0:00
/
1ܐܲܢܹܐ ܗܘܼܡܙܸܡܠܝܼ ܥܲܡܵܘܟ̣ܘܿܢ: ܕܠܵܐ ܦܵܝܫܝܼܬܘܿܢ ܡܘܼܟܦܸܪܹܐ. 2ܒܸܬ ܦܵܠܛܝܼ ܠܵܘܟ̣ܘܿܢ ܡ̣ܢ ܟܢܘܼܫܝܵܬܵܝ̈ܗܝ: ܐܘܼܦ ܒܹܐܬܵܝܵܐ ܝ݇ܠܵܗ̇ ܣܵܥܲܬ ܕܟܠ ܕܩܵܛܸܠܵܘܟ̣ܘܿܢ ܒܸܬ ܚܵܫܸܒ̣ ܕܚܸܠܡܲܬ ܡܲܩܪܘܼܒܹܐ ܝܠܹܗ ܠܐܲܠܵܗܵܐ. 3ܘܐܲܢܹܐ ܒܸܬ ܥܵܒ̣ܕܝܼ: ܣܵܒܵܒ ܕܠܹܐ ܝܢܵܐ ܝܕܸܥܝܹܐ ܠܒܵܒܵܐ ܐܘܼܦ ܠܵܐ ܐܸܠܝܼ. 4ܐܝܼܢܵܐ ܐܲܢܹܐ ܗܘܼܡܙܸܡܠܝܼ ܥܲܡܵܘܟ̣ܘܿܢ: ܕܐܝܼܡܲܢ ܕܐܵܬܝܵܐ ܣܵܥܲܬܵܝ: ܕܵܟ̣ܪܝܼܬܘܿܢ ܠܗ݇ܘܿܢ: ܕܐܵܢܵܐ ܐَܡܸܪܝܼ ܐܸܠܵܘܟ̣ܘܿܢ ܐܝܼܢܵܐ ܐܲܢܹܐ ܡ̣ܢ ܩܵܕَܡܵܝܬܵܐ ܠܵܐ ܐَܡܸܪܝܼ ܐܸܠܵܘܟ̣ܘܿܢ: ܣܵܒܵܒ ܕܥܲܡܵܘܟ̣ܘܿܢ ܝܼܘܸܢ ܗ݇ܘܵܐ. 5ܐܝܼܢܵܐ ܐܵܕܝܼܵܐ ܒܹܐܙܵܠܵܐ ܝܘܸܢ ܠܟܸܣ ܕܗ̇ܘ ܕܫܘܼܕܪܸܢܹܗ: ܘܠܵܐ ܐ݇ܢܵܫܵܐ ܡܸܢܵܘܟ̣ܘܿܢ ܒܵܩܘܿܪܹܐ ܝܠܹܗ ܡܸܢܝܼ: ܠܐܲܝܟܵܐ ܒܹܐܙܵܠܵܐ ܝܘܸܬ. 6ܣܵܒܵܒ ܕܐَܡܸܪܝܼ ܐܸܠܵܘܟ̣ܘܿܢ ܐܲܢܹܐ: ܡܠܹܐܠܵܗ̇ ܦܵܫܲܡܬܵܐ ܠܸܒܵܘܵܬܵܘ̈ܟ̣ܘܿܢ. 7ܐܸܠܵܐ ܐܵܢܵܐ ܣܲܪܲܣܬܘܼܬܵܐ ܒܹܐܡܵܪܵܐ ܝܘܸܢ ܐܸܠܵܘܟ̣ܘܿܢ: ܕܨܦܵܝܝܼ ܝ݇ܠܵܗ̇ ܐܸܠܵܘܟ̣ܘܿܢ ܕܐܵܢܵܐ ܐܵܙܸܠَܢ: ܣܵܒܵܒ ܐܸܢ ܐܵܢܵܐ ܠܵܐ ܐܵܙܸܠَܢ: ܦܵܪܲܩܠܹܝܛܵܐ ܠܹܐ ܐܵܬܹܐ ܠܟܸܣܠܵܘܟ̣ܘܿܢ: ܐܝܼܢܵܐ ܐܸܢ ܐܵܙܸܠَܢ: ܒܸܬ ܫܲܕܪܸܢܹܗ ܠܟܸܣܠܵܘܟ̣ܘܿܢ. 8ܘܐܝܼܡܲܢ ܕܐܵܬܹܐ: ܗ̇ܘ ܒܸܬ ܡܲܢܟܸܣ ܠܥܵܠܡܵܐ ܥܲܠ ܚܛܝܼܬܵܐ: ܘܥܲܠ ܙܲܕܝܼܩܘܼܬܵܐ: ܘܥܲܠ ܕܝܼܘܵܢ. 9ܥܲܠ ܚܛܝܼܬܵܐ: ܣܵܒܵܒ ܕܠܹܐ ܝܢܵܐ ܗܲܡܘܼܢܹܐ ܒܝܼܝܼ. 10ܥܲܠ ܙܲܕܝܼܩܘܼܬܵܐ: ܣܵܒܵܒ ܕܠܟܸܣ ܒܵܒܝܼ ܒܹܐܙܵܠܵܐ ܝܘܸܢ: ܘܡܸܢَܕܪܸܫَ ܠܹܐ ܚܵܙܹܝܬܘܿܢ ܠܝܼ. 11ܥܲܠ ܕܝܼܘܵܢ: ܣܵܒܵܒ ܕܓܘܼܪܵܐ ܕܐܵܗܵܐ ܥܵܠܡܵܐ ܦܝܵܫܵܐ ܝܠܹܗ ܕܝܼܢܵܐ. 12ܡܸܢَܕܪܸܫَ ܪܵܒܵܐ ܐܝܼܬ ܠܝܼ ܠܹܐܡܵܪܵܐ ܐܸܠܵܘܟ̣ܘܿܢ: ܐܸܠܵܐ ܠܹܐ ܡܵܨܹܝܬܘܿܢ ܠܸܕܒ̣ܵܩܵܐ ܐܵܕܝܼܵܐ. 13ܐܝܼܢܵܐ ܐܝܼܡܲܢ ܕܐܵܬܹܐ ܗ̇ܘ: ܪܘܼܚܵܐ ܕܣܲܪܲܣܬܘܼܬܵܐ: ܒܸܬ ܬܲܓܒܸܪܵܘܟ̣ܘܿܢ ܒܟܠܵܗ̇ ܣܲܪܲܣܬܘܼܬܵܐ: ܣܵܒܵܒ ܠܹܐ ܗܲܡܙܸܡ ܡ̣ܢ ܓܵܢܹܗ: ܐܸܠܵܐ ܟܠ ܕܫܵܡܸܥ ܗ̇ܘ ܒܸܬ ܗܲܡܙܸܡ: ܘܡܸܢܕܝܵܢܹ̈ܐ ܕܐܵܬܝܼ ܒܸܬ ܡܲܕܸܥ ܠܵܘܟ̣ܘܿܢ. 14ܗ̇ܘ ܒܸܬ ܚܵܩܸܪܝܼ: ܣܵܒܵܒ ܕܡ̣ܢ ܕܝܼܝܼ ܒܸܬ ܫܵܩܸܠ ܘܡܲܚܙܹܐ ܠܵܘܟ̣ܘܿܢ. 15ܟܠ ܡܸܢܕܝܼ ܕܒܵܒܵܐ ܐܝܼܬ ܠܹܗ: ܕܝܼܝܼ ܝܠܹܗ. ܣܵܒܵܒ ܕܐܵܗܵܐ ܐَܡܸܪܝܼ ܐܸܠܵܘܟ̣ܘܿܢ: ܕܡ̣ܢ ܕܝܼܝܼ ܒܸܬ ܫܵܩܸܠ ܘܡܲܚܙܹܐ ܠܵܘܟ̣ܘܿܢ. 16ܚܲܕَܟ̰ܵܐ (ܥܕܵܢܵܐ): ܘܠܹܐ ܚܵܙܹܝܬܘܿܢ ܠܝܼ ܘܡܸܢَܕܪܸܫَ ܚܲܕَܟ̰ܵܐ: ܘܒܸܬ ܚܵܙܹܝܬܘܿܢ ܠܝܼ. 17ܘܐَܡܸܪܗܘܿܢ ܡ̣ܢ ܬܲܠܡܝܼܕܘܼ̈ܗܝ ܚܲܕَ ܠܗ̇ܘ ܐ݇ܚܹܪ݇ܢܵܐ: ܡܘܼܕܝܼ ܝ݇ܠܵܗ̇ ܐܵܗܵܐ ܕܐَܡܝܼܪܹܗ ܐܸܠܲܢ: ܚܲܕَܟ̰ܵܐ: ܘܠܹܐ ܚܵܙܹܝܬܘܿܢ ܠܝܼ: ܘܡܸܢَܕܪܸܫَ ܚܲܕَܟ̰ܵܐ: ܘܒܸܬ ܚܵܙܹܝܬܘܿܢ ܠܝܼ: ܘܒܹܐܙܵܠܵܐ ܝܘܸܢ ܠܟܸܣ ܒܵܒܵܐ. 18ܘܐَܡܸܪܗܘܿܢ: ܡܘܼܕܝܼ ܝ݇ܠܵܗ̇ ܐܵܗܵܐ: ܚܲܕَܟ̰ܵܐ: ܕܐَܡܝܼܪܹܗ: ܠܹܐ ܝܘܵܚ ܒܝܼܕܵܥܝܵܐ ܡܘܼܕܝܼ ܗܲܡܙܘܼܡܹܐ ܝܠܹܗ. 19ܝܼܫܘܿܥ ܝܕܸܥܠܹܗ ܕܒܵܥܝܼ ܗ݇ܘܵܘ ܠܒܵܩܘܿܪܹܗ: ܘܐَܡܝܼܪܹܗ ܐܸܠܵܝܗܝ: ܥܲܠ ܕܐܵܗܵܐ ܒܵܩܘܿܪܹܐ ܝܬܘܿܢ ܚܲܕَ ܡܗ̇ܘ ܐ݇ܚܹܪ݇ܢܵܐ: ܕܐَܡܸܪܝܼ: ܚܲܕَܟ̰ܵܐ: ܘܠܹܐ ܚܵܙܹܝܬܘܿܢ ܠܝܼ: ܘܡܸܢَܕܪܸܫَ ܚܲܕَܟ̰ܵܐ: ܘܒܸܬ ܚܵܙܹܝܬܘܿܢ ܠܝܼ. 20ܬܪܘܿܨܵܐ ܬܪܘܿܨܵܐ: ܒܹܐܡܵܪܵܐ ܝܘܸܢ ܐܸܠܵܘܟ̣ܘܿܢ: ܕܒܸܬ ܒܵܟ̣ܝܼܬܘܿܢ ܘܒܸܬ ܝܵܠܝܼܬܘܿܢ: ܐܝܼܢܵܐ ܥܵܠܡܵܐ ܒܸܬ ܚܵܕܹܐ: ܘܐܲܚܬܘܿܢ ܒܸܬ ܦܵܫܡܝܼܬܘܿܢ: ܐܸܠܵܐ ܦܵܫܲܡܬܵܘܟ̣ܘܿܢ ܠܚܲܕܘܼܬܵܐ ܒܸܬ ܗܵܘܝܵܐ. 21ܒܲܟ̣ܬܵܐ ܐܝܼܡܲܢ ܕܝܵܠܕܵܗ̇ ܟܹܐ ܦܵܫܡܵܗ̇: ܕܡܛܹܠܵܗ̇ ܣܵܥܲܬܘܼܗ̇. ܐܝܼܢܵܐ ܐܝܼܡܲܢ ܕܝܵܠܕܵܗ̇ ܝܵܠܵܕَܐ: ܠܹܐ ܕܵܟ̣ܪܵܐ ܠܝܲܠܨܘܼܘܵܗ̇: ܡ̣ܢ ܚܲܕܘܼܬܵܐ ܕܦܸܫܠܹܗ ܗَܘܝܼܵܐ ܒܲܪܢܵܫܵܐ ܒܥܵܠܡܵܐ. 22ܐܘܼܦ ܐܲܚܬܘܿܢ ܐܵܕܝܼܵܐ ܒܸܦܫܵܡܵܐ ܝܬܘܿܢ: ܐܝܼܢܵܐ ܡܸܢَܕܪܸܫَ ܒܸܬ ܚܵܙܸܢܵܘܟ̣ܘܿܢ: ܘܠܸܒܵܘܟ̣ܘܿܢ ܒܸܬ ܚܵܕܹܐ: ܘܚܲܕܘܼܬܵܘܟ̣ܘܿܢ ܐ݇ܢܵܫܵܐ ܠܹܐ ܫܵܩܸܠ ܡܸܢܵܘܟ̣ܘܿܢ. 23ܘܒܗ̇ܘ ܝܵܘܡܵܐ ܡܸܢܝܼ ܠܹܐ ܛܵܠܒܝܼܬܘܿܢ ܡܸܢܕܝܼ ܬܪܘܿܨܵܐ: ܬܪܘܿܨܵܐ: ܒܹܐܡܵܪܵܐ ܝܘܸܢ ܐܸܠܵܘܟ̣ܘܿܢ: ܟܠ ܡܸܢܕܝܼ ܕܛܵܠܒܝܼܬܘܿܢ ܡ̣ܢ ܒܵܒܵܐ: ܒܸܬ ܝܵܗَܒܸܠܵܘܟ̣ܘܿܢ ܒܫܸܡܝܼ. 24ܗܲܠ ܐܵܕܝܼܵܐ ܠܵܐ ܛܠܸܒܠܵܘܟ̣ܘܿܢ ܡܸܢܕܝܼ ܒܫܸܡܝܼ. ܛܠܘܼܒܘܿܢ: ܘܒܸܬ ܫܵܩܠܝܼܬܘܿܢ: ܕܗܵܘܝܵܐ ܚܲܕܘܼܬܵܘܟ̣ܘܿܢ ܬܘܼܡܸܡܬܵܐ. 25ܐܲܢܹܐ ܒܡܵܣܵܠܹ̈ܐ ܗܘܼܡܙܸܡܠܝܼ ܥܲܡܵܘܟ̣ܘܿܢ: ܐܝܼܢܵܐ ܒܹܐܬܵܝܵܐ ܝ݇ܠܵܗ̇ ܣܵܥܲܬ: ܐܝܼܡܲܢ ܕܠܹܐ ܗܲܡܙܸܡܸܢ ܥܲܡܵܘܟ̣ܘܿܢ ܒܡܵܣܵܠܹ̈ܐ: ܐܸܠܵܐ ܒܐܲܫܟܵܪܵܐ ܒܸܬ ܗܵܩܸܢܵܘܟ̣ܘܿܢ ܒܘܼܬ ܕܒܵܒܵܐ. 26ܒܗ̇ܘ ܝܵܘܡܵܐ ܒܸܬ ܛܵܠܒܝܼܬܘܿܢ ܒܫܸܡܝܼ: ܘܠܹܐ ܝܘܸܢ ܒܹܐܡܵܪܵܐ ܐܸܠܵܘܟ̣ܘܿܢ ܕܐܵܢܵܐ ܒܸܬ ܛܵܠܒܸܢ ܡ̣ܢ ܒܵܒܵܐ ܒܘܼܬ ܕܝܼܵܘܟ̣ܘܿܢ. 27ܣܵܒܵܒ ܒܵܒܵܐ ܒܓܵܢܹܗ ܟܹܐ ܡܲܚܸܒ ܠܵܘܟ̣ܘܿܢ: ܣܵܒܵܒ ܕܐܲܚܬܘܿܢ ܩܲܡ ܡܲܚܸܒܝܼܬܘܿܢ ܠܝܼ: ܘܗܘܼܡܸܢܵܘܟ̣ܘܿܢ ܕܐܵܢܵܐ ܡ̣ܢ ܠܟܸܣ ܒܵܒܵܐ ܦܠܸܛܠܝܼ. 28ܦܠܸܛܠܝܼ ܡ̣ܢ ܠܟܸܣ ܒܵܒܵܐ: ܘܐَܬܹܐܠܝܼ ܠܥܵܠܡܵܐ: ܘܡܸܢَܕܪܸܫَ ܒܸܫܒ̣ܵܩܵܐ ܝܘܸܢ ܠܥܵܠܡܵܐ: ܘܒܹܐܙܵܠܵܐ ܝܘܸܢ ܠܟܸܣ ܒܵܒܵܐ. 29ܐܵܡܪܝܼ ܐܸܠܹܗ ܬܲܠܡܝܼܕܘܼ̈ܗܝ: ܗܵܐ: ܐܵܕܝܼܵܐ ܐܲܫܟܵܪܵܐ ܗܲܡܙܘܼܡܹܐ ܝܘܸܬ: ܘܡܵܣܵܠܵܐ ܠܹܐ ܝܘܸܬ ܗܲܡܙܘܼܡܹܐ. 30ܐܵܕܝܼܵܐ ܒܝܼܕܵܥܝܵܐ ܝܘܵܚ ܕܟܠ ܡܸܢܕܝܼ ܟܹܐ ܝܵܕܥܸܬ: ܘܠܹܐ ܝܘܸܬ ܣܢܝܼܩܵܐ ܕܐ݇ܢܵܫܵܐ ܒܵܩܸܪܘܼܟ. ܒܐܵܗܵܐ ܗܲܡܘܼܢܹܐ ܝܘܵܚ ܕܡ̣ܢ ܐܲܠܵܗܵܐ ܦܠܸܛܠܘܼܟܼ. 31ܓ̰ܘܼܘܸܒܠܹܗ ܐܸܠܵܝܗܝ ܝܼܫܘܿܥ: ܐܵܕܝܼܵܐ ܗܲܡܘܼܢܹܐ ܝܬܘܿܢ. ܗܵܐ: ܒܹܐܬܵܝܵܐ ܝ݇ܠܵܗ̇ ܣܵܥܲܬ: ܕܒܸܬ ܦܵܝܫܝܼܬܘܿܢ ܒܘܼܪܒܸܙܹܐ ܐ݇ܢܵܫܵܐ ܠܕܘܼܟܬܹܗ: ܘܒܸܬ ܫܵܒ̣ܩܝܼܬܘܿܢ ܠܝܼ ܒܢܲܦ̮ܫܝܼ. 32ܘܠܹܐ ܝܘܸܢ ܒܢܲܦ̮ܫܝ: ܣܵܒܵܒ ܕܒܵܒܵܐ ܥܲܡܝܼ ܝܠܹܗ. 33ܐܲܢܹܐ ܐَܡܸܪܝܼ ܐܸܠܵܘܟ̣ܘܿܢ: ܕܒܝܼܝܼ ܗܵܘܹܐ ܠܵܘܟ̣ܘܿܢ ܫܠܵܡܵܐ ܓܵܘ ܥܵܠܡܵܐ ܟܹܐ ܗܵܘܹܐ ܠܵܘܟ̣ܘܿܢ ܐܘܼܠܨܵܢܵܐ: ܐܸܠܵܐ ܗَܘܹܝܡܘܿܢ ܠܸܒܵܢܹ̈ܐ: ܐܵܢܵܐ ܓܼܠܝܼܒܵܐ ܝܘܸܢ ܠܥܵܠܡܵܐ.