0:00
/
1ܘܟܲܕ ܩܘܼܪܒܸܢܗܘܿܢ ܠܐܘܿܪܸܫܠܸܡ: ܘܐ݇ܬܹܐܠܗܘܿܢ ܠܒܹܝܬ ܦܵܓܹܐ ܠܟܸܣ ܛܘܼܪܵܐ ܕܙܲܝܬܹ̈ܐ: ܗ̇ܝܓܵܗ ܫܘܼܕܸܪܹܗ ܝܼܫܘܿܥ ܠܬܪܹܝ ܡ̣ܢ ܬܲܠܡܝܼܕܘܼ̈ܗܝ. 2ܘܐَܡܝܼܪܹܗ ܐܸܠܵܝܗܝ: ܙܹܠَܡܘܿܢ ܠܐܵܗܵܐ ܡܵܬܵܐ ܕܝ݇ܠܵܗ̇ ܠܒܲܪܩܘܼܒ̣ܠܵܘܟ̣ܘܿܢ: ܘܕܲܪܣܵܥܵܬ ܒܸܬ ܡܲܫَܟ̰ܚܝܼܬܘܿܢ ܚܡܵܪܬܵܐ ܐܣܝܼܪܬܵܐ ܘܓ̰ܲܥܫܵܐ ܥܲܡܵܗ̇: ܫܪܹܝܡܘܿܢ ܡܲܝܬَܡܘܿܢ ܠܟܸܣܠܝܼ. 3ܘܐܸܢ ܐ݇ܢܵܫܵܐ ܐܵܡܸܪ ܐܸܠܵܘܟ̣ܘܿܢ ܡܸܢܕܝܼ: ܐَܡܘܿܪܘܼܢ ܐܸܠܹܗ: ܠܡܵܪܲܢ ܠܵܙܸܡ ܝܼܢܵܐ: ܘܕܲܪܣܵܥܲܬ ܒܸܬ ܫܵܕܸܪܗܘܿܢ. 4ܐܝܼܢܵܐ ܐܵܗܵܐ ܗَܘܹܐ ܠܵܗ̇: ܕܦܵܐܹܫ ܬܘܼܡܸܡܵܐ ܡܸܢܕܝܼ ܕܐَܡܝܼܪܵܐ ܗ݇ܘܵܐ ܒܝܲܕ ܢܒ̣ܝܼܵܐ: ܕܐَܡܝܼܪܹܗ. 5ܐَܡܘܿܪܘܼܢ ܠܒܪܵܬܐ ܕܨܸܗܝܘܿܢ: ܗܵܐ: ܡܲܠܟܵܟ̣ܝ ܒܹܐܬܵܝܵܐ ܝܠܹܗ ܠܟܸܣܠܵܟ̣ܝ: ܡܲܟܝܼܟ̣ܵܐ ܘܪܟܝܼܒ̣ܵܐ ܥܲܠ ܚܡܵܪܬܵܐ: ܘܥܲܠ ܓ̰ܲܥܫܐ ܟܘܼܪܪܵܐ ܕܚܡܵܪܬܐ. 6ܘܐَܙܸܠܗܘܿܢ ܬܲܠܡܝܼܕܹ̈ܐ ܘܥܒܸܕܠܗܘܿܢ ܕܵܐܟ̣ܝܼ ܕܦܩܝܼܕܵܝܠܹܗ ܝܼܫܘܿܥ. 7ܘܡܘܼܬَܝܹܠܗܘܿܢ ܠܚܡܵܪܬܵܐ ܘܠܓ̰ܲܥܫܵܐ: ܘܡܘܼܬܸܒ̣ܠܗܘܿܢ ܥܲܠܵܝܗܝ ܓ̰ܘܼܠܵܝ̈ܗܝ: ܘܪܟܸܒ̣ܠܹܗ ܥܲܠܘܼܗܝ ܝܼܫܘܿܥ. 8ܘܒܘܼܫܵܝܝܼ ܕܟܸܢܫܹ̈ܐ ܫܵܘܝܼ ܗ݇ܘܵܘ ܓ̰ܘܼܠܵܝ̈ܗܝ ܒܐܘܼܪܚܵܐ: ܘܐ݇ܚܹܪ̈݇ܢܹܐ ܦܵܪܡܝܼ ܗ݇ܘܵܘ ܦܲܥܘܵܢܹ̈ܐ ܡ̣ܢ ܐܝܼܠܵܢܹ̈ܐ ܘܕܵܪܝܼ ܗ݇ܘܵܘ ܒܐܘܼܪܚܵܐ. 9ܘܟܸܢܫܹ̈ܐ ܕܒܹܐܙܵܠܵܐ ܗ݇ܘܵܘ ܩܵܕَܡܘܼܗܝ: ܘܒܹܐܬܵܝܵܐ ܗ݇ܘܵܘ ܒܵܬَܪܹܗ: ܡܲܩܘܸܚܝܼ ܗ݇ܘܵܘ ܘܐܵܡܪܝܼ: ܐܘܿܫܲܥܢܵܐ ܠܒܪܘܿܢܹܗ ܕܕܵܘܝܼܕ: ܒܪܝܼܟ̣ܵܐ ܝܠܹܗ ܗ̇ܘ ܕܒܹܐܬܵܝܵܐ ܝܠܹܗ ܒܫܸܡܹܗ ܕܡܵܪܝܵܐ: ܐܘܿܫܲܥܢܵܐ ܒܡܪ̈ܵܘܡܹܐ. 10ܘܟܲܕ ܥܒܼܸܪܹܗ ܠܐܘܿܪܸܫܠܸܡ: ܫܥܸܫܠܵܗ̇ ܟܠܵܗ̇ ܡܕܝܼܢَܬܵܐ: ܒܹܐܡܵܪܵܐ: ܡܵܢܝܼ ܝܠܹܗ ܐܵܗܵܐ. 11ܘܟܸܢܫܹ̈ܐ ܐܵܡܪܝܼ ܗ݇ܘܵܘ: ܐܵܗܵܐ ܝܠܹܗ ܝܼܫܘܿܥ ܢܒ̣ܝܼܵܐ ܕܡ̣ܢ ܢܵܨܪܲܬ ܕܓܠܝܼܠܵܐ. 12ܘܥܒܼܸܪܹܗ ܝܼܫܘܿܥ ܠܗܲܝܟܠܵܐ ܕܐܲܠܵܗܵܐ: ܘܦܘܼܠܸܛܠܹܗ ܠܟܠܵܝܗܝ ܐܵܢܝܼ ܕܒܸܙܒ̣ܵܢܵܐ ܗ݇ܘܵܘ ܘܙܵܒܘܿܢܹܐ ܓܵܘ ܗܲܝܟܠܵܐ: ܘܡܘܼܚܕܸܪܹܗ ܠܨܘܼܦܪܹ̈ܐ ܕܨܲܪ̈ܵܦܹܐ: ܘܠܟܘܼܪ̈ܣܵܘܵܬܹܐ ܕܐܵܢܝܼ ܕܙܵܒܘܿܢܹܐ ܝܵܘܢܹ̈ܐ. 13ܘܐَܡܝܼܪܹܗ ܐܸܠܵܝܗܝ: ܟܬܝܼܒ̣ܵܐ ܝܠܹܗ: ܒܲܝܬܝܼ ܒܲܝܬܵܐ ܕܨܠܘܿܬܵܐ ܒܸܬ ܦܵܐܹܫ ܩܸܪܝܵܐ: ܐܝܼܢܵܐ ܐܲܚܬܘܿܢ ܥܒܸܕܠܵܘܟ̣ܘܿܢ ܐܸܠܹܗ ܓܸܦܝܼܬܵܐ ܕܓ̰ܵܠܵܠܝܹܐ. 14ܘܐ݇ܬܹܐܠܗܘܿܢ ܠܟܸܣܠܹܗ ܓܵܘ ܗܲܝܟܠܵܐ ܣܸܡܝܹ̈ܐ ܘܣܲܩܲܬܹ̈ܐ ܘܒܘܼܣܡܵܝܠܹܗ. 15ܐܝܼܢܵܐ ܟܲܕ ܚܙܹܐܠܗܘܿܢ ܓܘܼܪ̈ܵܢܹܐ ܕܟܵܗܢܹ̈ܐ ܘܣܵܦܪܹ̈ܐ ܥܵܓ̰ܸܒܘܼܝܵܬܹ̈ܐ ܕܒܸܥܒ̣ܵܕܵܐ ܗ݇ܘܵܐ: ܘܝܵܠܹ̈ܕَܐ ܡܲܩܘܘܼܚܹܐ ܒܗܲܝܟܠܵܐ ܘܒܹܐܡܵܪܵܐ: ܐܘܿܫܲܥܢܵܐ ܠܒܪܘܿܢܹܗ ܕܕܵܘܝܼܕ: ܟܪܸܒܠܗܘܿܢ. 16ܘܐَܡܸܪܗܘܿܢ ܐܸܠܹܗ: ܒܸܫܡܲܥܝܵܐ ܝܘܸܬ ܡܘܼܕܝܼ ܒܹܐܡܵܪܵܐ ܝܢܵܐ ܐܲܢܹܐ: ܐܵܡܸܪ ܐܸܠܵܝܗܝ ܝܼܫܘܿܥ: ܗܹܐ. ܗܲܪ ܠܵܐ ܩܪܹܐܠܵܘܟ̣ܘܿܢ: ܕܡ̣ܢ ܦܘܼܡܵܐ ܕܝܵܠܹ̈ܕَܐ ܘܕܝܲܠܘܼܕܹ̈ܐ ܡܘܼܟܡܸܠܘܼܟܼ ܬܸܫܒܘܿܚܬܵܐ. ܘܫܒ̣ܝܼܩܵܝܠܹܗ: 17ܘܦܠܸܛܠܹܗ ܠܒܲܕܲܪ ܡ̣ܢ ܡܕܝܼܢَܬܵܐ ܠܒܹܝܬ ܥܲܢܝܵܐ. ܘܦܸܫܠܹܗ ܒܠܲܝܠܹܐ ܬܵܡܵܐ. 18ܐܝܼܢܵܐ ܒܩܵܝܕܲܡܬܵܐ: ܟܲܕ ܕܸܪܹܗ ܠܡܕܝܼܢَܬܵܐ: ܟܦܸܢܹܗ. 19ܘܚܙܹܐܠܹܗ ܚܲܕَ ܐܝܼܠܵܢܵܐ ܕܬܹܐܢܵܐ ܒܐܘܼܪܚܵܐ: ܘܐَܬܹܐܠܹܗ ܠܟܸܣܠܹܗ: ܘܠܵܐ ܡܘܼܫَܟ̰ܸܚܠܹܗ ܒܝܹܗ ܡܸܢܕܝܼ ܫܒ̣ܘܿܩ ܡ̣ܢ ܛܲܪ̈ܦܹܐ ܒܢܲܦ̮ܫܵܝܗܝ. ܘܐَܡܝܼܪܹܗ ܐܸܠܹܗ: ܐ݇ܚܹܪ݇ܢܵܐ ܠܵܐ ܗܵܘܝܼ ܒܝܼܘܼܟ ܛܥܘܿܢܝܵܬܹ̈ܐ ܠܐܵܒܵܕ. ܘܕܲܪܣܵܥܲܬ ܒܪܸܙܠܹܐ ܗ̇ܘ ܐܝܼܠܵܢܵܐ ܕܬܹܐܢܵܐ. 20ܘܚܙܹܐܠܗܘܿܢ ܬܲܠܡܝܼܕܹ̈ܐ ܘܥܘܼܓ̰ܸܒܠܗܘܿܢ: ܘܐَܡܸܪܗܘܿܢ: ܕܵܐܟ̣ܝܼ ܕܲܪܣܵܥܲܬ ܒܪܸܙܠܹܐ ܐܝܼܠܵܢܵܐ ܕܬܹܐܢܵܐ. 21ܓ̰ܘܼܘܸܒܠܹܗ ܝܼܫܘܿܥ ܘܐَܡܝܼܪܹܗ ܐܸܠܵܝܗܝ: ܬܪܘܿܨܵܐ ܒܹܐܡܵܪܵܐ ܝܘܸܢ ܐܸܠܵܘܟ̣ܘܿܢ: ܐܸܢ ܗܵܘܝܵܐ ܠܵܘܟ̣ܘܿܢ ܗܲܝܡܵܢܘܼܬܵܐ: ܘܠܵܐ ܦܵܝܫܝܼܬܘܿܢ ܕܘܼܒܵܪ: ܠܵܐ ܗܲܪ ܐܵܗܵܐ ܕܐܝܼܠܵܢܵܐ ܕܬܹܐܢܵܐ ܒܸܬ ܥܵܒ̣ܕܝܼܬܘܿܢ: ܐܸܠܵܐ ܐܘܼܦ ܐܸܢ ܠܐܵܗܵܐ ܛܘܼܪܵܐ ܐܵܡܪܝܼܬܘܿܢ: ܦܘܼܫ ܫܩܝ݇ܠܵܗ̇ ܘܦܘܼܫ ܪܘܼܦܝܵܐ ܒܝܵܡܵܐ: ܒܸܬ ܗܵܘܝܵܐ. 22ܘܟܠ ܡܸܢܕܝܼ ܕܛܵܠܒܝܼܬܘܿܢ ܒܨܠܘܿܬܵܐ ܘܗܲܡܸܢܝܼܬܘܿܢ: ܒܸܬ ܫܵܩܠܝܼܬܘܿܢ. 23ܘܟܲܕ ܐَܬܹܐܠܹܗ ܗ̇ܘ ܠܗܲܝܟܠܵܐ: ܐ݇ܬܹܐܠܗܘܿܢ ܠܟܸܣܠܹܗ ܓܘܼܪ̈ܵܢܹܐ ܕܟܵܗܢܹ̈ܐ ܘܚܘܵܪ̈ܕܸܩܢܹܐ ܕܛܵܝܸܦܵܐ ܟܲܕ ܡܵܠܘܿܦܹܐ ܗ݇ܘܵܐ: ܘܐَܡܸܪܗܘܿܢ ܐܸܠܹܗ: ܒܐܲܝܢܝܼ ܗܘܼܟܡܵܐ ܐܲܢܹܐ ܒܸܥܒ̣ܵܕܵܐ ܝܘܸܬ: ܘܡܵܢܝܼ ܝܘܼܗَܒ̣ܘܼܟ ܝܼܠܹܗ ܐܵܗܵܐ ܗܘܼܟܡܵܐ. 24ܓ̰ܘܼܘܸܒܠܹܗ ܝܼܫܘܿܥ ܘܐَܡܝܼܪܹܗ ܐܸܠܵܝܗܝ: ܐܘܼܦ ܐܵܢܵܐ ܒܸܬ ܒܵܩܪܸܢ ܡܸܢܵܘܟ̣ܘܿܢ ܚܕܵܐ ܗܹܡܸܙܡܵܢ: ܘܐܸܢ ܐܵܡܪܝܼܬܘܿܢ ܠܝܼ: ܐܘܼܦ ܐܵܢܵܐ ܒܸܬ ܐܵܡܪܸܢ ܐܸܠܵܘܟ̣ܘܿܢ ܒܐܲܝܢܝܼ ܗܘܼܟܡܵܐ ܐܲܢܹܐ ܒܸܥܒ̣ܵܕܵܐ ܝܘܸܢ. 25ܡܲܥܡܘܿܕܝܼܬܹܗ ܕܝܘܿܚܲܢܵܢ ܡ̣ܢ ܐܲܝܟܵܐ ܗ݇ܘܵܐ: ܡ̣ܢ ܫܡܲܝܵܐ ܝܲܢ ܡ̣ܢ ܒܢܲܝ̈ܢܵܫܵܐ: ܐܝܼܢܵܐ ܐܵܢܝܼ ܚܫܸܒ̣ܠܗܘܿܢ ܒܓܵܢܵܝܗܝ ܒܹܐܡܵܪܵܐ: ܐܸܢ ܐܵܡܪܵܚ ܡ̣ܢ ܫܡܲܝܵܐ: ܒܸܬ ܐܵܡܸܪ ܐܸܠܲܢ: ܒܲܣ ܩܵܡܘܿܕܝܼ ܠܵܐ ܗܘܼܡܸܢܵܘܟ̣ܘܿܢ ܒܝܹܗ. 26ܘܐܸܢ ܐܵܡܪܲܚ ܡ̣ܢ ܒܢܲܝ̈ܢܵܫܵܐ: ܒܸܙܕܵܥܝܵܐ ܝܘܵܚ ܡ̣ܢ ܟܸܢܫܵܐ: ܣܵܒܵܒ ܟܠܵܝܗܝ ܐܲܝܟܼ ܢܒ̣ܝܼܵܐ ܟܹܐ ܕܵܒ̣ܩܝܼ ܠܝܘܿܚܲܢܵܢ. 27ܘܓ̰ܘܼܘܸܒܠܗܘܿܢ ܘܐَܡܸܪܗܘܿܢ ܠܝܼܫܘܿܥ: ܠܹܐ ܝܘܵܚ ܒܝܼܕܵܥܝܵܐ. ܐܵܡܸܪ ܐܸܠܵܝܗܝ ܗ̇ܘ: ܐܘܼܦ ܐܵܢܵܐ ܠܹܐ ܐܵܡܪܸܢ ܐܸܠܵܘܟ̣ܘܿܢ ܒܐܲܝܢܝܼ ܗܘܼܟܡܵܐ ܐܲܢܹܐ ܒܸܥܒ̣ܵܕܵܐ ܝܘܸܢ. 28ܐܝܼܢܵܐ ܡܘܼܕܝܼ ܒܸܚܫܵܒ̣ܵܐ ܝܬܘܿܢ: ܚܲܕَ ܐ݇ܢܵܫܵܐ ܐܝܼܬ ܗ݇ܘܵܘ ܠܹܗ ܬܪܹܝ ܒܢܘܿܢܹ̈ܐ: ܘܐَܬܹܐܠܹܗ ܠܟܸܣ ܩܵܕَܡܵܝܵܐ: ܘܐَܡܝܼܪܹܗ ܐܸܠܹܗ: ܒܪܘܿܢܝܼ: ܙܹܠَܐ ܐܸܕܝܘܿܡ ܦܠܘܿܚ ܓܵܘ ܟܲܪܡܵܐ. 29ܘܗ̇ܘ ܓ̰ܘܼܘܸܒܠܹܗ ܘܐَܡܝܼܪܹܗ: ܠܹܐ ܒܵܣܡܵܐ ܠܝܼ. ܐܝܼܢܵܐ ܒܐَܚܲܪܬܵܐ ܦܫܸܡܠܹܗ ܘܐَܙܸܠܹܗ. 30ܘܐَܬܹܐܠܹܗ ܠܟܸܣ ܕܗ̇ܘ ܐ݇ܚܹܪ݇ܢܵܐ: ܘܐَܡܝܼܪܹܗ ܐܸܠܹܗ ܗܲܕܟ̣ܵܐ ܘܓ̰ܘܼܘܸܒܠܹܗ ܘܐَܡܝܼܪܹܗ: ܗܹܐ: ܐܵܓ̣ܵܝܝܼ: ܘܠܵܐ ܐَܙܸܠܹܗ. 31ܡܵܢܝܼ ܡܐܲܢܹܐ ܬܪܹܝ ܥܒܸܕܠܹܗ ܪܸܙܵܝܵܐ ܕܒܵܒܘܼܗܝ: ܐܵܡܪܝܼ: ܗ̇ܘ ܩܵܕَܡܵܝܵܐ. ܐܵܡܸܪ ܐܸܠܵܝܗܝ ܝܼܫܘܿܥ: ܬܪܘܿܨܵܐ ܒܹܐܡܵܪܵܐ ܝܘܸܢ ܐܸܠܵܘܟ̣ܘܿܢ: ܕܕܲܡܓ̣ܵܟ̰̈ܝܹܐ ܘܙܵܢܝܵܬܹ̈ܐ ܒܸܩܕܵܡܵܘܟ̣ܘܿܢ ܝܼܢܵܐ ܠܡܲܠܟܘܼܬܵܐ ܕܐܲܠܵܗܵܐ. 32ܣܵܒܵܒ ܕܐَܬܹܐܠܹܗ ܠܟܸܣܠܵܘܟ̣ܘܿܢ ܝܘܿܚܲܢܵܢ ܒܐܘܼܪܚܵܐ ܕܟܹܐܢܘܼܬܵܐ: ܘܠܵܐ ܗܘܼܡܸܢܵܘܟ̣ܘܿܢ ܒܝܹܗ: ܐܝܼܢܵܐ ܕܲܡܓ̣ܵܟ̰̈ܝܹܐ ܘܙܵܢܝܵܬܹ̈ܐ ܗܘܼܡܸܢܘܿܢ ܒܝܹܗ. ܘܐܲܚܬܘܿܢ ܟܲܕ ܚܙܹܐܠܵܘܟ̣ܘܿܢ: ܐܘܼܦ ܠܵܐ ܦܫܸܡܠܵܘܟ̣ܘܿܢ ܒܐَܚܲܪܬܵܐ: ܕܗܲܡܸܢܝܼܬܘܿܢ ܗ݇ܘܵܘ ܒܝܹܗ. 33ܫܡܸܥܡܘܿܢ ܡܵܣܵܠܵܐ ܐ݇ܚܹܪ݇ܢܵܐ. ܐܝܼܬ ܗ݇ܘܵܐ ܚܲܕَ ܐ݇ܢܵܫܵܐ ܡܵܪܹܐ ܒܲܝܬܵܐ: ܘܢܨܸܒ̣ܠܹܗ ܟܲܪܡܵܐ: ܘܡܚܹܐܠܹܗ ܠܚܵܕܸܪ̈ܘܵܢܘܼܗܝ ܣܝܵܓ̣ܵܐ: ܘܚܦܸܪܹܗ ܓܵܘܹܗ ܡܲܥܨܲܪܬܵܐ: ܘܒܢܹܐܠܹܗ ܒܝܼܹܗ ܒܘܼܪܓ̰ܵܐ: ܘܣܘܼܦܹܐܠܹܗ ܠܦܵܠܵܚܹ̈ܐ: ܘܐَܙܸܠܹܗ ܠܪܸܚܩܵܐ. 34ܘܟܲܕ ܩܘܼܪܒܸܢܹܗ ܙܲܒ̣ܢܵܐ ܕܛܥܘܿܢܝܵܬܹ̈ܐ: ܫܘܼܕܸܪܹܗ ܠܪܹ̈ܓܵܘܵܬܘܼܗܝ ܠܟܸܣ ܦܵܠܵܚܹ̈ܐ: ܕܫܵܩܠܝܼ ܗ݇ܘܵܘ ܛܥܘܿܢܝܵܬܹ̈ܗ. 35ܘܕܒܸܩܠܗܘܿܢ ܦܵܠܵܚܹ̈ܐ ܠܪܹ̈ܓܵܘܵܬܘܼܗܝ: ܘܐܝܼܬ ܗ݇ܘܵܐ ܕܡܚܹܐܠܗܘܿܢ ܐܸܠܹܗ: ܘܐܝܼܬ ܗ݇ܘܵܐ ܕܪܓ̰ܸܡܠܗܘܿܢ: ܘܐܝܼܬ ܗ݇ܘܵܐ ܕܩܛܸܠܗܘܿܢ. 36ܘܡܸܢَܕܪܸܫَ ܫܘܼܕܸܪܹܗ ܪܹ̈ܓܵܘܵܬܹܐ ܐ݇ܚܹܪ̈݇ܢܹܐ ܒܘܼܫ ܪܵܒܵܐ ܡ̣ܢ ܩܵܕَܡܵܝܹ̈ܐ: ܘܗܲܕܟ̣ܵܐ ܥܒܸܕܠܗܘܿܢ ܐܸܠܵܝܗܝ. 37ܐܝܼܢܵܐ ܒܐَܚܲܪܬܵܐ ܫܘܼܕܸܪܹܗ ܠܟܸܣܠܵܝܗܝ ܠܒܪܘܿܢܹܗ: ܒܹܐܡܵܪܵܐ: ܩܵܘܡܵܐ ܒܸܬ ܢܵܚܦܝܼ ܡ̣ܢ ܒܪܘܿܢܝܼ. 38ܐܝܼܢܵܐ ܦܵܠܵܚܹ̈ܐ ܟܲܕ ܚܙܹܐܠܗܘܿܢ ܠܒܪܘܿܢܵܐ: ܐَܡܸܪܗܘܿܢ ܒܓܵܢܵܝܗܝ: ܐܵܗܵܐ ܝܠܹܗ ܡܝܼܪܲܬܓܵܪ: ܬܹܐܡܘܿܢ ܩܵܛܠܵܚܠܹܗ ܘܕܵܒ̣ܩܵܚ ܡܝܼܪܲܬܓܵܪܘܼܬܹܗ. 39ܕܒܸܩܠܗܘܿܢ ܦܘܼܠܸܛܠܗܘܿܢ ܐܸܠܹܗ ܠܒܲܕܲܪ ܡ̣ܢ ܟܲܪܡܵܐ: ܘܩܛܸܠܗܘܿܢ. 40ܒܲܣ ܐܝܼܡܲܢ ܗܲܕܟ̣ܵܐ ܕܐܵܬܹܐ ܡܵܪܵܐ ܕܟܲܪܡܵܐ: ܡܘܼܕܝܼ ܒܸܬ ܥܵܒܸܕ ܠܐܵܢܝܼ ܦܵܠܵܚܹ̈ܐ. 41ܐܵܡܪܝܼ ܐܸܠܹܗ: ܣܸܪܝܵܐ ܒܸܬ ܬܵܠܸܩ ܠܗ݇ܘܿܢ ܐܵܢܝܼ ܒܝܼܫܹ̈ܐ: ܘܟܲܪܡܵܐ ܒܸܬ ܝܵܗَܒܸܠܹܗ ܠܦܵܠܵܚܹ̈ܐ ܐ݇ܚܹܪ̈݇ܢܹܐ: ܐܵܢܝܼ ܕܝܵܗَܒ̣ܝܼܠܹܗ ܛܥܘܿܢܝܵܬܹ̈ܐ ܒܙܲܒ̣ܢܵܝܗܝ. 42ܐܵܡܸܪ ܐܸܠܵܝܗܝ ܝܼܫܘܿܥ: ܗܲܪ ܠܵܐ ܩܪܹܐܠܵܘܟ̣ܘܿܢ ܒܟܬܵܒܹ̈ܐ: ܟܹܐܦܵܐ ܕܡܘܼܣܠܹܐܠܗܘܿܢ ܒܲܢ̈ܵܝܹܐ ܗ̇ܘ ܗَܘܹܐܠܹܗ ܠܪܹܫܵܐ ܕܩܸܪܢܝܼܬܵܐ: ܡ̣ܢ ܠܟܸܣ ܡܵܪܝܵܐ ܗَܘܹܐ ܠܵܗ̇ ܐܵܗܵܐ: ܘܥܵܓ̰ܸܒܘܼܬܵܐ ܝ݇ܠܵܗ̇ ܒܥܲܝ̈ܢܲܢ. 43ܣܵܒܵܒ ܕܐܵܗܵܐ ܒܹܐܡܵܪܵܐ ܝܘܸܢ ܐܸܠܵܘܟ̣ܘܿܢ: ܕܒܸܬ ܦܵܝܫܵܐ ܫܩܝܼܠܬܵܐ ܡܸܢܵܘܟ̣ܘܿܢ ܡܲܠܟܘܼܬܵܐ ܕܐܲܠܵܗܵܐ: ܘܒܸܬ ܦܵܝܫܵܐ ܝܘܼܗَܒܼܸܠܬܵܐ ܠܛܵܝܸܦܵܐ ܕܥܵܒܸܕ ܛܥܘܿܢܝܵܬܘܼ̈ܗ̇. 44ܘܡ̇ܢ ܕܢܵܦܸܠ ܥܲܠ ܕܐܵܗܵܐ ܟܹܐܦܵܐ: ܒܸܬ ܦܵܐܹܫ ܛܒܼܝܼܚܵܐ؛ ܐܝܼܢܵܐ ܟܠ ܡ̇ܢ ܕܗ̇ܘ ܢܵܦܸܠ ܥܲܠܘܼܗܝ: ܒܸܬ ܡܕܵܪܹܐ ܠܹܗ. 45ܘܟܲܕ ܫܡܸܥܠܗَܘܿܢ ܓܘܼܪ̈ܵܢܹܐ ܕܟܵܗܢܹ̈ܐ ܘܦܪ̈ܝܼܫܹܐ ܠܡܵܣܵܠܘܼ̈ܗܝ: ܝܕܸܥܠܗܘܿܢ ܕܥܲܠܵܝܗܝ ܐَܡܝܼܪܹܗ. 46ܘܒܥܹܐܠܗܘܿܢ ܠܸܕܒ̣ܵܩܹܗ: ܘܙܕܸܥܠܗܘܿܢ ܡ̣ܢ ܟܸܢܫܵܐ: ܣܵܒܵܒ ܐܲܝܟܼ ܠܢܒ̣ܝܼܵܐ ܕܒ̣ܝܼܩܘܼܗܝ ܗ݇ܘܵܘ.