0:00
/
1ܚܘܼܪܘܿܢ ܒܙܲܕܝܼܩܘܼܬܵܘܟ̣ܘܿܢ: ܕܠܵܐ ܥܵܒ̣ܕܝܼܬܘܿܢ ܠܵܗ̇ ܩܵܕَܡ ܒܢܲܝ̈ܢܵܫܵܐ: ܐܲܝܟܼ ܕܦܵܝܫܝܼܬܘܿܢ ܚܸܙܝܹܐ ܐܸܠܵܝܗܝ: ܘܐܸܢ ܠܵܐ: ܠܲܝܬ ܠܵܘܟ̣ܘܿܢ ܗܵܩܵܐ ܠܟܸܣ ܒܵܒܵܘܟ̣ܘܿܢ ܕܒܫܡܲܝܵܐ. 2ܐܝܼܡܲܢ ܗܲܕܟ̣ܵܐ ܕܥܵܒ̣ܕܸܬ ܐܸܪܘܵܢܵܐ: ܠܵܐ ܩܵܪܸܬ ܩܵܪَܢܵܐ ܩܵܕَܡܘܼܟ: ܐܲܝܟܼ ܕܥܵܒ̣ܕܝܼ ܢܵܣܒܲܝ̈ ܒܐܲܦܹ̈ܐ ܒܟܢܘܼܫܝܵܬܹ̈ܐ ܘܒܥܵܠܘܿܠܹ̈ܐ: ܕܦܵܝܫܝܼ ܚܩܝܼܪܹܐ ܡ̣ܢ ܒܢܲܝ̈ܢܵܫܵܐ. ܬܪܘܿܨܵܐ ܒܹܐܡܵܪܵܐ ܝܘܸܢ ܐܸܠܵܘܟ̣ܘܿܢ ܕܩܘܼܒܸܠܗܘܿܢ ܗܵܩܝ. 3ܐܝܼܢܵܐ ܐܲܢَܬ: ܐܝܼܡܲܢ ܕܥܵܒ̣ܕܸܬ ܐܸܪܘܵܢܵܐ: ܠܵܐ ܝܵܕܥܵܐ ܣܸܡܵܠܘܼܟܼ ܡܘܼܕܝܼ ܒܸܥܒ̣ܵܕܵܐ ܝ݇ܠܵܗ̇ ܝܲܡܝܼܢܘܼܟ. 4ܕܗܵܘܹܐ ܐܸܪܘܵܢܘܼܟ ܒܛܸܫܘܵܐ: ܘܒܵܒܘܼܟ ܕܚܵܙܹܐ ܒܛܸܫܘܵܐ: ܗ̇ܘ ܒܸܬ ܦܵܪܸܥܠܘܼܟܼ. 5ܘܐܝܼܡܲܢ ܕܨܵܠܸܬ ܨܠܘܿܬܵܐ: ܠܵܐ ܗܵܘܸܬ ܐܲܝܟܼ ܢܵܣܒܲܝ̈ ܒܐܲܦܹ̈ܐ: ܕܡܲܚܸܒܝܼ ܠܸܟܠܵܝܵܐ ܒܟܢܘܼܫܝܵܬܹ̈ܐ ܘܒܩܘܼܢܓ̰ܝܼܵܬܹ̈ܐ ܕܥܵܠܘܿܠܹ̈ܐ ܠܨܵܠܘܿܝܹܐ: ܕܦܵܝܫܝܼ ܚܸܙܝܹܐ ܠܒܢܲܝ̈ܢܵܫܵܐ. ܬܪܘܿܨܵܐ ܒܹܐܡܵܪܵܐ ܝܘܸܢ ܐܸܠܵܘܟ̣ܘܿܢ ܕܩܘܼܒܸܠܗܘܿܢ ܗܵܩܵܝܗܝ. 6ܐܝܼܢܵܐ ܐܲܢَܬ: ܐܝܼܡܲܢ ܕܨܵܠܸܬ: ܥܒܼܘܿܪ ܠܟܘܼܚܬܘܼܟ ܘܥܟ̰ܘܿܡ ܬܲܪܥܘܼܟ: ܘܨܵܠܝܼ ܠܒܵܒܘܼܟ ܕܒܛܸܫܘܵܐ: ܘܒܵܒܘܼܟ ܕܚܵܙܹܐ ܒܛܸܫܘܵܐ ܒܸܬ ܦܵܪܸܥܠܘܼܟܼ. 7ܘܐܝܼܡܲܢ ܕܨܵܠܝܼܬܘܿܢ: ܠܵܐ ܗܵܘܹܝܬܘܿܢ ܒܸܬܢܵܝܵܐ ܗܹܡܸܙܡܵܢ ܐܲܝܟܼ ܛܝܸܦܹ̈ܐ: ܣܵܒܵܒ ܕܟܹܐ ܚܵܫܒ̣ܝܼ ܕܒܗܲܡܙܲܡܬܐܵ ܪܵܒܵܐ ܦܵܝܫܝܼ ܫܸܡܥܝܹܐ. 8ܗܲܕܟ̣ܵܐ ܠܵܐ ܕܵܡܝܼܬܘܿܢ ܐܸܠܲܝܗܝ: ܣܵܒܵܒ ܒܵܒܵܘܟ̣ܘܿܢ ܟܹܐ ܝܵܕܸܥ ܡܘܼܕܝܼ ܠܵܙܸܡ ܝܼܠܹܗ ܐܸܠܵܘܟ̣ܘܿܢ: ܗܵܠܵܐ ܠܵܐ ܛܵܠܒܝܼܬܘܿܢ ܡܸܢܹܗ. 9ܒܲܣ ܗܲܕܟ̣ܵܐ ܨܵܠܹܝܡܘܿܢ ܐܲܚܬܘܿܢ: ܒܵܒܲܢ ܕܒܫܡܲܝܵܐ: ܦܵܐܹܫ ܡܩܘܼܕܫܵܐ ܫܸܡܘܼܟ. 10ܐܵܬܝܵܐ ܡܲܠܟܘܼܬܘܼܟ. ܗܵܘܹܐ ܪܹܙܵܝܘܼܟ: ܕܵܐܟ̣ܝܼ ܕܒܫܡܲܝܵܐ ܐܘܼܦ ܒܐܲܪܥܵܐ. 11ܗܲܒَܠ ܠܲܢ ܠܲܚܡܵܐ ܕܣܘܼܢܩܵܢܲܢ ܐܸܕܝܘܿܡ ܝܵܘܡܵܐ. 12ܘܫܒ̣ܘܿܩ ܠܲܢ ܚܵܘܒܲܝ̈ܢ: ܕܵܐܟ̣ܝܼ ܕܐܘܼܦ ܐܲܚܢܲܢ ܫܒܸܩܠܲܢ ܠܕܵܝܢܵܢܕܵܪܲܢ. 13ܘܠܵܐ ܡܲܥܒܸܪܸܬ ܠܲܢ ܠܓ̰ܘܼܪܵܒܵܐ: ܐܸܠܵܐ ܦܵܨܝܼ ܠܲܢ ܡ̣ܢ ܒܝܼܫܵܐ. ܣܵܒܵܒ ܕܝܼܘܼܟ ܝ݇ܠܵܗ̇ ܡܲܠܟܘܼܬܵܐ: ܘܚܲܝܠܵܐ: ܘܬܸܫܒܘܿܚܬܵܐ: ܠܥܵܠܲܡ ܥܵܠܡܝܼܢ: ܐܵܡܹܝܢ. 14ܣܵܒܵܒ ܕܐܸܢ ܫܵܒ̣ܩܝܼܬܘܿܢ ܠܒܢܲܝ̈ܢܵܫܵܐ ܓܢܵܗܵܝ̈ܗܝ: ܐܘܼܦ ܒܵܒܵܘܟ̣ܘܿܢ ܕܒܫܡܲܝܵܐ ܒܸܬ ܫܵܒܸܩ ܠܵܘܟ̣ܘܿܢ. 15ܐܝܼܢܵܐ ܐܸܢ ܠܵܐ ܫܵܒ̣ܩܝܼܬܘܿܢ ܠܒܢܲܝ̈ܢܵܫܵܐ ܓܢܵܗܵܝ̈ܗܝ: ܐܘܼܦ ܒܵܒܵܘܟ̣ܘܿܢ ܠܹܐ ܫܵܒܸܩ ܠܵܘܟ̣ܘܿܢ ܓܢܵܗܵܘ̈ܟ̣ܘܿܢ. 16ܘܐܝܼܡܲܢ ܕܨܵܝܡܝܼܬܘܿܢ: ܠܵܐ ܗܵܘܹܝܬܘܿܢ ܦܫܝܼܡܹ̈ܐ ܐܲܝܟܼ ܢܵܣܒܲܝ̈ ܒܐܲܦܹ̈ܐ: ܣܵܒܵܒ ܕܟܹܐ ܡܲܣܪܝܼ ܚܘܼܠܩܵܝܗܝ: ܕܦܵܝܫܝܼ ܚܸܙܝܹܐ ܠܒܢܲܝ̈ܢܵܫܵܐ ܕܒܸܨܝܵܡܵܐ ܝܢܵܐ. ܬܪܘܿܨܵܐ ܒܹܐܡܵܪܵܐ ܝܘܸܢ ܐܸܠܵܘܟ̣ܘܿܢ ܕܩܘܼܒܸܠܗܘܿܢ ܗܵܩܵܝܗܝ. 17ܐܝܼܢܵܐ ܐܲܢَܬ: ܐܝܼܡܲܢ ܕܨܵܝܡܸܬ: ܚܲܠܸܠ ܦܵܬܘܼܟ ܘܡܫܘܿܚ ܪܹܫܘܼܟ. 18ܕܠܵܐ ܦܵܝܫܸܬ ܚܸܙܝܵܐ ܠܒܢܲܝ̈ܢܵܫܵܐ ܕܒܸܨܝܵܡܵܐ ܝܘܸܬ: ܐܸܠܵܐ ܠܒܵܒܘܼܟ ܕܒܛܸܫܘܵܐ: ܘܒܵܒܘܼܟ ܕܚܵܙܹܐ ܒܛܸܫܘܵܐ: ܗ̇ܘ ܒܸܬ ܦܵܪܸܥܠܘܼܟܼ. 19ܠܵܐ ܡܲܬܒ̣ܝܼܬܘܿܢ ܠܵܘܟ̣ܘܿܢ ܚܲܙܝܼܢܹ̈ܐ ܒܐܲܪܥܵܐ: ܐܲܝܟܵܐ ܕܓ̰ܲܢܓ ܘܐܸܟ̣ܠܵܐ ܡܲܚܪܸܒ̣ܝܼ: ܘܐܲܝܟܵܐ ܕܓܹܢܵܒܹ̈ܐ ܒܲܙܥܝܼ ܘܓܵܢܒ̣ܝܼ. 20ܐܸܠܵܐ ܡܲܬܒ̣ܘܿܢ ܠܵܘܟ̣ܘܿܢ ܚܲܙܝܼܢܹ̈ܐ ܒܫܡܲܝܵܐ: ܐܲܝܟܵܐ ܕܠܵܐ ܓ̰ܲܢܓ ܘܠܵܐ ܐܸܟ̣ܠܵܐ ܡܲܚܪܸܒ̣ܝܼ: ܘܐܲܝܟܵܐ ܕܓܹܢܵܒܹ̈ܐ ܠܹܐ ܒܲܙܥܝܼ ܘܠܹܐ ܓܵܢܒ̣ܝܼ. 21ܣܵܒܵܒ ܐܲܝܟܵܐ ܕܝ݇ܠܵܗ̇ ܚܲܙܝܼܢܵܘܟ̣ܘܿܢ: ܬܵܡܵܐ ܒܸܬ ܗܵܘܹܐ ܐܘܼܦ ܠܸܒܵܘܟ̣ܘܿܢ. 22ܫܪܵܓَܝܵܐ ܕܦܲܓ̣ܪܵܐ ܥܲܝܢܵܐ ܝ݇ܠܵܗ̇: ܐܸܢ ܥܲܝܢܘܼܟ ܗܲܕܟ̣ܵܐ ܗܵܘܝܵܐ ܦܫܝܼܛܬܵܐ: ܐܘܼܦ ܟܠܹܗ ܦܲܓ̣ܪܘܼܟ ܒܲܗܪܵܢܵܐ ܝܠܹܗ. 23ܐܝܼܢܵܐ ܐܸܢ ܥܲܝܢܘܼܟ ܗܵܘܝܵܐ ܒܝܼܫܬܵܐ: ܟܠܹܗ ܦܲܓ̣ܪܘܼܟ ܚܸܫܟܵܢܵܐ ܒܸܬ ܗܵܘܹܐ. ܐܸܢ ܗܲܕܟ̣ܵܐ ܒܲܗܪܵܐ ܕܒܝܼܘܼܟ. ܚܸܫܟܵܐ ܝܠܹܗ: ܚܘܼܒ̣ܝܘܼܟ ܟܡܵܐ ܒܸܬ ܗܵܘܹܐ. 24ܐ݇ܢܵܫܵܐ ܠܹܐ ܡܵܨܹܐ ܠܸܦܠܵܚܵܐ ܠܬܪܹܝ ܡܵܪ̈ܵܘܵܬܹܐ: ܣܵܒܵܒ ܝܲܢ ܠܚܲܕَ ܒܸܬ ܣܵܢܹܐ: ܘܠܗ̇ܘ ܐ݇ܚܹܪ݇ܢܵܐ ܒܸܬ ܡܲܚܸܒ: ܝܲܢ ܠܚܲܕَ ܒܸܬ ܡܝܵܩܸܪ: ܘܠܗ̇ܘ ܐ݇ܚܹܪ݇ܢܵܐ ܒܸܬ ܡܲܣܠܹܐ. ܠܹܐ ܡܵܨܹܝܬܘܿܢ ܠܸܦܠܵܚܵܐ ܠܐܲܠܵܗܵܐ ܘܠܡܵܡܘܿܢܵܐ. 25ܣܵܒܵܒ ܕܐܵܗܵܐ ܒܹܐܡܵܪܵܐ ܝܘܼܢ ܐܸܠܵܘܟ̣ܘܿܢ: ܠܵܐ ܐܵܟ̣ܠܝܼܬܘܿܢ ܚܲܡ ܠܓܵܢܵܘܟ̣ܘܿܢ: ܡܘܼܕܝܼ ܐܵܟ̣ܠܝܼܬܘܿܢ ܘܡܘܼܕܝܼ ܫܵܬܹܝܬܘܿܢ: ܘܠܵܐ ܠܦܲܓ̣ܪܵܘܟ̣ܘܿܢ: ܡܘܼܕܝܼ ܠܵܒ̣ܫܝܼܬܘܿܢ. ܠܹܐ ܝ݇ܠܵܗ̇ ܓܵܢܵܐ ܙܵܘܕܵܐ ܡ̣ܢ ܡܹܐܟ̣ܘܼܠܬܵܐ: ܘܦܲܓ̣ܪܵܐ ܡ̣ܢ ܠܒܸܫܬܵܐ. 26ܚܘܼܪܘܿܢ ܒܛܲܝܪܹ̈ܐ ܕܫܡܲܝܵܐ: ܕܠܹܐ ܙܵܪܥܝܼ ܘܠܹܐ ܚܵܨܕܝܼ: ܘܠܹܐ ܓ̰ܵܡܥܝܼ ܒܐܲܢܒܵܪܹ̈ܐ: ܘܒܵܒܵܘܟ̣ܘܿܢ ܕܒܫܡܲܝܵܐ ܟܹܐ ܬܲܪܣܹܐ ܠܗ݇ܘܿܢ. ܠܹܐ ܝܬܘܿܢ ܐܲܚܬܘܿܢ ܙܵܘܕܵܐ ܡܸܢܵܝܗܝ. 27ܐܝܼܢܵܐ ܡܵܢܝܼ ܡܸܢܵܘܟ̣ܘܿܢ ܟܲܕ ܐܵܟܼܸܠ ܚܲܡ: ܡܵܨܹܐ ܠܡܲܙܝܘܼܕܹܐ ܥܲܠ ܩܘܼܡܬܹܗ ܚܕܵܐ ܝܲܡܝܼܢܵܐ. 28ܘܥܲܠ ܠܒܸܫܬܵܐ ܩܵܡܘܿܕܝܼ ܚܲܡ ܒܹܐܟ̣ܵܠܵܐ ܝܬܘܿܢ: ܚܘܼܪܘܿܢ ܒܫܘܼܫܲܢܹ̈ܐ ܕܕܸܫܬܵܐ: ܕܵܐܟ̣ܝܼ ܟܹܐ ܓܲܪܘܸܣܝܼ: ܕܠܹܐ ܓ̰ܲܗَܝܝܼ ܘܠܹܐ ܥܵܙܠܝܼ. 29ܐܝܼܢܵܐ ܒܹܐܡܵܪܵܐ ܝܘܸܢ ܐܸܠܵܘܟ̣ܘܿܢ: ܕܐܘܼܦ ܫܠܹܝܡܘܿܢ ܒܟܠܹܗ ܚܸܩܪܹܗ ܠܹܐ ܗ݇ܘܵܐ ܠܒ̣ܝܼܫܵܐ ܐܲܝܟܼ ܚܲܕَ ܡܸܢܵܝܗܝ. 30ܐܝܼܢܵܐ ܐܸܢ ܠܓܸܠܵܐ ܕܚܲܩܠܵܐ ܕܐܸܕܝܘܿܡ ܝܠܹܗ: ܘܩܵܝܕܲܡܬܵܐ ܟܹܐ ܦܵܐܹܫ ܕܸܪܝܵܐ ܒܬܵܢܘܿܪܵܐ: ܐܲܠܵܗܵܐ ܗܲܕܟ̣ܵܐ ܟܹܐ ܡܲܠܒܸܫ: ܠܵܐ ܒܘܼܫ ܙܵܘܕܵܐ ܐܸܠܵܘܟ̣ܘܿܢ: ܝܵܐ ܟܝܼܡ ܗܲܝܡܵܢܘܼܬܵܐ. 31ܒܲܣ ܠܵܐ ܐܵܟ̣ܠܝܼܬܘܿܢ ܚܲܡ: ܝܲܢ ܐܵܡܪܝܼܬܘܿܢ: ܡܘܼܕܝܼ ܐܵܟ̣ܠܵܚ: ܝܲܢ ܡܘܼܕܝܼ ܫܵܬܵܚ: ܝܲܢ ܡܘܼܕܝܼ ܠܵܒ̣ܫܵܚ. 32ܣܵܒܵܒ ܐܲܢܹܐ ܟܠܵܝܗܝ ܛܵܝܸܦܹ̈ܐ ܟܹܐ ܒܵܥܝܼ ܠܗ݇ܘܿܢ: ܐܝܼܢܵܐ ܒܵܒܵܘܟ̣ܘܿܢ ܕܒܫܡܲܝܵܐ ܟܹܐ ܝܵܕܸܥ ܕܐܸܠܵܘܟ̣ܘܿܢ ܠܵܙܸܡ ܝܼܢܵܐ ܐܲܢܹܐ ܟܠܵܝܗܝ. 33ܐܝܼܢܵܐ ܒܥܹܝܡܘܿܢ ܩܵܕَܡܵܝܬܵܐ ܡܲܠܟܘܼܬܹܗ ܕܐܲܠܵܗܵܐ ܘܙܲܕܝܼܩܘܼܬܹܗ: ܘܟܠܵܝܗܝ ܐܲܢܹܐ ܒܸܬ ܦܵܝܫܝܼ ܡܘܼܙܝܸܕܹܐ ܐܸܠܵܘܟ̣ܘܿܢ. 34ܒܲܣ ܠܵܐ ܐܵܟ̣ܠܝܼܬܘܿܢ ܚܲܡ ܕܩܵܝܕܲܡܬܵܐ: ܣܵܒܵܒ ܕܗ̇ܝ ܩܵܝܕܲܡܬܵܐ ܒܸܬ ܐܵܟ̣ܠܵܗ̇ ܚܲܡ ܕܓܵܢܘܼܗ̇. ܟܹܐ ܡܵܠܝܵܐ ܠܹܗ ܠܝܵܘܡܵܐ ܒܝܼܫܬܹܗ.