1ܒܲܣ ܟܲܕ ܦܸܫܠܲܢ ܡܘܼܟܫܸܛܹܐ ܒܗܲܝܡܵܢܘܼܬܵܐ؛ ܗܵܘܹܐ ܠܲܢ ܫܠܵܡܵܐ ܠܟܸܣ ܐܲܠܵܗܵܐ؛ ܒܡܵܪܲܢ ܝܼܫܘܿܥ ܡܫܝܼܚܵܐ؛ 2ܕܐܘܼܦ ܒܝܹܗ ܐܝܼܬ ܠܲܢ ܩܲܪܒܲܢܬܵܐ ܒܗܲܝܡܵܢܘܼܬܵܐ ܠܐܵܗܵܐ ܫܵܦܵܩܵܬ ܕܒܝܼܵܗܿ ܒܸܟܠܵܝܵܐ ܝܘܵܚ؛ ܘܒܸܥܒܼܵܕܵܐ ܝܘܵܚ ܫܘܼܒܼܗܵܪܵܐ ܒܗܹܒܼܝܼ ܕܬܸܫܒܘܿܚܬܹܗ ܕܐܲܠܵܗܵܐ. 3ܘܠܵܐ ܗܲܕܟܼܵܐ ܐܲܚܟ̰ܝܼ؛ ܐܸܠܵܐ ܐܘܼܦ ܕܒܐܘܼܠܨܵܢܲܢ ܒܸܥܒܼܵܕܵܐ ܝܘܵܚ ܫܘܼܒܼܗܵܪܵܐ؛ ܕܒܝܼܕܲܥܝܵܐ ܝܘܵܚ ܕܐܘܼܠܨܵܢܵܐ ܒܸܦܠܵܚܵܐ ܝܠܹܗ ܚܡܵܠܬܵܐ ܒܝܲܢ؛ 4ܘܚܡܵܠܬܵܐ ܨܲܪܲܦܬܵܐ؛ ܘܨܲܪܦܬܵܐ ܗܹܒܼܝܼ؛ 5ܘܗܹܒܼܝܼ ܠܹܐ ܡܲܢܚܸܦܵܐ؛ ܣܵܒܵܒ ܚܘܼܒܹܗ ܕܐܲܠܵܗܵܐ ܡܘܼܫܦܸܟܼܵܐ ܝܠܹܗ ܥܲܠ ܠܸܒܵܘܵܬܲ̈ܢ ܒܪܘܼܚܵܐ ܕܩܘܼܕܫܵܐ ܕܦܸܫܠܹܗ ܝܘܼܗَܒܼܸܠܬܵܐ ܐܸܠܲܢ. 6ܣܵܒܵܒ ܟܲܕ ܙܲܒܘܼܢܹ̈ܐ ܝܘܵܚ ܗَܘܵܘ؛ ܡܫܝܼܚܵܐ ܒܙܲܒܼܢܵܐ ܡܒܵܕܵܠ ܕܒܝܼܫܹ̈ܐ ܡܝܼܬܠܹܗ؛ 7ܣܵܒܵܒ ܕܒܚܲܝܠܵܐ ܐَܢܵܫܵܐ ܡܒܵܕܵܠ ܕܐَܢܵܫܵܐ ܟܹܐܢܵܐ ܒܸܬ ܡܵܝܸܬ؛ ܣܵܒܵܒ ܡܒܵܕܵܠ ܕܐَܢܵܫܵܐ ܛܵܒܼܵܐ ܒܲܠܟܵܐ ܩܲܫܕܸܪ ܐَܢܵܫܵܐ ܠܸܡܝܵܬܵܐ. 8ܐܝܼܢܵܐ ܡܲܕܘܼܥܝܹܐ ܝܠܹܗ ܐܲܠܵܗܵܐ ܚܘܼܒܹܗ ܕܠܟܸܣܠܲܢ؛ ܕܟܲܕ ܚܲܛܵܝܹ̈ܐ ܝܘܵܚ ܗَܘܵܘ ܡܫܝܼܚܵܐ ܡܒܵܕܵܠ ܕܝܲܢ ܡܝܼܬܠܹܗ. 9ܒܲܣ ܟܡܵܐ ܙܵܘܕܵܐ؛ ܟܲܕ ܐܵܕܝܼܵܐ ܦܸܫܠܲܢ ܡܘܼܟܫܸܛܹܐ ܒܕܸܡܹܗ؛ ܒܝܹܗ ܒܸܬ ܦܵܝܫܵܚ ܦܘܼܨܝܹܐ ܡ̣ܢ ܟܲܪܒܵܐ؛ 10ܣܵܒܵܒ ܐܸܢ ܟܲܕ ܕܫܸܡܸܢܹ̈ܐ ܝܘܵܚ ܗَܘܵܘ؛ ܦܸܫܠܲܢ ܣܘܼܙܓܸܪܹܐ ܥܲܡ ܐܲܠܵܗܵܐ؛ ܒܝܲܕ ܡܵܘܬܵܐ ܕܒܪܘܼܢܹܗ؛ ܟܡܵܐ ܙܵܘܕܵܐ ܟܲܕ ܗَܘܹܠܲܢ ܣܘܼܙܓܸܪܹܐ ܒܸܬ ܦܵܝܫܵܚ ܦܘܼܪܩܹܐ ܒܚܲܝܘܼ̈ܗܝ؛ 11ܘܠܵܐ ܗܲܕܟܼܵܐ ܐܲܚܟ̰ܝܼ؛ ܐܸܠܵܐ ܐܘܼܦ ܒܸܥܒܼܵܕܵܐ ܝܘܵܚ ܫܘܼܒܼܗܵܪܵܐ ܒܐܲܠܵܗܵܐ ܒܝܲܕ ܡܵܪܲܢ ܝܼܫܘܿܥ ܡܫܝܼܚܵܐ؛ ܕܒܝܲܕ ܕܗ̇ܘ ܐܵܕܝܼܵܐ ܩܘܼܒܸܠܲܢ ܣܲܙܓܲܪܬܵܐ. 12ܣܵܒܵܒ ܕܐܵܗܵܐ؛ ܕܵܐܟܼܝܼ ܕܒܝܲܕ ܚܲܕَ ܒܲܪܢܵܫܵܐ ܥܒܼܸܪܵܗ̇ ܚܛܝܼܬܵܐ ܓܵܘ ܥܲܠܡܵܐ؛ ܘܒܝܲܕ ܚܛܝܼܬܵܐ ܡܵܘܬܵܐ؛ ܘܗܲܕܟܼܵܐ ܒܟܠܵܝܗܝ ܒܢܲܝ̈ܢܵܫܵܐ ܥܒܸܼܸܪܹܗ ܡܵܘܬܵܐ؛ ܒܗ̇ܝ ܕܟܠܵܝܗܝ ܚܛܹܐܠܘܿܢ؛ 13ܣܵܒܵܒ ܕܗܲܠ ܢܵܡܘܿܣܵܐ ܚܛܝܼܬܵܐ ܓܵܘ ܥܵܠܡܵܐ ܗَܘܵܐ؛ ܐܝܼܢܵܐ ܠܹܐ ܝَܠܵܗ̇ ܚܘܼܫܒܸܢܬܵܐ ܚܛܝܼܬܵܐ؛ ܟܲܕ ܠܲܝܬ ܢܵܡܘܿܣܵܐ. 14ܐܸܠܵܐ ܗܘܼܟܸܡܠܹܗ ܡܵܘܬܵܐ ܡ̣ܢ ܐܵܕܵܡ ܗܲܠ ܡܘܼܫܹܐ؛ ܐܘܼܦ ܥܲܠ ܕܐܵܢܝܼ ܕܠܵܐ ܚܛܹܐܠܘܿܢ ܒܕܡܘܼܬܵܐ ܕܥܒܼܵܪܬܵܐ ܕܐܵܕܵܡ؛ ܗ̇ܘ ܕܝܼܠܹܗ ܕܘܼܡܝܵܐ ܕܗ̇ܘ ܕܒܸܬ ܐܵܬܸܐ ܗَܘܵܐ. 15ܐܸܠܵܐ ܠܹܐ ܝَܠܵܗ̇ ܐܲܝܟܼ ܓܢܵܗܵܐ ܗܲܕܟܼܵܐ ܚܲܠܥܲܬ. ܣܵܒܵܒ ܐܸܢ ܒܓ̰ܪܵܛܬܹܗ ܕܚܲܕَ ܪܵܒܵܐ ܡܝܼܬܠܘܿܢ؛ ܟܡܵܐ ܙܵܘܕܵܐ ܫܵܦܵܩܲܬܹܗ ܕܐܲܠܵܗܵܐ؛ ܘܚܲܠܥܲܬܹܗ ܒܫܵܦܵܩܲܬ ܕܚܲܕَ ܐَܢܵܫܵܐ؛ ܝܼܫܘܿܥ ܡܫܝܼܚܵܐ؛ ܙܸܕܠܵܗ ܠܪܵܒܵܐ. 16ܘܠܵܐ ܐܲܝܟܼ ܒܝܲܕ ܚܲܕَ ܕܚܛܹܐܠܹܗ؛ ܗܲܕܟܼܵܐ ܚܲܠܥܲܬ. ܣܵܒܵܒ ܕܝܪܘܵܢ ܗَܘܹܐܠܵܗ̇ ܡ̣ܢ ܚܲܕَ؛ ܠܓܘܼܢܵܗܟܵܪܘܼܬܵܐ؛ ܐܝܼܢܵܐ ܚܲܠܥܲܬ ܡ̣ܢ ܪܵܒܵܐ ܓܢܵܗܹ̈ܐ ܗَܘܹܐܠܵܗ̇ ܠܡܲܟܫܲܛܬܵܐ. 17ܣܵܒܵܒ ܐܸܢ ܒܝܲܕ ܓܢܵܗܵܐ ܕܚܲܕَ؛ ܗܘܼܟܸܡܠܹܗ ܡܵܘܬܵܐ ܒܝܲܕ ܚܲܕَ ܒܘܼܫ ܙܵܘܕܵܐ ܐܵܢܝܼ ܕܫܩܸܠܘܿܢ ܒܘܼܫܵܝܝܼ ܕܫܵܦܵܩܲܬ ܘܕܚܲܠܥܲܬ ܕܙܲܕܝܼܩܘܼܬܵܐ؛ ܒܚܲܝܹ̈ܐ ܒܸܬ ܗܵܟܡܝܼ ܒܝܲܕ ܚܲܕَ؛ ܝܼܫܘܿܥ ܡܫܝܼܚܵܐ. 18ܒܲܣ ܕܵܐܟܼܝܼ ܕܒܝܲܕ ܚܕܵܐ ܓܢܵܗܵܐ ܗَܘܹܐܠܵܗ̇ ܓܘܼܢܵܗܟܵܪܘܼܬܵܐ ܠܟܠܵܝܗܝ ܒܢܲܝ̈ܢܵܫܵܐ؛ ܗܲܕܟܼܵܐ ܒܝܲܕ ܚܕܵܐ ܙܲܕܝܼܩܘܼܬܵܐ ܒܸܬ ܗܵܘܝܵܐ ܡܲܟܫܲܛܬܵܐ ܠܚܲܝܹ̈ܐ ܠܟܠܵܝܗܝ ܒܢܲܝ̈ܢܵܫܵܐ. 19ܣܵܒܵܒ ܕܵܐܟܼܝܼ ܕܒܝܲܕ ܠܵܐ ܡܲܨܝܲܬܬܹܗ ܕܚܲܕَ ܒܲܪܢܵܫܵܐ ܪܵܒܵܐ ܗَܘܹܐܠܗَܘܿܢ ܚܲܛܵܝܹ̈ܐ؛ ܗܲܕܟܼܵܐ ܐܘܼܦ ܒܝܲܕ ܡܲܨܝܲܬܬܹܗ ܕܚܲܕَ ܪܵܒܵܐ ܒܸܬ ܗܵܘܝܼ ܙܲܕܝܼܩܹ̈ܐ. 20ܘܢܵܡܘܿܣܵܐ ܥܒܼܸܪܹܗ؛ ܕܙܵܝܪܵܐ ܗَܘܵܐ ܓܢܵܗܵܐ؛ ܐܝܼܢܵܐ ܐܲܝܟܵܐ ܕܙܸܕܠܵܗ ܚܛܝܼܬܵܐ؛ ܬܵܡܵܐ ܙܸܕܠܵܗ ܒܘܼܫ ܪܵܒܵܐ ܫܵܦܵܩܲܬ؛ 21ܕܐܲܝܟܼ ܕܗܘܼܟܸܡܠܵܗ ܚܛܝܼܬܵܐ ܒܡܵܘܬܵܐ؛ ܗܲܕܟܼܵܐ ܗܵܟܡܵܐ ܫܵܦܵܩܲܬ ܒܝܲܕ ܙܲܕܝܸܩܘܼܬܵܐ ܠܚܲܝܹ̈ܐ ܕܠܐܵܒܲܕ؛ ܒܝܲܕ ܡܵܪܲܢ ܝܼܫܘܿܥ ܡܫܝܼܚܵܐ.