܐ݇ܚܹܪ̈݇ܢܹܐ: ܢܒ̣ܝܼܵܐ ܚܲܕَ ܡ̣ܢ ܩܵܕَܡܵܝܹ̈ܐ ܩܝܼܡܵܐ ܝܠܹܗ. 20ܐܵܡܸܪ ܐܸܠܵܝܗܝ: ܐܝܼܢܵܐ ܐܲܚܬܘܿܢ ܡܵܢܝܼ ܒܹܐܡܵܪܵܐ ܝܬܘܿܢ ܕܝܼܘܸܢ: ܓ̰ܘܼܘܸܒܠܹܗ ܟܹܐܦܵܐ ܘܐَܡܝܼܪܹܗ: ܡܫܝܼܚܹܗ ܕܐܲܠܵܗܵܐ. 21ܐܝܼܢܵܐ ܗ̇ܘ ܢܓ̰ܘܼܠܹܗ ܒܝܼܵܝܗܝ: ܘܦܩܸܕܠܹܗ ܕܐܵܗܵܐ ܠܐ݇ܢܵܫܵܐ ܠܵܐ ܐܵܡܪܝܼ ܗ݇ܘܵܘ. 22ܒܹܐܡܵܪܵܐ: ܘܵܓ̰ܸܒ ܝ݇ܠܵܗ̇ ܕܒܪܘܿܢܹܗ ܕܐ݇ܢܵܫܵܐ ܪܵܒܵܐ ܚܲܫܵܐ ܩܵܒܸ̇ܠ: ܘܦܵܐܹܫ ܡܘܼܣܠܝܼܵܐ ܡ̣ܢ ܚܘܵܪ̈ܕܸܩܢܹܐ ܘܓܘܼܪ̈ܵܢܹܐ ܕܟܵܗܢܹ̈ܐ ܘܣܵܦܪܹ̈ܐ: ܘܦܵܐܹܫ ܩܛܝܼܠܵܐ: ܘܒܝܵܘܡܵܢܹ̈ܐ ܕܬܠܵܬَܐ ܩܵܝܸܡ. 23ܘܐܵܡܸܪ ܗ݇ܘܵܐ ܠܟܠܵܝܗܝ: ܡ̇ܢ ܕܒܵܣܡܵܐ ܠܹܗ ܕܐܵܬܹܐ ܒܵܬَܪܝܼ: ܟܵܦܸܪ ܒܓܵܢܹܗ: ܘܫܵܩܸܠ ܙܩܝܼܦܹܗ ܝܵܘܡܵܐ ܒܝܵܘܡܵܐ: ܘܐܵܬܹܐ ܒܵܬَܪܝܼ. 24ܣܵܒܵܒ ܡ̇ܢ ܕܒܵܣܡܵܐ ܠܹܗ ܕܓܵܢܹܗ ܡܲܚܹܐ: ܒܸܬ ܬܵܠܸܩ ܠܵܗ̇: ܐܝܼܢܵܐ ܡ̇ܢ ܕܬܵܠܸܩ ܓܵܢܹܗ ܒܚܵܬܸܪ ܕܝܼܝܼ: ܗ̇ܘ ܒܸܬ ܡܲܚܹܐ ܠܵܗ̇. 25ܣܵܒܵܒ ܡܘܼܕܝܼ ܦܲܝܕܵܐ ܟܹܐ ܗܵܘܹܐ ܠܒܲܪܢܵܫܵܐ: ܕܩܵܢܹܐ ܟܠܹܗ ܥܵܠܡܵܐ: ܐܝܼܢܵܐ ܓܵܢܹܗ ܬܵܠܸܩ ܝܲܢ ܡܲܒܨܸܪ. 26ܣܵܒܵܒ ܡ̇ܢ ܕܢܵܚܸܦ ܒܝܼܝܼ ܘܒܗܹܡܸܙܡܵܢܝܼ̈: ܒܸܬ ܢܵܚܸܦ ܒܝܹܗ ܒܪܘܿܢܹܗ ܕܐ݇ܢܵܫܵܐ: ܐܝܼܡܲܢ ܕܐܵܬܹܐ ܒܚܸܩܪܵܐ ܕܓܵܢܹܗ ܘܕܒܵܒܵܐ ܘܕܡܲܠܲܐܟܹ̈ܐ ܩܲܕܝܼܫܹ̈ܐ. 27ܫܲܪܝܼܪܘܼܬܵܐ ܒܹܐܡܵܪܵܐ ܝܘܸܢ ܐܸܠܵܘܟ̣ܘܿܢ: ܕܐܝܼܬ ܐ݇ܢܵܫܹ̈ܐ ܒܸܟܠܵܝܵܐ ܠܲܐܟ̣ܵܐ: ܕܗܲܪ ܠܹܐ ܛܵܥܡܝܼ ܡܵܘܬܵܐ ܗܲܠ ܕܚܵܙܝܼ ܡܲܠܟܘܼܬܵܐ ܕܐܲܠܵܗܵܐ. 28ܐܝܼܢܵܐ ܗَܘܹܐ ܠܵܗ̇ ܒܵܬَܪ ܐܲܢܹܐ ܗܹܡܸܙܡܵܢܹ̈ܐ ܐܲܝܟܼ ܬܡܵܢܝܵܐ ܝܵܘܡܵܢܹ̈ܐ: ܠܘܼܒܸܠܹܗ ܠܟܹܐܦܵܐ ܘܠܝܲܥܩܘܿܒ̣ ܘܠܝܘܿܚܲܢܵܢ: ܘܐ݇ܣܸܩܠܹܗ ܠܛܘܼܪܵܐ ܠܨܵܠܘܿܝܹܐ ܨܠܘܿܬܵܐ. 29ܘܗَܘܹܐ ܠܵܗ̇ ܟܲܕ ܗ̇ܘ ܨܵܠܘܿܝܹܐ ܗ݇ܘܵܐ: ܦܸܫܠܹܗ ܡܘܼܚܠܸܦܵܐ ܚܸܙܘܵܐ ܕܦܵܬܹܗ: ܘܠܒܸܫܬܹܗ ܚܘܸܪܵܗ̇ ܘܡܲܒܪܸܩܵܐ ܗ݇ܘܵܐ. 30ܘܗܵܐ: ܬܪܹܝ ܐ݇ܢܵܫܹ̈ܐ ܗܲܡܙܘܼܡܹܐ ܥܲܡܹܗ: ܕܝܼܗ݇ܘܵܘ ܡܘܼܫܹܐ ܘܐܹܠܝܼܵܐ. 31ܕܦܸܫܠܗَܘܿܢ ܚܸܙܝܹܐ ܒܬܸܫܒܘܿܚܬܵܐ: ܘܐܵܡܪܝܼ ܗ݇ܘܵܘ ܒܘܼܬ ܕܦܠܵܛܹܗ ܕܗܕܝܼܪܵܐ ܗ݇ܘܵܐ ܕܬܲܡܸܡ ܒܐܘܿܪܸܫܠܸܡ. 32ܘܟܹܐܦܵܐ ܘܐܵܢܝܼ ܕܥܲܡܹܗ ܝܘܼܩܪܸܢܹܐ ܗ݇ܘܵܘ ܒܫܸܢܬܵܐ: ܘܟܲܕ ܪܥܸܫܠܗܘܿܢ ܚܙܹܐܠܗܘܿܢ ܚܸܩܪܹܗ: ܘܠܐܵܢܝܼ ܬܪܹܝ ܐ݇ܢܵܫܹ̈ܐ ܕܒܸܟܠܵܝܵܐ ܠܟܸܣܠܹܗ. 33ܘܗَܘܹܐ ܠܵܗ̇ ܟܲܕ ܒܸܦܪܵܫܵܐ ܗ݇ܘܵܘ ܡܸܢܹܗ: ܐَܡܝܼܪܹܗ ܟܹܐܦܵܐ ܠܝܼܫܘܿܥ: ܪܵܒܝܼ: ܨܦܵܝܝܼ ܝ݇ܠܵܗ̇ ܩܵܬܲܢ ܕܠܲܐܟ̣ܵܐ ܗܵܘܵܚ. ܘܥܵܒ̣ܕܵܚ ܬܠܵܬَ ܡܛܲܠܠܹ̈ܐ: ܚܕܵܐ ܩܵܐ ܕܝܼܘܼܟ: ܘܚܕܵܐ ܩܵܐ ܡܘܼܫܹܐ: ܘܚܕܵܐ ܩܵܐ ܐܹܠܝܼܵܐ: ܘܠܹܐ ܗ݇ܘܵܐ ܒܝܼܕܵܥܝܵܐ ܡܘܼܕܝܼ ܒܹܐܡܵܪܵܐ ܗ݇ܘܵܐ. 34ܘܟܲܕ ܐَܡܝܼܪܹܗ ܐܲܢܹܐ: ܗَܘܹܐ ܠܵܗ̇ ܥܢܵܢܵܐ ܘܥܒܸܕܠܵܗ̇ ܛܸܠܵܢܝܼܬܵܐ ܥܲܠܵܝܗܝ: ܘܙܕܸܥܠܗܘܿܢ ܟܲܕ ܐܵܢܝܼ ܥܒܼܸܪܗܘܿܢ ܓܵܘ ܥܢܵܢܵܐ. 35ܘܩܵܠܵܐ ܗَܘܹܐܠܹܗ ܡ̣ܢ ܥܢܵܢܵܐ ܒܹܐܡܵܪܵܐ: ܐܵܗܵܐ ܝܠܹܗ ܒܪܘܿܢܝܼ ܡܘܼܚܸܒܵܐ: ܐܸܠܹܗ ܫܡܸܥܡܘܿܢ. 36 ܘܟܲܕ ܗَܘܹܐܠܹܗ ܩܵܠܵܐ: ܦܸܫܠܹܗ ܡܘܼܫَܟ̰ܸܚܵܐ ܝܼܫܘܿܥ ܒܢܲܦ̮ܫܹܗ. ܘܐܵܢܝܼ ܫܬܸܩܠܗܘܿܢ: ܘܠܐ݇ܢܵܫܵܐ ܠܵܐ ܐَܡܸܪܗܘܿܢ ܒܐܵܢܝܼ ܝܵܘܡܵܢܹ̈ܐ ܡܸܢܕܝܼ ܡ̣ܢ ܕܐܵܢܝܼ ܕܚܙܹܐܠܗܘܿܢ. 37ܘܗَܘܹܐ ܠܵܗ̇ ܒܝܵܘܡܵܢܹ̈ܐ ܕܒܵܬَܪܹܗ: ܟܲܕ ܒܸܨܠܵܝܵܐ ܐܵܢܝܼ ܡ̣ܢ ܛܘܼܪܵܐ: ܬܦܸܩܠܹܗ ܒܝܹܗ ܟܸܢܫܵܐ ܪܵܒܵܐ. 38ܘܗܵܐ: ܚܲܕَ ܐ݇ܢܵܫܵܐ ܡ̣ܢ ܟܸܢܫܵܐ ܡܘܼܩܘܸܚܠܹܗ ܘܐَܡܝܼܪܹܗ: ܡܲܠܦܵܢܵܐ: ܦܲܪܦܘܼܠܹܐ ܝܘܸܢ ܒܝܼܘܼܟ ܥܒ̣ܘܿܕ ܪ̈ܲܚܡܹܐ ܥܲܠ ܒܪܘܿܢܝܼ ܕܝܼܚܝܼܕܵܝܵܐ ܝܠܹܗ ܐܸܠܝܼ. 39ܘܗܵܐ: ܪܘܼܚܵܐ ܟܹܐ ܥܵܒ̣ܪܵܐ ܥܲܠܘܼܗܝ: ܘܡܸܢܫܸܠܬܵܢܹܐ ܟܹܐ ܡܲܩܘܸܚ: ܘܟܹܐ ܚܲܪܚܸܟ̰ ܟܵܟܹ̈ܗ ܘܟܹܐ ܓܲܒܓܸܦ ܦܘܼܡܹܗ: ܘܒܚܲܝ݇ܠܵܗ̇ ܟܹܐ ܦܵܪܩܵܗ̇ ܡܸܢܹܗ ܓ̰ܲܢܓ̰ܘܼܪܹܐ ܐܸܠܹܗ. 40ܘܦܘܼܪܦܸܠܝܼ ܒܬܲܠܡܝܼܕܘܼ̈ܟ ܕܦܵܠܛܝܼ ܠܹܗ: ܘܠܵܐ ܡܨܹܐܠܗܘܿܢ. 41ܘܓ̰ܘܼܘܸܒܠܹܗ ܝܼܫܘܿܥ ܘܐَܡܝܼܪܹܗ: ܝܵܐ ܐܘܼܓ̰ܵܓ̣ ܠܵܐ ܗܘܼܡܸܢܬܵܐ ܘܦܟ̰ܝܼܠܬܵܐ: ܗܲܠ ܐܝܼܡܲܢ ܒܸܬ ܗܵܘܸܢ ܠܟܸܣܠܵܘܟ̣ܘܿܢ: ܘܚܵܡܠܸܢ ܒܝܼܵܘܟ̣ܘܿܢ: ܡܲܝܬَܝܼ ܠܹܗ ܠܲܐܟ̣ܵܐ ܒܪܘܿܢܘܼܟ. 42ܘܟܲܕ ܒܹܐܬܵܝܵܐ ܗ݇ܘܵܐ: ܚܘܼܪܙܸܦܠܹܗ ܗ̇ܘ ܕܲܝܘܵܐ: ܘܚܠܸܨܠܹܗ. ܘܢܓ̰ܸܘܼܠܹܗ ܝܼܫܘܿܥ ܒܪܘܼܚܵܐ ܛܲܡܹܐܐ: ܘܒܘܼܣܸܡܠܹܗ ܠܝܵܠܵܕَܐ: ܘܝܘܼܗَܒܼܸܠܹܗ ܠܒܵܒܹܗ. 43ܘܥܘܼܓ̰ܸܒܠܗܘܿܢ ܟܠܵܝܗܝ ܒܓܘܼܪܘܼܬܹܗ ܕܐܲܠܵܗܵܐ. ܘܟܲܕ ܟܠܵܝܗܝ ܐ݇ܢܵܫܹ̈ܐ ܥܵܓ̰ܒܝܼ ܗ݇ܘܵܘ ܥܲܠ ܟܠ ܕܥܵܒܸܕ ܗ݇ܘܵܐ: ܐَܡܝܼܪܹܗ ܠܬܲܠܡܝܼܕܘܼ̈ܗܝ. 44ܡܲܬܒ̣ܘܿܢ ܐܲܚܬܘܿܢ ܐܲܢܹܐ ܗܹܡܸܙܡܵܢܹ̈ܐ ܒܢܵܬܝܵܬܵܘ̈ܟ̣ܘܿܢ: ܣܵܒܵܒ ܒܪܘܿܢܹܗ ܕܐ݇ܢܵܫܵܐ ܗܕܝܼܪܵܐ ܝܠܹܗ ܕܦܵܐܹܫ ܣܘܼܦܝܵܐ ܒܐܝܼܕܵܬܹ̈ܐ ܕܒܢܲܝ̈ܢܵܫܵܐ. 45ܐܝܼܢܵܐ ܐܵܢܝܼ ܠܵܐ ܦܘܼܪܡܹܠܗܘܿܢ ܠܐܵܗܵܐ ܗܹܡܸܙܡܵܢ: ܘܛܘܼܫܝܼܬܵܐ ܗ݇ܘܵܐ ܡܸܢܵܝܗܝ ܕܠܵܐ ܝܵܕܥܝܼ ܗ݇ܘܵܘ ܠܵܗ̇: ܘܒܸܙܕܵܥܝܵܐ ܗ݇ܘܵܘ ܕܒܵܩܪܝܼ ܠܹܗ ܥܲܠ ܕܗ̇ܝ ܗܹܡܸܙܡܵܢ. 46ܘܥܒܼܸܪܹܗ ܒܝܼܵܝܗܝ ܚܘܼܫܵܒ̣: ܕܡܵܢܝܼ ܝܠܹܗ ܓܘܼܪܵܐ ܓܵܘܵܝܗܝ. 47ܐܝܼܢܵܐ ܝܼܫܘܿܥ ܝܕܸܥܠܹܗ ܚܘܼܫܵܒ̣ ܕܠܸܒܵܝܗܝ: ܘܫܩܸܠܹܗ ܝܵܠܵܕَܐ ܙܥܘܿܪܵܐ: ܘܡܘܼܟܠܹܐܠܹܗ ܠܟܸܣܠܹܗ. 48ܘܐَܡܝܼܪܹܗ ܐܸܠܵܝܗܝ: ܟܠ ܡ̇ܢ ܕܩܵܒܸ̇ܠ ܠܐܵܗܵܐ ܝܵܠܵܕَܐ ܙܥܘܿܪܵܐ ܒܫܸܡܝܼ: ܐܸܠܝܼ ܟܹܐ ܩܵܒܸ̇ܠ: ܘܡ̇ܢ ܕܐܸܠܝܼ ܩܵܒܸ̇ܠ: ܟܹܐ ܩܵܒܸ̇ܠ ܠܗ̇ܘ ܕܫܘܼܕܪܸܢܹܐ. ܣܵܒܵܒ ܐܲܝܢܝܼ ܕܝܼܠܹܗ ܙܥܘܿܪܵܐ ܓܵܘ ܟܠܵܘܟܘܿܢ: ܐܵܗܵܐ ܝܠܹܗ ܓܘܼܪܵܐ. 49ܘܓ̰ܘܼܘܸܒܠܹܗ ܝܘܿܚܲܢܵܢ ܘܐَܡܝܼܪܹܗ: ܪܵܒ̇ܝܲܢ: ܚܙܹܐܠܲܢ ܐ݇ܢܵܫܵܐ ܦܵܠܘܿܛܹܐ ܕܲܝܘܹ̈ܐ ܒܫܸܡܘܼܟ: ܘܡܘܼܟܠܹܠܲܢ ܐܸܠܹܗ: ܣܵܒܵܒ ܕܠܵܐ ܐَܬܹܐܠܹܗ ܥܲܡܲܢ ܒܵܬَܪܘܼܟ. 50ܐܵܡܸܪ ܐܸܠܹܗ ܝܼܫܘܿܥ: ܠܵܐ ܡܲܟܠܝܼܬܘܿܢ: ܣܵܒܵܒ ܡ̇ܢ ܕܠܹܐ ܝܠܹܗ ܠܕܲܪܩܘܼܒ̣ܠܵܘܟ̣ܘܿܢ ܠܓܹܒܵܘܟ̣ܘܿܢ ܝܼܠܹܗ. 51ܘܗَܘܹܐ ܠܵܗ̇: ܟܲܕ ܦܝܵܫܵܐ ܗ݇ܘܵܘ ܬܘܼܡܸܡܹܐ ܝܵܘܡܵܢܹ̈ܐ ܕܣܘܼܠܵܩܹܗ: ܡܘܼܬܒ̣ܵܠܹܗ ܦܵܬܹܗ ܬܪܘܿܨܵܐ ܕܐܵܙܸܠ ܠܐܘܿܪܸܫܠܸܡ. 52ܘܫܘܼܕܸܪܹܗ ܩܵܨܸܕܹ̈ܐ ܩܵܕَܡ ܦܵܬܹܗ: ܘܐَܙܸܠܗܘܿܢ ܘܥܒܼܸܪܗܘܿܢ ܠܡܵܬܵܐ ܕܫܵܡܪ̈ܵܝܹܐ: ܕܗܵܕܪܝܼ ܗ݇ܘܵܘ ܩܵܐ ܕܝܹܗ. 53ܘܠܵܐ ܩܘܼܒܸܠܗܘܿܢ ܐܸܠܹܗ: ܣܵܒܵܒ ܕܦܵܬܹܗ ܡܘܼܬܒ̣ܵܐ ܗ݇ܘܵܐ ܠܹܐܙܵܠܵܐ ܠܐܘܿܪܸܫܠܸܡ. 54ܘܟܲܕ ܚܙܹܐܠܗܘܿܢ ܝܲܥܩܘܿܒ̣ ܘܝܘܿܚܲܢܵܢ ܬܲܠܡܝܼܕܘܼ̈ܗܝ: ܐܵܡܪܝܼ ܐܸܠܹܗ: ܡܵܪܲܢ: ܒܵܥܹܝܬ ܕܐܵܡܪܵܚ ܘܨܵܠܹܐ ܢܘܼܪܵܐ ܡ̣ܢ ܫܡܲܝܵܐ ܘܬܵܝܸܡ ܠܗ݇ܘܿܢ: ܐܲܝܟܼ ܕܐܘܼܦ ܐܹܠܝܼܵܐ ܥܒܸܕܠܹܗ. 55ܘܕܸܪܹܗ ܘܢܓ̰ܸܘܠܹܐ ܒܝܼܵܝܗܝ ܘܐَܡܝܼܪܹܗ؛ ܠܹܐ ܝܬܘܿܢ ܒܝܼܕܵܥܵܐ ܕܐܲܝܢܝܼ ܪܘܼܚܵܐ ܝَܬܘܿܢ. 56ܣܵܒܵܒ ܒܪܘܿܢܵܐ ܕܐَܢܵܫܵܐ ܠܵܐ ܐَܬܹܐ ܠܹܗ ܠܛܲܠܘܼܩܹܐ ܓܵܢܵܬܹ̈ܐ ܕܒܢܲܝ̈ܢܵܫܵܐ ܐܸܠܵܐ ܠܡܲܚܘܼܘܹܐ. ܘܐَܙܸܠܗܘܿܢ ܠܡܵܬܵܐ ܐܚܹܪَܬܵܐ. 57ܘܗَܘܹܐ ܠܵܗ̇ ܟܲܕ ܒܹܐܙܵܠܵܐ ܗ݇ܘܵܘ ܒܐܘܼܪܚܵܐ: ܐَܡܝܼܪܹܗ ܐܸܠܹܗ ܚܲܕَ ܐ݇ܢܵܫܵܐ: ܒܸܬ ܐܵܬܸܢ ܒܵܬَܪܘܼܟ ܠܐܲܝܟܵܐ ܕܐܵܙܸܠَܬ. 58ܐܵܡܸܪ ܐܸܠܹܗ ܝܼܫܘܿܥ: ܬܲܥ̈ܠܹܐ ܒܸܙܥܵܙܹ̈ܐ ܐܝܼܬ ܠܗ݇ܘܿܢ: ܘܛܲܝܪܹ̈ܐ ܕܫܡܲܝܵܐ ܕܘܼܟܵܐ ܕܫܪܵܝܬܵܐ: ܐܝܼܢܵܐ ܒܪܘܿܢܹܗ ܕܐ݇ܢܵܫܵܐ ܠܲܝܬ ܠܹܗ ܐܲܝܟܵܐ ܕܡܲܬܸܒ̣ ܪܹܫܹܗ. 59ܘܐَܡܝܼܪܹܗ ܠܚܲܕَ ܐ݇ܚܹܪ݇ܢܵܐ: ܬܵܐ ܒܵܬَܪܝܼ ܐܝܼܢܵܐ ܗ̇ܘ ܐَܡܝܼܪܹܗ ܐܸܠܹܗ: ܡܵܪܝܼ: ܗܲܒَܠ ܠܝܼ ܕܲܣܬܘܼܪ ܩܵܕَܡܵܝܬܵܐ ܕܐܵܙܸܠَܢ ܩܵܒ̣ܪܸܢ ܠܒܵܒܝܼ. 60ܐܝܼܢܵܐ ܐَܡܝܼܪܹܗ ܐܸܠܹܗ: ܫܒ̣ܘܿܩ ܡܝܼܬܹ̈ܐ ܩܵܒ̣ܪܝܼ ܡܝܼܬܵܝ̈ܗܝ: ܘܐܲܢَܬ ܙܹܠَܐ ܡܲܫܚܸܕ ܡܲܠܟܘܼܬܹܗ ܕܐܲܠܵܗܵܐ. 61ܘܐَܡܝܼܪܹܗ ܐܸܠܹܗ ܚܲܕَ ܐ݇ܚܹܪ݇ܢܵܐ: ܒܸܬ ܐܵܬܸܢ ܒܵܬَܪܘܼܟ: ܡܵܪܝܼ: ܐܝܼܢܵܐ ܩܵܕَܡܵܝܬܵܐ ܗܲܒَܠ ܠܝܼ ܕܲܣܬܘܼܪ ܕܐܵܙܸܠَܢ ܫܵܒ̣ܩܸܢ ܒܫܠܵܡܵܐ ܠܐܵܢܝܼ ܕܓܵܘ ܒܲܝܬܝܼ. 62ܐܝܼܢܵܐ ܐܵܡܸܪ ܐܸܠܹܗ ܝܼܫܘܿܥ: ܐ݇ܢܵܫܵܐ ܠܹܐ ܕܵܪܹܗ ܐܝܼܕܹܗ ܥܲܠ ܦܕܵܢܵܐ: ܘܚܵܝܸܪ ܠܵܒܵܬَܪܹܗ: ܘܚܵܫܸܚ ܠܡܲܠܟܘܼܬܹܗ ܕܐܲܠܵܗܵܐ.