0:00
/
1ܒܵܬَܪ ܐܲܢܹܐ ܐَܙܸܠܹܗ ܝܼܫܘܿܥ ܠܡܲܪܙܵܐ ܐ݇ܚܹܪ݇ܢܵܐ ܕܝܵܡܵܐ ܕܓܠܝܼܠܵܐ: ܗ̇ܝ ܕܛܹܒ̇ܪܝܼܘܿܣ. 2ܘܐَܙܸܠܗܘܿܢ ܒܵܬَܪܹܗ ܟܸܢܫܹ̈ܐ ܪܵܒܵܐ: ܣܵܒܵܒ ܕܒܸܚܙܵܝܵܐ ܗ݇ܘܵܘ ܢܝܼܫܲܢܩܹ̈ܐ ܕܥܒܸܕܠܹܗ ܒܡܸܪ̈ܥܝܹܐ. 3ܘܐ݇ܣܸܩܠܹܗ ܝܼܫܘܿܥ ܠܛܘܼܪܵܐ: ܘܬܵܡܵܐ ܝܬܸܒ̣ܠܹܗ ܥܲܡ ܬܲܠܡܝܼܕܘܼ̈ܗܝ. 4ܐܝܼܢܵܐ ܩܘܼܪܒܵܐ ܗ݇ܘܵܐ ܦܸܨܚܵܐ: ܥܹܐܕܵܐ ܕܝܗَܘܼܕܵܝܹ̈ܐ. 5ܘܡܘܼܪܸܡܠܹܗ ܝܼܫܘܿܥ ܥܲܝܢܘܼ̈ܗܝ: ܘܟܲܕ ܚܙܹܐܠܹܗ ܕܟܸܢܫܵܐ ܪܵܒܵܐ ܒܹܐܬܵܝܵܐ ܠܟܸܣܠܹܗ: ܐَܡܝܼܪܹܗ ܠܦܝܼܠܝܼܦܘܿܣ: ܡܐܲܝܟܵܐ ܙܵܒ̣ܢܵܚ ܠܲܚܡܵܐ ܕܐܵܟ̣ܠܝܼ ܐܲܢܹܐ. 6ܐܝܼܢܵܐ ܐܵܗܵܐ ܐَܡܝܼܪܹܗ ܟܲܕ ܓ̰ܵܪܘܿܒܹܗ: ܣܵܒܵܒ ܗ̇ܘ ܒܝܼܕܵܥܝܵܐ ܗ݇ܘܵܐ ܡܘܼܕܝܼ ܗܕܝܼܪܵܐ ܗ݇ܘܵܐ ܠܸܥܒ̣ܵܕܵܐ. 7ܓ̰ܘܼܘܸܒܠܹܗ ܐܸܠܹܗ ܦܝܼܠܝܼܦܘܿܣ: ܠܲܚܡܵܐ ܕܬܪܹܝܡܵܐܐ ܕܸܝܢܵܪܹ̈ܐ ܠܹܐ ܡܵܠܹܐ ܠܗ݇ܘܿܢ: ܟܲܕ ܚܲܕَܟ̰ܵܐ ܟܠ ܚܲܕَ ܫܵܩܸܠ. 8ܐܵܡܸܪ ܐܸܠܹܗ ܚܲܕَ ܡ̣ܢ ܬܲܠܡܝܼܕܘܼ̈ܗܝ: ܐܲܢܕܪܹܐܘܿܣ: ܐܵܚܘܿܢܹܗ ܕܫܸܡܥܘܿܢ ܟܹܐܦܵܐ. 9ܐܝܼܬ ܠܲܐܟ̣ܵܐ ܚܲܕَ ܝܵܠܵܕَܐ: ܕܐܝܼܬ ܠܹܗ ܚܲܡܸܫ ܓܸܪ̈ܕܲܝܹܐ ܕܣܲܥܪܹ̈ܐ ܘܬܪܹܝ ܢܘܼܢܹ̈ܐ ܕܲܝܩܹ̈ܐ: ܐܸܠܵܐ ܐܲܢܹܐ ܡܘܼܕܝܼ ܝܢܵܐ ܠܐܲܢܹܐ ܟܠܵܝܗܝ. 10ܐܵܡܸܪ ܝܼܫܘܿܥ: ܥܒ̣ܘܿܕܘܿܢ ܐ݇ܢܵܫܹ̈ܐ ܕܝܵܬܒ̣ܝܼ. ܘܓܸܠܵܐ ܪܵܒܵܐ ܗ݇ܘܵܐ ܒܗܵܝ ܕܘܼܟܬܵܐ: ܘܝܬܸܒ̣ܠܘܿܢ ܗܲܕܟ̣ܵܐ ܐ݇ܢܵܫܹ̈ܐ ܒܡܸܢܝܵܢܵܐ ܐܲܝܟܼ ܚܲܡܫܵܐ ܐܲܠܦܹ̈ܐ. 11ܘܫܩܸܠܹܗ ܝܼܫܘܿܥ ܠܲܚܡܵܐ: ܘܒܘܼܪܸܟ̣ܠܹܗ: ܘܦܘܼܠܹܠܹܗ ܠܐܵܢܝܼ ܕܝܬܝܼܒܹܐ ܗ݇ܘܵܘ ܘܗܲܕܟ̣ܵܐ ܐܘܼܦ ܡ̣ܢ ܢܘܼܢܹ̈ܐ ܟܡܵܐ ܕܒܣܸܡܠܵܐ ܠܗ݇ܘܿܢ. 12ܘܟܲܕ ܣܒܥܹܐܠܗܘܿܢ: ܐَܡܝܼܪܹܗ ܠܬܲܠܡܝܼܕܘܼ̈ܗܝ: ܓ̰ܲܡܸܥܡܘܿܢ ܩܸܛܥܵܛܹ̈ܐ ܕܙܸܕܠܘܿܢ: ܕܠܵܐ ܬܵܠܸܩ ܡܸܢܕܝܼ. 13ܗܲܕܟ̣ܵܐ ܓ̰ܘܼܡܸܥܠܗܘܿܢ: ܘܡܠܹܠܗܘܿܢ ܬܪܸܥܣܲܪ ܩܘܼܦܹ̈ܐ ܩܸܛܥܵܛܹ̈ܐ ܡ̣ܢ ܚܲܡܫܵܐ ܠܲܚܡܹ̈ܐ ܕܣܲܥܪܹ̈ܐ: ܐܲܝܢܝܼ ܕܙܸܕܠܗܘܿܢ ܠܐܵܢܝܼ ܕܐَܟܼܸܠܗܘܿܢ. 14ܐܝܼܢܵܐ ܐ݇ܢܵܫܹ̈ܐ ܕܚܙܹܐܠܗܘܿܢ ܢܝܼܫܲܢܩܵܐ ܕܥܒܸܕܠܹܗ: ܐَܡܸܪܗܘܿܢ: ܒܫܲܪܝܼܪܘܼܬܵܐ ܐܵܗܵܐ ܝܠܹܗ ܢܒ̣ܝܼܵܐ ܕܐܵܬܹܐ ܠܥܵܠܡܵܐ. 15ܐܝܼܢܵܐ ܟܲܕ ܝܼܫܘܿܥ ܝܕܸܥܠܹܗ ܕܗܕܝܼܪܹܐ ܗ݇ܘܵܘ ܕܐܵܬܝܼ ܫܵܩܠܝܼ ܠܹܗ ܒܚܲܝܠܵܐ ܘܥܵܒ̣ܕܝܼ ܠܹܗ ܡܲܠܟܵܐ: ܫܘܼܢܹܐܠܹܗ ܡܸܢَܕܪܸܫَ ܠܛܘܼܪܵܐ ܗ̇ܘ ܒܢܲܦ̮ܫܹܗ. 16ܘܟܲܕ ܗَܘܹܐܠܹܗ ܪܲܡܫܵܐ: ܨܠܹܠܗܘܿܢ ܬܲܠܡܝܼܕܘܼ̈ܗܝ ܠܝܵܡܵܐ. 17ܘܥܒܼܸܪܗܘܿܢ ܓܵܘ ܓܵܡܝܼ: ܘܒܹܐܬܵܝܵܐ ܗ݇ܘܵܘ ܠܡܲܪܙܵܐ ܐ݇ܚܹܪ݇ܢܵܐ ܕܝܵܡܵܐ ܠܟܦܲܪܢܵܚܘܿܡ: ܘܐܵܕܝܼܵܐ ܗَܘܹܐܠܹܗ ܚܘܼܒ̣ܝܼܵܐ: ܘܠܹܐ ܗ݇ܘܵܐ ܐܸܬܝܸܐ ܠܟܸܣܠܵܝܗܝ ܝܼܫܘܿܥ. 18ܘܝܵܡܵܐ ܩܸܡܠܵܗ̇ ܥܲܠܵܝܗܝ: ܣܵܒܵܒ ܕܦܵܘܚܵܐ ܓܘܼܪܵܐ ܕܒܸܡܚܵܝܵܐ ܗ݇ܘܵܐ. 19ܘܛܪܹܠܗܘܿܢ ܐܲܝܟܼ ܥܸܣܪܝܼ ܘܚܲܡܸܫ ܝܲܢ ܬܠܵܬَܝ ܐܸܣܛ̈ܕܵܘܵܬܵܐ: ܘܚܙܹܐܠܗܘܿܢ ܠܝܼܫܘܿܥ ܒܸܚܕܵܪܵܐ ܥܲܠ ܝܵܡܵܐ: ܘܒܹܐܬܵܝܵܐ ܩܘܼܪܒܵܐ ܠܓܵܡܝܼ: ܘܙܕܸܥܠܗܘܿܢ. 20ܐܝܼܢܵܐ ܗ̇ܘ ܐَܡܝܼܪܹܗ ܐܸܠܵܝܗܝ: ܐܵܢܵܐ ܝܘܸܢ: ܠܵܐ ܙܵܕܥܝܼܬܘܿܢ. 21ܘܒܥܹܐܠܗܘܿܢ ܕܩܵܒ̇ܠܝܼ ܗ݇ܘܵܘ ܠܹܗ ܓܵܘ ܓܵܡܝܼ: ܘܒܗ̇ܝ ܣܵܥܲܬ ܓܵܡܝܼ ܗَܘܹܐ ܠܵܗ̇ ܠܟܸܣ ܐܲܪܥܵܐ ܗ̇ܝ ܕܒܹܐܙܵܠܵܐ ܗ݇ܘܵܘ ܝ݇ܠܵܗ̇. 22ܘܒܝܵܘܡܵܐ ܕܒܵܬَܪܹܗ ܟܸܢܫܵܐ ܕܟܸܠܝܵܐ ܗ݇ܘܵܐ ܒܡܲܪܙܵܐ ܐ݇ܚܹܪ݇ܢܵܐ ܕܝܵܡܵܐ: ܚܙܹܐܠܗܘܿܢ ܕܓܵܡܝܼ ܐܚܹܪَܬܵܐ ܠܲܝܬ ܗ݇ܘܵܐ ܬܵܡܵܐ: ܫܒ̣ܘܿܩ ܡ̣ܢ ܚܕܵܐ: ܘܕܠܵܐ ܥܒܼܸܪܹܗ ܝܼܫܘܿܥ ܥܲܡ ܬܲܠܡܝܼܕܘܼ̈ܗܝ ܓܵܘ ܓܵܡܝܼ: ܐܸܠܵܐ ܬܲܠܡܝܼܕܘܼ̈ܗܝ ܒܢܲܦ̮ܫܵܝܗܝ ܐَܙܸܠܗܘܿܢ. 23ܐܝܼܢܵܐ ܐَܬܝܹܐ ܗ݇ܘܵܘ ܓܵܡ̈ܝܹܐ ܡ̣ܢ ܛܹܒܲܪܝܼܘܿܣ ܩܘܼܪܒܵܐ ܠܗ̇ܝ ܕܘܼܟܬܵܐ ܕܐَܟܼܸܠܗܘܿܢ ܓܵܘܵܗ̇ ܠܲܚܡܵܐ: ܟܲܕ ܒܘܼܪܸܟ̣ܠܹܗ ܝܼܫܘܿܥ. 24ܘܟܲܕ ܚܙܹܐܠܹܗ ܟܸܢܫܵܐ ܕܠܹܐ ܗ݇ܘܵܐ ܬܵܡܵܐ ܝܼܫܘܿܥ: ܐܘܼܦ ܠܵܐ ܬܲܠܡܝܼܕܘܼ̈ܗܝ: ܐܣܸܩܠܗܘܿܢ ܐܘܼܦ ܐܵܢܝܼ ܠܓܵܡ̈ܝܹܐ ܘܐ݇ܬܹܐܠܗܘܿܢ ܠܟܦܲܪܢܵܚܘܿܡ: ܒܸܛܲܥܝܵܐ ܠܝܼܫܘܿܥ. 25ܘܟܲܕ ܡܘܼܫَܟ̰ܸܚܠܗܘܿܢ ܐܸܠܹܗ ܒܡܲܪܙܵܐ ܐ݇ܚܹܪ݇ܢܵܐ ܕܝܵܡܵܐ: ܐܵܡܪܝܼ ܐܸܠܹܗ: ܪܵܒܝܼ: ܐܝܼܡܲܢ ܐܬܹܠܘܼܟܼ ܠܲܐܟ̣ܵܐ. 26ܓ̰ܘܼܘܸܒܠܹܗ ܝܼܫܘܿܥ ܘܐَܡܝܼܪܹܗ ܐܸܠܵܝܗܝ: ܬܪܘܿܨܵܐ: ܬܪܘܿܨܵܐ: ܒܹܐܡܵܪܵܐ ܝܘܸܢ ܐܸܠܵܘܟ̣ܘܿܢ: ܒܸܛܲܥܝܵܐ ܝܬܘܿܢ ܐܸܠܝܼ: ܠܵܐ ܣܵܒܵܒ ܕܚܙܹܠܵܘܟ̣ܘܿܢ ܢܝܼܫܲܢܩܹ̈ܐ: ܐܸܠܵܐ ܕܐܟܸܠܵܘܟ̣ܘܿܢ ܠܲܚܡܵܐ ܘܣܒܸܥܠܵܘܟ̣ܘܿܢ. 27ܠܵܐ ܦܵܠܚܝܼܬܘܿܢ ܠܡܹܐܟ̣ܘܼܠܬܵܐ ܕܬܵܠܩܵܐ: ܐܸܠܵܐ ܡܹܐܟ̣ܘܼܠܬܵܐ ܕܦܵܝܫܵܐ ܠܚܲܝܹ̈ܐ ܕܠܐܵܒܲܕ: ܗ̇ܝ ܕܒܪܘܿܢܹܗ ܕܐ݇ܢܵܫܵܐ ܒܸܬ ܝܵܗܒܸܠ ܠܵܘܟ̣ܘܿܢ: ܣܵܒܵܒ ܕܠܵܐܗܵܐ ܒܵܒܵܐ: ܐܲܠܵܗܵܐ: ܡܸܚܝܵܐ ܝܠܹܗ ܡܵܘܗܪ. 28ܘܐَܡܸܪܗܘܿܢ ܐܸܠܹܗ: ܡܘܼܕܝܼ ܥܵܒ̣ܕܵܚ ܕܦܵܠܚܵܚ ܦܘܼܠܚܵܢܹ̈ܐ ܕܐܲܠܵܗܵܐ. 29ܓ̰ܘܼܘܸܒܠܹܗ ܝܼܫܘܿܥ ܘܐَܡܝܼܪܹܗ ܐܸܠܵܝܗܝ: ܐܵܗܵܐ ܝܠܹܗ ܦܘܼܠܚܵܢܵܐ ܕܐܲܠܵܗܵܐ: ܕܗܲܡܸܢܝܼܬܘܿܢ ܒܡ̇ܢ ܕܗ̇ܘ ܫܘܼܕܸܪܹܗ. 30ܐَܡܸܪܗܘܿܢ ܗܲܕܟ̣ܵܐ ܐܸܠܹܗ: ܒܲܣ ܡܘܼܕܝܼ ܢܝܼܫܲܢܩܵܐ ܒܸܥܒ̣ܵܕܵܐ ܝܘܸܬ ܕܚܵܙܵܚ ܘܗܲܡܸܢܵܚ ܒܝܼܘܼܟ: ܡܘܼܕܝܼ ܒܸܦܠܵܚܵܐ ܝܘܸܬ. 31ܐܲܒ̣ܵܗ̈ܵܬܲܢ ܡܲܢܢܵܐ ܐَܟܼܸܠܗܘܿܢ ܓܵܘ ܒܲܪܝܼܵܐ: ܕܵܐܟ̣ܝܼ ܕܝܼܠܹܗ ܟܬܝܼܒ̣ܵܐ: ܠܲܚܡܵܐ ܡ̣ܢ ܫܡܲܝܵܐ ܝܘܼܗَܒܼܸܠܹܗ ܐܸܠܵܝܗܝ ܠܹܐܟ̣ܵܠܵܐ. 32ܐَܡܝܼܪܹܗ ܐܸܠܵܝܗܝ ܝܼܫܘܿܥ: ܬܪܘܿܨܵܐ: ܒܹܐܡܵܪܵܐ ܝܘܸܢ ܐܸܠܵܘܟ̣ܘܿܢ: ܠܵܐ ܡܘܼܫܹܐ ܝܘܼܗَܒܼܸܠܹܗ ܐܸܠܵܘܟ̣ܘܿܢ ܠܲܚܡܵܐ ܡ̣ܢ ܫܡܲܝܵܐ: ܐܸܠܵܐ ܒܵܒܝܼ ܒܝܼܵܗَܒ̣ܵܘܟ̣ܘܿܢ ܝܼܠܹܗ ܠܲܚܡܵܐ ܣܲܪܣܬ ܡ̣ܢ ܫܡܲܝܵܐ. 33ܣܵܒܵܒ ܠܲܚܡܹܗ ܕܐܲܠܵܗܵܐ ܝܠܹܗ ܗ̇ܘ ܕܒܸܨܠܵܝܵܐ ܝܠܹܗ ܡ̣ܢ ܫܡܲܝܵܐ: ܘܒܝ̣ܵܗَܒ̣ܵܐ ܝܠܹܗ ܚܲܝܹ̈ܐ ܠܥܵܠܡܵܐ. 34ܐَܡܸܪܗܘܿܢ ܐܸܠܹܗ ܗܲܕܟ̣ܵܐ: ܡܵܪܲܢ: ܒܟܠ ܙܲܒ̣ܢܵܐ ܗܲܒَܠ ܠܲܢ ܐܵܗܵܐ ܠܲܚܡܵܐ. 35ܐَܡܝܼܪܹܗ ܐܸܠܵܝܗܝ ܝܼܫܘܿܥ: ܐܵܢܵܐ ܝܘܸܢ ܠܲܚܡܵܐ ܕܚܲܝܹ̈ܐ: ܗ̇ܘ ܕܐܵܬܹܐ ܠܟܸܣܠܝܼ ܠܹܐ ܟܵܦܸܢ: ܘܗ̇ܘ ܕܗܲܡܸܢ ܒܝܼܝܼ ܗܲܪ ܠܹܐ ܨܗَܝܹܐ. 36ܐܸܠܵܐ ܐَܡܸܪܝܼ ܐܸܠܵܘܟ̣ܘܿܢ ܕܩܲܡ ܚܵܙܹܝܬܘܿܢ ܠܝܼ: ܘܠܹܐ ܝܬܘܿܢ ܗܲܡܘܼܢܹܐ. 37ܟܠ ܕܝܵܗَܒܸܠ ܠܝܼ ܒܵܒܵܐ: ܠܟܸܣܠܝܼ ܒܸܬ ܐܵܬܹܐ: ܘܗ̇ܘ ܕܠܟܸܣܠܝܼ ܐܵܬܹܐ ܠܹܐ ܦܵܠܛܸܢܹܗ ܠܒܲܕܲܪ. 38ܣܵܒܵܒ ܨܠܹܠܝܼ ܡ̣ܢ ܫܡܲܝܵܐ: ܠܵܐ ܕܥܵܒ̣ܕܸܢ ܪܸܙܵܝܵܐ ܕܝܼܝܼ: ܐܸܠܵܐ ܪܸܙܵܝܹܗ ܕܗ̇ܘ ܕܫܘܼܕܪܸܢܹܗ. 39ܘܐܵܗܵܐ ܝܠܹܗ ܪܸܙܵܝܹܗ ܕܗ̇ܘ ܕܫܘܼܕܪܸܢܹܗ: ܕܟܠ ܕܝܘܼܗَܒܼܸܠܹܗ ܐܸܠܝܼ ܠܵܐ ܬܵܠܩܸܢ ܡܸܢܹܗ: ܐܸܠܵܐ ܡܲܩܸܡܸܢܹܗ ܒܝܵܘܡܵܢܹ̈ܐ ܐَܚܵܪܵܝܵܐ. 40ܣܵܒܵܒ ܐܵܗܵܐ ܝܠܹܗ ܪܸܙܵܝܹܗ ܕܒܵܒܝܼ: ܕܟܠ ܕܚܵܙܹܐ ܠܒܪܘܿܢܵܐ ܘܗܲܡܸܢ ܒܝܹܗ: ܗܵܘܝܼ ܠܹܗ ܚܲܝܹ̈ܐ ܕܠܐܵܒܲܕ: ܘܐܵܢܵܐ ܒܸܬ ܡܲܩܸܡܸܢܹܗ ܒܝܵܘܡܵܢܹ̈ܐ ܐَܚܵܪܵܝܵܐ. 41ܐܝܼܢܵܐ ܝܗَܘܼܕܵܝܹ̈ܐ ܛܲܪܛܸܡܝܼ ܗ݇ܘܵܘ ܥܲܠܘܼܗܝ: ܕܐَܡܝܼܪܹܗ: ܐܵܢܵܐ ܝܘܸܢ ܠܲܚܡܵܐ ܕܨܠܹܐܠܹܗ ܡ̣ܢ ܫܡܲܝܵܐ. 42ܘܐَܡܸܪܗܘܿܢ: ܠܹܐ ܝܠܹܗ ܐܵܗܵܐ ܝܼܫܘܿܥ: ܒܪܘܿܢܹܗ ܕܝܵܘܣܸܦ: ܗ̇ܘ ܕܐܲܚܢܲܢ ܟܹܐ ܝܲܕܥܵܚ ܠܒܵܒܹܗ ܘܠܝܸܡܹܗ: ܒܲܣ ܕܵܐܟ̣ܝܼ ܒܹܐܡܵܪܵܐ ܝܠܹܗ ܐܵܗܵܐ: ܕܡ̣ܢ ܫܡܲܝܵܐ ܨܠܹܠܝܼ. 43ܓ̰ܘܼܘܸܒܠܹܗ ܝܼܫܘܿܥ ܘܐَܡܝܼܪܹܗ ܐܸܠܵܝܗܝ: ܠܵܐ ܛܲܪܛܸܡܝܼܬܘܿܢ ܚܲܕَ ܥܲܡ ܕܗ̇ܘ ܐ݇ܚܹܪ݇ܢܵܐ. 44ܠܵܐ ܐ݇ܢܵܫܵܐ ܡܵܨܹܐ ܕܐܵܬܹܐ ܠܟܸܣܠܝܼ: ܐܸܠܵܐ ܐܸܢ ܓܵܪܸܫ ܠܹܗ ܒܵܒܵܐ ܕܫܘܼܕܪܸܢܹܗ: ܘܐܵܢܵܐ ܒܸܬ ܡܲܩܸܡܸܢܹܗ ܒܝܵܘܡܵܢܹ̈ܐ ܐَܚܵܪܵܝܵܐ. 45ܟܬܝܼܒ̣ܵܐ ܝܠܹܗ ܒܢܒ̣̈ܝܹܐ: ܕܒܸܬ ܗܵܘܝܼ ܟܠܵܝܗܝ ܡܘܼܠܦܹ̈ܐ ܕܐܲܠܵܗܵܐ. ܟܠ ܡ̇ܢ ܕܫܡܸܥܠܹܗ ܡ̣ܢ ܒܵܒܵܐ: ܘܝܠܸܦܠܹܗ: ܟܹܐ ܐܵܬܹܐ ܠܟܸܣܠܝܼ. 46ܠܹܐ ܝ݇ܠܵܗ̇ ܕܐ݇ܢܵܫܵܐ ܚܸܙܝܵܐ ܝܠܹܗ ܠܒܵܒܵܐ: ܐܸܠܵܐ ܡ̇ܢ ܕܡ̣ܢ ܐܲܠܵܗܵܐ ܝܠܹܗ: ܗ̇ܘ ܚܸܙܝܵܐ ܝܠܹܗ ܠܒܵܒܵܐ. 47ܬܪܘܿܨܵܐ: ܬܪܘܿܨܵܐ: ܒܹܐܡܵܪܵܐ ܝܘܸܢ ܐܸܠܵܘܟ̣ܘܿܢ: ܗ̇ܘ ܕܗܲܡܸܢ ܒܝܼܝܼ ܐܝܼܬ ܠܹܗ ܚܲܝܹ̈ܐ ܕܠܐܵܒܲܕ. 48 ܐܵܢܵܐ ܝܘܸܢ ܠܲܚܡܵܐ ܕܚܲܝܹ̈ܐ. 49ܐܲܒ̣ܵܗܵܬܵܘ̈ܟ̣ܘܿܢ ܐَܟܼܸܠܗܘܿܢ ܡܲܢܢܵܐ ܓܵܘ ܒܲܪܝܼܵܐ ܘܡܝܼܬܠܗܘܿܢ. 50ܐܵܗܵܐ ܝܠܹܗ ܠܲܚܡܵܐ ܕܨܠܹܐܠܹܗ ܡ̣ܢ ܫܡܲܝܵܐ: ܕܐܵܟܼܸܠ ܐ݇ܢܵܫܵܐ ܡܸܢܹܗ: ܘܠܵܐ ܡܵܝܸܬ. 51ܐܵܢܵܐ ܝܘܸܢ ܠܲܚܡܵܐ ܚܵܝܵܐ ܕܨܠܹܠܝܼ ܡ̣ܢ ܫܡܲܝܵܐ ܐܸܢ ܐ݇ܢܵܫܵܐ ܐܵܟܼܸܠ ܡܐܵܗܵܐ ܠܲܚܡܵܐ: ܒܸܬ ܚܲܝܹܐ ܠܥܵܠܲܡ. ܘܠܲܚܡܵܐ ܗ̇ܘ ܕܐܵܢܵܐ ܒܸܬ ܝܵܗَܒܸܢ: ܦܲܓ̣ܪܝܼ ܝܠܹܗ: ܒܚܵܬܸܪ ܕܚܲܝܹ̈ܐ ܕܥܵܠܡܵܐ. 52ܐܝܼܢܵܐ ܕܪܹܫܠܗܘܿܢ ܗܲܕܟ̣ܵܐ ܝܗَܘܼܕܵܝܹ̈ܐ ܚܲܕَ ܥܲܡ ܗ̇ܘ ܐ݇ܚܹܪ݇ܢܵܐ ܒܹܐܡܵܪܵܐ: ܕܵܐܟ̣ܝܼ ܡܵܨܹܐ ܐܵܗܵܐ ܕܝܵܗَܒܸܠ ܠܲܢ ܦܲܓ̣ܪܹܗ ܠܹܐܟ̣ܵܠܵܐ. 53ܘܐَܡܝܼܪܹܗ ܐܸܠܵܝܗܝ ܝܼܫܘܿܥ: ܬܪܘܿܨܵܐ: ܬܪܘܿܨܵܐ: ܒܹܐܡܵܪܵܐ ܝܘܸܢ ܐܸܠܵܘܟ̣ܘܿܢ: ܐܸܢ ܠܵܐ ܐܵܟ̣ܠܝܼܬܘܿܢ ܦܲܓ̣ܪܹܗ ܕܒܪܘܿܢܹܗ ܕܐ݇ܢܵܫܵܐ: ܘܫܵܬܹܝܬܘܿܢ ܕܸܡܹܗ: ܠܲܝܬ ܠܵܘܟ̣ܘܿܢ ܚܲܝܹ̈ܐ ܒܓܵܢܵܘܟ̣ܘܿܢ. 54ܡ̇ܢ ܕܐܵܟܼܸܠ ܦܲܓ̣ܪܝܼ: ܘܫܵܬܹܐ ܕܸܡܝܼ: ܐܝܼܬ ܠܹܗ ܚܝܹ̈ܐ ܕܠܐܵܒܲܕ: ܘܐܵܢܵܐ ܒܸܬ ܡܲܩܸܡܸܢܹܗ ܒܝܵܘܡܵܐ ܐَܚܵܪܵܝܵܐ. 55ܣܵܒܵܒ ܦܲܓ̣ܪܝܼ ܒܫܲܪܝܼܪܘܼܬܵܐ ܡܹܐܟ̣ܘܼܠܬܵܐ ܝܠܹܗ: ܘܕܸܡܝܼ ܒܫܲܪܝܼܪܘܼܬܵܐ ܫܬܵܝܵܐ ܝܠܹܗ. 56ܡ̇ܢ ܕܐܵܟܼܸܠ ܦܲܓ̣ܪܝܼ ܘܫܵܬܹܐ ܕܸܡܝܼ: ܒܝܼܝܼ ܟܹܐ ܥܲܪܩܸܠ: ܘܐܵܢܵܐ ܒܝܹܗ. 57ܕܵܐܟ̣ܝܼ ܕܫܘܼܕܪܸܢܹܗ ܒܵܒܵܐ ܚܲܝܵܐ: ܘܐܵܢܵܐ ܒܸܚܵܝܵܐ ܝܘܸܢ ܣܵܒܵܒ ܕܒܵܒܵܐ: ܗܲܕܟ̣ܵܐ ܡ̇ܢ ܕܐܵܟܼܸܠܝܼ: ܐܘܼܦ ܗ̇ܘ ܒܸܬ ܚܲܝܹܐ ܣܵܒܵܒ ܕܝܼܝܼ. 58ܐܵܗܵܐ ܝܠܹܗ ܠܲܚܡܵܐ ܕܨܠܹܐܠܹܗ ܡ̣ܢ ܫܡܲܝܵܐ: ܠܵܐ ܐܝܟ ܕܐَܟܼܸܠܗܘܿܢ ܐܲܒ̣ܵـ̈ـܗܵܬܵܐ ܘܡܝܼܬܠܗܘܿܢ ܡ̇ܢ ܕܐܵܟܼܸܠ ܡܐܵܗܵܐ ܠܲܚܡܵܐ ܒܸܬ ܚܲܝܹܐ ܠܥܵܠܲܡ. 59ܐܲܢܹܐ ܐَܡܝܼܪܹܗ ܓܵܘ ܟܢܘܼܫܬܵܐ ܟܲܕ ܡܵܠܘܿܦܹܐ ܒܟܦܲܪܢܵܚܘܿܡ. 60ܘܪܵܒܵܐ ܕܫܡܸܥܠܗَܘܿܢ ܡ̣ܢ ܬܲܠܡܝܼܕܘܼ̈ܗܝ ܐَܡܸܪܗܘܿܢ: ܥܲܨܝܵܐ ܝܠܹܗ ܐܵܗܵܐ ܚܲܒ̇ܪܵܐ: ܡܵܢܝܼ ܡܵܨܹܐ ܠܸܫܡܲܥܝܹܗ. 61ܐܝܼܢܵܐ ܝܼܫܘܿܥ ܝܕܸܥܠܹܗ ܒܓܵܢܹܗ ܕܬܲܠܡܝܼܕܘܼ̈ܗܝ ܛܲܪܛܘܼܡܹܐ ܗ݇ܘܵܘ ܥܲܠ ܕܐܵܗܵܐ: ܘܐَܡܝܼܪܹܗ ܐܸܠܵܝܗܝ: ܐܵܗܵܐ ܡܲܟܦܘܼܪܵܘܟ̣ܘܿܢ ܝ݇ܠܵܗ̇. 62ܒܲܣ ܐܸܢ ܚܵܙܹܝܬܘܿܢ ܠܒܪܘܿܢܹܗ ܕܐ݇ܢܵܫܵܐ ܒܹܐܣܵܩܵܐ ܠܕܘܼܟܬܵܐ ܕܝܼܗ݇ܘܵܐ ܡ̣ܢ ܩܵܕَܡܵܝܬܵܐ. ܪܘܼܚܵܐ ܝ݇ܠܵܗ̇ ܕܟܹܐ ܡܲܚܝܼܵܐ: ܒܸܣܪܵܐ ܠܹܐ ܥܵܒܸܕ ܦܲܝܕܵܐ ܡܸܢܕܝܼ. 63ܗܹܡܸܙܡܵܢܹ̈ܐ ܕܐܵܢܵܐ ܗܘܼܡܙܸܡܵܐ ܝܘܸܢ ܥܲܡܵܘܟ̣ܘܿܢ: ܪܘܼܚܵܐ ܝܢܵܐ ܘܚܲܝܹ̈ܐ ܝܢܵܐ. 64ܐܸܠܵܐ ܐܝܼܬ ܐ݇ܢܵܫܹ̈ܐ ܡܸܢܵܘܟ̣ܘܿܢ ܕܠܹܐ ܝܢܵܐ ܗܲܡܘܼܢܹܐ. ܣܵܒܵܒ ܕܟܹܐ ܝܵܕܸܥ ܗ݇ܘܵܐ ܝܼܫܘܿܥ ܡ̣ܢ ܩܵܕَܡܵܝܬܵܐ ܡܵܢܝܼ ܗ݇ܘܵܘ ܐܵܢܝܼ ܕܠܹܐ ܗ݇ܘܵܘ ܗܲܡܘܼܢܹܐ: ܘܡܵܢܝܼ ܗ݇ܘܵܐ ܗ̇ܘ ܕܣܵܦܹܐ ܗ݇ܘܵܐ ܠܹܗ. 65ܘܐَܡܝܼܪܹܗ: ܣܵܒܵܒ ܕܐܵܗܵܐ ܐَܡܸܪܝܼ ܐܸܠܵܘܟ̣ܘܿܢ: ܐ݇ܢܵܫܵܐ ܠܹܐ ܡܵܨܹܐ ܕܐܵܬܹܐ ܠܟܸܣܠܝܼ: ܐܸܢ ܠܵܐ ܗܵܘܹܐ ܝܘܼܗَܒ̣ܵܐ ܐܸܠܹܗ ܡ̣ܢ ܒܵܒܝܼ. 66ܡ̣ܢ ܕܐܵܗܵܐ ܪܵܒܵܐ ܡ̣ܢ ܬܲܠܡܝܼܕܘܼ̈ܗܝ ܐَܙܸܠܗܘܿܢ ܠܒܵܬَܪܵܝܗܝ: ܘܐ݇ܚܹܪ݇ܢܵܐ ܠܵܐ ܚܕܸܪܘܿܢ ܥܲܡܹܗ. 67ܐَܡܝܼܪܹܗ ܗܲܕܟ̣ܵܐ ܝܼܫܘܿܥ ܠܬܪܸܥܣܲܪܬܹܗ: ܐܘܼܦ ܐܲܚܬܘܿܢ ܒܸܒܥܵܝܵܐ ܝܬܘܿܢ ܠܹܐܙܵܠܵܐ. 68ܓ̰ܘܼܘܸܒܠܹܗ ܫܸܡܥܘܿܢ ܟܹܐܦܵܐ: ܡܵܪܝܼ: ܠܟܸܣ ܡܵܢܝܼ ܐܵܙܵܠَܚ: ܗܹܡܸܙܡܵܢܹ̈ܐ ܕܚܲܝܹ̈ܐ ܕܠܐܵܒܲܕ ܐܲܢَܬ ܐܝܼܬ ܠܘܼܟܼ. 69ܘܐܲܚܢܲܢ ܗܘܼܡܸܢܲܢ ܘܝܕܸܥܠܲܢ ܕܐܲܢَܬ ܝܼܘܸܬ ܩܲܕܝܼܫܵܐ ܕܐܲܠܵܗܵܐ. 70ܓ̰ܘܼܘܸܒܠܹܗ ܐܸܠܵܝܗܝ ܝܼܫܘܿܥ: ܐܵܢܵܐ ܠܵܐ ܩܲܡ ܓܵܒܸ̇ܢܵܘܟ̣ܘܿܢ ܬܪܸܥܣܲܪ: ܘܚܲܕَ ܡܸܢܵܘܟ̣ܘܿܢ ܣܵܛܵܢܵܐ ܝܠܹܗ. 71ܐܝܼܢܵܐ ܐَܡܝܼܪܹܗ ܥܲܠ ܝܼܗܘܼܕܵܐ ܒܪܘܿܢܹܗ ܕܫܸܡܥܘܿܢ ܣܟܲܪܝܘܿܛܵܐ: ܣܵܒܵܒ ܗ̇ܘ ܗܕܝܼܪܵܐ ܗ݇ܘܵܐ ܕܣܵܦܹܐ ܗ݇ܘܵܐ ܠܹܗ: ܚܲܕَ ܡ̣ܢ ܬܪܸܥܣܲܪ.