0:00
/
1ܠܵܐ ܕܵܝܢܝܼܬܘܿܢ: ܕܠܵܐ ܦܵܝܫܝܼܬܘܿܢ ܕܝܼܢܹܐ. 2ܣܵܒܵܒ ܕܒܕܝܼܘܵܢ ܕܕܵܝܢܝܼܬܘܿܢ: ܒܸܬ ܦܵܝܫܝܼܬܘܿܢ ܕܝܼܢܹܐ: ܘܒܟܝܵܠܬܵܐ ܕܟܵܝܠܝܼܬܘܿܢ: ܒܸܬ ܦܵܐܹܫ ܟܝܼܠܵܐ ܐܸܠܵܘܟ̣ܘܿܢ. 3ܘܩܵܡܘܿܕܝܼ ܒܸܚܙܵܝܵܐ ܝܘܸܬ ܓܸܠܵܐ ܕܒܥܲܝܢܹܗ ܕܐܵܚܘܿܢܘܼܟ: ܘܠܩܵܪܝܼܬܵܐ ܕܒܥܲܝܢܵܐ ܕܓܵܢܘܼܟ ܠܹܐ ܝܘܸܬ ܒܸܚܙܵܝܵܐ. 4ܝܲܢ ܕܵܐܟ̣ܝܼ ܒܹܐܡܵܪܵܐ ܝܘܸܬ ܠܐܵܚܘܿܢܘܼܟ: ܫܒ̣ܘܿܩ ܦܵܠܛܸܢ ܓܸܠܵܐ ܡ̣ܢ ܥܲܝܢܘܼܟ: ܘܗܵܐ ܩܵܪܝܼܬܵܐ ܒܥܲܝܢܵܐ ܕܓܵܢܘܼܟ. 5ܢܵܣܸܒ̣ ܒܐܲܦܹ̈ܐ: ܦܵܠܸܛ ܩܵܕَܡܵܝܬܵܐ ܩܵܪܝܼܬܵܐ ܡ̣ܢ ܥܲܝܢܵܐ ܕܓܵܢܘܼܟ: ܘܗ̇ܝܓܵܗ̇ ܨܸܦܝܵܐ ܒܸܬ ܚܵܙܸܬ ܠܦܵܠܘܿܛܹܐ ܓܸܠܵܐ ܡ̣ܢ ܥܲܝܢܹܗ ܕܐܵܚܘܿܢܘܼܟ. 6ܠܵܐ ܝܵܗَܒ̣ܝܼܬܘܿܢ ܩܘܼܕܫܵܐ ܠܟܲܠܒܹ̈ܐ: ܘܠܵܐ ܕܵܪܝܼܬܘܿܢ ܡܲܪ̈ܓܵܢܝܵܬܵܘܟ̣ܘܿܢ ܩܵܕَܡ ܚܙܘܼܪܹ̈ܐ: ܕܠܵܐ ܕܵܝܫܝܼ ܠܗ݇ܘܿܢ ܒܐܲܩܠܵܝ̈ܗܝ: ܘܕܵܝܪܝܼ ܘܟ̰ܲܢܟ̰ܸܪܝܼܠܵܘܟ̣ܘܿܢ. 7ܛܠܘܼܒܘܿܢ: ܘܒܸܬ ܦܵܐܹܫ ܝܘܼܗَܒ̣ܵܐ ܐܸܠܵܘܟ̣ܘܿܢ: ܨܲܚܨܵܝܡܘܿܢ: ܘܒܸܬ ܡܲܫَܟ̰ܚܝܼܬܘܿܢ: ܬܲܩܬܸܩܘܿܢ: ܘܒܸܬ ܦܵܐܹܫ ܦܬܝܼܚܵܐ ܐܸܠܵܘܟ̣ܘܿܢ. 8ܣܵܒܵܒ ܟܠ ܕܛܵܠܸܒ: ܟܹܐ ܫܵܩܸܠ: ܘܗ̇ܘ ܕܒܵܥܝܹܐ ܟܹܐ ܡܵܫَܟ̰ܸܚ: ܘܠܲܐܝܢܝܼ ܕܬܲܩܬܸܩ: ܟܹܐ ܦܵܐܹܫ ܦܬܝܼܚܐ ܐܸܠܹܗ. 9ܝܲܢ ܡܵܢܝܼ ܝܠܹܗ ܡܸܢܵܘܟ̣ܘܿܢ ܐ݇ܢܵܫܵܐ ܕܛܵܠܸܒ ܡܸܢܹܗ ܒܪܘܿܢܹܗ ܠܲܚܡܵܐ: ܟܹܐܦܵܐ ܦܵܫܸܛ ܠܹܗ. 10ܘܐܸܢ ܢܘܼܢܵܐ ܛܵܠܸܒ ܡܸܢܹܗ: ܚܘܼܘܹܐ ܦܵܫܸܛ ܠܹܗ. 11ܒܲܣ ܐܸܢ ܐܲܚܬܘܿܢ ܕܝܼܬܘܿܢ ܒܝܼܫܹ̈ܐ: ܟܹܐ ܝܵܕܥܝܼܬܘܿܢ ܚܲܠܥܲܬܹ̈ܐ ܛܵܒܹ̈ܐ ܠܝܼܵܗَܒ̣ܵܐ ܠܒܢܘܿܢܵܘ̈ܟ̣ܘܿܢ: ܟܡܵܐ ܙܵܘܕܵܐ ܒܵܒܵܘܟ̣ܘܿܢ ܕܒܫܡܲܝܵܐ ܒܸܬ ܝܵܗَܒܸܠ ܛܵܒ̣ܵܬܹ̈ܐ ܠܐܵܢܝܼ ܕܛܵܠܒܝܼ ܡܸܢܹܗ. 12ܟܠ ܡܸܢܕܝܼ ܕܒܵܣܡܵܐ ܠܵܘܟ̣ܘܿܢ ܕܥܵܒ̣ܕܝܼ ܐܸܠܵܘܟ̣ܘܿܢ ܒܢܲܝ̈ܢܵܫܵܐ: ܗܲܕܟ̣ܵܐ ܐܘܼܦ ܐܲܚܬܘܿܢ ܥܒ̣ܘܿܕܘܿܢ ܐܸܠܵܝܗܝ: ܣܵܒܵܒ ܐܵܗܵܐ ܝܠܹܗ ܢܵܡܘܿܣܵܐ ܘܢܒ̣̈ܝܹܐ. 13ܥܒܼܘܿܪܘܿܢ ܒܬܲܪܥܵܐ ܥܝܼܩܵܐ: ܣܵܒܵܒ ܦܸܬܝܵܐ ܝܠܹܗ ܬܲܪܥܵܐ: ܘܪܘܝܼܚܬܵܐ ܝ݇ܠܵܗ̇ ܐܘܼܪܚܵܐ: ܕܠܵܒܠܵܗ̇ ܠܐܲܒ̣ܕܵܢܵܐ: ܘܪܵܒܵܐ ܝܢܵܐ ܐܵܢܝܼ ܕܐܵܙܠَܝܼ ܒܝܼܵܗ̇. 14ܣܵܒܒ ܥܝܼܩܵܐ ܝܠܹܗ ܬܲܪܥܵܐ: ܘܥܝܼܩܬܵܐ ܝ݇ܠܵܗ̇ ܐܘܼܪܚܵܐ: ܕܠܵܒܠܵܐ ܠܚܲܝܹ̈ܐ: ܘܚܲܕَܟ̰ܵܐ ܝܢܵܐ ܐܵܢܝܼ ܕܡܲܫَܟ̰ܚܝܼ ܠܵܗ̇. 15ܗَܘܹܝܡܘܿܢ ܗܸܫܝܵܪ ܡ̣ܢ ܢܒ̣̈ܝܹܐ ܕܲܓܵܠܹ̈ܐ ܕܐܵܬܝܼ ܠܟܸܣܠܵܘܟ̣ܘܿܢ ܒܠܒܸܫܝܵܬܹ̈ܐ ܕܦܹܪܹ̈ܐ: ܐܝܼܢܵܐ ܡ̣ܢ ܠܓܵܘܵܝܝܼ ܕܐܹܒܹ̈ܐ ܚܵܛܘܿܦܹ̈ܐ ܝܢܵܐ. 16ܡ̣ܢ ܛܥܘܿܢܝܵܬܵܝ̈ܗܝ ܒܸܬ ܝܵܕܥܝܼܬܘܿܢ ܠܗ݇ܘܿܢ. ܟܹܐ ܓܵܒܝܼ ܡ̣ܢ ܟܸܬܘܹ̈ܐ ܥܲܢܒܹ̈ܐ: ܝܲܢ ܡ̣ܢ ܩܝܼܘܵܪܹ̈ܐ ܬܹܐܢܹ̈ܐ. 17ܗܲܕܟ̣ܵܐ ܟܠ ܐܝܼܠܵܢܵܐ ܨܦܵܝܝܼ ܛܥܘܿܢܝܵܬܹ̈ܐ ܫܲܦܝܼܪܹ̈ܐ ܟܹܐ ܥܵܒܸܕ: ܐܝܼܢܵܐ ܐܝܼܠܵܢܵܐ ܚܸܪܒܵܐ: 18ܛܥܘܿܢܝܵܬܹ̈ܐ ܚܸܪܒܵܐ ܟܹܐ ܥܵܒܸܕ. ܠܹܐ ܡܵܨܹܐ ܐܝܼܠܵܢܵܐ ܨܦܵܝܝܼ ܛܥܘܿܢܝܵܬܹ̈ܐ ܚܸܪܒܵܐ ܠܸܥܒ̣ܵܕܵܐ: ܠܵܐ ܐܝܼܠܵܢܵܐ ܚܸܪܒܵܐ ܛܥܘܿܢܝܵܬܹ̈ܐ ܫܲܦܝܼܪܹ̈ܐ ܠܸܥܒ̣ܵܕܵܐ. 19ܟܠ ܐܝܼܠܵܢܵܐ ܕܠܵܐ ܥܵܒܸܕ ܛܥܘܿܢܝܵܬܹ̈ܐ ܫܲܦܝܼܪܹ̈ܐ: ܟܹܐ ܦܵܐܹܫ ܦܪܝܼܡܵܐ ܘܕܸܪܝܵܐ ܒܢܘܼܪܵܐ. 20ܒܲܣ ܡ̣ܢ ܛܥܘܼܢܝܵܬܵܝ̈ܗܝ ܒܸܬ ܝܵܕܥܝܼܬܘܿܢ ܠܗ݇ܘܿܢ. 21ܠܹܐ ܝ݇ܠܵܗ̇ ܟܠ ܕܐܵܡܸܪ ܐܸܠܝܼ: ܡܵܪܝܼ: ܡܵܪܝܼ: ܒܸܬ ܥܵܒܼܸܪ ܠܡܲܠܟܘܼܬܵܐ ܕܫܡܲܝܵܐ: ܐܸܠܵܐ ܡ̇ܢ ܕܥܵܒܸܕ ܪܸܙܵܝܹܗ ܕܒܵܒܝܼ ܕܒܫܡܲܝܵܐ. 22ܪܵܒܵܐ ܒܸܬ ܐܵܡܪܝܼ ܐܸܠܝܼ ܒܗ̇ܘ ܝܵܘܡܵܐ: ܡܵܪܝ: ܡܵܪܝܼ: ܒܫܸܡܘܼܟ ܠܵܐ ܢܘܼܒܹܠܲܢ: ܘܒܫܸܡܘܼܟ ܕܲܝܘܹ̈ܐ ܦܘܼܠܸܛܠܲܢ: ܘܒܫܸܡܘܼܟ ܚܲܝܠܹܗ ܪܵܒܵܐ ܥܒܸܕܠܲܢ. 23ܘܗ̇ܝܓܵܗ ܒܸܬ ܡܵܘܕܸܢ ܐܸܠܵܝܗܝ: ܗܸܟ̰ ܠܵܐ ܝܕܸܥܠܝܼ ܐܸܠܵܘܟ̣ܘܿܢ: ܪܚܘܿܩܘܿܢ ܐܲܚܬܘܿܢ ܡܸܢܝܼ: ܦܵܠܵܚܹ̈ܐ ܕܥܵܘܠܵܐ. 24ܗܲܕܟ̣ܵܐ ܟܠ ܕܫܵܡܸܥ ܠܐܲܢܹܐ ܗܹܡܸܙܡܵܢܝܼ̈: ܘܥܵܒܸܕ ܠܗ݇ܘܿܢ: ܒܸܬ ܦܵܐܹܫ ܡܘܼܕܡܝܼܵܐ ܠܐ݇ܢܵܫܵܐ ܥܵܩܸܠܕܵܪ: ܗ̇ܘ ܕܒܢܹܐܠܹܗ ܒܲܝܬܹܗ ܥܲܠ ܩܵܝܵܐ. 25ܘܨܠܹܐ ܠܵܗ̇ ܡܸܛܪܵܐ: ܘܐ݇ܬܹܐܠܗܘܿܢ ܢܲܗܪ̈ܵܘܵܬܹܐ: ܘܡܚܹܐܠܗܘܿܢ ܦܵܘܚܹ̈ܐ: ܘܩܸܬܠܗܘܿܢ ܒܗ̇ܘ ܒܲܝܬܵܐ: ܘܠܵܐ ܢܦܸܠܹܗ: ܣܵܒܵܒ ܕܫܲܬܸܐܣܬܹܗ ܥܲܠ ܩܵܝܵܐ ܡܘܼܬܸܒ̣ܬܵܐ ܗ݇ܘܵܐ. 26ܟܠ ܡ̇ܢ ܕܫܵܡܸܥ ܠܐܲܢܹܐ ܗܹܡܸܙܡܵܢܝܼ̈: ܘܠܵܐ ܥܵܒܸܕ ܠܗ݇ܘܿܢ: ܒܸܬ ܦܵܐܹܫ ܡܘܼܕܡܝܼܵܐ ܠܐ݇ܢܵܫܵܐ ܣܲܟ̣ܠܵܐ: ܕܒܢܹܐܠܹܗ ܒܲܝܬܹܗ ܥܲܠ ܣܹܠܵܐ. 27ܘܨܠܹܐ ܠܵܗ̇ ܡܸܛܪܵܐ: ܘܐ݇ܬܹܐܠܗܘܿܢ ܢܲܗܪ̈ܵܘܵܬܹܐ: ܘܡܚܹܐܠܗܘܿܢ ܦܵܘܚܹ̈ܐ: ܘܩܸܬܠܗܘܿܢ ܒܗ̇ܘ ܒܲܝܬܵܐ: ܘܢܦܸܠܹܗ: ܘܗَܘܹܐ ܠܵܗ̇ ܢܦܵܠܬܹܗ ܓܘܼܪܬܵܐ. ܘܗَܘܹܐ ܠܵܗ̇: 28ܟܲܕ ܬܘܼܡܸܡܠܹܗ ܝܼܫܘܿܥ ܐܲܢܹܐ ܗܹܡܸܙܡܵܢܹ̈ܐ: ܥܘܼܓ̰ܒܹܐ ܗ݇ܘܵܘ ܟܸܢܫܹ̈ܐ ܥܲܠ ܝܘܼܠܦܵܢܹܗ. 29ܣܵܒܵܒ ܕܡܵܠܸܦ ܗ݇ܘܵܐ ܠܗܘܿܢ ܐܲܝܟܼ ܡܵܪܹܐ ܗܘܼܟܡܵܐ: ܘܠܵܐ ܐܲܝܟܼ ܣܵܦܪ̈ܵܝܗܝ.