1ܠܗ̇ܘ ܕܝܼܠܹܗ ܙܲܒܘܼܢ ܒܗܲܝܡܵܢܘܼܝܬܵܐ ܩܵܒܿܠܘܿܢ؛ ܠܵܐ ܠܬܲܦ̮ܬܲܫܬܵܐ ܕܚܘܼܫܵܒܹ̈ܐ. 2ܣܵܒܵܒ ܐܝܼܬ ܕܗܲܡܸܢ ܕܟܠ ܡܸܢܕܝܼ ܐܵܟܼܸܠ؛ ܐܝܼܢܵܐ ܗ̇ܘ ܕܝܼܠܹܗ ܙܲܒܘܼܢ؛ ܝܲܪܩܵܐ ܟܹܐ ܐܵܟܼܸܠ. 3ܗ̇ܘ ܕܐܵܟܼܸܠ؛ ܠܗ̇ܘ ܕܠܵܐ ܐܵܟܼܸܠ ܠܵܐ ܡܲܣܠܹܐ؛ ܘܗ̇ܘ ܕܠܵܐ ܐܵܟܼܸܠ؛ ܠܗ̇ܘ ܕܐܵܟܼܸܠ ܠܵܐ ܕܵܝܸܢ؛ ܣܵܒܵܒ ܐܲܠܵܗܵܐ ܩܘܼܒܠܹܗ ܝܠܹܗ. 4ܐܲܢَܬ ܡܵܢܝܼ ܝܘܸܬ ܕܒܸܕܝܵܢܵܐ ܝܘܸܬ ܠܪܹܓܵܐ ܕܠܵܐ ܕܝܼܘܼܟ؛ ܠܡܵܪܵܐ ܕܓܵܢܹܗ ܟܹܐ ܟܵܠܹܐ ܝܲܢ ܢܵܦܸܠ. ܐܝܼܢܵܐ ܟܠܵܝܗܝ ܒܸܬ ܟܵܠܹܐ؛ ܣܵܒܵܒ ܕܟܹܐ ܡܵܨܹܐ ܐܲܠܵܗܵܐ ܡܲܟܠܹܐ ܠܹܗ. 5ܐܝܼܬ ܕܟܹܐ ܡܝܵܩܸܪ ܝܵܘܡܵܐ (ܙܵܘܕܵܐ) ܡ̣ܢ ܝܵܘܡܵܐ؛ ܘܐܝܼܬ ܕܟܹܐ ܡܝܵܩܸܪ ܟܠ ܝܵܘܡܵܐ؛ ܐܝܼܢܵܐ ܟܠ ܐَܢܵܫܵܐ ܒܚܝܼܵܠ ܕܓܵܢܹܗ ܦܵܝܸܫ ܡܘܼܩܘܝܼܵܐ. 6ܡ̇ܢ ܕܚܵܫܸܒܼ ܠܝܵܘܡܵܐ؛ ܠܡܵܪܲܢ ܟܹܐ ܚܵܫܸܒܼ ܠܹܗ. ܘܗ̇ܘ ܕܐܵܟܼܸܠ؛ ܠܡܵܪܲܢ ܟܹܐ ܐܵܟܼܸܠ؛ ܣܵܒܵܒ ܕܐܲܠܵܗܵܐ ܟܹܐ ܫܵܟܸܪ. ܘܗ̇ܘ ܕܠܵܐ ܐܵܟܼܸܠ؛ ܠܡܵܪܲܢ ܠܹܐ ܐܵܟܼܸܠ؛ ܘܟܹܐ ܫܵܟܸܪ ܠܐܲܠܵܗܵܐ. 7ܣܵܒܵܒ ܠܲܝܬ ܐَܢܵܫܵܐ ܡܸܢܲܢ ܕܠܓܵܢܹܗ ܟܹܐ ܚܲܝܹܐ؛ ܘܠܲܝܬ ܐَܢܵܫܵܐ ܕܠܓܵܢܹܗ ܟܹܐ ܡܵܝܸܬ. 8ܣܵܒܵܒ ܐܸܢ ܚܲܝܵܚ ܠܡܵܪܲܢ ܟܹܐ ܚܲܝܵܚ؛ ܘܐܸܢ ܡܵܝܬܵܚ؛ ܠܡܵܪܲܢ ܟܹܐ ܡܵܝܬܵܚ. ܒܲܣ ܐܸܢ ܚܲܝܵܚ ܘܐܸܢ ܡܵܝܬܵܚ؛ ܕܡܵܪܲܢ ܝܼܘܵܚ. 9ܣܵܒܵܒ ܠܕܐܵܗܵܐ ܐܘܼܦ ܡܫܝܼܚܵܐ ܡܝܼܬܠܹܗ ܘܚܹܝܠܹܗ؛ ܕܗ̇ܘ ܗܵܘܹܐ ܡܵܪܝܵܐ ܠܡܝܼܬܹ̈ܐ ܘܠܚܵܝܹ̈ܐ. 10ܐܝܼܢܵܐ ܐܲܢَܬ ܩܵܡܘܼܕܝܼ ܒܸܕܝܵܢܵܐ ܝܘܸܬ ܠܐܵܚܘܿܢܘܼܟ؛ ܝܲܢ ܐܘܼܦ ܐܲܢَܬ ܩܵܡܘܼܕܝܼ ܡܲܣܠܘܼܝܹܐ ܝܘܸܬ ܠܐܵܚܘܿܢܘܼܟ؛ ܣܵܒܵܒ ܟܠܲܢ ܒܸܬ ܟܵܠܵܚ ܩܵܕَܡ ܟܘܼܪܣܝܵܐ ܕܕܝܼܘܵܢ ܕܡܫܝܼܚܵܐ. 11ܣܵܒܵܒ ܕܟܬܝܼܒܼܵܐ ܝܠܹܗ؛ ܚܲܝܵܐ ܝܘܸܢ؛ ܒܸܐܡܵܪܵܐ ܝܠܹܗ ܡܵܪܝܵܐ؛ ܐܸܠܝܼ ܒܸܬ ܒܵܪܟܵܐ ܟܠ ܒܘܼܪܟܵܐ؛ ܘܠܐܲܠܵܗܵܐ ܒܸܬ ܡܵܘܕܹܐ ܟܠ ܠܸܫܵܢܵܐ. 12ܒܲܣ ܟܠ ܐَܢܵܫܵܐ ܡܸܢܲܢ ܓ̰ܘܼܘܵܒ ܡ̣ܢ ܓܸܒܵܐ ܕܓܵܢܹܗ ܒܸܬ ܝܵܗَܒܸܠ ܠܐܲܠܵܗܵܐ. 13ܒܲܣ ܡܐܵܕܝܼܵܐ ܠܵܐ ܕܵܝܢܵܚ ܚܲܕَ ܠܗ̇ܘ ܐَܚܹܪَܢܵܐ؛ ܐܸܠܵܐ ܐܵܗܵܐ ܕܘܼܢܘܿܢ ܙܵܘܕܵܐ؛ ܕܬܘܼܪܩܵܠܵܐ ܝܲܢ ܗܲܓ̰ܲܬ ܕܢܦܵܠܬܵܐ ܠܵܐ ܡܲܬܒܼܸܬ ܠܐܵܚܘܿܢܘܼܟ. 14ܒܝܼܕܲܥܝܵܐ ܝܘܸܢ ܘܗܲܪ ܗܘܼܡܸܢܵܐ ܝܘܸܢ ܒܡܵܪܝܵܐ ܝܼܫܘܿܥ؛ ܕܠܲܝܬ ܡܸܢܕܝܼ ܕܛܲܡܵܐܐ ܝܠܹܗ ܡ̣ܢ ܓܵܢܹܗ. ܐܸܠܵܐ ܠܗ̇ܘ ܕܚܵܫܸܒܼ ܥܲܠ ܡܸܢܕܝܼ ܕܛܲܡܵܐܐ ܝܠܹܗ؛ ܠܗ̇ܘ ܛܲܡܵܐܐ ܝܠܹܗ. 15ܣܵܒܵܒ ܐܸܢ ܥܲܠ ܡܸܐܟܼܘܼܠܬܵܐ ܦܵܝܸܫ ܡܘܼܦܫܸܡܵܐ ܐܵܚܘܿܢܘܼܟ؛ ܠܹܐ ܝܘܸܬ ܐܚܸܪَܢܵܐ ܒܸܚܕܵܪܵܐ ܒܚܘܼܒܵܐ. ܠܵܐ ܬܵܠܩܸܬ ܒܡܹܐܟܼܘܼܠܬܘܼܟܼ 16ܠܗ̇ܘ ܕܒܚܵܬܸܪܹܗ ܡܝܼܬܠܹܗ ܡܫܝܼܚܵܐ. ܘܠܵܐ ܦܵܝܫܵܐ ܓܕܝܼܦܬܵܐ ܛܵܒܼܬܘܟܼܘܿܢ. 17ܣܵܒܵܒ ܡܲܠܟܘܼܬܹܗ ܕܐܲܠܵܗܵܐ ܠܹܐ ܝَܠܵܗ̇ ܐَܟܼܵܠܵܐ ܘܫܬܵܝܵܐ؛ ܐܸܠܵܐ ܙܲܕܝܼܩܘܼܬܵܐ ܘܫܠܵܡܵܐ ܘܚܲܕܘܼܬܵܐ ܒܪܘܼܚܵܐ ܕܩܘܼܕܫܵܐ. 18ܣܵܒܵܒ ܡ̇ܢ ܕܒܲܐܢܸܐ ܥܵܒܸܕ ܚܸܠܡܲܬ ܠܡܫܝܼܚܵܐ ܟܹܐ ܫܵܦܸܪ ܠܐܲܠܵܗܵܐ؛ ܘܩܵܕَܡ ܒܢܲܝ̈ܢܵܫܵܐ ܪܸܕܝܵܐ ܝܠܹܗ. 19ܒܲܣ ܒܵܬَܪ ܫܠܵܡܵܐ ܪܵܚܛܵܚ. ܘܒܵܬَܪ ܒܸܢܝܵܢܵܐ ܕܚܲܕَ ܕܗ̇ܘ ܐَܚܹܪَܢܵܐ. 20ܘܠܵܐ ܒܘܼܬ ܡܹܐܟܼܘܼܠܬܵܐ ܒܵܛܠܸܬ ܦܘܼܠܚܵܢܵܐ ܕܐܲܠܵܗܵܐ. ܣܵܒܵܒ ܟܠ ܡܸܢܕܝܼ ܕܸܟܼܝܵܐ ܝܠܹܗ؛ ܐܝܼܢܵܐ ܣܸܪܝܵܐ ܝܠܹܗ ܠܐَܢܵܫܵܐ ܕܐܵܟܼܸܠ ܒܬܲܪܩܲܠܬܵܐ. 21ܨܦܵܝܝܼ ܝَܠܵܗ̇ ܠܵܐ ܠܹܐܟܼܵܠܵܐ ܒܸܣܪܵܐ؛ ܘܠܵܐ ܠܸܫܬܵܝܵܐ ܚܲܡܪܵܐ؛ ܘܠܵܐ ܠܥܸܒܼܵܕܵܐ ܡܸܢܕܝܼ ܕܒܝܹܗ ܬܲܪܩܸܠ ܐܵܚܘܿܢܲܢ. 22ܐܲܢَܬ ܕܐܝܼܬ ܠܘܼܟܼ ܗܲܝܡܵܢܘܼܬܵܐ؛ ܠܓܵܢܘܼܟܼ ܕܒܼܘܿܩ ܠܵܗܿ ܩܵܕَܡ ܐܲܠܵܗܵܐ. ܛܘܼܒܼܵܐ ܠܗ̇ܘ ܕܠܵܐ ܕܵܝܸܢ ܓܵܢܹܗ ܒܡܸܢܕܝܼ ܕܩܵܒܸܠ. 23ܣܵܒܵܒ ܗ̇ܘ ܕܦܵܝܸܫ ܕܘܼܒܵܪ؛ ܐܸܢ ܐܵܟܼܸܠ؛ ܗَܘܹܐ ܠܹܗ ܓܘܼܢܵܗܟܵܪ؛ ܣܵܒܵܒ ܕܠܹܐ ܗَܘܵܐ ܒܗܲܝܡܵܢܘܼܬܵܐ. ܣܵܒܵܒ ܟܠ ܡܸܢܕܝܼ ܕܠܹܐ ܝܠܹܗ ܡ̣ܢ ܗܲܝܡܵܢܘܼܬܵܐ ܚܛܝܼܬܵܐ ܝܠܹܗ.