1ܟܠ ܓܵܢܵܐ ܠܗܘܼܟܡܹ̈ܐ ܕܓܘܼܪܘܼܬܵܐ ܦܵܝܫܵܐ ܙܲܒܛ؛ ܣܵܒܵܒ ܠܲܝܬ ܗܘܼܟܡܵܐ ܕܠܹܐ ܝܠܹܗ ܡ̣ܢ ܐܲܠܵܗܵܐ ܘܐܵܢܝܼ ܗܘܼܟܡܹ̈ܐ ܕܐܝܼܬ؛ ܡ̣ܢ ܐܲܠܵܗܵܐ ܦܩܝܼܪܹܐ ܝܢܵܐ. 2ܒܲܣ ܡ̇ܢ ܕܩܵܝܸܡ ܠܕܲܪܩܘܼܒܼܠ ܕܗܘܼܟܡܵܐ؛ ܠܕܲܪܩܘܼܒܼܠ ܕܦܘܼܩܕܵܢܵܐ ܕܐܲܠܵܗܵܐ ܟܹܐ ܩܵܝܸܡ؛ ܘܐܵܢܝܼ ܕܩܵܝܡܝܼ ܠܕܲܪܩܘܼܒܼܠܵܝܗܝ؛ ܕܝܼܘܵܢ ܒܸܬ ܩܵܒܿܠܝܼ. 3ܣܵܒܵܒ ܗܲܟܝܼܡܹ̈ܐ ܠܹܐ ܝܢܵܐ ܙܕܘܼܥܬܵܐ ܠܦܘܼܠܚܵܢܹ̈ܐ ܛܵܒܹ̈ܐ؛ ܐܸܠܵܐ ܠܒܝܼܫܹ̈ܐ. ܒܲܣ ܒܸܒܲܥܝܵܐ ܝܘܸܬ ܕܠܵܐ ܙܵܕܸܥܬ ܡ̣ܢ ܗܘܼܟܡܵܐ؛ ܥܒܼܘܿܕ ܛܵܒܼܬܵܐ؛ ܘܚܸܩܪܵܐ ܒܸܬ ܗܵܘܹܐ ܠܘܼܟܼ ܡܸܢܹܗ؛ 4ܣܵܒܵܒ ܚܸܠܡܲܬܟܵܪ ܕܐܲܠܵܗܵܐ ܝܠܹܗ ܐܸܠܘܼܟܼ ܠܛܵܒܼܵܬܵܐ. ܐܝܼܢܵܐ ܐܸܢ ܒܝܼܫܬܵܐ ܥܵܒܼܕܸܬ؛ ܙܕܥܝܼ؛ ܣܵܒܵܒ ܕܠܹܐ ܝܠܹܗ ܗܵܒܵܣ ܐَܣܝܼܪܵܐ ܠܣܲܝܦܵܐ؛ ܣܵܒܵܒ ܚܸܠܡܲܬܟܵܪ ܕܐܲܠܵܗܵܐ ܝܠܹܗ؛ ܫܵܩܠܵܢܵܐ ܕܬܘܼܥܠܵܐ ܕܟܲܪܒܵܐ ܠܗ̇ܘ ܕܥܵܒܸܕ ܒܝܼܫܬܵܐ. 5ܣܵܒܵܒ ܕܐܵܗܵܐ ܘܵܓ̰ܸܒ ܝܼܠܹܗ ܐܸܠܲܢ ܠܸܦܝܵܫܵܐ ܙܲܒܛ؛ ܠܵܐ ܣܵܒܵܒ ܕܟܲܪܒܵܐ ܗܲܪ؛ ܐܸܠܵܐ ܐܘܼܦ ܒܚܵܬܸܪ ܕܐܸܢܝܲܬ. 6ܣܵܒܵܒ ܕܐܵܗܵܐ ܐܘܼܦ ܚܲܪܓ̰ ܒܝܼܵܗَܒܼܵܐ ܝܬܘܿܢ؛ ܣܵܒܵܒ ܚܸܠܡܲܬܟܵܪܹ̈ܐ ܕܐܲܠܵܗܵܐ ܝܢܵܐ؛ ܕܗܲܪ ܠܐܵܗܵܐ ܫܘܼܠܵܐ ܟܹܐ ܟܵܠܝܼ. 7ܒܲܣ ܦܪܹܥܡܘܿܢ ܠܟܠ ܐَܢܵܫܵܐ ܐܲܝܟܼ ܕܝܼܠܵܗ̇ ܘܵܓ̰ܸܒ ܐܸܠܹܗ؛ ܠܡ̇ܢ ܕܚܲܪܓ̰؛ ܚܲܪܓ̰؛ ܘܠܡ̇ܢ ܕܕܲܡܓܼܵܐ؛ ܕܲܡܓܼܵܐ؛ ܘܠܡ̇ܢ ܕܙܕܘܼܥܬܵܐ؛ ܙܕܘܼܥܬܵܐ؛ ܘܠܡ̇ܢ ܕܐܝܼܩܵܪܵܐ؛ ܐܝܼܩܵܪܵܐ. 8ܠܟ̰ܘܼ ܐَܢܵܫܵܐ ܠܵܐ ܗܵܘܝܼܬܘܿܢ ܕܵܝܢܵܢܹ̈ܐ؛ ܐܸܠܵܐ ܐܸܢ ܚܲܕَ ܠܗ̇ܘ ܐܚܸܪَܢܵܐ ܠܡܲܚܘܼܒܹܐ؛ ܣܵܒܵܒ ܡ̇ܢ ܕܡܲܚܸܒ ܠܚܲܒܼܪܹܗ؛ ܢܵܡܘܿܣܵܐ ܬܘܼܡܸܡܵܐ ܝܠܹܗ. 9ܣܵܒܵܒ ܕܐܘܼܦ ܗܿܝ؛ ܠܵܐ ܩܵܛܠܸܬ؛ ܠܵܐ ܥܵܒܼܕܸܬ ܩܲܗܒܘܼܬܵܐ؛ ܠܵܐ ܓܵܢܒܼܸܬ؛ ܠܵܐ ܫܲܗَܘܸܬܸܬ؛ ܘܐܸܢ ܐܝܼܬ ܦܘܼܩܕܵܢܵܐ ܐَܚܹܪَܢܵܐ؛ ܒܐܵܗܵܐ ܗܹܡܸܙܡܵܢ ܟܹܐ ܦܵܝܸܫ ܬܘܼܡܸܡܵܐ؛ ܝܲܥܢܹܐ؛ ܡܲܚܸܒܸܬ ܠܫܒܼܵܒܘܼܟ ܐܲܝܟܼ ܓܵܢܘܼܟ. 10ܚܘܼܒܵܐ ܠܫܒܼܵܒܹܗ ܣܪܝܼܬܵܐ ܠܹܐ ܦܵܠܸܚ. ܒܲܣ ܚܘܼܒܵܐ ܬܲܡܲܡܬܵܐ ܕܢܵܡܘܿܣܵܐ ܝܠܹܗ. 11ܘܐܵܗܵܐ؛ ܟܲܕ ܝܲܕܥܵܚ ܙܲܒܼܢܵܐ؛ ܕܣܵܥܲܬ ܝܼܠܵܗ̇ ܡܐܵܕܝܼܵܐ ܕܪܵܥܫܵܚ ܡ̣ܢ ܫܸܢܬܲܢ؛ ܣܵܒܵܒ ܐܵܕܝܼܵܐ ܒܘܼܫ ܙܵܘܕܵܐ ܩܘܼܪܒܸܢܹܗ ܝܢܵܐ ܐܸܠܲܢ ܚܲܝܲܢ ܡ̣ܢ ܕܟܲܕ ܗܘܼܡܸܢܲܢ. 12ܠܲܝܠܹܐ ܥܒܼܝܼܪܵܐ ܝܠܹܗ؛ ܘܐܝܼܡܵܡܵܐ ܩܘܼܪܒܸܢܵܐ ܝܠܹܗ. ܒܲܣ ܪܲܦܵܚ ܡܸܢܲܢ ܦܘܼܠܚܵܢܹ̈ܐ ܕܚܘܼܒܼܝܵܐ؛ ܘܠܵܒܼܫܵܚ ܟ̰ܲܟܹ̈ܐ ܕܒܲܗܪܵܐ. 13ܐܲܝܟܼ ܕܒܐܝܼܡܵܡܵܐ ܒܐܵܕܵܒܘܼܬܵܐ ܚܵܕܪܵܚ؛ ܠܵܐ ܒܙܡܵܪܵܐ ܘܒܪܵܘܵܝܘܼܬܵܐ؛ ܠܵܐ ܒܕܡܵܟܼܵܐ ܟ̰ܲܦܵܠ ܘܒܦܲܚܙܘܼܬܵܐ؛ ܠܵܐ ܒܒܲܚܸܠܵܢܘܼܬܵܐ ܘܒܡܲܩܲܪܨܘܼܬܵܐ. 14ܐܸܠܵܐ ܠܒܼܘܿܫܘܿܢ ܠܡܵܪܲܢ ܝܼܫܘܿܥ ܡܫܝܼܚܵܐ؛ ܘܠܵܐ ܐܵܟܼܠܝܼܬܘܿܢ ܚܲܡ ܕܒܸܣܪܵܘܟܼܘܿܢ ܠܫܲܗَܘܲܬܝܵܬܹ̈ܐ.