0:00
/
1ܘܒܐܵܢܝܼ ܝܵܘܡܵܢܹ̈ܐ ܐَܬܹܐܠܹܗ ܝܘܿܚܲܢܵܢ ܡܲܥܡܕܵܢܵܐ: ܡܲܟܪܘܿܙܹܐ ܓܵܘ ܒܲܪܝܼܵܐ ܕܝܼܗܘܼܕܵܐ. 2ܒܹܐܡܵܪܵܐ: ܬܲܘܸܒܘܿܢ: ܣܵܒܵܒ ܩܘܼܪܒܸܢܵܗ̇ ܡܲܠܟܘܼܬܵܐ ܕܫܡܲܝܵܐ. 3ܣܵܒܵܒ ܐܵܗܵܐ ܝܠܹܗ ܗ̇ܘ ܕܝܼܠܹܗ ܐَܡܝܼܪܵܐ ܒܝܲܕ ܐܹܫܲܥܝܵܐ ܢܒ̣ܝܼܵܐ: ܕܐَܡܝܼܪܹܗ: ܩܵܠܵܐ ܕܩܵܪܹܐ ܓܵܘ ܒܲܪܝܼܵܐ: ܗܲܕܪܘܿܢ ܐܘܼܪܚܹܗ ܕܡܵܪܝܵܐ: ܘܡܲܫܘܹܡܘܿܢ ܠܓ̰ܵܕܵܘܵܬܘܼ̈ܗܝ. 4ܘܗ̇ܘ ܝܘܿܚܲܢܵܢ ܐܝܼܬ ܗ݇ܘܵܐ ܠܹܗ ܠܒܸܫܬܵܐ ܕܣܲܥܪܵܐ ܕܓܘܼܡܠܹ̈ܐ: ܘܚܵܨܵܐ ܕܓܸܠܕܵܐ ܒܚܵܨܹܗ: ܘܡܹܐܟ̣ܘܼܠܬܹܗ ܩܲܡܨܹ̈ܐ ܘܕܸܒ̣ܫܵܐ ܕܒܲܪܝܼܵܐ. 5ܗ̇ܝܓܵܗ ܦܠܸܛܠܵܗ̇ ܠܟܸܣܠܹܗ ܐܘܿܪܸܫܠܸܡ ܘܟܠܵܗ̇ ܝܼܗܘܼܕ: ܘܟܠܹܗ ܐܲܬܪܵܐ ܕܠܚܵܕܸܪ̈ܘܵܢܹܐ ܕܝܘܿܪܕܢܢ. 6ܘܥܡܸܕܠܗܘܿܢ ܡܸܢܹܗ ܒܝܘܿܪܕܢܵܢ ܢܲܗܪܵܐ: ܟܲܕ ܡܵܘܕܘܼܝܹܐ ܒܚܛܝܼܵܬܵܝ̈ܗܝ. 7ܐܝܼܢܵܐ ܟܲܕ ܚܙܹܐܠܹܗ ܪܵܒܵܐ ܡ̣ܢ ܦܪ̈ܝܼܫܹܐ ܘܡ̣ܢ ܙܲܕܘܼܩܵܝܹ̈ܐ ܒܹܐܬܵܝܵܐ ܠܡܲܥܡܘܿܕܝܼܬܹܗ: ܐَܡܝܼܪܹܗ ܐܸܠܵܝܗܝ: ܙܲܪܥܵܐ ܕܐܵܟܸܕܢܹ̈ܐ: ܡܵܢܝܼ ܡܘܼܕܸܥܠܹܗ ܐܸܠܵܘܟ̣ܘܿܢ ܠܸܥܪܵܩܵܐ ܡ̣ܢ ܟܲܪܒܵܐ ܕܒܹܐܬܵܝܵܐ ܝ݇ܠܵܗ̇. 8ܥܒ̣ܘܿܕܘܿܢ ܗܲܕܟ̣ܵܐ ܛܥܘܿܢܝܵܬܹ̈ܐ ܕܚܵܫܚܝܼ ܠܬܝܵܒ̣ܘܼܬܵܐ. 9ܘܠܵܐ ܚܵܫܒ̣ܝܼܬܘܿܢ ܘܐܵܡܪܝܼܬܘܿܢ ܒܓܵܢܵܘܟ̣ܘܿܢ: ܒܵܒܵܐ ܐܝܼܬ ܠܲܢ: ܐܲܒ̣ܪܵܗܵܡ: ܣܵܒܵܒ ܒܹܐܡܵܪܵܐ ܝܘܸܢ ܐܸܠܵܘܟ̣ܘܿܢ: ܕܡܵܨܹܐ ܐܲܠܵܗܵܐ ܡܐܲܢܹܐ ܟܹܐܦܹ̈ܐ ܠܡܲܩܘܼܡܹܐ ܒܢܘܿܢܹ̈ܐ ܠܐܲܒ̣ܪܵܗܵܡ. 10ܘܐܘܼܦ ܐܵܕܝܼܵܐ ܢܵܪܵܓَܐ ܡܘܼܬܒ̣ܵܐ ܝܠܹܗ ܥܲܠ ܥܸܩܪܵܐ ܕܐܝܼܠܵܢܹ̈ܐ. ܟܠ ܐܝܼܠܵܢܵܐ ܗܲܕܟ̣ܵܐ ܕܛܥܘܿܢܝܵܬܹ̈ܐ ܫܲܦܝܼܪܹ̈ܐ ܠܵܐ ܥܵܒܸܕ: ܟܹܐ ܦܵܐܹܫ ܦܪܝܼܡܵܐ ܘܕܸܪܝܵܐ ܒܢܘܼܪܵܐ. 11ܐܵܢܵܐ ܡܲܥܡܘܿܕܹܐ ܝܘܸܢ ܐܸܠܵܘܟ̣ܘܿܢ ܒܡ̈ܝܼܵܐ ܠܬܝܵܒ̣ܘܼܬܵܐ: ܐܝܼܢܵܐ ܗ̇ܘ ܕܒܹܐܬܵܝܵܐ ܝܠܹܗ ܒܵܬَܪܝܼ ܒܘܼܫ ܙܲܪܒܵܢܵܐ ܝܠܹܗ ܡܸܢܝܼ: ܗ̇ܘ ܕܠܹܐ ܚܵܫܚܸܢ ܐܵܢܵܐ ܠܨܵܘܠܘܼ̈ܗܝ ܠܸܫܩܵܠܵܐ: ܗ̇ܘ ܡܲܥܡܸܕ ܠܵܘܟ̣ܘܿܢ ܒܪܘܼܚܵܐ ܕܩܘܼܕܫܵܐ ܘܒܢܘܼܪܵܐ. 12ܗ̇ܘ ܕܪܘܼܦ̮ܫܬܵܐ ܒܐܝܼܕܹܗ ܘܒܸܬ ܕܵܟܹܐ ܒܸܐܕܪܵܬܘܼܗܝ: ܘܚܸܛܘܼ̈ܗܝ ܒܸܬ ܓ̰ܲܡܸܥ ܠܐܲܢܒܵܪ̈ܘܼܗܝ: ܘܬܸܒ̣ܢܵܐ ܒܸܬ ܡܵܩܸܕ ܒܢܘܼܪܵܐ ܕܠܹܐ ܟ̰ܲܡܹܐ. 13ܗ̇ܝܓܵܗ ܐَܬܹܐܠܹܗ ܝܼܫܘܿܥ ܡ̣ܢ ܓܠܝܼܠܵܐ ܠܝܘܿܪܕܢܵܢ ܠܟܸܣ ܝܘܿܚܲܢܵܢ: ܕܥܵܡܸܕ ܡܸܢܹܗ. 14ܐܝܼܢܵܐ ܝܘܿܚܲܢܵܢ ܡܲܟܠܹܐ ܗ݇ܘܵܐ ܠܹܗ: ܘܐܵܡܸܪ: ܐܵܢܵܐ ܣܢܝܼܩܵܐ ܝܘܸܢ ܕܡܸܢܘܼܟ ܦܵܝܫܸܢ ܡܘܼܥܡܸܕܵܐ: ܘܐܲܢَܬ ܠܟܸܣܠܝܼ ܐܬܹܠܘܼܟܼ. 15ܐܝܼܢܵܐ ܝܼܫܘܿܥ ܓ̰ܘܼܘܸܒܠܹܗ ܘܐَܡܝܼܪܹܗ ܐܸܠܹܗ: ܫܒ̣ܘܿܩ ܐܵܕܝܼܵܐ: ܣܵܒܵܒ ܗܲܕܟ̣ܵܐ ܘܵܓ̰ܸܒ ܝ݇ܠܵܗ̇ ܐܸܠܲܢ ܕܬܲܡܸܡܵܚ ܟܠܵܗ̇ ܟܹܐܢܘܼܬܵܐ. ܗ̇ܝܓܵܗ ܫܒܸܩܠܹܗ. 16ܘܟܲܕ ܥܡܸܕܠܹܗ ܝܼܫܘܿܥ: ܕܲܪܣܵܥܲܬ ܐ݇ܣܸܩܠܹܗ ܡ̣ܢ ܡ̈ܝܼܵܐ: ܘܗܵܐ: ܦܸܫܠܗَܘܿܢ ܦܬܝܼܚܹܐ ܐܸܠܹܗ ܫܡܲܝܹ̈ܐ: ܘܚܙܹܐܠܹܗ ܪܘܼܚܵܐ ܕܐܲܠܵܗܵܐ ܒܸܨܠܵܝܵܐ ܐܲܝܟܼ ܝܵܘܢܵܐ: ܘܒܹܐܬܵܝܵܐ ܥܲܠܘܼܗܝ. 17ܘܗܵܐ: ܩܵܠܵܐ ܡ̣ܢ ܫܡܲܝܵܐ ܕܐܵܡܸܪ: ܐܵܗܵܐ ܝܠܹܗ ܒܪܘܿܢܝܼ ܡܘܼܚܸܒܵܐ: ܕܒܝܹܗ ܒܸܒܣܵܡܝܼ ܝ݇ܠܵܗ̇.