0:00
/
1ܒܗ̇ܘ ܝܵܘܡܵܐ ܦܠܸܛܠܹܗ ܝܼܫܘܿܥ ܡܢ ܒܲܝܬܵܐ ܘܝܬܸܒ̣ ܠܹܗ ܥܲܠ ܡܲܪܙܵܐ ܕܝܵܡܵܐ. 2ܘܓ̰ܡܸܥܠܗܘܿܢ ܠܟܸܣܠܹܗ ܟܸܢܫܹ̈ܐ ܪܵܒܵܐ: ܗܲܕܟ̣ܵܐ ܕܐ݇ܣܸܩܠܹܗ ܘܝܬܸܒ̣ܠܹܗ ܓܵܘ ܓܵܡܝܼ: ܘܟܠܹܗ ܟܸܢܫܵܐ ܟܸܠܝܵܐ ܗ݇ܘܵܐ ܥܲܠ ܣܸܦܬܵܐ ܕܝܵܡܵܐ. 3ܘܗܘܼܡܙܸܡܠܹܗ ܪܵܒܵܐ ܥܲܡܵܝܗܝ ܒܡܵܣܵܠܹ̈ܐ ܘܐܵܡܸܪ: ܗܵܐ: ܦܠܸܛܠܹܗ ܙܲܪܥܵܢܵܐ ܠܸܙܪܲܥܝܵܐ. 4ܘܟܲܕ ܙܪܸܥܠܹܗ: ܐܝܼܬ ܗ݇ܘܵܐ ܕܢܦܸܠܹܗ ܥܲܠ ܡܲܪܙܵܐ ܕܐܘܼܪܚܵܐ: ܘܐ݇ܬܹܐܠܗܘܿܢ ܛܲܝܪܹ̈ܐ ܘܐَܟܼܸܠܗܘܿܢ ܐܸܠܹܗ. 5ܘܐ݇ܚܹܪ݇ܢܵܐ ܢܦܸܠܹܗ ܥܲܠ ܐܲܪܥܵܐ ܟܹܐܦܵܢܬܵܐ: ܐܲܝܟܵܐ ܕܠܲܝܬ ܗ݇ܘܵܐ ܥܲܦܪܵܐ ܪܵܒܵܐ: ܘܗܲܪ ܒܗ̇ܝ ܣܵܥܲܬ ܡܘܼܓ̰ܝܸܢܹܗ: ܣܵܒܵܒ ܕܠܲܝܬ ܗ݇ܘܵܐ ܥܘܼܡܩܵܐ ܕܐܲܪܥܵܐ. 6ܐܝܼܢܵܐ ܟܲܕ ܙܪܸܩܠܹܗ ܫܸܡܫܵܐ ܚܸܡܠܹܗ: ܘܣܵܒܵܒ ܕܠܲܝܬ ܗ݇ܘܵܐ ܠܹܗ ܥܸܩܪܵܐ: ܒܪܸܙܠܹܗ. 7ܘܐ݇ܚܹܪ݇ܢܵܐ ܢܦܸܠܹܗ ܓܵܘ ܟܸܬܘܹ̈ܐ: ܘܐܣܸܩܠܗܘܿܢ ܟܸܬܘܹ̈ܐ ܘܚܢܸܩܠܗܘܿܢ ܐܸܠܹܗ. 8ܐܝܼܢܵܐ ܐ݇ܚܹܪ݇ܢܵܐ ܢܦܸܠܹܗ ܒܐܲܪܥܵܐ ܨܦܵܝܝܼ: ܘܝܘܼܗَܒܼܸܠܹܗ ܛܥܘܿܢܝܵܬܹ̈ܐ: ܐܝܼܬ ܗ݇ܘܵܐ ܕܡܵܐܐ: ܘܐܝܼܬ ܗ݇ܘܵܐ ܕܐܸܫܬܝܼ: ܘܐܝܼܬ ܗ݇ܘܵܐ ܕܬܠܵܬَܝܼ. 9ܡ̇ܢ ܕܐܝܼܬ ܠܹܗ ܢܵܬܝܵܬܹ̈ܐ ܕܫܵܡܸܥ: ܫܵܡܹܥ. 10ܘܐ݇ܬܹܐܠܗܘܿܢ ܬܲܠܡܝܼܕܘܼ̈ܗܝ ܘܐَܡܸܪܗܘܿܢ ܐܸܠܹܗ: ܩܵܡܘܿܕܝܼ ܒܡܵܣܵܠܹ̈ܐ ܗܲܡܙܘܼܡܹܐ ܝܘܸܬ ܥܲܡܵܝܗܝ. 11ܘܗ̇ܘ ܓ̰ܘܼܘܸܒܠܹܗ ܘܐَܡܝܼܪܹܗ ܐܸܠܵܝܗܝ: ܐܸܠܵܘܟ̣ܘܿܢ ܝܘܼܗَܒ̣ܵܐ ܝܠܹܗ ܠܝܼܕܲܥܝܵܐ ܣܸܪܹ̈ܐ ܕܡܲܠܟܘܼܬܵܐ ܕܫܡܲܝܵܐ: ܐܝܼܢܵܐ ܠܐܵܢܝܼ ܠܹܐ ܝܠܹܗ ܝܘܼܗَܒ̣ܵܐ. 12ܣܵܒܵܒ ܠܡ̇ܢ ܕܐܝܼܬ ܠܹܗ: ܒܸܬ ܦܵܐܹܫ ܝܘܼܗَܒ̣ܵܐ ܐܸܠܹܗ ܘܒܸܬ ܙܵܝܸܕ ܐܸܠܹܗ: ܘܠܡ̇ܢ ܕܠܲܝܬ ܠܹܗ: ܘܐܘܼܦ ܗ̇ܘ ܕܐܝܼܬ ܠܹܗ ܒܸܬ ܦܵܐܹܫ ܫܩܝܼܠܵܐ ܡܸܢܹܗ. 13ܣܵܒܵܒ ܕܐܵܗܵܐ ܒܡܵܣܵܠܹ̈ܐ ܗܲܡܙܘܼܡܹܐ ܝܘܸܢ ܥܲܡܵܝܗܝ: ܣܵܒܵܒ ܕܚܙܵܝܵܐ ܠܹܐ ܚܵܙܝܼ: ܘܫܡܵܥܝܵܐ ܠܹܐ ܫܵܡܥܝܼ: ܘܠܹܐ ܦܲܪܡܝܼ. 14ܘܦܵܝܫܵܐ ܝ݇ܠܵܗ̇ ܬܘܼܡܸܡܬܵܐ ܒܝܼܵܝܗܝ ܢܒ̣ܝܼܘܼܬܹܗ ܕܐܹܫܲܥܝܵܐ ܢܒ̣ܝܼܵܐ ܕܐَܡܝܼܪܹܗ: ܕܫܡܵܥܝܵܐ ܒܸܬ ܫܵܡܥܝܼܬܘܿܢ ܘܠܹܐ ܦܲܪܡܝܼܬܘܿܢ: ܘܚܙܵܝܵܐ ܒܸܬ ܚܵܙܹܝܬܘܿܢ ܘܠܹܐ ܝܵܕܥܝܼܬܘܿܢ. 15ܣܵܒܵܒ ܕܚܠܸܥܡܠܹܗ ܠܸܒܹܗ ܕܐܵܗܵܐ ܛܵܝܸܦܵܐ: ܘܒܢܵܬܝܵܬܵܝ̈ܗܝ ܒܝܵܩܘܿܪܘܼܬܵܐ ܫܡܸܥܠܗَܘܿܢ: ܘܥܲܝܢܵܝ̈ܗܝ ܥܟ̰ܸܡܠܗܘܿܢ: ܕܠܵܐ ܚܵܙܝܼ ܒܥܲܝܢܵܝ̈ܗܝ: ܘܫܵܡܥܝܼ ܒܢܵܬܝܵܬܵܝ̈ܗܝ: ܘܦܲܪܡܝܼ ܒܠܸܒܵܝܗܝ: ܘܕܵܝܪܝܼ ܘܒܵܣܡܸܢܘܿܢ. 16ܐܝܼܢܵܐ ܕܝܼܵܘܟ̣ܘܿܢ: ܛܘܼܒ̣ܵܐ ܠܥܲܝܢܵܘ̈ܟ̣ܘܿܢ ܕܟܹܐ ܚܵܙܝܼ: ܘܠܢܵܬܝܵܬܵܘ̈ܟ̣ܘܿܢ ܕܟܹܐ ܫܵܡܥܝܼ. 17ܣܵܒܵܒ ܕܬܪܘܿܨܵܐ ܒܹܐܡܵܪܵܐ ܝܘܸܢ ܐܸܠܵܘܟ̣ܘܿܢ: ܕܪܵܒܵܐ ܢܒ̣̈ܝܹܐ ܘܙܲܕܝܼܩܹ̈ܐ ܫܘܼܗَܘܸܬܠܗܘܿܢ ܠܸܚܙܵܝܵܐ ܡܸܢܕܝܼ ܕܒܸܚܙܵܝܵܐ ܝܬܘܿܢ: ܘܠܵܐ ܚܙܹܐܠܗܘܿܢ: ܘܠܸܫܡܲܥܝܵܐ ܡܸܢܕܝܼ ܕܒܸܫܡܲܥܝܵܐ ܝܬܘܿܢ: ܘܠܵܐ ܫܡܸܥܠܗَܘܿܢ. 18ܐܝܼܢܵܐ ܐܲܚܬܘܿܢ ܫܡܸܥܡܘܿܢ ܡܵܣܵܠܵܐ ܕܙܲܪܥܵܢܵܐ. 19ܟܠ ܕܫܵܡܸܥ ܗܹܡܸܙܡܵܢ ܕܡܲܠܟܘܼܬܵܐ ܘܠܵܐ ܦܲܪܡܹܐ ܠܵܗ̇: ܟܹܐ ܐܵܬܹܐ ܒܝܼܫܵܐ ܘܟܹܐ ܓܵܢܸܒܼ ܡܸܢܕܝܼ ܕܝܼܠܹܗ ܙܸܪܥܝܵܐ ܒܠܸܒܹܗ. ܐܵܗܵܐ ܝܠܹܗ ܗ̇ܘ ܕܥܲܠ ܡܲܪܙܵܐ ܕܐܘܼܪܚܵܐ ܦܸܫܠܹܗ ܙܸܪܥܝܵܐ. 20ܘܗ̇ܘ ܕܥܲܠ ܐܲܪܥܵܐ ܟܹܐܦܵܢܬܵܐ ܦܸܫܠܹܗ ܙܸܪܥܝܵܐ: ܗ̇ܘ ܝܼܠܹܗ ܕܫܵܡܸܥ ܗܹܡܸܙܡܵܢ: ܘܕܲܪܣܵܥܲܬ ܒܚܲܕܘܼܬܵܐ ܩܵܒܸ̇ܠ ܠܵܗ̇. 21ܐܝܼܢܵܐ ܠܲܝܬ ܠܹܗ ܥܸܩܪܵܐ ܒܓܵܢܹܗ: ܐܸܠܵܐ ܕܙܲܒ̣ܢܵܐ ܝܠܹܗ: ܘܐܝܼܡܲܢ ܕܗَܘܹܐܠܹܗ ܐܘܼܠܨܵܢܵܐ 22ܝܲܢ ܛܪܵܕܬܵܐ ܣܵܒܵܒ ܕܗܹܡܸܙܡܵܢ: ܓ̰ܲܠܕܹܐ ܟܹܐ ܟܵܦܸܪ. ܘܗ̇ܘ ܕܓܵܘ ܟܸܬܘܹ̈ܐ ܦܸܫܠܹܗ ܙܸܪܥܝܵܐ: ܗ̇ܘ ܝܼܠܹܗ ܕܫܵܡܸܥ ܗܹܡܸܙܡܵܢ: ܘܚܲܡ ܕܐܵܗܵܐ ܥܵܠܡܵܐ ܘܚܸܠܛܘܼܢܝܘܼܬܵܐ ܕܕܵܘܸܠܬܵܐ ܟܹܐ ܚܵܢܩܝܼ ܠܵܗ̇ ܗܹܡܸܙܡܵܢ: ܘܟܹܐ ܗܵܘܝܵܐ ܕܠܵܐ ܛܥܘܿܢܝܵܬܹ̈ܐ. 23ܐܝܼܢܵܐ ܗ̇ܘ ܕܥܲܠ ܐܲܪܥܵܐ ܨܦܵܝܝܼ ܦܸܫܠܹܗ ܙܸܪܥܝܵܐ: ܗ̇ܘ ܝܼܠܹܗ ܕܫܵܡܸܥ ܗܹܡܸܙܡܵܢ: ܘܦܲܪܡܹܐ ܠܵܗ̇: ܘܝܵܗَܒܸܠ ܛܥܘܿܢܝܵܬܹ̈ܐ: ܘܥܵܒܸܕ: ܐܝܼܬ ܕܡܵܐܐ: ܘܐܝܼܬ ܕܐܸܫܬܝܼ: ܘܐܝܼܬ ܕܬܠܵܬَܝܼ. 24ܡܵܣܵܠܵܐ ܐ݇ܚܹܪ݇ܢܵܐ ܡܘܼܬܸܒ̣ܠܹܗ ܩܵܕَܡܵܝܗܝ ܘܐَܡܝܼܪܹܗ: ܟܹܐ ܕܵܡܝܵܐ ܡܲܠܟܘܼܬܵܐ ܕܫܡܲܝܵܐ ܠܐ݇ܢܵܫܵܐ ܕܙܪܸܥܠܹܗ ܒܲܪܙܲܪܥܵܐ ܨܦܵܝܝܼ ܒܚܲܩܠܹܗ. 25ܘܟܲܕ ܕܡܸܟ̣ܠܗܘܿܢ ܐ݇ܢܵܫܹ̈ܐ: ܐَܬܹܐܠܹܗ ܕܸܫܡܸܢܹܗ ܘܙܪܸܥܠܹܗ ܙܝܼܘܵܢܹ̈ܐ ܒܓܵܘܵܐ ܕܚܸܛܹ̈ܐ ܘܐَܙܸܠܹܗ. 26ܐܝܼܢܵܐ ܟܲܕ ܡܘܼܓ̰ܝܸܢܹܐ ܝܸܩܢܵܐ ܘܥܒܸܕܠܹܗ ܛܥܘܿܢܝܵܬܹ̈ܐ: ܗ̇ܝܓܵܗ ܦܸܫܠܗَܘܿܢ ܚܸܙܝܹܐ ܐܘܼܦ ܙܝܼܘܵܢܹ̈ܐ. 27ܘܐ݇ܬܹܐܠܗܘܿܢ ܪܹ̈ܓܵܘܵܬܹܐ ܕܡܵܪܹܐ ܒܲܝܬܵܐ ܘܐَܡܸܪܗܘܿܢ ܐܸܠܹܗ: ܐܵܓ̣ܝܲܢ: ܠܹܐ ܝܗܘܵܐ ܒܲܪܙܲܪܥܵܐ ܨܦܵܝܝܼ ܙܪܸܥܠܘܼܟܼ ܒܚܲܩܠܘܼܟܼ: ܡܐܲܝܟܵܐ ܐܝܼܬ ܒܝܹܗ ܙܝܼܘܵܢܹ̈ܐ. 28ܘܗ̇ܘ ܐَܡܝܼܪܹܗ ܐܸܠܵܝܗܝ: ܐ݇ܢܵܫܵܐ ܕܸܫܡܸܢ ܥܒܸܕܠܹܗ ܐܵܗܵܐ: ܐܵܡܪܝܼ ܐܸܠܹܗ ܪܹ̈ܓܵܘܵܬܘܼܗܝ: ܒܵܥܹܝܬ ܕܐܵܙܵܠَܚ ܓܵܒܵܚܠܗ݇ܘܿܢ. 29ܐܝܼܢܵܐ ܗ̇ܘ ܐَܡܝܼܪܹܗ ܐܸܠܵܝܗܝ: ܠܵܐ: ܠܵܐ ܗَܘܹܐ ܕܟܲܕ ܓܵܒ̇ܝܼܬܘܿܢ ܙܝܼܘܵܢܹ̈ܐ: ܥܵܩܪܝܼܬܘܿܢ ܥܲܡܵܝܗܝ ܐܘܼܦ ܚܸܛܹ̈ܐ. 30ܫܒ̣ܘܿܩܘܿܢ ܕܓܲܪܘܸܣܝܼ ܬܸܪ̈ܘܵܝܗܝ ܡܸܚܕܵܕܹ̈ܐ ܗܲܠ ܚܸܨܕܵܐ: ܘܒܙܲܒ̣ܢܵܐ ܕܚܸܨܕܵܐ ܒܸܬ ܐܵܡܪܸܢ ܠܚܵܨܵܕܹ̈ܐ: ܓܵܒܹܝܡܘܿܢ ܩܵܕَܡܵܝܬܵܐ ܙܝܼܘܵܢܹ̈ܐ: ܘܐܣܘܿܪܘܿܢ ܠܗ݇ܘܿܢ ܕܲܪ̈ܙܹܐ ܠܡܵܩܘܿܕܵܝܗܝ: ܐܝܢܵܐ ܚܸܛܹ̈ܐ ܓ̰ܲܡܸܥܡܘܿܢ ܠܗ݇ܘܿܢ ܠܐܲܢܒܵܪ̈ܝܼ. 31ܡܵܣܵܠܵܐ ܐ݇ܚܹܪ݇ܢܵܐ ܡܘܼܬܸܒ̣ܠܹܗ ܩܵܕَܡܵܝܗܝ ܘܐَܡܝܼܪܹܗ: ܟܹܐ ܕܵܡܝܵܐ ܡܲܠܟܘܼܬܵܐ ܕܫܡܲܝܵܐ ܠܕܲܢܕܸܟܬܵܐ ܕܚܲܪܕܵܠ: ܕܫܩܝܼܠܵܐܠܹܗ ܐ݇ܢܵܫܵܐ ܘܙܸܪܥܝܵܠܹܗ ܒܚܲܩܠܹܗ. 32ܘܗ̇ܝ ܙܥܘܿܪܬܵܐ ܝ݇ܠܵܗ̇ ܡ̣ܢ ܟܠܵܝܗܝ ܒܲܪܙܲܪ̈ܥܹܐ: ܐܝܼܢܵܐ ܐܝܼܡܲܢ ܕܓܘܼܪܘܸܣܠܵܗ̇: ܓܘܼܪܬܵܐ ܝ݇ܠܵܗ̇ ܡ̣ܢ ܟܠܵܝܗܝ ܝܲܪ̈ܩܹܐ: ܘܟܹܐ ܗܵܘܝܵܐ ܐܝܼܠܵܢܵܐ: ܗܲܕܟ̣ܵܐ ܕܐܵܬܝܼ ܛܲܝܪܹ̈ܐ ܕܫܡܲܝܵܐ ܫܵܪܝܼ ܒܦܲܥܘܵܢܘܼ̈ܗ̇. 33ܡܵܣܵܠܵܐ ܐ݇ܚܹܪ݇ܢܵܐ ܐَܡܝܼܪܹܗ ܐܸܠܵܝܗܝ: ܟܹܐ ܕܵܡܝܵܐ ܡܲܠܟܘܼܬܵܐ ܕܫܡܲܝܵܐ ܠܚܡܝܼܪܵܐ: ܗ̇ܘ ܕܫܩܸܠܵܗ̇ ܒܲܟ̣ܬܵܐ ܛܘܼܡܸܪܵܗ̇ ܒܬܠܵܬَܐ ܟܝܼܘܼ̈ܠܹܐ ܕܩܲܡܚܵܐ: ܗܲܠ ܕܟܠܹܗ ܚܡܸܥܠܹܗ. 34ܐܲܢܹܐ ܟܠܵܝܗܝ ܗܘܼܡܙܸܡܠܹܗ ܝܼܫܘܿܥ ܒܡܵܣܵܠܹ̈ܐ ܠܟܸܢܫܹ̈ܐ: ܘܕܠܵܐ ܡܵܣܵܠܹ̈ܐ ܠܹܐ ܗܲܡܙܸܡ ܗ݇ܘܵܐ ܥܲܡܵܝܗܝ. 35ܕܦܵܐܹܫ ܬܘܼܡܸܡܵܐ ܡܸܢܕܝܼ ܕܐَܡܝܼܪܵܐ ܗ݇ܘܵܐ ܒܝܲܕ ܢܒ̣ܝܼܵܐ: ܕܐَܡܝܼܪܹܗ: ܒܸܬ ܦܵܬܚܸܢ ܦܘܼܡܝܼ ܒܡܵܣܵܠܹ̈ܐ: ܘܒܸܬ ܡܲܢܒܸܥܢ ܫܘܼܠܹ̈ܐ ܟܸܣܝܹ̈ܐ ܕܡ̣ܢ ܩܵܕَܡ ܒܸܢܝܲܬܹ̈ܗ ܕܥܵܠܡܵܐ. 36ܗ̇ܝܓܵܗ ܫܒܸܩܠܹܗ ܝܼܫܘܿܥ ܠܟܸܢܫܹ̈ܐ ܘܐَܬܹܐܠܹܗ ܠܒܲܝܬܵܐ: ܘܐ݇ܬܹܐܠܗܘܿܢ ܠܟܸܣܠܹܗ ܬܲܠܡܝܼܕܘܼ̈ܗܝ ܘܐܵܡܪܝܼ ܐܸܠܹܗ: ܦܵܫܸܩ ܠܲܢ ܗ̇ܘ ܡܵܣܵܠܵܐ ܕܙܝܼܘܵܢܹ̈ܐ ܘܕܚܲܩܠܵܐ. 37ܘܗ̇ܘ ܓ̰ܘܼܘܸܒܠܹܗ ܘܐَܡܝܼܪܹܗ ܐܸܠܵܝܗܝ: ܗ̇ܘ ܕܙܪܸܥܠܹܗ ܒܲܪܙܲܪܥܵܐ ܨܦܵܝܝܼ ܒܪܘܿܢܹܗ ܕܐ݇ܢܵܫܵܐ ܝܠܹܗ. 38ܚܲܩܠܵܐ ܥܵܠܡܵܐ ܝ݇ܠܵܗ̇: ܘܒܲܪܙܲܪܥܵܐ ܨܦܵܝܝܼ: ܒܢܘܿܢܹ̈ܐ ܕܡܲܠܟܘܼܬܵܐ ܝܢܵܐ: ܐܝܼܢܵܐ ܙܝܼܘܵܢܹ̈ܐ ܒܢܘܿܢܹ̈ܐ ܕܒܝܼܫܵܐ ܝܢܵܐ. 39ܕܸܫܡܸܢ ܕܙܸܪܥܝܵܝܠܹܗ ܐܲܢܹܐ ܐܵܟܹܠܩܲܪܨܵܐ ܝܠܹܗ. ܚܸܨܕܵܐ ܬܝܵܡܹܗ ܕܥܵܠܡܵܐ ܝܠܹܗ: ܘܚܵܨܵܕܹ̈ܐ ܡܲܠܲܐܟܹ̈ܐ ܝܢܵܐ. 40ܕܵܐܟ̣ܝܼ ܗܲܕܟ̣ܵܐ ܕܦܵܝܫܝܼ ܓܘܼܒ̇ܝܹܐ ܙܝܼܘܵܢܹ̈ܐ ܘܝܵܩܕܝܼ ܒܢܘܪܵܐ: ܗܲܕܟ̣ܵܐ ܒܸܬ ܗܵܘܹܐ ܒܬܝܵܡܹܗ ܕܥܵܠܡܵܐ. 41ܒܸܬ ܫܵܕܸܪ ܒܪܘܿܢܹܗ ܕܐ݇ܢܵܫܵܐ ܡܲܠܲܐܟ̣ܘܼ̈ܗܝ: ܘܒܸܬ ܓܵܒܝܼ ܡ̣ܢ ܡܲܠܟܘܼܬܹܗ ܟܠܵܝܗܝ ܟܦܘܼܪ̈ܝܹܐ ܘܥܵܒ̣ܕܵܢܹ̈ܐ ܕܥܵܘܠܵܐ. 42ܘܒܸܬ ܕܵܪܝܼ ܠܗ݇ܘܿܢ ܒܐܲܬܘܿܢܵܐ ܕܢܘܼܪܵܐ. ܬܵܡܵܐ ܒܸܬ ܗܵܘܹܐ ܒܸܟ̣ܝܵܐ ܘܚܲܪܚܲܟ̰ܬܵܐ ܕܟܹܟܹ̈ܐ. 43ܗ̇ܝܓܵܗ ܙܲܕܝܼܩܹ̈ܐ ܒܸܬ ܒܲܗَܪܸܢܝܼ ܐܲܝܟܼ ܫܸܡܫܵܐ ܒܡܲܠܟܘܼܬܵܐ ܕܒܵܒܵܝܗܝ. ܡ̇ܢ ܕܐܝܼܬ ܠܹܗ ܢܵܬܝܵܬܹ̈ܐ ܕܫܵܡܸܥ: ܫܵܡܹܥ. 44ܡܸܢَܕܪܸܫَ: ܟܹܐ ܕܵܡܝܵܐ ܡܲܠܟܘܼܬܵܐ ܕܫܡܲܝܵܐ ܠܚܲܙܝܼܢܵܐ ܕܛܘܼܫܝܼܬܵܐ ܒܚܲܩܠܵܐ: ܗ̇ܝ ܕܡܘܼܫَܟ̰ܚܵܠܹܗ ܐ݇ܢܵܫܵܐ ܘܛܘܼܫܵܝܠܹܗ: ܘܡ̣ܢ ܚܲܕܘܼܬܹܗ ܘܐَܙܸܠܹܗ ܙܘܼܒܸ̇ܢܹܐ ܟܠ ܡܸܢܕܝܼ ܕܐܝܼܬ ܗ݇ܘܵܐ ܠܹܗ: ܘܙܒ̣ܝܼܢܵܠܹܗ ܗ̇ܝ ܚܲܩܠܵܐ. 45ܡܸܢَܕܪܸܫَ: ܟܹܐ ܕܵܡܝܵܐ ܡܲܠܟܘܼܬܵܐ ܕܫܡܲܝܵܐ ܠܐ݇ܢܵܫܵܐ ܬܵܓ̰ܝܼܪ ܕܛܵܥܹܐ ܗ݇ܘܵܐ ܠܡܲܪ̈ܓܵܢܝܵܬܹܐ ܫܲܦܝܼܪܹ̈ܐ. 46ܘܟܲܕ ܡܘܼܫَܟ̰ܸܚܠܹܗ ܚܕܵܐ ܡܲܪܓܵܢܝܼܬܵܐ ܡܵܪܹܐ ܛܝܼܡܵܐ: ܐَܙܸܠܹܗ ܙܘܼܒܸܢܹܐ ܟܠ ܡܸܢܕܝܼ ܕܐܝܼܬ ܗ݇ܘܵܐ ܠܹܗ ܘܙܒ̣ܝܼܢܵܠܹܗ. 47ܡܸܢَܕܪܸܫَ: ܟܹܐ ܕܵܡܝܵܐ ܡܲܠܟܘܼܬܵܐ ܕܫܡܲܝܵܐ ܠܓܲܪܕܵܐ ܕܸܪܝܵܐ ܓܵܘ ܝܵܡܵܐ: ܘܡ̣ܢ ܟܠ ܬܵܗܵܪ ܓ̰ܘܼܡܸܥܠܹܗ. 48ܘܟܲܕ ܡܠܹܐܠܹܗ: ܡܘܼܣܸܩܠܗܘܿܢ ܐܸܠܹܗ ܠܣܸܦܬܵܐ ܕܝܵܡܵܐ: ܘܝܬܸܒ̣ܠܗܘܿܢ ܘܓܘܼܒܹܠܗܘܿܢ ܛܵܒܹ̈ܐ ܒܡܵܐܢܹ̈ܐ: ܘܣܸܪ̈ܝܹܐ ܪܘܼܦܹܠܗܘܿܢ ܠܒܲܕܲܪ. 49ܗܲܕܟ̣ܵܐ ܒܸܬ ܗܵܘܹܐ ܒܬܝܵܡܹܗ ܕܥܵܠܡܵܐ. ܒܸܬ ܦܵܠܛܝܼ ܡܲܠܲܐܟܹ̈ܐ: ܘܒܸܬ ܦܵܪܫܝܼ ܒܝܼܫܹ̈ܐ ܡ̣ܢ ܓܵܘܵܐ ܕܙܲܕܝܼܩܹ̈ܐ. 50ܘܒܸܬ ܕܵܪܝܼܠܗ݇ܘܿܢ ܒܐܲܬܘܿܢܵܐ ܕܢܘܼܪܵܐ: ܬܵܡܵܐ ܒܸܬ ܗܵܘܹܐ ܒܸܟܝܵܐ ܘܚܲܪܚܲܟ̰ܬܵܐ ܕܟܹܟܹ̈ܐ. 51ܦܘܼܪܡܹܠܵܘܟ̣ܘܿܢ ܟܠܵܝܗܝ ܐܲܢܹܐ: ܐܵܡܪܝܼ ܐܸܠܹܗ: ܗܹܐ: ܡܵܪܲܢ. 52ܐَܡܝܼܪܹܗ ܐܸܠܵܝܗܝ: ܣܵܒܵܒ ܕܐܵܗܵܐ ܟܠ ܣܵܦܪܵܐ ܬܘܼܠܡܸܕܵܐ ܠܡܲܠܟܘܼܬܵܐ ܕܫܡܲܝܵܐ: ܟܹܐ ܕܵܡܹܐ ܠܐ݇ܢܵܫܵܐ ܡܵܪܹܐ ܒܲܝܬܵܐ: ܕܦܵܠܸܛ ܡ̣ܢ ܚܲܙܝܼܢܹܗ ܚܲܕَܬܹ̈ܐ ܘܥܵܬܝܼܩܹ̈ܐ. 53ܘܗَܘܹܐ ܠܵܗ̇ ܟܲܕ ܬܘܼܡܸܡܠܹܗ ܝܼܫܘܿܥ ܐܲܢܹܐ ܡܵܣܵܠܹ̈ܐ: ܫܘܼܢܹܐܠܹܗ ܡ̣ܢ ܬܵܡܵܐ. 54ܘܐَܬܹܐܠܹܗ ܠܐܲܬܪܹܗ: ܘܡܵܠܸܦ ܗ݇ܘܵܐ ܠܗ݇ܘܿܢ ܒܟܢܘܼܫܝܵܬܵܝ̈ܗܝ: ܕܵܐܟ̣ܝܼ ܕܥܵܓ̰ܒܝܼ ܗ݇ܘܵܘ ܘܐܵܡܪܝܼ: ܐܵܗܵܐ ܡܐܲܝܟܵܐ ܠܹܗ ܐܵܗܵܐ ܥܵܩܸܠܕܵܪܘܼܬܵܐ ܘܚܲܝܠܹ̈ܐ. 55ܠܹܐ ܝܠܹܗ ܐܵܗܵܐ ܒܪܘܿܢܹܗ ܕܢܵܓ̰ܵܪ: ܝܸܡܹܗ ܠܹܐ ܝ݇ܠܵܗ̇ ܦܝܵܫܵܐ ܩܪܝܼܬܵܐ ܡܲܪܝܲܡ: ܘܐܵܚܘܿܢܘܵܬܹ̈ܗ: ܝܲܥܩܘܿܒ̣ ܘܝܵܘܣܸܦ ܘܫܸܡܥܘܿܢ ܘܝܼܗܘܼܕܵܐ. 56ܘܚܵܬܘܵܬܹ̈ܗ ܟܠܵܝܗܝ: ܗܵܐ ܠܹܐ ܝܢܵܐ ܠܟܸܣܠܲܢ ܡܐܲܝܟܵܐ ܠܹܗ ܐܵܗܵܐ ܟܠܵܝܗܝ ܐܲܢܹܐ. 57 ܘܦܸܫܠܗَܘܿܢ ܡܘܼܟܦܸܪܹܐ ܒܝܹܗ. ܐܝܼܢܵܐ ܝܼܫܘܿܥ ܐَܡܝܼܪܹܗ ܐܸܠܵܝܗܝ: ܠܲܝܬ ܢܒ̣ܝܼܵܐ ܕܠܵܐ ܐܝܼܩܵܪܵܐ: ܫܒ̣ܘܿܩ ܡ̣ܢ ܓܵܘ ܐܲܬܪܹܗ ܘܓܵܘ ܒܲܝܬܹܗ. 58ܘܠܵܐ ܥܒܸܕܠܹܗ ܬܵܡܵܐ ܚܲܝܠܹ̈ܐ ܪܵܒܵܐ ܣܵܒܵܒ ܕܠܵܐ ܗܲܝܡܵܢܘܼܬܵܝܗܝ.