1ܒܲܣ ܡܘܼܕܝܼ ܐܵܡܪܵܚ ܥܲܪܩܸܠܵܚ ܒܚܛܝܼܬܵܐ ܕܫܵܦܵܩܲܬ ܙܵܝܕܵܐ؛ 2ܚܵܣ ܠܲܢ. ܐܲܚܢܲܢ ܕܡܝܼܬܠܲܢ ܠܚܛܝܼܬܵܐ؛ ܕܵܐܟܼܝܼ ܐَܚܹܪَܢܵܐ ܚܲܝܵܚ ܒܝܼܵܗܿ؛ 3ܝܲܢ ܠܹܐ ܝܬܘܿܢ ܒܝܼܕܲܥܝܵܐ ܕܟܠܲܢ ܕܥܡܸܕܠܲܢ ܒܝܼܫܘܿܥ ܡܫܝܼܚܵܐ؛ ܒܡܵܘܬܹܗ ܥܡܸܕܠܲܢ؛ 4ܦܸܫܠܲܢ ܩܒܼܝܼܪܹܐ ܗܲܕܟܼܵܐ ܥܲܡܹܗ ܒܝܲܕ ܡܲܥܡܘܿܕܝܼܬܵܐ ܠܡܵܘܬܵܐ؛ ܕܕܵܐܟܼܝܼ ܕܩܸܡܠܹܗ ܡܫܝܼܚܵܐ ܡ̣ܢ ܡܝܼܬܹ̈ܐ ܒܬܸܫܒܘܿܬܵܐ ܕܒܵܒܹܗ؛ ܗܲܕܟܼܵܐ ܐܘܼܦ ܐܲܚܢܲܢ ܒܚܲܝܹ̈ܐ ܚܵܕَܬܹ̈ܐ ܚܵܕܪܵܚ. 5ܣܵܒܵܒ ܐܸܢ ܦܸܫܠܲܢ ܙܘܼܘܸܓܹܐ ܥܲܡܹܐ؛ ܒܕܡܘܼܬܵܐ ܕܡܵܘܬܹܗ؛ ܗܲܕܟܼܵܐ ܒܸܬ ܗܵܘܵܚ ܐܘܼܦ (ܒܕܡܘܼܬܵܐ) ܕܩܝܵܡܬܹܗ؛ 6ܟܲܕ ܒܝܼܕܲܥܝܵܐ ܝܘܵܚ؛ ܕܒܲܪܢܵܫܲܢ ܥܲܬܝܼܩܵܐ ܦܸܫܠܹܗ ܙܩܝܼܦܵܐ ܥܲܡܹܗ؛ ܕܦܵܝܸܫ ܗَܘܵܐ ܒܛܝܼܠܵܐ ܦܲܓܼܪܵܐ ܕܚܛܝܼܬܵܐ؛ ܕܐَܚܹܪَܢܵܐ ܠܵܐ ܥܵܒܼܕܵܚ ܩܘܼܠܘܼܬܵܐ ܠܚܛܝܼܬܵܐ؛ 7ܣܵܒܵܒ ܗ̇ܘ ܕܡܝܼܬܠܹܗ؛ ܗَܘܹܐ ܠܹܗ ܐܵܙܵܕ ܡ̣ܢ ܚܛܝܼܬܵܐ. 8ܐܝܼܢܵܐ ܐܸܢ ܡܝܼܬܠܲܢ ܥܲܡ ܡܫܝܼܚܵܐ؛ ܗܲܡܘܼܢܹܐ ܝܘܵܚ ܕܐܘܼܦ ܥܲܡܹܗ ܒܸܬ ܚܲܝܵܚ؛ 9ܣܵܒܵܒ ܒܝܼܕܥܝܵܐ ܝܘܵܚ ܕܡܫܝܼܚܵܐ ܩܸܡܠܹܗ ܡ̣ܢ ܡܝܼܬܹ̈ܐ؛ ܘܡܸܢَܕܪܸܫَ ܠܹܐ ܡܵܝܸܬ؛ ܘܡܵܘܬܵܐ ܡܸܢَܕܪܸܫَ ܠܹܐ ܗܵܟܸܡ ܒܝܹܗ. 10ܣܵܒܵܒ ܒܗ̇ܝ ܕܡܝܼܬܠܹܗ؛ ܠܚܛܝܼܬܵܐ ܡܝܼܬܠܹܗ ܚܕܵܐ ܓܵܗܵܐ. ܘܒܗ̇ܝ ܕܚܵܝܵܐ ܝܠܹܗ ܠܐܲܠܵܗܵܐ. 11ܗܲܕܟܼܵܐ ܐܘܼܦ ܐܲܚܬܘܿܢ ܚܫܘܿܒܼܘܿܢ ܓܵܢܵܘܟܼܘܿܢ ܕܡܝܼܬܹ̈ܐ ܝܬܘܿܢ ܠܚܛܝܼܬܵܐ؛ ܐܝܼܢܵܐ ܚܵܝܹ̈ܐ ܠܐܲܠܵܗܵܐ ܒܡܵܪܲܢ ܝܼܫܘܿܥ ܡܫܝܼܚܵܐ. 12ܒܲܣ ܠܵܐ ܗܲܟܡܵܐ ܚܛܝܼܬܵܐ ܒܦܲܓܼܪܵܘܟܼܘܿܢ ܡܝܼܬܵܐ؛ ܕܡܲܨܝܸܬܝܼܬܘܿܢ ܐܸܠܵܗܿ ܠܫܲܗَܘܲܬܝܵܬܹ̈ܗ؛ 13ܘܐܘܼܦ ܠܵܐ ܗܵܕܪܝܼܬܘܿܢ ܗܲܕܵܡܵܘ̈ܟܼܘܿܢ ܐܲܣܒܵܒܹ̈ܐ ܕܥܵܘܠܵܐ ܠܚܛܝܼܬܵܐ؛ ܐܸܠܵܐ ܗܵܕܪܘܿܢ ܓܵܢܵܘܟܼܘܿܢ ܠܐܲܠܵܗܵܐ؛ ܐܲܝܟܼ ܐَܢܵܫܹ̈ܐ ܕܡ̣ܢ ܡܝܼܬܹ̈ܐ ܚܹܝܠܵܘܟܼܘܿܢ؛ ܘܗܲܕܵܡܵܘ̈ܟܼܘܿܢ ܐܲܣܒܵܒܹ̈ܐ ܕܙܲܕܝܼܩܘܼܬܵܐ ܠܐܲܠܵܗܵܐ. 14ܣܵܒܵܒ ܚܛܝܼܬܵܐ ܠܹܐ ܗܲܟܡܵܐ ܥܲܠܵܘܟܼܘܿܢ؛ ܣܵܒܵܒ ܠܹܐ ܝܬܘܿܢ ܬܚܘܿܬ ܢܵܡܘܿܣܵܐ؛ ܐܸܠܵܐ ܬܚܘܿܬ ܫܵܦܵܩܲܬ. 15ܒܲܣ ܡܘܼܕܝܼ؛ ܚܵܛܲܚ ܣܵܒܵܒ ܕܠܹܐ ܝܘܵܚ ܬܚܘܿܬ ܢܵܡܘܿܣܵܐ ܐܸܠܵܐ ܬܚܘܿܬ ܫܵܦܵܩܲܬ؛ ܚܵܣ ܠܲܢ. 16ܠܹܐ ܝܬܘܿܢ ܒܝܼܕܲܥܝܵܐ ܕܠܗ̇ܘ ܕܗܵܕܪܝܼܬܘܿܢ ܓܵܢܵܘܟܼܘܿܢ ܪܹ̈ܓܵܘܵܬܹܐ ܠܡܲܨܝܲܬܬܵܐ؛ ܪܹ̈ܓܵܘܵܬܹܐ ܕܗ̇ܘ ܝܼܬܘܿܢ ܕܡܲܨܝܘܼܬܹܐ ܝܬܘܿܢ ܐܸܠܹܗ؛ ܝܲܢ ܕܚܛܝܼܬܵܐ ܠܡܵܘܬܵܐ؛ ܝܲܢ ܕܡܲܨܝܲܬܬܵܐ ܠܙܲܕܝܼܩܘܼܬܵܐ؛ 17ܐܝܼܢܵܐ ܡܸܢܬܵܐ ܡ̣ܢ ܐܲܠܵܗܵܐ؛ ܕܟܲܕ ܪܹ̈ܓܵܘܵܬܹܐ ܕܚܛܝܼܬܵܐ ܝܬܘܿܢ ܗَܘܵܘ؛ ܡܘܼܨܝܸܬܠܵܘܟܼܘܿܢ ܡ̣ܢ ܠܸܒܵܐ ܠܗ̇ܘ ܐܸܣܟܹܝܡܵܐ ܕܝܘܼܠܦܵܢܵܐ ܕܦܸܫܠܵܘܟܼܘܿܢ ܣܘܼܦܝܹܐ ܒܝܹܗ. 18ܘܟܲܕ ܦܸܫܠܵܘܟܼܘܿܢ ܥܒܼܝܼܕܹܐ ܐܵܙܵܕ ܡ̣ܢ ܚܛܝܼܬܵܐ؛ ܗَܘܹܐܠܵܘܟܼܘܿܢ ܪܹ̈ܓܵܘܵܬܹܐ ܠܙܲܕܝܼܩܘܼܬܵܐ. 19ܐܲܝܟܼ ܕܓܵܘ ܒܢܲܝ̈ܢܵܫܵܐ ܒܹܐܡܵܪܵܐ ܝܘܸܢ؛ ܣܵܒܵܒ ܕܙܲܒܘܼܢܘܼܬܵܐ ܕܒܸܣܪܵܘܟܼܘܿܢ؛ ܕܕܵܐܟܼܝܼ ܕܗܘܼܕܸܪܵܘܟܼܘܿܢ ܗܲܕܵܡܵܘ̈ܟܼܘܿܢ ܪܹ̈ܓܵܘܵܬܹܐ ܠܛܲܢܦܘܼܬܵܐ ܘܠܥܵܘܠܵܐ ܩܵܐ ܥܵܘܠܵܐ؛ ܗܲܕܟܼܵܐ ܐܘܼܦ ܐܵܕܝܼܵܐ ܗܵܕܪܘܿܢ ܗܲܕܵܡܵܘ̈ܟܼܘܿܢ ܪܹ̈ܓܵܘܵܬܹܐ ܕܙܲܕܝܼܩܘܼܬܵܐ ܩܵܐ ܩܲܕܝܼܫܘܼܬܵܐ. 20ܣܵܒܵܒ ܟܲܕ ܪܹ̈ܓܵܘܵܬܹܐ ܕܚܛܝܼܬܵܐ ܝܬܘܿܢ ܗَܘܵܘ؛ ܐܵܙܵܕܹ̈ܐ ܝܬܘܿܢ ܗَܘܵܘ ܡ̣ܢ ܙܲܕܝܼܩܘܼܬܵܐ. 21ܘܡܘܼܕܝܼ ܛܥܘܼܢܬܵܐ ܐܝܼܬ ܗَܘܵܐ ܠܵܘܟܼܘܿܢ ܗܿܝܓܵܗ ܒܐܲܢܹܐ ܕܐܵܕܝܼܵܐ ܒܸܢܚܵܦܵܐ ܝܬܘܿܢ ܒܝܼܝܵܗܝ؛ ܣܵܒܵܒ ܚܲܪܬܵܝܗܝ ܡܵܘܬܵܐ ܝَܠܵܗ̇. 22ܐܝܼܢܵܐ ܐܲܕܝܼܵܐ ܕܦܸܫܠܵܘܟܼܘܿܢ ܥܒܼܝܕܹܐ ܐܵܙܵܕ ܡ̣ܢ ܚܛܝܼܬܵܐ؛ ܘܗَܘܹܐܠܵܘܟܼܘܿܢ ܪܹ̈ܓܵܘܵܬܹܐ ܠܐܲܠܵܗܵܐ؛ ܐܝܼܬ ܠܵܘܟܼܘܿܢ ܛܥܘܼܢܬܵܐ ܠܩܲܕܝܼܫܘܼܬܵܐ؛ ܘܚܲܪܬܵܐ ܚܲܝܹ̈ܐ ܕܠܐܵܒܲܕ. 23ܣܵܒܵܒ ܗܵܩܵܐ ܕܚܛܝܼܬܵܐ ܡܵܘܬܵܐ ܝܠܹܗ؛ ܐܝܼܢܵܐ ܚܲܠܥܲܬܹܗ ܕܐܲܠܵܗܵܐ ܚܲܝܹ̈ܐ ܕܠܐܵܒܲܕ ܒܡܵܪܲܢ ܝܼܫܘܿܥ ܡܫܝܼܚܵܐ.