0:00
/
1ܪܹܫܵܐ ܕܐܹܘܵܢܓܵܠܝܼܘܿܢ ܕܝܼܫܘܿܥ ܡܫܝܼܚܵܐ: ܒܪܘܿܢܹܗ ܕܐܲܠܵܗܵܐ. 2ܐܲܝܟܼ ܕܝܼܠܹܗ ܟܬܝܼܒ̣ܵܐ ܒܐܹܫܲܥܝܵܐ ܢܒ̣ܝܼܵܐ: ܗܵܐ: ܫܵܕܘܿܪܹܐ ܝܘܸܢ ܡܲܠܲܐܟ̣ܝܼ ܩܵܕَܡ ܦܵܬܘܼܟ: ܕܗܵܕܸܪ ܐܘܼܪܚܘܼܟ ܩܵܕَܡܘܼܟ. 3ܩܵܠܵܐ ܕܩܵܪܹܐ ܒܒܲܪܝܼܵܐ: ܗܲܕܪܘܿܢ ܠܐܘܼܪܚܹܗ ܕܡܵܪܝܵܐ: ܘܡܲܫܘܹܡܘܿܢ ܓ̰ܵܕܵܘܵܬܘܼ̈ܗܝ. 4ܗَܘܹܐܠܹܗ ܝܘܿܚܲܢܵܢ ܡܲܥܡܘܿܕܹܐ ܓܵܘ ܒܲܪܝܼܵܐ ܘܡܲܟܪܘܼܙܹܐ ܡܲܥܡܘܿܕܝܼܬܵܐ ܕܬܝܵܒ̣ܘܼܬܵܐ ܠܫܒ̣ܵܩܵܐ ܕܚܛܝܼܵܬܹ̈ܐ. 5ܘܦܠܸܛܠܹܗ ܠܟܸܣܠܹܗ ܟܠܹܗ ܐܲܬܪܵܐ ܕܝܼܗܘܼܕ: ܘܒܢܲܝ̈ ܐܘܿܪܸܫܠܸܡ: ܘܥܵܡܕܝܼ ܗ݇ܘܵܘ ܡܸܢܹܗ ܟܠܵܝܗܝ ܒܝܘܿܪܕܢܵܢ ܢܲܗܪܵܐ: ܟܲܕ ܡܵܘܕܘܼܝܹܐ ܒܚܛܝܼܵܬܵܝ̈ܗܝ. 6ܘܝܘܿܚܲܢܵܢ ܠܒ̣ܝܼܫܵܐ ܗ݇ܘܵܐ ܠܒܸܫܬܵܐ ܕܣܲܥܪܵܐ ܕܓܘܼܡܠܹ̈ܐ: ܘܬܲܣܡܵܐ ܕܓܸܠܕܵܐ ܒܚܵܨܹܗ: ܘܟܹܐ ܐܵܟܼܸܠ ܗ݇ܘܵܐ ܩܲܡܨܹ̈ܐ ܘܕܸܒ̣ܫܵܐ ܕܒܲܪܝܼܵܐ. 7ܘܡܲܟܪܸܙ ܗ݇ܘܵܐ ܘܐܵܡܸܪ: ܒܹܐܬܵܝܵܐ ܝܠܹܗ ܒܵܬَܪܝܼ ܕܒܘܼܫ ܚܲܝܠܵܢܵܐ ܝܠܹܗ ܡܸܢܝܼ: ܗ̇ܘ ܕܠܹܐ ܚܵܫܚܸܢ ܐܵܢܵܐ ܕܟܵܝܦܸܢ ܠܸܫܪܵܝܵܐ ܠܬܲܣܡܵܬܹ̈ܐ ܕܨܵܘܠܘܼ̈ܗܝ. 8ܐܵܢܵܐ ܡܘܼܥܡܸܕܠܝܼ ܐܸܠܵܘܟ̣ܘܿܢ ܒܡ̈ܝܼܵܐ: ܐܝܼܢܵܐ ܗ̇ܘ ܒܸܬ ܡܲܥܡܸܕ ܠܵܘܟ̣ܘܿܢ ܒܪܘܼܚܵܐ ܕܩܘܼܕܫܵܐ. 9ܘܗَܘܹܐ ܠܵܗ̇ ܒܐܵܢܝܼ ܝܵܘܡܵܢܹ̈ܐ: ܐَܬܹܐܠܹܗ ܝܼܫܘܿܥ ܡ̣ܢ ܢܵܨܪܲܬ ܕܓܠܝܼܠܵܐ: ܘܥܡܸܕܠܹܗ ܒܝܘܿܪܕܢܵܢ ܡ̣ܢ ܝܘܿܚܲܢܵܢ. 10ܘܕܲܪܣܵܥܲܬ ܟܲܕ ܐ݇ܣܸܩܠܹܗ ܡ̣ܢ ܡ̈ܝܼܵܐ: ܚܙܹܐܠܹܗ ܕܟ̰ܠܸܦܠܗܘܿܢ ܫܡܲܝܹ̈ܐ: ܘܪܘܼܚܵܐ ܐܲܝܟܼ ܝܵܘܢܵܐ ܒܸܨܠܵܝܵܐ ܥܲܠܘܼܗܝ. 11ܘܩܵܠܵܐ ܗَܘܹܐܠܹܗ ܡ̣ܢ ܫܡܲܝܵܐ: ܐܲܢَܬ ܝܼܘܸܬ ܒܪܘܿܢܝܼ ܡܘܼܚܸܒܵܐ: ܕܒܝܼܘܼܟ ܒܸܒܣܵܡܝܼ ܝ݇ܠܵܗ̇. 12ܘܕܲܪܣܵܥܲܬ ܦܘܼܠܸܛܠܵܗ̇ ܐܸܠܹܗ ܪܘܼܚܵܐ ܠܒܲܪܝܼܵܐ. 13ܘܗَܘܹܐܠܹܗ ܓܵܘ ܒܲܪܝܼܵܐ ܐܲܪܒܥܝܼ ܝܵܘܡܵܢܹ̈ܐ: ܟܲܕ ܦܝܵܫܵܐ ܓ̰ܘܼܪܒܵܐ ܡ̣ܢ ܣܵܛܵܢܵܐ: ܘܥܲܡ ܕܵܒܹ̈ܐ ܗ݇ܘܵܐ: ܘܥܵܒ̣ܕܝܼ ܗ݇ܘܵܘ ܠܹܗ ܚܸܠܡܲܬ ܡܲܠܲܐܟܹ̈ܐ. 14ܐܝܼܢܵܐ ܡܒܵܬَܪ ܕܦܸܫܠܹܗ ܣܘܼܦܝܵܐ ܝܘܿܚܲܢܵܢ: ܐَܬܹܐܠܹܗ ܝܼܫܘܿܥ ܠܓܠܝܼܠܵܐ: ܡܲܟܪܘܼܙܹܐ ܡܲܫܚܲܕܬܵܐ ܕܡܲܠܟܘܼܬܹܗ ܕܐܲܠܵܗܵܐ. 15ܘܐܵܡܸܪ: ܬܘܼܡܸܡܠܹܗ ܙܲܒ̣ܢܵܐ: ܘܩܘܼܪܒܸܢܵܗ̇ ܡܲܠܟܘܼܬܵܐ ܕܐܲܠܵܗܵܐ. ܬܲܘܸܒܘܼܢ: ܘܗܲܡܸܢܘܿܢ ܒܐܹܘܵܢܓܵܠܝܼܘܿܢ. 16ܘܟܲܕ ܒܸܚܕܵܪܵܐ ܗ݇ܘܵܐ ܥܲܠ ܡܲܪܙܵܐ ܕܝܵܡܵܐ ܕܓܠܝܼܠܵܐ: ܚܙܹܐܠܹܗ ܠܫܸܡܥܘܿܢ ܘܠܲܐܢܕܪܹܐܘܿܣ ܐܵܚܘܿܢܘܼܗܝ ܒܸܕܪܵܝܵܐ ܓܲܪܕܵܐ ܒܝܵܡܵܐ: ܣܵܒܵܒ ܕܨܲܝܵܕܹ̈ܐ ܗ݇ܘܵܘ. 17ܘܐَܡܝܼܪܹܗ ܐܸܠܵܝܗܝ ܝܼܫܘܿܥ: ܬܹܐܡܘܿܢ ܒܵܬَܪܝܼ: ܘܒܸܬ ܥܵܒ̣ܕܸܢܵܘܟ̣ܘܿܢ ܕܗܵܘܹܝܬܘܿܢ ܨܲܝܵܕܹ̈ܐ ܕܒܢܲܝ̈ܢܵܫܵܐ. 18ܘܕܲܪܣܵܥܲܬ ܫܒܸܩܠܗܘܿܢ ܠܓܲܪ̈ܕܵܝܗܝ: ܘܐَܙܸܠܗܘܿܢ ܒܵܬَܪܹܗ. 19ܘܟܲܕ ܥܒܸܪܹܗ ܚܲܕَܟ̰ܵܐ: ܚܙܹܐܠܹܗ ܠܝܲܥܩܘܿܒ̣ ܒܪܘܿܢܹܗ ܕܙܲܒ̣ܕܲܝ: ܘܠܝܘܿܚܲܢܵܢ ܐܵܚܘܿܢܘܼܗܝ: ܘܐܘܼܦ ܐܵܢܝܼ ܒܓܵܡܝܼ ܬܵܪܘܿܨܹܐ ܠܓܲܪ̈ܕܵܝܗܝ. 20ܘܕܲܪܣܵܥܲܬ ܩܸܪܝܵܝܠܹܗ: ܘܫܒܸܩܠܗܘܿܢ ܠܙܲܒ̣ܕܲܝ ܒܵܒܵܝܗܝ ܓܵܘ ܓܵܡܝܼ ܥܲܡ ܪܹ̈ܓܵܘܵܬܹܐ ܕܗܵܩܵܐ: ܘܐَܙܸܠܗܘܿܢ ܒܵܬَܪܹܗ. 21ܘܥܒܼܸܪܗܘܿܢ ܠܟܦܲܪܢܵܚܘܿܡ: ܘܕܲܪܣܵܥܲܬ ܒܫܲܒܬܵܐ ܥܒܼܸܪܹܗ ܠܟܢܘܼܫܬܵܐ ܘܡܵܠܸܦ ܗ݇ܘܵܐ. 22ܘܥܵܓ̰ܒܝܼ ܗ݇ܘܵܘ ܒܝܘܼܠܦܵܢܹܗ: ܣܵܒܵܒ ܕܡܵܠܸܦ ܗ݇ܘܵܐ ܠܗ݇ܘܿܢ ܐܲܝܟܼ ܡܵܪܹܐ ܗܘܼܟܡܵܐ: ܘܠܵܐ ܐܲܝܟܼ ܣܵܦܪܹ̈ܐ. 23ܘܐܝܼܬ ܗ݇ܘܵܐ ܒܟܢܘܼܫܬܵܝܗܝ ܚܲܕَ ܐ݇ܢܵܫܵܐ ܕܐܝܼܬ ܗ݇ܘܵܐ ܒܝܹܗ ܪܘܼܚܵܐ ܛܲܡܹܐܐ: ܘܡܘܼܩܘܸܚܠܹܗ. 24ܘܐَܡܝܼܪܹܗ: ܡܵܐ ܠܘܼܟܼ ܡܸܢܲܢ: ܝܼܫܘܿܥ ܢܵܨܪܵܝܵܐ: ܐَܬܹܐܠܘܿܟ ܠܬܵܠܘܿܩܲܢ. ܟܹܐ ܝܵܕܥܸܢܘܼܟ ܡܵܢܝ ܝܘܸܬ: ܩܲܕܝܼܫܹܗ ܕܐܲܠܵܗܵܐ. 25ܘܢܓ̰ܘܼܠܹܗ ܒܝܹܗ ܝܼܫܘܿܥ: ܘܐَܡܝܼܪܹܗ: ܥܟ̰ܘܿܡ ܦܘܼܡܘܼܟ ܘܦܠܘܿܛ ܡܸܢܹܗ. 26ܘܟ̰ܘܼܢܟ̰ܸܪܵܗ̇ ܐܸܠܹܗ ܪܘܼܚܵܐ ܛܲܡܹܐܐ: ܘܡܘܼܩܘܸܚܠܵܗ̇ ܒܩܵܠܵܐ ܪܵܡܵܐ: ܘܦܠܸܛܠܵܗ̇ ܡܸܢܹܗ. 27ܘܥܘܼܓ̰ܸܒܠܗܘܿܢ ܟܠܵܝܗܝ: ܗܲܕܟ̣ܵܐ ܕܒܵܩܪܝܼ ܚܲܕَ ܡܗ̇ܘ ܐ݇ܚܹܪ݇ܢܵܐ: ܘܐܵܡܪܝܼ: ܡܘܼܕܝܼ ܝ݇ܠܵܗ̇ ܐܵܗܵܐ: ܘܡܘܼܕܝܼ ܝܠܹܗ ܐܵܗܵܐ ܝܘܼܠܦܵܢܵܐ ܚܲܕَܬܵܐ: ܕܒܗܘܼܟܡܵܐ ܐܘܼܦ ܠܪ̈ܘܼܚܹܐ ܛܲܡܹ̈ܐܐ ܒܸܦܩܵܕܵܐ ܝܠܹܗ: ܘܡܲܨܝܘܼܬܹܐ ܝܢܵܐ ܐܸܠܹܗ. 28ܘܕܲܪܣܵܥܲܬ ܦܠܸܛܠܵܗ̇ ܒܵܗܣܹܗ ܒܟܠܹܗ ܐܲܬܪܵܐ ܕܚܵܕܸܪ̈ܘܵܢܹܐ ܕܓܠܝܼܠܵܐ. 29ܘܕܲܪܣܵܥܲܬ ܦܠܸܛܠܗܘܿܢ ܡ̣ܢ ܟܢܘܼܫܬܵܐ: ܐ݇ܬܹܐܠܗܘܿܢ ܠܒܲܝܬܹܗ ܕܫܸܡܥܘܿܢ ܘܕܲܐܢܕܪܹܐܘܿܣ ܥܲܡ ܝܲܥܩܘܿܒ̣ ܘܝܘܿܚܲܢܵܢ. 30ܘܚܡܵܬܹܗ ܕܫܸܡܥܘܿܢ ܢܦܝܼܠܬܵܐ ܗ݇ܘܵܐ ܒܐܫܵܬܵܐ: ܘܕܲܪܣܵܥܲܬ ܐَܡܸܪܗܘܿܢ ܐܸܠܹܗ ܒܘܼܬ ܕܝܼܵܗ̇. 31ܘܐَܬܹܐܠܹܗ ܕܒ̣ܝܼܩܵܠܹܗ ܒܐܝܼܕܵܗ̇: ܘܡܘܼܩܸܡܵܐܠܹܗ: ܘܫܒ̣ܝܼܩܵܠܵܗ̇ ܐܫܵܬܵܐ: ܘܥܵܒ̣ܕܵܐ ܗ݇ܘܵܐ ܠܗ݇ܘܿܢ ܚܸܠܡܲܬ. 32ܘܒܪܲܡܫܵܐ: ܒܓܢܵܝܹܗ ܕܫܸܡܫܵܐ: ܡܘܼܬَܝܹܠܗܘܿܢ ܠܟܸܣܠܹܗ ܟܠܵܝܗܝ ܐܵܢܝܼ ܕܡܸܪܥܝܹܐ ܗ݇ܘܵܘ: ܘܕܲܝܘܵܢܹ̈ܐ. 33ܘܟܠܵܗ̇ ܡܕܝܼܢَܬܵܐ ܓ̰ܡܥܝܼܬܵܐ ܗ݇ܘܵܐ ܥܲܠ ܬܲܪܥܵܐ. 34ܘܒܘܼܣܸܡܠܹܗ ܠܪܵܒܵܐ ܕܡܸܪܥܝܹܐ ܗ݇ܘܵܘ ܒܡܲܪ̈ܥܹܐ ܬܵܗܵܪܹ̈ܐ ܬܵܗܵܪܹ̈ܐ: ܘܪܵܒܵܐ ܕܲܝܘܹ̈ܐ ܦܘܪܠܸܛܠܹܗ: ܘܠܹܐ ܫܵܒܸܩ ܗ݇ܘܵܐ ܠܕܲܝܘܹ̈ܐ ܠܗܲܡܙܘܼܡܹܐ: ܣܵܒܵܒ ܟܹܐ ܝܵܕܥܝܼ ܗ݇ܘܵܘ ܠܹܗ. 35ܒܨܲܦܪܵܐ ܩܘܼܕܸܡܠܹܗ ܪܵܒܵܐ ܓ̰ܲܠܕܹܐ: ܘܦܠܸܛܠܹܗ ܘܐَܙܸܠܹܗ ܠܚܕܵܐ ܕܘܼܟܵܐ ܚܵܪܵܒܵܐ: ܘܬܵܡܵܐ ܨܵܠܹܐ ܗ݇ܘܵܐ. 36ܘܐَܙܸܠܗܘܿܢ ܒܵܬَܪܹܗ ܫܸܡܥܘܿܢ ܘܐܵܢܝܼ ܕܥܲܡܹܗ. 37ܘܟܲܕ ܡܘܼܫَܟ̰ܸܚܠܗܘܿܢ: ܐܵܡܪܝܼ ܐܸܠܹܗ: ܟܠܵܝܗܝ ܐ݇ܢܵܫܹ̈ܐ ܒܸܛܲܥܝܵܐ ܝܢܵܐ ܐܸܠܘܼܟܼ. 38ܐܵܡܸܪ ܐܸܠܵܝܗܝ: ܐܵܙܵܠَܚ ܠܡܵܬܘܵܬܹ̈ܐ ܓܘܼܪܹ̈ܐ ܕܝܼܢܵܐ ܩܘܼܪܒܵܐ: ܕܐܘܼܦ ܬܵܡܵܐ ܡܲܟܪܸܙܸܢ: ܣܵܒܵܒ ܕܠܵܐܗܵܐ ܐَܬܹܐܠܝܼ. 39ܘܐܙܹܐܠܹܗ ܡܲܟܪܘܼܙܹܐ ܓܵܘ ܟܠܵܝܗܝ ܟܢܘܼܫܝܵܬܵܝ̈ܗܝ ܒܟܠܵܗ̇ ܓܠܝܼܠܵܐ: ܘܦܵܠܸܛ ܗ݇ܘܵܐ ܕܲܝܘܹ̈ܐ. 40ܘܐَܬܹܐܠܹܗ ܠܟܸܣܠܹܗ ܚܲܕَ ܓܸܪܒ̣ܵܢܵܐ: ܘܒܪܸܟ̇ܠܹܗ ܩܵܕَܡܘܼܗܝ: ܘܦܲܪܦܸܠ ܗ݇ܘܵܐ ܒܝܹܗ: ܒܹܐܡܵܪܵܐ: ܐܸܢ ܒܵܥܹܝܬ: ܟܹܐ ܡܵܨܸܬ ܠܕܵܟ̣ܘܿܝܝܼ. 41ܘܝܼܫܘܿܥ ܪܘܼܚܸܡܠܹܗ ܥܲܠܘܼܗܝ: ܘܦܘܼܫܛܵܠܹܗ ܐܝܼܕܹܗ: ܕܩܸܪܹܗ ܒܝܹܗ ܘܐَܡܝܼܪܹܗ: ܒܸܒܥܵܝܵܐ ܝܘܸܢ: ܗَܘܝܼ ܕܸܟ̣ܝܵܐ. 42ܘܒܗ̇ܝ ܣܵܥܲܬ ܐَܙܸܠܹܗ ܡܸܢܹܗ ܓܸܪܒܹܗ: ܘܦܸܫܠܹܗ ܕܘܼܟ̣ܝܵܐ. 43ܘܢܓ̰ܘܼܠܹܗ ܒܝܹܗ: ܘܕܲܪܣܵܥܲܬ ܦܘܼܠܸܛܠܹܗ. 44ܘܐَܡܝܼܪܹܗ ܐܸܠܹܗ: ܚܙܝܼ ܠܐ݇ܢܵܫܵܐ ܠܵܐ ܐܵܡܪܸܬ: ܐܸܠܵܐ ܙܹܠَܐ ܡܲܚܙܝܼ ܓܵܢܘܼܟ ܠܟܵܗܢܵܐ: ܘܡܲܩܪܸܒ̣ ܡܒܵܕܵܠ ܕܕܵܟ̣ܵܝܬܘܼܟ ܐܵܢܝܼ ܕܦܩܸܕܠܹܗ ܡܘܼܫܹܐ ܠܣܵܗܕܘܼܬܵܝܗܝ. 45ܐܝܼܢܵܐ ܐܵܗܵܐ ܒܥܸܕܵܢܵܐ ܕܦܠܸܛܠܹܗ ܫܘܼܪܹܐܠܹܗ ܪܵܒܵܐ ܡܲܟܪܘܿܙܹܐ؛ ܥܒܼܸܕܠܹܗ ܨܦܵܝܝܼ ܠܗܹܡܸܙܡܵܢ؛ ܐܲܝܟܵܐ ܕܠܹܐ ܡܵܨܹܐ ܗ݇ܘܵܐ ܝܼܫܘܿܥ ܒܐܲܫܟܵܪܵܐ ܕܥܵܒܼܸܪ ܠܸܡܕܝܼܢَܬܵܐ؛ ܐܝܼܢܵܐ ܠܒܼܲܕܲܪ ܗܘܼܵܐ ܒܕܘܼܟܬܵܐ ܚܵܪܵܒܵܐ. ܘܐܵܬܝܼ ܗ݇ܘܵܘ ܠܟܸܣܠܹܗ ܡ̣ܢ ܟܠ ܕܘܼܟܵܐ.