1ܐܵܕܝܼܵܐ ܐܘܼܦ (ܕܝܵܬܹܩܹܐ) ܩܵܕ݇ܡܵܝܬܵܐ ܐܝܼܬ ܠܵܗ̇ ܦܘܼܩܕܵܢܹ̈ܐ ܕܚܸܠܡܲܬ؛ ܘܒܹܝܬ ܩܘܼܕܫܵܐ ܥܵܠܡܵܝܵܐ. 2ܣܵܒܵܒ ܡܵܫܸܟܢܵܐ ܦܸܫܠܹܗ ܬܘܼܨܪܵܐ؛ ܗ̇ܘ ܩܵܕ݇ܡܵܝܵܐ؛ ܕܐܝܼܬ ܗ݇ܘܵܐ ܓܵܘܹܐ ܩܲܢܕܝܼܠܵܐ؛ ܘܦܵܬܘܿܪܵܐ؛ ܘܠܚܸܡ ܐܲܦܹ̈ܐ؛ ܘܟܹܐ ܦܵܝܸܫ ܗ݇ܘܵܐ ܩܸܪܝܵܐ؛ ܒܹܝܬ ܩܘܼܕܫܵܐ. 3ܘܡ̣ܢ ܒܵܬ݇ܪ ܣܸܬܪܵܐ ܕܬܪܹܝ؛ ܡܵܫܸܟܢܵܐ ܕܟܹܐ ܦܵܝܸܫ ܗ݇ܘܵܐ ܩܸܪܝܵܐ؛ ܩܕܘܿܫ ܩܘܼܕܫܹ̈ܐ. 4ܘܐܝܼܬ ܗ݇ܘܵܐ ܒܝܼܹܗ ܦܝܼܪܡܵܐ ܕܕܲܗܒܼܵܐ؛ ܘܩܹܒܼܘܼܬܵܐ ܕܕܝܵܬܹܩܹܐ ܕܩܪܝܼܡܬܵܐ ܟܠܵܗ̇ ܒܕܲܗܒܼܵܐ؛ ܕܐܝܼܬ ܗ݇ܘܵܐ ܓܵܘܵܗ̇ ܡܵܐܢܵܐ ܕܕܲܗܒܼܵܐ؛ ܗ̇ܘ ܕܐܝܼܬ ܗ݇ܘܵܐ ܓܵܘܹܗ ܡܲܢܢܵܐ؛ ܘܩܵܛܝܼܵܐ ܕܐܲܗܪܘܿܢ ܗ̇ܘ ܕܦܩܸܚܠܹܐ؛ ܘܠܘܼܚܹ̈ܐ ܕܕܝܵܬܹܩܹܐ؛ 5ܘܥܸܠܸܠ ܡܸܢܵܗ̇ ܟܪ̈ܘܿܒܹܐ ܕܚܸܩܪܵܐ ܕܒܸܥܒܼܵܕܵܐ ܛܸܠܵܢܝܼܬܵܐ ܥܲܠ ܚܘܼܣܵܝܵܐ؛ ܕܐܵܕܝܼܵܐ ܠܹܐ ܝܠܹܗ ܙܲܒܼܢܵܐ ܕܐܵܡܪܵܚ ܥܲܠ ܟܠ ܚܕܵܐ ܡܸܢܵܝܗܝ. 6ܟܲܕ ܐܲܢܹܐ ܗܲܕܟܼܵܐ ܬܘܼܪܨܹܐ ܗ݇ܘܵܘ؛ ܓܵܘ ܡܵܫܸܟܢܵܐ ܩܵܕ݇ܡܵܝܵܐ ܒܟܠ ܙܲܒܼܢܵܐ ܟܹܐ ܐܵܘܪܝܼ ܗ݇ܘܵܘ ܟܵܗܢܹ̈ܐ؛ ܘܬܲܡܸܡܝܼ ܗ݇ܘܵܘ ܚܸܠܡܲܬܵܝ؛ 7ܐܝܼܢܵܐ ܓܵܘ ܡܵܫܸܟܢܵܐ ܕܬܪܹܝ؛ ܚܕܵܐ ܓܵܗܵܐ ܒܫܹܢ݇ܬܵܐ ܟܹܐ ܐܵܘܸܪ ܗ݇ܘܵܐ ܓܘܼܪܵܐ ܕܟܵܗܢܹ̈ܐ ܒܢܲܦ̮ܫܹܗ؛ ܠܵܐ ܕܠܵܐ ܕܸܡܵܐ؛ ܗ̇ܘ ܕܡܲܩܪܸܒܼ ܗ݇ܘܵܐ ܡܒܵܕܵܠ ܕܓܵܢܹܗ ܘܕܚܸܠܛܘܼܢܝܘܼܝܵܬܹ̈ܐ ܕܛܵܝܸܦܵܐ. 8ܐܝܼܢܵܐ ܐܵܗܵܐ ܟܹܐ ܡܲܕܥܝܵܐ ܗ݇ܘܵܐ ܪܘܼܚܵܐ ܕܩܘܼܕܫܵܐ؛ ܕܗܹܫ ܠܵܐ ܦܸܫܠܵܗ̇ ܓܠܝܼܬܵܐ ܐܘܼܪܚܵܐ ܕܒܹܝܬ ܩܘܼܕܫܹ̈ܐ ܟܡܵܐ ܙܲܒܼܢܵܐ ܕܒܸܟܠܵܝܵܐ ܗ݇ܘܵܐ ܡܵܫܸܟܢܵܐ ܩܵܕ݇ܡܵܝܵܐ. 9ܘܐܵܗܵܐ ܛܘܼܦ̮ܣܵܐ ܗ݇ܘܵܐ ܕܙܲܒܼܢܵܐ ܕܩܵܐܹܡ؛ ܕܒܝܼܹܗ ܩܘܼܪ̈ܒܵܢܹܐ ܘܕܸܒܼܚܹ̈ܐ ܟܹܐ ܦܵܝܫܝܼ ܡܘܼܩܪܸܒܹܐ؛ ܐܵܢܝܼ ܕܠܹܐ ܡܵܨܝܼ ܠܡܲܟܡܘܼܠܹܐ ܒܐܸܢܝܲܬܹܗ ܠܡܲܩܪܸܒܼܵܢܵܝܗܝ؛ 10ܐܲܚܟ̰ܝܼ ܒܡܹܐܟܼܘܼܠܝܵܬܹ̈ܐ (ܝܢܵܐ)؛ ܘܒܫܬܵܝܵܬܹ̈ܐ؛ ܘܒܡܲܥܡܘܿܕܝܵܬܹ̈ܐ ܕܬܵܗܵܪܹ̈ܐ ܬܵܗܵܪܹ̈ܐ؛ ܦܘܼܩܕܵܢܹ̈ܐ ܕܒܸܣܪܵܐ؛ ܕܡܘܼܬܒܹܐ ܝܢܵܐ ܗܲܠ ܙܲܒܼܢܵܐ ܕܬܘܼܪܵܨܵܐ. 11ܐܝܼܢܵܐ ܡܫܝܼܚܵܐ ܕܐَܬܹܐܠܹܗ ܓܘܼܪܵܐ ܕܟܵܗܢܹ̈ܐ ܕܛܵܒܼܵܬܹ̈ܐ ܕܗܕܝܼܪܹܐ ܗ݇ܘܵܘ؛ ܒܝܼܸܕ ܡܵܫܸܟܢܵܐ ܕܒܘܼܫ ܓܘܼܪܵܐ ܘܬܲܡܵܡ؛ ܠܵܐ ܬܘܼܪܨܵܐ ܒܐܝܼܕܵܬܹ̈ܐ؛ ܝܲܥܢܹܐ؛ ܠܹܐ ܗ݇ܘܵܐ ܕܐܵܗܵܐ ܒܪܝܼܬܵܐ؛ 12ܘܠܵܐ ܒܕܸܡܵܐ ܕܥܸܙܹ̈ܐ ܘܕܡܘܼ̈ܓ̰ܹܐ؛ ܐܸܠܵܐ ܒܕܸܡܵܐ ܕܓܵܢܹܗ؛ ܥܒܼܸܪܹܗ ܚܕܵܐ ܓܵܗܵܐ ܓܵܘ ܒܹܝܬ ܩܘܼܕܫܵܐ؛ ܘܡܘܼܫَܟ̰ܸܚܠܹܗ ܦܘܼܪܩܵܢܵܐ ܕܠܥܵܠܲܡ. 13ܣܵܒܵܒ ܐܸܢ ܕܸܡܵܐ ܕܥܸܙܹ̈ܐ ܘܕܡܘܼ̈ܓ̰ܹܐ؛ ܘܩܸܛܡܵܐ ܕܫܵܪܸܚܬܵܐ ܡܘܼܪܝܸܣܵܐ ܥܲܠ ܡܛܘܼܡܝܹ̈ܐ؛ ܩܵܕܸܫ ܗ݇ܘܵܐ ܠܗ݇ܘܿܢ ܠܕܵܟܼܵܝܬܵܐ ܕܒܸܣܪܵܝܗܝ؛ 14ܟܡܐܵ ܙܵܘܕܵܐ ܕܸܡܹܗ ܕܡܫܝܼܚܵܐ؛ ܕܒܪܘܼܚܵܐ ܕܠܥܵܠܲܡ ܡܘܼܩܪܸܒܼܠܹܗ ܓܵܢܹܗ ܕܠܵܐ ܡܘܼܡܵܐ ܠܐܲܠܵܗܵܐ؛ ܒܸܬ ܕܵܟܼܹܐ ܐܸܢܝܲܬܲܢ ܡ̣ܢ ܦܘܼܠܚܵܢܹ̈ܐ ܡܝܼܬܹ̈ܐ؛ ܕܥܵܒܼܕܵܚ ܚܸܠܡܲܬ ܠܐܲܠܵܗܵܐ ܚܲܝܵܐ؛ 15ܘܣܵܒܵܒ ܕܐܵܗܵܐ ܗ̇ܘ ܗ݇ܘܹܐ ܠܹܗ ܢܵܘܸܓ̰ܝܼ ܕܕܝܵܬܹܩܹܐ ܚܲܕܬܵܐ؛ ܕܟܲܕ ܡܵܘܬܵܐ ܗ݇ܘܹܐܠܹܗ ܠܦܘܼܚܵܠܵܐ ܕܐܵܢܝܼ ܓܢܵܗܹ̈ܐ ܕܥܲܠ ܕܝܵܬܹܩܹܐ ܩܵܕ݇ܡܵܝܬܵܐ؛ ܐܵܢܝܼ ܕܦܸܫܠܗَܘܿܢ ܩܸܪܝܹܐ ܫܵܩܠܝܼ ܗ݇ܘܵܘ ܠܩܵܘܠܵܐ ܕܝܵܪܬܘܼܬܵܐ ܕܠܥܵܠܲܡ. 16ܣܵܒܵܒ ܐܲܝܟܵܐ ܕܐܝܼܬ ܕܝܵܬܹܩܹܐ؛ ܡܵܘܬܵܐ ܕܗ̇ܘ ܕܥܒܼܝܼܕܵܠܹܗ ܡ̣ܢ ܐܲܢܲܢܩܹܐ ܦܝܵܫܵܐ ܝܠܹܗ ܡܘܼܕܸܥܝܵܐ. 17ܣܵܒܵܒ ܕܝܵܬܹܩܹܐ ܒܡܝܼܬܵܐ ܟܹܐ ܦܵܝܫܵܐ ܡܘܼܩܘܝܼܬܵܐ؛ ܣܵܒܵܒ ܟܡܵܐ ܕܚܵܝܵܐ ܝܠܹܗ ܗ̇ܘ ܕܥܒܼܝܼܕܵܠܹܐ؛ ܠܲܝܬ ܒܝܼܵܗ̇ ܚܲܝܠܵܐ. 18ܣܵܒܵܒ ܕܐܵܗܵܐ ܐܘܼܦ ܗ̇ܝ ܩܵܕ݇ܡܵܝܬܵܐ ܠܵܐ ܦܸܫܠܵܗ̇ ܡܘܼܩܸܡܬܵܐ ܕܠܵܐ ܕܸܡܵܐ. 19ܣܵܒܵܒ ܟܲܕ ܦܸܫܠܹܗ ܐَܡܝܼܪܵܐ ܟܠܹܗ ܦܘܼܩܕܵܢܵܐ ܡ̣ܢ ܡܘܼܫܹܐ ܠܟܠܹܗ ܛܵܝܸܦܵܐ ܐܲܝܟܼ ܢܵܡܘܿܣܵܐ؛ ܫܩܸܠܹܗ ܕܸܡܵܐ ܕܡܘܼ̈ܓ̰ܹܐ ܘܕܥܸܙܹ̈ܐ؛ ܥܲܡ ܡ̈ܝܼܵܐ ܘܥܲܡܪܵܐ ܕܩܸܪܡܝܼܙ ܘܙܘܿܦܵܐ؛ ܘܡܘܼܪܝܸܣܠܹܐ ܥܲܠ ܟܬܵܒܼܵܐ ܘܥܲܠ ܟܠܹܗ ܛܵܝܸܦܵܐ؛ 20ܘܐَܡܝܼܪܹܗ ܐܸܠܵܝܗܝ؛ ܐܵܗܵܐ ܝܠܹܗ ܕܸܡܵܐ ܕܕܝܵܬܹܩܹܐ؛ ܗ̇ܝ ܕܦܸܫܠܵܗ̇ ܦܩܝܼܕܬܵܐ ܐܸܠܵܘܟܼܘܿܢ ܡ̣ܢ ܐܲܠܵܗܵܐ. 21ܐܘܼܦ ܥܲܠ ܡܵܫܸܟܢܵܐ؛ ܘܥܲܠ ܟܠܵܝܗܝ ܡܵܐܢܹ̈ܐ ܕܚܸܠܡܲܬ؛ ܒܕܸܡܵܐ ܗܲܪ ܗܵܕܵܐ ܡܘܼܪܝܸܣܠܹܐ. 22ܘܚܲܕَܟ̰ܵܐ ܦܵܝܫܵܐ ܕܟܠ ܡܸܢܕܝܼ ܒܕܸܡܵܐ ܟܹܐ ܦܵܝܸܫ ܕܘܼܟܼܝܵܐ ܒܢܵܡܘܿܣܵܐ؛ ܘܕܠܵܐ ܫܦܵܟܼܬܵܐ ܕܕܸܡܵܐ ܠܲܝܬ ܫܒܼܵܩܵܐ. 23ܒܲܣ ܘܵܓ̰ܸܒ ܝܼܗ݇ܘܵܐ ܕܐܲܢܹܐ ܕܝܼܢܵܐ ܕܘܼܡܝܼܹ̈ܐ ܕܡܸܢܕܝܵܢܹ̈ܐ ܕܫܡܲܝܵܐ ܦܵܝܫܝܼ ܕܘܼܟܼܝܹܐ ܒܐܲܢܹܐ؛ ܐܝܼܢܵܐ ܐܲܢܹܐ ܫܡܲܝܵܢܵܝܹ̈ܐ ܒܕܸܒܼܚܹ̈ܐ ܕܒܘܼܫ ܨܦܵܝܝܼ ܡ̣ܢ ܕܐܲܢܹܐ. 24ܣܵܒܵܒ ܠܹܐ ܝَܠܵܗ̇ ܕܓܵܘ ܒܹܝܬ ܩܘܼܕܫܵܐ ܕܬܘܼܪܨܵܐ ܒܐܝܼܕܵܬܹ̈ܐ ܥܒܼܸܪܹܗ ܡܫܝܼܚܵܐ؛ ܕܝܼܠܹܗ ܛܘܼܦ̮ܣܵܐ ܕܗ̇ܘ ܫܲܪܝܼܪܵܐ؛ ܐܸܠܵܐ ܠܫܡܲܝܵܐ ܒܓܵܢܘܼܗ̇؛ ܕܐܵܕܝܼܵܐ ܦܵܝܸܫ ܗ݇ܘܵܐ ܚܸܙܝܵܐ ܩܵܕ݇ܡ ܦܵܬܹܗ ܕܐܲܠܵܗܵܐ ܡܒܵܕܵܠܲܢ. 25ܐܘܼܦ ܠܵܐ ܕܡܲܩܪܸܒܼ ܓܵܢܹܗ ܪܵܒܵܐ ܓܵܗܹ̈ܐ؛ ܐܲܝܟܼ ܕܓܘܼܪܵܐ ܕܟܵܗܢܹ̈ܐ ܟܹܐ ܐܵܘܸܪ ܒܟܠ ܫܹܢ݇ܬܵܐ ܠܒܹܝܬ ܩܘܼܕܫܵܐ ܒܕܸܡܵܐ ܠܵܐ ܕܓܵܢܹܗ. 26ܘܐܸܢ ܠܵܐ؛ ܘܵܓ̰ܸܒ ܝܼܗ݇ܘܵܐ ܕܪܵܒܵܐ ܓܵܗܹ̈ܐ ܩܵܒܸܠ ܗ݇ܘܵܐ ܚܲܫܵܐ ܡ̣ܢ ܒܸܢܝܲܬ ܕܥܵܠܡܵܐ؛ ܐܝܼܢܵܐ ܐܵܕܝܼܵܐ ܒܚܲܪܬܹܗ ܕܥܵܠܡܵܐ ܚܕܵܐ ܓܵܗܵܐ ܦܸܫܠܹܗ ܓܸܠܝܵܐ ܒܕܒܼܵܚܬܵܐ ܕܓܵܢܹܗ ܕܒܵܛܸܠ ܠܚܛܝܼܬܵܐ. 27ܘܕܵܐܟܼܝܼ ܕܡܘܼܬܒܼܵܐ ܝܠܹܗ ܠܒܲܢܝ̈ܢܵܫܵܐ ܕܚܕܵܐ ܓܵܗܹܐ ܡܵܝܬܝܼ؛ ܘܒܵܬ݇ܪ ܕܐܵܗܵܐ ܕܝܼܘܵܢ؛ 28ܗܲܕܟܼܵܐ ܐܘܼܦ ܡܫܝܼܚܵܐ ܚܕܵܐ ܓܵܗܹܐ ܦܸܫܠܹܗ ܡܘܼܩܪܸܒܼܵܐ ܕܛܵܥܸܢ ܚܛܝܼܵܬܹ̈ܐ ܕܪܵܒܵܐ؛ ܐܝܼܢܵܐ ܓܵܗܵܐ ܕܬܲܪ̈ܬܹܝ ܕܠܵܐ ܚܛܝܼܵܬܹ̈ܐ ܒܸܬ ܦܵܝܸܫ ܚܸܙܝܵܐ ܠܦܘܼܪܩܵܢܵܐ ܕܐܵܢܝܼ ܕܣܵܦܪܝܼ ܐܸܠܹܗ.