0:00
/
1ܐܵܢܵܐ ܝܘܸܢ ܓܸܦܬܵܐ ܣܲܪܲܣܬ: ܘܒܵܒܝܼ ܝܠܹܗ ܢܵܛܲܪ ܓܲܢܬܵܐ. 2ܟܠ ܦܵܥܘܵܐ ܕܒܝܼܝܼ ܡܲܗܨܘܼܠܹ̈ܐ ܠܵܐ ܡܲܝܬَܝܵܐ: ܟܹܐ ܫܵܩܵܠ ܠܵܗ̇: ܘܟܠ ܕܡܲܝܬَܝܵܐ ܡܲܗܨܘܼܠܹ̈ܐ: ܟܹܐ ܕܵܟܹܐ ܠܵܗ̇: ܕܙܵܘܕܵܐ ܡܲܗܨܘܼܠܹ̈ܐ ܡܲܝܬَܝܵܐ. 3ܐܲܚܬܘܿܢ ܡ̣ܢ ܓ̰ܲܠܕܹܐ ܕܸܟ̣ܝܹ̈ܐ ܝܬܘܿܢ: ܣܵܒܵܒ ܕܗܹܡܸܙܡܵܢ ܕܗܘܼܡܙܸܡܠܝܼ ܥܲܡܵܘܟ̣ܘܿܢ. 4ܥܲܪܩܸܠܗܘܿܢ ܒܝܼܝܼ: ܘܐܵܢܵܐ ܒܝܼܵܘܟ̣ܘܿܢ ܕܵܐܟ̣ܝܼ ܕܦܵܥܘܵܐ ܠܹܐ ܡܵܨܝܵܐ ܕܡܲܝܬَܝܵܐ ܡܲܗܨܘܼܠܹ̈ܐ ܡ̣ܢ ܓܵܢܘܼܗ̇: ܐܸܢ ܠܵܐ ܥܲܪܩܸܠܵܗ̇ ܒܓܸܦܬܵܐ: ܗܲܕܟ̣ܵܐ ܐܘܼܦ ܠܵܐ ܐܲܚܬܘܿܢ: ܐܸܢ ܠܵܐ ܥܲܪܩܸܠܝܼܬܘܿܢ ܒܝܼܝܼ. 5ܐܵܢܵܐ ܝܘܸܢ ܓܸܦܬܵܐ: ܘܐܲܚܬܘܿܢ ܦܵܥܘܵܢܹ̈ܐ ܗ̇ܘ ܕܥܲܪܩܸܠ ܒܝܼܝܼ: ܘܐܵܢܵܐ ܒܝܹܗ: ܐܵܗܵܐ ܟܹܐ ܡܲܝܬَܝܹܐ ܡܲܗܨܘܼܠܹ̈ܐ ܪܵܒܵܐ: ܣܵܒܵܒ ܕܠܵܐ ܕܝܼܝܼ ܠܹܐ ܡܵܨܹܝܬܘܿܢ ܠܸܥܒ̣ܵܕܵܐ ܡܸܢܕܝܼ. 6ܐܸܢ ܐ݇ܢܵܫܵܐ ܠܵܐ ܥܲܪܩܸܠ ܒܝܼܝܼ: ܒܸܬ ܦܵܐܹܫ ܪܘܼܦܝܵܐ ܠܒܲܕܲܪ ܐܲܝܟܼ ܦܵܥܘܵܐ ܕܒܵܪܙܵܐ: ܘܟܹܐ ܓ̰ܵܡܥܝܼ ܘܕܵܪܝܼ ܠܵܗ̇ ܓܵܘ ܢܘܼܪܵܐ ܘܝܵܩܕܵܐ. 7ܐܸܢ ܥܲܪܩܸܠܝܼܬܘܿܢ ܒܝܼܝܼ: ܘܗܹܡܸܙܡܵܢܝܼ̈ ܥܲܪܩܠܝܼ ܒܝܼܵܘܟ̣ܘܿܢ: ܟܠ ܡܸܢܕܝܼ ܕܒܵܣܡܵܐ ܠܵܘܟ̣ܘܿܢ ܒܸܬ ܛܵܠܒܝܼܬܘܿܢ: ܘܒܸܬ ܗܵܘܹܐ ܠܵܘܟ̣ܘܿܢ. 8ܒܐܵܗܵܐ ܦܝܵܫܵܐ ܝܠܹܗ ܚܩܝܼܪܵܐ ܒܵܒܝܼ: ܕܪܵܒܵܐ ܡܲܗܨܘܼܠܹ̈ܐ ܡܲܝܬَܝܝܼܬܘܿܢ: ܘܒܸܬ ܗܵܘܹܝܬܘܿܢ ܬܲܠܡܝܼܕܝܼ̈. 9ܕܵܐܟ̣ܝܼ ܕܡܘܼܚܸܒܸܢܹܗ ܒܵܒܵܐ: ܐܘܼܦ ܐܵܢܵܐ ܩܲܡ ܡܲܚܸܒܸܢܵܘܟ̣ܘܿܢ ܥܲܪܩܸܠܗܘܿܢ ܒܡܲܚܲܒܬܵܐ ܕܝܼܝܼ. 10ܐܸܢ ܢܵܛܪܝܼܬܘܿܢ ܦܘܼܩܕܵܢܝܼ̈: ܒܸܬ ܥܲܪܩܸܠܝܼܬܘܿܢ ܒܚܘܼܒܵܐ ܕܝܼܝܼ: ܕܵܐܟ̣ܝܼ ܕܐܵܢܵܐ ܢܛܸܪܝܼ ܦܘܼܩܕܵܢܹ̈ܐ ܕܒܵܒܝܼ: ܘܟܹܐ ܥܲܪܩܸܠܸܢ ܒܚܘܼܒܹܗ. 11ܐܲܢܹܐ ܗܘܼܡܙܸܡܠܝܼ ܥܲܡܵܘܟ̣ܘܿܢ: ܕܚܲܕܘܼܬܝܼ ܗܵܘܝܵܐ ܒܝܼܵܘܟ̣ܘܿܢ: ܘܕܦܵܝܫܵܐ ܬܘܼܡܸܡܬܵܐ ܚܲܕܘܼܬܵܘܟ̣ܘܿܢ. 12ܐܵܗܵܐ ܝܠܹܗ ܦܘܼܩܕܵܢܝܼ: ܕܡܲܚܸܒܝܼܬܘܿܢ ܚܲܕَ ܠܗ̇ܘ ܐ݇ܚܹܪ݇ܢܵܐ: ܕܵܐܟ̣ܝܼ ܕܐܵܢܵܐ ܩܲܡ ܡܲܚܸܒܸܢܵܘܟ̣ܘܿܢ. 13ܚܘܼܒܵܐ ܕܓܘܼܪܵܐ ܡ̣ܢ ܕܐܵܗܵܐ ܠܲܝܬ: ܕܐ݇ܢܵܫܵܐ ܡܲܬܸܒ̣ ܓܵܢܹܗ ܡܒܵܕܵܠ ܕܕܵܘܣܬܘܼ̈ܗܝ. 14ܐܲܚܬܘܿܢ ܕܵܘܣܬܝܼ̈ ܝܬܘܿܢ: ܐܸܢ ܥܵܒ̣ܕܝܼܬܘܿܢ ܡܸܢܕܝܼ ܕܦܵܩܕܸܢܵܘܟ̣ܘܿܢ. 15ܡܐܵܕܝܼܵܐ ܠܹܐ ܩܵܪܸܢܵܘܟ̣ܘܿܢ ܪܹ̈ܓܵܘܵܬܹܐ: ܣܵܒܵܒ ܪܹܓܵܐ ܠܹܐ ܝܵܕܸܥ ܡܘܼܕܝܼ ܒܸܥܒ̣ܵܕܵܐ ܝܠܹܗ ܐܵܓ̣ܵܝܹܗ: ܐܝܼܢܵܐ ܕܵܘܣܬܝܼ̈ ܩܲܡ ܩܵܪܸܢܵܘܟ̣ܘܿܢ: ܣܵܒܵܒ ܟܠ ܕܫܡܸܥܠܝܼ ܡ̣ܢ ܒܵܒܝܼ ܡܘܼܕܸܥܠܝܼ ܐܸܠܵܘܟ̣ܘܿܢ. 16ܠܵܐ ܕܐܲܚܬܘܿܢ ܓܘܼܒܹܠܵܘܟ̣ܘܿܢ ܐܸܠܝܼ: ܐܸܠܵܐ ܐܵܢܵܐ ܩܲܡ ܓܵܒܸ̇ܢܵܘܟ̣ܘܿܢ: ܘܩܲܡ ܡܲܬܒܸܢܵܘܟ̣ܘܿܢ: ܕܐܘܼܦ ܐܲܚܬܘܿܢ ܐܵܙܠَܝܼܬܘܿܢ ܡܲܝܬَܝܝܼܬܘܿܢ ܡܲܗܨܘܼܠܹ̈ܐ: ܘܡܲܗܨܘܼܠܵܘ̈ܟ̣ܘܿܢ ܥܲܪܩܸܠܝܼ: ܕܟܠ ܡܸܢܕܝܼ ܕܛܵܠܒܝܼܬܘܿܢ ܡ̣ܢ ܒܵܒܵܐ ܒܫܸܡܝܼ: ܝܵܗَܒܸܠ ܠܵܘܟ̣ܘܿܢ. 17ܐܲܢܹܐ ܦܵܩܘܿܕܹܐ ܝܘܸܢ ܐܸܠܵܘܟ̣ܘܿܢ: ܕܡܲܚܸܒܝܼܬܘܿܢ ܚܲܕَ ܠܗ̇ܘ ܐ݇ܚܹܪ݇ܢܵܐ. 18ܘܐܸܢ ܥܵܠܡܵܐ ܣܵܢܹܐ ܠܵܘܟ̣ܘܿܢ: ܝܕܸܥܡܘܿܢ ܕܡܩܵܕَܡ ܕܝܼܵܘܟ̣ܘܿܢ ܐܸܠܝܼ ܣܢܹܠܹܗ. 19ܘܐܸܢ ܡ̣ܢ ܥܵܠܡܵܐ ܗܵܘܹܝܬܘܿܢ ܗ݇ܘܵܘ: ܥܵܠܡܵܐ ܠܕܝܹܗ ܒܸܬ ܡܲܚܸܒ ܗ݇ܘܵܐ: ܐܝܼܢܵܐ ܣܵܒܵܒ ܠܹܐ ܝܬܘܿܢ ܡ̣ܢ ܥܵܠܡܵܐ: ܐܸܠܵܐ ܐܵܢܵܐ ܩܲܡ ܓܵܒܸ̇ܢܵܘܟ̣ܘܿܢ ܡ̣ܢ ܥܵܠܡܵܐ: ܣܵܒܵܒ ܕܐܵܗܵܐ: ܥܵܠܡܵܐ ܒܸܣܢܵܝܵܘܟ̣ܘܿܢ ܝܼܠܹܗ. 20ܕܟ̣ܘܿܪܘܿܢ ܗܹܡܸܙܡܵܢ ܕܐܵܢܵܐ ܐَܡܸܪܝܼ ܐܸܠܵܘܟ̣ܘܿܢ: ܪܹܓܵܐ ܠܹܐ ܝܠܹܗ ܓܘܼܪܵܐ ܡ̣ܢ ܐܵܓ̣ܵܝܹܗ. ܐܸܢ ܐܸܠܝܼ ܛܪܸܕܠܗܘܿܢ: ܐܘܼܦ ܐܸܠܵܘܟ̣ܘܿܢ ܒܸܬ ܛܵܪܕܝܼ: ܘܐܸܢ ܗܹܡܸܙܡܵܢܝܼ ܢܛܸܪܘܿܢ: ܐܘܼܦ ܕܝܼܵܘܟ̣ܘܿܢ ܒܸܬ ܢܵܛܪܝܼ. 21ܐܸܠܵܐ ܐܲܢܹܐ ܟܠܵܝܗܝ ܒܸܬ ܥܵܒ̣ܕܝܼ ܒܝܼܵܘܟ̣ܘܿܢ ܒܘܼܬ ܫܸܡܵܐ ܕܝܼܝܼ: ܣܵܒܵܒ ܠܹܐ ܝܢܵܐ ܒܝܼܕܵܥܝܵܐ ܠܗ̇ܘ ܕܫܘܼܕܪܸܢܹܗ. 22ܐܸܢ ܐܵܢܵܐ ܠܵܐ ܗܵܘܸܢ ܗ݇ܘܵܐ ܐܬܝܼܵܐ ܗܘܼܡܙܸܡܵܐ ܥܲܡܵܝܗܝ: ܠܲܝܬ ܗ݇ܘܵܐ ܠܗ݇ܘܿܢ ܚܛܝܼܬܵܐ: ܐܝܼܢܵܐ ܐܵܕܝܼܐ ܠܲܝܬ ܠܗ݇ܘܿܢ ܡܵܗܵܢܵܐ ܒܘܼܬ ܚܛܝܼܵܬܵܝ̈ܗܝ. 23ܡ̇ܢ ܕܐܸܠܝܼ ܣܵܢܹܐ: ܐܘܼܦ ܠܒܵܒܝܼ ܟܹܐ ܣܵܢܹܐ. 24ܐܸܢ ܦܘܼܠܚܵܢܹ̈ܐ ܠܵܐ ܗܵܘܸܢ ܗ݇ܘܵܐ ܥܒ̣ܝܼܕܵܐ ܓܵܘܵܝܗܝ: ܐܵܢܝܼ ܕܐ݇ܢܵܫܵܐ ܐ݇ܚܹܪ݇ܢܵܐ ܠܵܐ ܥܒܸܕܠܹܗ: ܠܲܝܬ ܗ݇ܘܵܐ ܠܗ݇ܘܿܢ ܚܛܝܼܬܵܐ: ܐܝܼܢܵܐ ܐܵܕܝܼܵܐ ܚܸܙܝܹܐ ܝܢܵܐ ܘܣܸܢܝܹܐ ܝܢܵܐ ܐܘܼܦ ܐܸܠܝܼ ܘܐܘܼܦ ܠܒܵܒܝܼ. 25ܐܸܠܵܐ (ܗَܘܹܐ ܠܵܗ̇) ܕܦܵܝܫܵܐ ܬܘܼܡܸܡܬܵܐ ܗܹܡܸܙܡܵܢ ܕܝܼܠܵܗ̇ ܟܬܝܼܒ̣ܬܵܐ ܒܢܵܡܘܿܣܵܝܗܝ: ܣܢܹܠܗܘܿܢ ܐܸܠܝܼ ܕܠܵܐ ܗܲܓ̰ܲܬ. 26ܐܝܼܢܵܐ ܐܝܼܡܲܢ ܕܐܵܬܹܐ ܦܵܪܲܩܠܹܝܛܵܐ: ܗ̇ܘ ܕܐܵܢܵܐ ܒܸܬ ܫܵܕܪܸܢ ܠܟܸܣܠܵܘܟ̣ܘܿܢ ܡ̣ܢ ܠܟܸܣ ܒܵܒܵܐ: ܪܘܼܚܵܐ ܕܣܲܪܲܣܬܘܼܬܵܐ: ܗ̇ܘ ܕܡ̣ܢ ܠܟܸܣ ܒܵܒܵܐ ܟܹܐ ܦܵܠܸܛ: ܗ̇ܘ ܒܸܬ ܝܵܗَܒܸܠ ܣܵܗܕܘܼܬܵܐ ܒܵܗَܣ ܕܝܼܝܼ. 27ܐܘܼܦ ܐܲܚܬܘܿܢ ܒܝܼܵܗَܒ̣ܵܐ ܝܬܘܿܢ ܣܵܗܕܘܼܬܵܐ: ܣܵܒܵܒ ܕܡ̣ܢ ܫܵܪܵܝܬܵܐ ܥܲܡܝܼ ܝܬܘܿܢ.