0:00
/
1ܠܵܐ ܦܵܐܹܫ ܫܓ̣ܝܼܫܵܐ ܠܸܒܵܘܟ̣ܘܿܢ. ܗܲܡܸܢܘܿܢ ܒܐܲܠܵܗܵܐ: ܘܒܝܼܝܼ ܗܲܡܸܢܘܿܢ. 2ܪܵܒܵܐ ܝܢܵܐ ܡܲܢܙܝܼܠܹ̈ܐ ܕܓܵܘ ܒܲܝܬܵܐ ܕܒܵܒܝܼ: ܐܸܢ ܠܵܐ: ܒܸܬ ܐܵܡܪܸܢ ܗ݇ܘܵܐ ܠܵܘܟ̣ܘܿܢ: ܣܵܒܵܒ ܕܒܹܐܙܵܠܵܐ ܝܘܸܢ ܕܗܵܕܪܸܢܵܘܟ̣ܘܿܢ ܕܘܼܟܵܐ. 3ܘܐܸܢ ܐܵܙܸܠَܢ ܘܗܵܕܪܸܢܵܘܟ̣ܘܿܢ ܕܘܼܟܵܐ: ܡܸܢَܕܪܸܫَ ܒܸܬ ܐܵܬܸܢ ܘܒܸܬ ܠܵܒܠܸܢܵܘܟ̣ܘܿܢ ܠܟܸܣܠܝܼ: ܕܐܲܝܟܵܐ ܕܐܵܢܵܐ ܝܘܸܢ: ܐܘܼܦ ܐܲܚܬܘܿܢ ܗܵܘܹܝܬܘܿܢ. 4ܘܠܲܐܝܟܵܐ ܕܒܹܐܙܵܠܵܐ ܝܘܸܢ: ܒܝܼܕܵܥܝܵܐ ܝܬܘܿܢ: ܘܐܘܼܪܚܵܐ ܒܝܼܕܵܥܝܵܐ ܝܬܘܿܢ. 5ܐܵܡܸܪ ܐܸܠܹܗ ܬܐܘܿܡܵܐ: ܡܵܪܲܢ: ܠܹܐ ܝܘܵܚ ܒܝܼܕܵܥܝܵܐ ܠܐܲܝܟܵܐ ܒܹܐܙܵܠܵܐ ܝܘܸܬ: ܘܕܵܐܟ̣ܝܼ ܡܵܨܵܚ ܐܘܼܪܚܵܐ ܠܝܼܕܲܥܝܵܐ. 6ܐܵܡܸܪ ܐܸܠܹܗ ܝܼܫܘܿܥ: ܐܵܢܵܐ ܝܘܸܢ ܐܘܼܪܚܵܐ: ܣܲܪܲܣܬܘܼܬܵܐ ܘܚܲܝܹ̈ܐ. ܐ݇ܢܵܫܵܐ ܠܹܐ ܐܵܬܹܐ ܠܟܸܣ ܒܵܒܝܼ ܐܸܠܵܐ ܐܸܢ ܒܝܼܝܼ. 7ܐܸܢ ܐܸܠܝܼ ܗܵܘܹܝܬܘܿܢ ܗ݇ܘܵܘ ܝܕܸܥܝܹܐ: ܐܘܼܦ ܠܒܵܒܝܼ ܒܸܬ ܗܵܘܹܝܬܘܿܢ ܗ݇ܘܵܘ ܝܕܸܥܝܹܐ. ܘܡܵܐܕܝܼܵܐ ܟܹܐ ܝܵܕܥܝܼܬܘܿܢ ܠܹܗ ܘܚܙܹܠܵܘܟ̣ܘܿܢ ܐܸܠܹܗ. 8ܐܵܡܸܪ ܐܸܠܹܗ ܦܝܼܠܝܼܦܘܿܣ: ܡܵܪܲܢ: ܡܲܚܙܝܼ ܠܲܢ ܒܵܒܵܐ: ܘܟܹܐ ܡܵܠܝܵܐ ܠܲܢ. 9ܐܵܡܸܪ ܐܸܠܹܗ ܝܼܫܘܿܥ: ܐܵܗܵܐ ܙܲܒ̣ܢܵܐ ܟܠܹܗ ܥܲܡܵܘܟ̣ܘܿܢ ܝܼܘܸܢ: ܘܠܵܐ ܩܲܡ ܝܵܕܥܸܬ ܠܝܼ: ܦܝܼܠܝܼܦܵܐ: ܡ̇ܢ ܕܐܸܠܝܼ ܚܵܙܹܐ ܚܸܙܝܵܐ ܝܠܹܗ ܠܒܵܒܵܐ: ܘܕܵܐܟ̣ܝ ܐܲܢَܬ ܒܹܐܡܵܪܵܐ ܝܘܸܬ: ܡܲܚܙܝܼ ܠܲܢ ܒܵܒܵܐ. 10ܠܹܐ ܝܼܘܸܬ ܗܲܡܘܼܢܹܐ ܕܐܵܢܵܐ ܒܒܵܒܵܐ ܝܘܸܢ: ܘܒܵܒܵܐ ܒܝܼܝܼ ܝܠܹܗ: ܗܹܡܸܙܡܵܢܹ̈ܐ ܕܐܵܢܵܐ ܗܲܡܙܘܼܡܹܐ ܝܘܸܢ ܥܲܡܵܘܟ̣ܘܿܢ ܡ̣ܢ ܓܵܢܝܼ ܠܹܐ ܝܘܸܢ ܗܲܡܙܘܼܡܹܐ: ܐܝܼܢܵܐ ܒܵܒܵܐ ܕܒܝܼܝܼ ܒܸܥܡܵܪܵܐ ܝܠܹܗ: ܗ̇ܘ ܒܸܥܒ̣ܵܕܵܐ ܝܠܹܗ ܐܲܢܹܐ ܦܘܼܠܚܵܢܹ̈ܐ. 11 ܗܲܡܸܢܘܿܢ ܕܐܵܢܵܐ ܒܒܵܒܵܐ ܝܘܸܢ: ܘܒܵܒܵܐ ܒܝܼܝܼ: ܘܐܸܢ ܠܵܐ: ܗܲܪ ܣܵܒܵܒ ܕܦܘܼܠܚܵܢܹ̈ܐ ܗܲܡܸܢܘܿܢ. 12ܬܪܘܿܨܵܐ: ܬܪܘܿܨܵܐ: ܒܹܐܡܵܪܵܐ ܝܘܸܢ ܐܸܠܵܘܟ̣ܘܿܢ: ܡ̇ܢ ܕܗܲܡܸܢ ܒܝܼܝܼ: ܦܘܼܠܚܵܢܹ̈ܐ ܕܐܵܢܵܐ ܒܸܥܒ̣ܵܕܵܐ ܝܘܸܢ ܐܘܼܦ ܗ̇ܘ ܒܸܬ ܥܵܒܸܕ: ܘܓܘܼܪܹ̈ܐ ܡ̣ܢ ܕܐܲܢܹܐ ܒܸܬ ܥܵܒܸܕ: ܣܵܒܵܒ ܕܐܵܢܵܐ ܠܟܸܣ ܒܵܒܵܐ ܒܹܐܙܵܠܵܐ ܝܘܸܢ. 13ܘܡܸܢܕܝܼ ܕܛܵܠܒܝܼܬܘܿܢ ܒܫܸܡܝܼ ܒܸܬ ܥܵܒ̣ܕܸܢܹܗ: ܕܦܵܐܹܫ ܚܩܝܼܪܵܐ ܒܵܒܵܐ ܒܒܪܘܿܢܹܗ. 14ܐܸܢ ܛܵܠܒܝܼܬܘܿܢ ܡܸܢܕܝܼ ܒܫܸܡܝܼ: ܐܵܢܵܐ ܒܸܬ ܥܵܒ̣ܕܸܢܹܗ. 15ܐܸܢ ܡܲܚܸܒܝܼܬܘܿܢ ܠܝܼ: ܦܘܼܩܕܵܢܝܼ̈ ܢܛܘܿܪܘܿܢ. 16ܘܐܵܢܵܐ ܒܸܬ ܛܵܠܒܸܢ ܡ̣ܢ ܒܵܒܵܐ: ܘܦܵܪܲܩܠܹܝܛܵܐ ܐ݇ܚܹܪ݇ܢܵܐ ܒܸܬ ܝܵܗَܒܸܠ ܠܵܘܟ̣ܘܿܢ: ܕܦܵܐܹܫ ܥܲܡܵܘܟ̣ܘܿܢ ܗܲܠ ܥܵܠܲܡ. 17ܪܘܼܚܵܐ ܕܣܲܪܲܣܬܘܼܬܵܐ: ܗ̇ܘ ܕܥܵܠܡܵܐ ܠܹܐ ܡܵܨܹܐ ܠܩܵܒ̇ܘܿܠܹܐ: ܣܵܒܵܒ ܕܠܹܐ ܝܠܹܗ ܒܸܚܙܵܝܹܗ: ܘܠܹܐ ܝܠܹܗ ܒܝܼܕܲܥܝܹܗ: ܐܝܼܢܵܐ ܐܲܚܬܘܿܢ ܟܹܐ ܝܵܕܥܝܼܬܘܿܢ ܠܹܗ: ܕܠܟܸܣܠܵܘܟ̣ܘܿܢ ܒܸܥܡܵܪܵܐ ܝܠܹܗ: ܘܒܝܼܵܘܟ̣ܘܿܢ ܒܸܬ ܗܵܘܹܐ. 18ܠܹܐ ܫܵܒ̣ܩܸܢܵܘܟ̣ܘܿܢ ܝܵܬܘܿܡܹ̈ܐ: ܒܸܬ ܐܵܬܸܢ ܠܟܸܣܠܵܘܟ̣ܘܿܢ. 19ܘܗܵܠܵܐ ܚܲܕَܟ̰ܵܐ: ܘܥܵܠܡܵܐ ܠܹܐ ܚܵܙܹܐ ܠܝܼ: ܐܝܼܢܵܐ ܐܲܚܬܘܿܢ ܒܸܬ ܚܵܙܹܝܬܘܿܢ ܠܝܼ. ܣܵܒܵܒ ܚܵܝܵܐ ܝܘܸܢ: ܐܘܼܦ ܐܲܚܬܘܿܢ ܒܸܬ ܚܲܝܝܼܬܘܿܢ. 20ܒܗ̇ܘ ܝܵܘܡܵܐ ܒܸܬ ܝܵܕܥܝܼܬܘܿܢ ܕܐܵܢܵܐ ܒܒܵܒܝܼ ܝܘܸܢ: ܘܐܲܚܬܘܿܢ ܒܝܼܝܼ: ܘܐܵܢܵܐ ܒܝܼܵܘܟ̣ܘܿܢ. 21ܡ̇ܢ ܕܐܝܼܬ ܠܟܸܣܠܹܗ ܦܘܼܩܕܵܢܝܼ̈: ܘܢܵܛܸܗܪܘܿܢ: ܗ̇ܘ ܝܼܠܹܗ ܕܡܲܚܘܼܒܝܼ ܐܝܼܢܵܐ ܗ̇ܘ ܕܡܲܚܸܒ ܠܝܼ ܒܸܬ ܦܵܐܹܫ ܡܘܼܚܸܒܵܐ ܡ̣ܢ ܒܵܒܝܼ: ܘܐܵܢܵܐ ܒܸܬ ܡܲܚܸܒܸܢܹܗ: ܘܒܸܬ ܡܲܚܙܸܢ ܐܸܠܹܗ ܓܵܢܝܼ. 22ܐܵܡܸܪ ܐܸܠܹܗ ܝܼܗܘܼܕܵܐ: ܠܵܐ ܣܟܲܪܝܘܿܛܵܐ: ܡܵܪܝܼ: ܡܘܼܕܝܼ ܗَܘܝܼܵܐ ܝܠܹܗ: ܕܒܸܬ ܡܲܚܙܸܬ ܓܵܢܘܼܟ ܐܸܠܲܢ ܘܠܵܐ ܠܥܵܠܡܵܐ. 23ܓ̰ܘܼܘܸܒܠܹܗ ܝܼܫܘܿܥ ܘܐَܡܝܼܪܹܗ ܐܸܠܹܗ: ܐܸܢ ܐ݇ܢܵܫܵܐ ܡܲܚܸܒ ܠܝܼ: ܗܹܡܸܙܡܵܢܝܼ̈ ܒܸܬ ܢܵܛܸܪ: ܘܒܵܒܝܼ ܒܸܬ ܡܲܚܸܒ ܠܹܗ: ܘܠܟܸܣܠܹܗ ܒܸܬ ܐܵܬܵܚ: ܘܡܲܢܙܝܼܠ ܠܟܸܣܠܹܗ ܒܸܬ ܥܵܒ̣ܕܵܚ. 24ܐܝܼܢܵܐ ܗ̇ܘ ܕܠܵܐ ܡܲܚܸܒ ܠܝܼ: ܗܹܡܸܙܡܵܢ̈ܝܼ ܠܹܐ ܢܵܛܸܪ. ܘܗܹܡܸܙܡܵܢ ܕܒܸܫܡܲܥܝܵܐ ܝܬܘܿܢ ܠܹܐ ܝ݇ܠܵܗ̇ ܕܝܼܝܼ: ܐܸܠܵܐ ܕܒܵܒܵܐ ܕܫܘܼܕܪܸܢܹܗ. 25ܐܲܢܹܐ ܗܘܼܡܙܸܡܠܝܼ ܥܲܡܵܘܟ̣ܘܿܢ: ܟܲܕ ܦܝܵܫܵܐ ܝܘܸܢ ܠܟܸܣܠܵܘܟ̣ܘܿܢ. 26ܐܝܼܢܵܐ ܦܵܪܲܩܠܹܝܛܵܐ: ܪܘܼܚܵܐ ܕܩܘܼܕܫܵܐ: ܗ̇ܘ ܕܒܸܬ ܫܵܕܸܪ ܒܵܒܝܼ ܒܫܸܡܝܼ: ܗ̇ܘ ܒܸܬ ܡܵܠܸܦ ܠܵܘܟ̣ܘܿܢ ܟܠ ܡܸܢܕܝܼ: ܘܗ̇ܘ ܒܸܬ ܡܲܕܟܸܪܵܘܟ̣ܘܿܢ ܟܠ ܡܸܢܕܝܼ ܕܐَܡܝܼܪܵܐ ܝܘܸܢ ܐܸܠܵܘܟ̣ܘܿܢ. 27ܫܠܵܡܵܐ ܒܸܫܒ̣ܵܩܵܐ ܝܘܸܢ ܠܟܸܣܠܵܘܟ̣ܘܿܢ: ܫܠܵܡܵܐ ܕܝܼܝܼ ܒܝܼܵܗَܒ̣ܵܐ ܝܘܸܢ ܐܸܠܵܘܟ̣ܘܿܢ: ܠܵܐ ܕܵܐܟ̣ܝܼ ܕܝܵܗَܒܸܠ ܥܵܠܡܵܐ ܐܵܢܵܐ ܒܝܼܵܗَܒ̣ܵܐ ܝܘܸܢ ܐܸܠܵܘܟ̣ܘܿܢ: ܠܵܐ ܦܵܐܹܫ ܫܓ̣ܝܼܫܵܐ ܠܸܒܵܘܟ̣ܘܿܢ: ܘܠܵܐ ܙܵܕܸܥ. 28ܫܡܸܥܠܵܘܟ̣ܘܿܢ ܕܐܵܢܵܐ ܐَܡܸܪܝܼ ܐܸܠܵܘܟ̣ܘܿܢ: ܒܹܐܙܵܠܵܐ ܝܘܸܢ ܘܒܹܐܬܵܝܵܐ ܝܘܸܢ ܠܟܸܣܠܵܘܟ̣ܘܿܢ: ܐܸܢ ܗܵܘܹܝܬܘܿܢ ܗ݇ܘܵܘ ܡܲܚܘܸܒܝܼ: ܒܸܬ ܚܵܕܝܼܬܘܿܢ ܗ݇ܘܵܘ: ܕܒܹܐܙܵܠܵܐ ܝܘܸܢ ܠܟܸܣ ܒܵܒܵܐ: ܣܵܒܵܒ ܒܵܒܵܐ ܓܘܼܪܵܐ ܝܠܹܗ ܡܸܢܝܼ. 29ܘܐܵܕܝܼܵܐ ܐَܡܸܪܝܼ ܐܸܠܵܘܟ̣ܘܿܢ ܗܵܠܵܐ ܠܵܐ ܗَܘܵܝܵܐ: ܕܐܝܼܡܲܢ ܕܗَܘܹܐ ܠܵܗ̇: ܗܲܡܸܢܝܼܬܘܿܢ. 30ܡܐܵܕܝܼܵܐ ܠܹܐ ܗܲܡܙܸܡܸܢ ܥܲܡܵܘܟ̣ܘܿܢ ܪܵܒܵܐ: ܣܵܒܵܒ ܕܒܹܐܬܵܝܵܐ ܝܠܹܗ ܓܘܼܪܵܐ ܕܥܵܠܡܵܐ: ܘܒܝܼܝܼ ܠܲܝܬ ܠܹܗ ܡܸܢܕܝܼ. 31ܐܸܠܵܐ ܕܝܵܕܸܥ ܥܵܠܡܵܐ ܕܡܲܚܘܼܒܹܐ ܝܘܸܢ ܠܒܒܵܐ: ܘܕܵܐܟ̣ܝܼ ܕܦܘܼܩܕܸܢܹܗ ܒܵܒܵܐ: ܗܲܕܟ̣ܵܐ ܒܸܥܒ̣ܵܕܵܐ ܝܘܸܢ. ܩܘܼܡܘܿܢ: ܐܵܙܵܠَܚ ܡܐܲܟ̣ܵܐ.