1ܣܵܒܵܒ ܐܲܠܵܗܵܐ ܠܲܝܬ ܠܘܼܟܼ ܡܲܕܲܪܬܵܐ ܕܓ̰ܘܼܘܵܒ؛ ܝܵܐ ܒܲܪܢܵܫܵܐ؛ ܟܠ ܕܝܼܘܸܬ ܕܒܸܕܝܵܢܵܐ ܝܘܸܬ؛ ܣܵܒܵܒ ܕܒܗ̇ܘ ܕܒܸܕܝܵܢܵܐ ܝܘܸܬ ܠܐَܚܹܪܢܵܐ؛ ܓܵܢܘܼܟ ܒܸܥܒܼܵܕܵܐ ܝܘܸܬ ܓܘܼܢܵܗܟܵܪ. ܣܵܒܵܒ ܐܘܼܦ ܐܲܢَܬ ܕܒܸܕܝܵܢܵܐ ܝܘܸܬ ܗܲܪ ܐܵܢܝܼ ܒܸܦܠܵܚܵܐ ܝܘܸܬ. 2ܘܒܝܼܕܵܥܝܵܐ ܝܘܵܚ ܕܕܝܼܘܵܢܹܗ ܕܐܲܠܿܗܵܐ ܒܣܲܪܲܣܬܘܼܬܵܐ ܝَܠܵܗ̇ ܝܲܠ ܐܵܢܝܼ ܕܐܲܢܸܐ ܦܵܠܚܝܼ. 3ܐܝܼܢܵܐ ܐܵܗܵܐ ܒܸܚܫܵܒܼܵܐ ܝܘܹܬ؛ ܝܵܐ ܒܲܪܢܵܫܵܐ؛ ܕܒܸܕܝܵܢܵܐ ܝܘܸܬ ܠܐܵܢܝܼ ܕܐܲܢܸܐ ܒܸܦܠܵܚܵܐ ܝܢܵܐ؛ ܟܲܕ ܐܘܼܦ ܐܲܢܬ ܒܸܥܒܼܵܕܵܝ ܝܘܸܬ؛ ܕܐܲܢܬ ܒܸܬ ܚܵܠܨܸܬ ܡ̣ܢ ܕܝܼܘܵܢܸܗ ܕܐܲܠܵܗܵܐ؛ 4ܝܲܢ ܠܕܵܘܸܠܬܵܐ ܕܒܵܣܝܼܡܘܼܬܹܗ؛ ܘܕܡܲܪܝܲܟܼܬܵܐ ܕܒܹܢܹܗ؛ ܘܕܡܵܘܗܠܲܬܹܗ؛ ܡܲܣܠܘܼܝܹܐ ܝܘܸܬ؛ ܘܠܹܐ ܝܘܸܬ ܒܝܼܕܥܵܝܵܐ ܕܒܵܣܝܼܡܘܼܬܹܗ ܕܐܲܠܵܗܵܐ ܠܬܵܝܒܼܘܼܬܵܐ ܡܵܐܘܘܼܟܼ ܝܼܠܵܗ̇؛ 5ܐܸܠܵܐ ܐܲܝܟܼ ܩܸܫܝܘܼܬܘܼܟܼ ܘܠܸܒܘܼܟܼ ܠܵܐ ܬܲܘܸܒܵܢܵܐ؛ ܡܲܬܘܼܒܹܐ ܝܘܸܬ ܠܓܵܢܘܼܟܼ ܚܲܙܝܼܢܵܐ ܕܟܲܪܒܵܐ ܒܝܵܘܡܵܐ ܕܟܲܪܒܵܐ ܘܓܸܠܝܵܢܵܐ ܕܕܝܼܘܵܢ ܗܲܩ ܕܐܲܠܵܗܵܐ؛ 6ܗ̇ܘ ܕܒܸܬ ܦܲܪܸܥ ܠܟܠ ܐَܢܵܫܵܐ ܐܲܝܟܼ ܦܘܼܠܚܵܢܘܼ̈ܗܝ؛ 7ܠܐܵܢܝܼ ܕܒܚܡܵܠܬܵܐ ܕܦܘܼܠܚܵܢܹ̈ܐ ܛܵܒܹ̈ܐ؛ ܬܸܫܒܘܿܚܬܵܐ ܘܐܝܼܩܵܪܵܐ ܘܠܵܐ ܚܪܵܒܼܬܵܐ ܒܸܒܲܥܝܵܐ ܝܢܵܐ؛ ܚܲܝܹ̈ܐ ܕܠܐܵܒܲܕ؛ 8ܐܝܼܢܵܐ ܠܥܵܨܝܹ̈ܐ؛ ܘܠܵܐ ܡܲܨܝܸܬܵܢܹ̈ܐ ܠܣܲܪܲܣܬܘܼܬܵܐ؛ ܐܸܠܵܐ ܠܥܵܘܠܵܐ ܡܲܨܝܸܬܝܼ؛ (ܒܸܬ ܗܵܘܝܵܐ) ܟܲܪܒܵܐ ܘܚܸܡܬܵܐ؛ 9ܐܘܼܠܨܵܢܵܐ ܘܓ̰ܘܼܢܓ̰ܵܪܵܐ؛ ܥܲܠ ܟܠ ܓܵܢܵܐ ܕܒܲܪܢܵܫܵܐ ܕܦܵܠܚܵܐ ܒܝܼܫܬܵܐ؛ ܠܝܗَܘܼܕܵܝܵܐ ܩܵܕَܡܵܝܬܵܐ؛ ܘܠܝܵܘܢܵܝܵܐ؛ 10ܐܝܼܢܵܐ ܬܸܫܒܘܿܚܬܵܐ؛ ܘܐܝܼܩܵܪܵܐ؛ ܘܫܠܵܡܵܐ؛ ܠܟܠ ܕܦܲܠܸܚ ܛܵܒܼܬܵܐ؛ ܠܝܗَܘܼܕܵܝܵܐ ܩܵܕَܡܵܝܬܵܐ؛ ܘܠܝܵܘܢܵܝܵܐ؛ 11ܣܵܒܵܒ ܠܲܝܬ ܚܙܵܝܬܵܐ ܕܦܵܬܵܐ ܠܟܸܣ ܐܲܠܵܗܵܐ؛ 12ܣܵܒܵܒ ܟܠܵܝܗܝ ܕܕܠܵܐ ܢܵܡܘܿܣܵܐ ܚܛܹܐܠܘܿܢ؛ ܐܘܼܦ ܕܠܵܐ ܢܵܡܘܿܣܵܐ ܒܸܬ ܬܲܠܩܝܼ؛ ܘܟܠܵܝܗܝ ܕܒܢܵܡܘܿܣܵܐ ܚܛܹܐܠܘܿܢ؛ ܡ̣ܢ ܢܵܡܘܿܣܵܐ ܒܸܬ ܦܵܝܫܝܼ ܕܝܼܢܹܐ. 13ܣܵܒܵܒ ܠܵܐ ܕܫܲܡܥܵܢܹ̈ܐ ܕܢܵܡܘܿܣܵܐ ܙܲܕܝܼܩܹ̈ܐ ܝܢܵܐ ܩܵܕܡ ܐܲܠܵܗܵܐ؛ ܐܸܠܵܐ ܥܵܒܼܕܵܢܹ̈ܐ ܕܢܵܡܘܿܣܵܐ ܒܸܬ ܦܵܝܫܝܼ ܡܘܼܟܫܸܛܹܐ؛ 14ܣܵܒܵܒ ܕܟܲܕ ܛܵܝܸܦܹ̈ܐ ܕܠܲܝܬ ܠܗܘܿܢ ܢܵܡܘܿܣܵܐ؛ ܡ̣ܢ ܐܲܨܠܵܝܗܝ ܥܵܒܼܕܝܼ ܫܘܼܠܹ̈ܐ ܕܢܵܡܘܿܣܵܐ؛ ܐܵܢܝܼ؛ ܟܲܕ ܢܵܡܘܼܣܵܐ ܠܲܝܬ ܠܗܘܿܢ؛ ܠܓܵܢܵܝܗܝ ܗَܘܹܐܠܘܿܢ ܢܵܡܘܿܣܵܐ؛ 15ܒܗ̇ܝ ܕܟܹܐ ܡܲܚܙܝܼ ܦܘܼܠܚܵܢܹܗ ܕܢܵܡܘܿܣܵܐ ܟܬܝܼܒܼܵܐ ܥܲܠ ܠܸܒܵܝܗܝ؛ ܟܲܕ ܝܵܗܒܼܵܐ ܣܵܗܕܘܼܬܵܐ ܐܸܢܝܲܬܵܝܗܝ؛ ܟܲܕ ܚܘܼܫܵܒܼܵܝ̈ܗܝ ܒܹܝܠ ܓܵܢܵܝܗܝ ܟܹܐ ܡܲܢܟܸܣܝܼ ܝܲܢ ܓܲܘܸܒܝܼ (ܐܸܠܵܝ)؛ 16ܒܝܵܘܡܵܐ ܕܕܵܝܸܢ ܐܲܠܵܗܵܐ ܫܘܼܠܹ̈ܐ ܛܸܫܝܹ̈ܐ ܕܒܢܲܝ̈ܢܵܫܵܐ؛ ܐܲܝܟܼ ܐܸܘܵܢܓܵܠܝܼܘܿܢ ܕܝܼܝܼ؛ ܒܝܲܕ ܝܼܫܘܿܥ ܡܫܝܼܚܵܐ. 17ܐܝܼܢܵܐ ܐܸܢ ܐܲܢَܬ ܦܝܵܫܵܐ ܝܘܸܬ ܩܸܪܝܵܐ ܝܗَܘܼܕܵܝܵܐ؛ ܘܒܸܢܵܝܵܚܵܐ. ܝܘܸܬ ܒܢܵܡܘܿܣܵܐ؛ ܘܒܸܥܒܼܵܕܵܐ ܝܘܸܬ ܫܘܼܒܼܗܵܪܵܐ ܒܐܲܠܵܗܵܐ؛ 18ܘܒܝܼܕܲܥܝܵܐ ܝܘܸܬ ܪܸܙܵܝܹܗ؛ ܘܒܸܦܪܵܫܵܐ ܝܘܸܬ ܡܸܢܕܝܵܢܹ̈ܐ ܦܪ̈ܝܼܫܹܐ؛ ܟܲܕ ܡܘܿܠܦܵܐ ܝܘܸܬ ܡ̣ܢ ܢܵܡܘܿܣܵܐ؛ 19ܘܗܲܪ ܗܘܼܡܸܢܵܐ ܝܘܸܬ ܒܓܵܢܘܼܟ ܕܬܲܓܒܸܪܵܢܵܐ ܕܣܸܡܝܹ̈ܐ ܝܘܸܬ؛ ܘܒܲܗܪܵܐ ܕܐܵܢܝܼ ܕܝܼܢܵܐ ܒܚܘܼܒܼܝܵܐ؛ 20ܘܬܲܥܠܡܵܢܵܐ ܕܣܲܟܼܠܹ̈ܐ؛ ܘܡܲܠܦܵܢܵܐ ܕܝܲܠܘܼܕܹ̈ܐ؛ ܘܐܝܼܬ ܠܘܼܟܼ ܐܸܣܟܹܝܡܵܐ ܕܝܕܹܥܬܵܐ ܘܕܣܲܪܲܣܬܘܼܬܵܐ ܒܢܵܡܘܿܣܵܐ؛ 21ܐܲܢܬ ܗܲܕܟܼܵܐ ܕܡܵܠܘܿܦܹܐ ܝܘܸܬ ܠܐَܚܹܪَ̈ܢܹܐ؛ ܠܓܵܢܘܼܟܼ ܠܹܐ ܝܘܸܬ ܡܵܠܘܿܦܹܐ؛ ܐܲܢَܬ ܕܡܲܟܪܘܼܙܹܐ ܝܘܸܬ ܕܠܵܐ ܓܵܢܒܼܝܼ؛ ܒܸܓܢܵܒܼܵܐ ܝܘܸܬ؛ 22ܐܲܢَܬ ܕܒܹܐܡܵܪܵܐ ܝܘܸܬ ܕܠܵܐ ܥܵܒܼܕܝܼ ܩܲܗܒܘܼܬܵܐ؛ ܒܸܥܒܼܵܕܵܐ ܝܘܸܬ ܩܲܗܒܘܼܬܵܐ؛ ܐܲܢَܬ ܕܡܲܣܠܘܼܝܹܐ ܝܘܸܬ ܨܵܢܲܡܹ̈ܐ؛ ܫܵܠܘܿܚܹܐ ܝܘܸܬ ܡܲܩܕܫܹ̈ܐ؛ 23ܐܲܢَܬ ܕܒܸܥܒܼܵܕܵܐ ܝܘܸܬ ܫܘܼܒܼܗܵܪܵܐ ܒܢܵܡܘܿܣܵܐ؛ ܒܝܲܕ ܥܒܼܵܪܬܘܼܟ ܥܲܠ ܢܵܡܘܿܣܵܐ ܠܐܲܠܵܗܵܐ ܡܲܒܨܘܼܪܹܐ ܝܘܸܬ؛ 24ܣܵܒܵܒ ܫܸܡܹܗ ܕܐܲܠܵܗܵܐ ܒܘܼܬ ܕܝܼܵܘܟܼܘܿܢ ܟܹܐ ܦܵܝܸܫ ܓܕܝܼܦܵܐ ܓܵܘ ܛܵܝܸܦܹ̈ܐ؛ ܐܲܝܟܼ ܕܝܼܠܹܗ ܟܬܝܼܒܼܵܐ. 25ܣܵܒܵܒ ܓܙܘܼܪܬܵܐ ܟܹܐ ܥܵܒܼܕܵܐ ܦܲܝܕܵܐ ܐܸܢ ܢܵܡܘܿܣܵܐ ܬܲܡܸܡܸܬ. ܐܝܼܢܵܐ ܐܸܢ ܥܵܒܼܪܸܬ ܥܲܠ ܢܵܡܘܿܣܵܐ؛ ܓܙܘܼܪܬܘܼܟ ܗَܘܹܐ ܠܵܗ̇ ܥܘܼܪܠܘܼܬܵܐ. 26ܐܝܼܢܵܐ ܐܸܢ ܥܘܼܪܠܘܼܬܵܐ ܢܵܛܪܵܐ ܦܘܼܩܕܵܢܹܗ ܕܢܵܡܘܿܣܵܐ؛ ܗܵܐ ܥܘܼܪܠܘܼܬܵܐ ܠܹܐ ܦܵܝܫܵܐ ܚܘܼܫܒܸܢܬܵܐ ܠܓܙܘܼܪܬܵܐ؛ 27ܘܥܘܼܪܠܘܼܬܵܐ ܕܡ̣ܢ ܐܲܨܠܵܗܿ؛ ܐܸܢ ܬܲܡܸܡܵܐ ܢܵܡܘܿܣܵܐ؛ ܠܹܐ ܕܵܝܢܵܐ ܐܸܠܘܼܟܼ؛ ܕܒܟܬܵܒܼܵܐ ܘܒܓܙܘܼܪܬܵܐ ܒܸܥܒܼܵܪܵܐ ܝܘܸܬ ܥܲܠ ܢܵܡܘܿܣܵܐ؛ 28ܣܵܒܵܒ ܠܹܐ ܝܠܹܗ ܡ̇ܢ ܕܒܲܪܵܐܝܼܬ ܗ̇ܘ ܝܠܹܗ ܝܗَܘܼܕܵܝܵܐ؛ ܐܘܼܦ ܠܵܐ ܗ̇ܝ ܕܝܼܠܵܗ̇ ܒܲܪܵܐܝܼܬ ܒܒܸܣܪܵܐ ܓܙܘܼܪܬܵܐ. 29ܐܸܠܵܐ ܗ̇ܘ ܝܼܠܹܗ ܝܗَܘܼܕܵܝܵܐ ܗ̇ܘ ܕܓܵܘܵܐܝܼܬ ܝܼܠܹܗ؛ ܘܓܙܘܼܪܬܵܐ ܗ̇ܝ ܕܠܸܒܵܐ ܝَܠܵܗ̇؛ ܒܪܘܼܚܵܐ ܘܠܵܐ ܒܟܬܵܒܼܵܐ؛ ܗ̇ܝ ܕܚܸܩܪܘܼܗܿ ܠܹܐ ܝܠܹܗ ܡ̣ܢ ܒܢܲܝ̈ܢܵܫܵܐ؛ ܐܸܠܵܐ ܡ̣ܢ ܐܲܠܵܗܵܐ.