0:00
/
1ܐܝܼܢܵܐ ܝܼܫܘܿܥ ܐَܙܸܠܹܗ ܠܛܘܼܪܵܐ ܕܙܲܝܬܹ̈ܐ. 2ܘܒܨܲܦܪܵܐ ܡܸܢَܕܪܸܫَ ܐَܬܹܐܠܹܗ ܠܗܲܝܟܠܵܐ: ܘܟܠܹܗ ܛܵܝܸܦܵܐ ܐَܬܹܐܠܹܗ ܠܟܸܣܠܹܗ: ܘܟܲܕ ܝܬܸܒ̣ܠܹܗ: ܡܘܼܠܦܵܝܠܹܗ. 3ܐܝܼܢܵܐ ܡܘܼܬَܝܹܠܗܘܿܢ ܠܟܸܣܠܹܗ ܣܵܦܪܹ̈ܐ ܘܦܪ̈ܝܼܫܹܐ ܠܚܕܵܐ ܒܲܟ̣ܬܵܐ ܕܦܸܫܠܵܗ̇ ܕܒ̣ܝܼܩܬܵܐ ܒܩܲܗܒܘܼܬܵܐ: ܘܟܲܕ ܡܘܼܟܠܝܼܵܠܗܘܿܢ ܒܒܹܝܦܲܠܓܵܐ. 4ܐܵܡܪܝܼ ܐܸܠܹܗ: ܡܲܠܦܵܢܵܐ: ܐܵܗܵܐ ܒܲܟ̣ܬܵܐ ܦܸܫܠܵܗ̇ ܕܒ̣ܝܼܩܬܵܐ ܐܲܫܟܵܪܵܐ ܒܫܘܼܠܵܐ ܕܩܲܗܒܘܼܬܵܐ. 5ܘܓܵܘ ܢܵܡܘܿܣܵܐ: ܡܘܼܫܹܐ ܦܘܼܩܸܕܠܹܗ ܐܸܠܲܢ ܕܠܐܵܢܝܼ ܕܐܲܝܟܼ ܐܲܢܹܐ ܪܵܓ̰ܡܵܚ. 6ܒܲܣ ܐܲܢَܬ ܡܘܼܕܝܼ ܒܹܐܡܵܪܵܐ ܝܘܸܬ. ܐܵܗܵܐ ܐَܡܸܪܗܘܿܢ ܠܓ̰ܵܪܘܿܒܹܗ: ܕܗܵܘܝܵܐ ܗ݇ܘܵܐ ܠܗ݇ܘܿܢ ܕܡܵܚܝܼ ܕܲܪ̈ܗܲܩܘܼܗܝ ܐܝܼܢܵܐ ܝܼܫܘܿܥ ܟܸܦܠܹܗ ܠܐܸܠܬܸܚ: ܘܟܬܸܒ̣ܠܹܗ ܒܨܸܒܥܹܗ ܥܲܠ ܐܲܪܥܵܐ. 7ܐܝܼܢܵܐ ܟܲܕ ܥܘܼܪܩܸܠܗܘܿܢ ܗܲܪ ܒܵܩܘܿܪܹܗ: ܩܸܡܠܹܗ: ܘܐَܡܝܼܪܹܗ ܐܸܠܵܝܗܝ: ܟܠ ܡܸܢܵܘܟ̣ܘܿܢ ܕܝܼܠܹܗ ܕܠܵܐ ܚܛܝܼܬܵܐ: ܩܵܕَܡܵܝܵܐ ܪܲܦܹܐ ܥܲܠܘܼܗ̇ ܟܹܐܦܵܐ. 8ܘܡܸܢَܕܪܸܫَ ܟܲܕ ܟܸܦܠܹܗ ܟܬܸܒ̣ܠܹܗ ܥܲܠ ܐܲܪܥܵܐ. 9ܐܝܼܢܵܐ ܐܵܢܝܼ: ܟܲܕ ܫܡܸܥܠܗَܘܿܢ: ܦܠܸܛܠܗܘܿܢ ܚܲܕَ ܒܚܲܕَ: ܟܲܕ ܫܘܼܪܹܠܗܘܿܢ ܡ̣ܢ ܚܘܵܪ̈ܕܸܩܢܹܐ ܗܲܠ ܐَܚܵܪ̈ܵܝܹܐ: ܘܦܸܫܠܹܗ ܫܒ̣ܝܼܩܵܐ ܝܼܫܘܿܥ ܒܢܲܦ̮ܫܹܗ: ܘܒܲܟ̣ܬܵܐ ܟܲܕ ܝܼܗ݇ܘܵܐ ܒܒܹܝܦܲܠܓܵܐ. 10ܐܝܼܢܵܐ ܟܲܕ ܩܸܡܠܹܗ ܝܼܫܘܿܥ: ܐَܡܝܼܪܹܗ ܐܸܠܵܗ̇: ܒܲܟ̣ܬܵܐ: ܐܲܝܟܵܐ ܝܢܵܐ: ܐ݇ܢܵܫܵܐ ܠܵܐ ܩܲܡ ܥܵܒܸܕ ܠܵܟ̣ܝ ܓܘܼܢܗܟܵܪ. 11ܘܗ̇ܝ ܐ݇ܡܸܪܵܗ̇: ܟ̰ܘܼ ܐ݇ܢܵܫܵܐ: ܡܵܪܝܵܐ. ܘܐَܡܝܼܪܹܗ ܝܼܫܘܿܥ: ܐܘܼܦ ܐܵܢܵܐ ܠܹܐ ܥܵܒ̣ܕܸܢܵܟ̣ܝ ܓܘܼܢܵܗܟܵܪ ܙܹܠَܐܝܼ: ܡܐܵܕܝܼܵܐ ܡܸܢَܕܪܸܫَ ܠܵܐ ܚܵܛܝܵܬܝ. 12ܐܝܼܢܵܐ ܡܸܢَܕܪܸܫَ ܗܘܼܡܙܸܡܠܹܗ ܝܼܫܘܿܥ ܥܲܡܵܝܗܝ ܘܐَܡܝܼܪܹܗ: ܐܵܢܵܐ ܝܘܸܢ ܒܲܗܪܹܗ ܕܥܵܠܡܵܐ. ܡ̇ܢ ܕܒܵܬَܪܝܼ ܐܵܬܹܐ ܠܹܐ ܚܵܕܸܪ ܒܚܸܫܟܵܐ: ܐܸܠܵܐ ܒܸܬ ܗܵܘܹܐ ܠܹܗ ܒܲܗܪܵܐ ܕܚܲܝܹ̈ܐ. 13ܐܵܡܪܝܼ ܗܲܕܟ̣ܵܐ ܐܸܠܹܗ ܦܪ̈ܝܼܫܹܐ: ܐܲܢَܬ ܥܲܠ ܓܵܢܘܼܟ ܒܝܼܵܗَܒ̣ܵܐ ܝܘܸܬ ܣܵܗܕܘܼܬܵܐ: ܣܵܗܕܘܼܬܘܼܟ ܠܹܐ ܝ݇ܠܵܗ̇ ܫܲܪܝܼܪܬܵܐ. 14ܓ̰ܘܼܘܸܒܠܹܗ ܝܼܫܘܿܥ ܘܐَܡܝܼܪܹܗ ܐܸܠܵܝܗܝ: ܐܵܦܸܢ ܕܐܵܢܵܐ ܒܝܼܵܗَܒ̣ܵܐ ܝܘܸܢ ܣܵܗܕܘܼܬܵܐ ܥܲܠ ܓܵܢܝܼ: ܫܲܪܝܼܪܬܵܐ ܝ݇ܠܵܗ̇ ܣܵܗܕܘܼܬܝܼ: ܣܵܒܵܒ ܕܒܝܼܕܵܥܝܵܐ ܝܘܸܢ ܡܐܲܝܟܵܐ ܐَܬܹܐܠܝܼ: ܘܠܲܐܝܟܵܐ ܒܹܐܙܵܠܵܐ ܝܘܸܢ: ܐܝܼܢܵܐ ܐܲܚܬܘܿܢ ܠܹܐ ܝܬܘܿܢ ܒܝܼܕܵܥܝܵܐ ܡܐܲܝܟܵܐ ܒܹܐܬܵܝܵܐ ܝܘܸܢ: ܘܠܵܐ ܠܐܲܝܟܵܐ ܒܹܐܙܵܠܵܐ ܝܘܸܢ. 15ܐܲܚܬܘܿܢ ܦܲܓ̣ܪܵܢܵܐܝܼܬ ܒܸܕܝܵܢܵܐ ܝܬܘܿܢ: ܐܵܢܵܐ ܠܐ݇ܢܵܫܵܐ ܠܹܐ ܝܘܸܢ ܒܸܕܝܵܢܵܐ. 16ܘܐܸܢ ܕܵܝܢܸܢ: ܕܝܼܘܵܢܝܼ ܫܲܪܝܼܪܬܵܐ ܝ݇ܠܵܗ̇: ܣܵܒܵܒ ܠܹܐ ܝܘܸܢ ܒܢܲܦ̮ܫܝܼ: ܐܸܠܵܐ ܐܵܢܵܐ ܘܒܵܒܝܼ ܕܫܘܼܕܪܸܢܹܗ. 17ܘܒܢܵܡܘܿܣܵܘܟ̣ܘܿܢ ܟܬܝܼܒ̣ܵܐ ܝܠܹܗ: ܕܣܵܗܕܘܼܬܵܐ ܕܬܪܹܝ ܐ݇ܢܵܫܹ̈ܐ ܫܲܪܝܼܪܬܵܐ ܝ݇ܠܵܗ̇. 18ܐܵܢܵܐ ܝܘܸܢ ܕܒܝܼܵܗَܒ̣ܵܐ ܝܘܸܢ ܣܵܗܕܘܼܬܵܐ ܥܲܠ ܓܵܢܝܼ: ܘܒܵܒܵܐ ܕܫܘܼܕܪܸܢܹܗ ܒܝܼܵܗَܒ̣ܵܐ ܝܠܹܗ ܣܵܗܕܘܼܬܵܐ ܥܲܠܝܼ. 19ܐَܡܸܪܗܘܿܢ ܐܸܠܹܗ: ܐܲܝܟܵܐ ܝܠܹܗ ܒܵܒܘܼܟ: ܓ̰ܘܼܘܸܒܠܹܗ ܝܼܫܘܿܥ: ܘܠܵܐ ܐܸܠܝܼ ܒܝܼܕܵܥܝܵܐ ܝܬܘܿܢ: ܘܠܵܐ ܠܒܵܒܝܼ: ܐܸܢ ܐܸܠܝܼ ܗܵܘܹܝܬܘܿܢ ܗ݇ܘܵܘ ܒܝܼܕܵܥܝܵܐ: ܐܘܼܦ ܠܒܵܒܝܼ ܒܸܬ ܝܵܕܥܝܼܬܘܿܢ ܗ݇ܘܵܘ. 20ܐܲܢܹܐ ܗܹܡܸܙܡܵܢܹ̈ܐ ܗܘܼܡܙܸܡܠܹܗ ܓܵܘ ܒܹܝܬ ܚܲܙܝܼܢܵܐ: ܟܲܕ ܡܵܠܘܿܦܹܐ ܓܵܘ ܗܲܝܟܠܵܐ: ܘܠܵܐ ܐ݇ܢܵܫܵܐ ܕܒܸܩܠܹܗ: ܣܵܒܵܒ ܗܵܠܵܐ ܠܹܐ ܗ݇ܘܵܐ ܐܬܝܼܵܐ ܣܵܥܲܬܹܗ. 21ܐَܡܝܼܪܹܗ ܐܸܠܵܝܗܝ ܡܸܢَܕܪܸܫَ: ܐܵܢܵܐ ܒܹܐܙܵܠܵܐ ܝܘܸܢ: ܘܒܸܬ ܛܵܥܝܼܬܘܿܢ ܐܸܠܝܼ: ܘܒܸܬ ܡܵܝܬܝܼܬܘܿܢ ܒܚܛܝܼܵܬܵܘ̈ܟ̣ܘܿܢ. ܐܲܝܟܵܐ ܕܐܵܢܵܐ ܒܹܐܙܵܠܵܐ ܝܘܸܢ: ܐܲܚܬܘܿܢ ܠܹܐ ܡܵܨܹܝܬܘܿܢ ܠܹܐܬܵܝܵܐ. 22ܐَܡܸܪܗܘܿܢ ܗܲܕܟ̣ܵܐ ܝܗَܘܼܕܵܝܹ̈ܐ: ܒܸܬ ܩܵܛܸܠ ܓܵܢܹܗ: ܕܒܹܐܡܵܪܵܐ ܝܠܹܗ: ܐܲܝܟܵܐ ܕܐܵܢܵܐ ܒܹܐܙܵܠܵܐ ܝܘܸܢ ܐܲܚܬܘܿܢ ܠܹܐ ܡܵܨܹܝܬܘܿܢ ܠܹܐܬܵܝܵܐ. 23ܘܐَܡܝܼܪܹܗ ܐܸܠܵܝܗܝ: ܐܲܚܬܘܿܢ ܡ̣ܢ ܠܐܸܠܬܸܚ ܝܼܬܘܿܢ: ܘܐܵܢܵܐ ܡ̣ܢ ܠܥܸܠܸܠ ܝܼܘܸܢ: ܐܲܚܬܘܿܢ ܡ̣ܢ ܕܐܵܗܵܐ ܥܵܠܡܵܐ ܝܬܘܿܢ: ܐܵܢܵܐ ܠܹܐ ܝܘܸܢ ܡ̣ܢ ܕܐܵܗܵܐ ܥܵܠܡܵܐ. 24ܐَܡܸܪܝܼ ܐܸܠܵܘܟ̣ܘܿܢ ܕܒܸܬ ܡܵܝܬܝܼܬܘܿܢ ܒܚܛܝܼܵܬܵܘ̈ܟ̣ܘܿܢ: ܣܵܒܵܒ ܐܸܢ ܠܵܐ ܗܲܡܸܢܝܼܬܘܿܢ ܕܐܵܢܵܐ ܝܘܸܢ: ܒܸܬ ܡܵܝܬܝܼܬܘܿܢ ܒܚܛܝܼܵܬܵܘ̈ܟ̣ܘܿܢ. 25ܐَܡܸܪܗܘܿܢ ܐܸܠܹܗ: ܐܲܢَܬ ܡܵܢܝܼ ܝܘܸܬ: ܐَܡܝܼܪܹܗ ܐܸܠܵܝܗܝ ܝܼܫܘܿܥ: ܗܲܪ ܗ̇ܘ ܕܒܫܘܼܪܵܝܵܐ ܐَܡܸܪܝܼ ܐܸܠܵܘܟ̣ܘܿܢ. 26ܪܵܒܵܐ ܐܝܼܬ ܠܝܼ ܒܘܼܬ ܕܝܼܵܘܟ̣ܘܿܢ ܠܹܐܡܵܪܵܐ ܘܠܸܕܝܵܢܵܐ: ܐܸܠܵܐ ܗ̇ܘ ܕܫܘܼܕܪܸܢܹܗ ܫܲܪܝܼܪܵܐ ܝܠܹܗ. ܘܐܵܢܵܐ: ܐܵܢܝܼ ܕܫܡܸܥܠܝܼ ܡܸܢܹܗ: ܐܲܢܹܐ ܗܲܡܙܘܼܡܹܐ ܝܘܸܢ ܒܥܵܠܡܵܐ. 27ܘܠܵܐ ܝܕܸܥܠܗܘܿܢ ܕܒܵܗَܣ ܕܒܵܒܵܐ ܐَܡܝܼܪܹܗ ܐܸܠܵܝܗܝ. 28ܐَܡܝܼܪܹܗ ܗܲܕܟ̣ܵܐ ܐܸܠܵܝܗܝ ܝܼܫܘܿܥ: ܐܝܼܡܲܢ ܕܡܵܪܡܝܼܬܘܿܢ ܠܹܗ ܒܪܘܿܢܹܗ ܕܐ݇ܢܵܫܵܐ: ܗ̇ܝܓܵܗ ܒܸܬ ܝܵܕܥܝܼܬܘܿܢ ܕܐܵܢܵܐ ܝܘܸܢ: ܘܡܸܢܕܝܼ ܡ̣ܢ ܓܵܢܝܼ ܠܹܐ ܝܘܸܢ ܒܸܥܒ̣ܵܕܵܐ: ܐܸܠܵܐ ܕܵܐܟ̣ܝܼ ܕܡܘܼܠܦܸܢܹܗ ܒܵܒܵܐ: ܗܲܕܟ̣ܵܐ ܗܲܡܙܘܼܡܹܐ ܝܘܸܢ. 29ܘܗ̇ܘ ܕܫܘܼܕܪܸܢܹܗ ܥܲܡܝܼ ܝܠܹܗ: ܘܠܵܐ ܫܒ̣ܝܼܩܸܢܹܗ ܒܢܲܦ̮ܫܝܼ: ܣܵܒܵܒ ܐܵܢܵܐ ܡܸܢܕܝܼ ܕܫܵܦܸܪ ܐܸܠܹܗ ܟܹܐ ܥܵܒ̣ܕܸܢ ܒܟܠ ܙܲܒ̣ܢܵܐ. 30ܟܲܕ ܐܲܢܹܐ ܗܲܡܙܘܼܡܹܐ ܗ݇ܘܵܐ: ܪܵܒܵܐ ܗܘܼܡܸܢܗܘܿܢ ܒܝܹܗ. 31ܐَܡܝܼܪܹܗ ܗܲܕܟ̣ܵܐ ܝܼܫܘܿܥ ܠܐܵܢܝܼ ܝܗَܘܼܕܵܝܹ̈ܐ ܕܗܘܼܡܸܢܗܘܿܢ ܒܝܹܗ: ܐܸܢ ܐܲܚܬܘܿܢ ܥܲܪܩܸܠܝܼܬܘܿܢ ܒܗܹܡܸܙܡܵܢܝܼ: ܫܲܪܝܼܪܵܐܝܼܬ ܬܲܠܡܝܼܕܝܼ̈ ܝܬܘܿܢ. 32ܘܒܸܬ ܝܵܕܥܝܼܬܘܿܢ ܣܲܪܲܣܬܘܼܬܵܐ: ܘܣܲܪܲܣܬܘܼܬܵܐ ܒܸܬ ܥܵܒ̣ܕܵܠܵܘܟ̣ܘܿܢ ܐܵܙܵܕܹ̈ܐ. 33ܓ̰ܘܼܘܸܒܠܗܘܿܢ ܐܸܠܹܗ: ܙܲܪܥܹܗ ܕܐܲܒ̣ܪܵܗܵܡ ܝܼܘܵܚ: ܘܪܹܓܘܼܬܵܐ ܠܐ݇ܢܵܫܵܐ ܗܲܪ ܠܹܐ ܝܘܵܚ ܦܠܝܼܚܹܐ. ܕܵܐܟ̣ܝܼ ܒܹܐܡܵܪܵܐ ܝܘܸܬ ܕܒܸܬ ܗܵܘܹܝܬܘܿܢ ܐܵܙܵܕܹ̈ܐ. 34ܓ̰ܘܼܘܸܒܠܹܗ ܐܸܠܵܝܗܝ ܝܼܫܘܿܥ: ܬܪܘܿܨܵܐ: ܬܪܘܿܨܵܐ: ܒܹܐܡܵܪܵܐ ܝܘܸܢ ܐܸܠܵܘܟ̣ܘܿܢ: ܟܠ ܕܥܵܒܸܕ ܚܛܝܼܬܵܐ: ܩܘܼܠܵܐ ܕܚܛܝܼܬܵܐ ܝܠܹܗ. 35ܘܩܘܼܠܵܐ ܠܹܐ ܥܲܪܩܸܠ ܠܥܵܠܲܡ ܓܵܘ ܒܲܝܬܵܐ: ܒܪܘܿܢܵܐ ܠܥܵܠܲܡ ܟܹܐ ܥܲܪܩܸܠ. 36ܐܸܢ ܗܲܕܟ̣ܵܐ ܒܪܘܿܢܵܐ ܥܵܒܸܕ ܠܵܘܟ̣ܘܿܢ ܐܵܙܵܕܹ̈ܐ: ܫܲܪܝܼܪܵܐܝܼܬ ܒܸܬ ܗܵܘܹܝܬܘܿܢ ܐܵܙܵܕܹ̈ܐ. 37ܒܝܼܕܵܥܝܵܐ ܝܘܸܢ ܕܙܲܪܥܹܗ ܕܐܲܒ̣ܪܵܗܵܡ ܝܼܬܘܿܢ: ܐܸܠܵܐ ܒܸܛܲܥܝܵܐ ܝܬܘܿܢ ܠܸܩܛܵܠܝܼ: ܣܵܒܵܒ ܕܗܹܡܸܙܡܵܢܝܼ ܠܲܝܬ ܠܵܗ̇ ܕܘܼܟܵܐ ܒܝܼܵܘܟ̣ܘܿܢ. 38ܐܵܢܵܐ ܡܸܢܕܝܼ ܕܚܙܹܠܝܼ ܠܟܸܣ ܒܵܒܝܼ ܟܹܐ ܗܲܡܙܸܡܸܢ: ܘܐܲܚܬܘܿܢ ܡܸܢܕܝܼ ܕܫܡܸܥܠܵܘܟ̣ܘܿܢ ܡ̣ܢ ܒܵܒܵܘܟ̣ܘܿܢ ܟܹܐ ܥܵܒ̣ܕܝܼܬܘܿܢ. 39ܓ̰ܘܼܘܸܒܠܗܘܿܢ ܘܐَܡܸܪܗܘܿܢ ܐܸܠܹܗ: ܒܵܒܵܐ ܕܝܲܢ ܐܲܒ̣ܪܵܗܵܡ ܝܠܹܗ. ܐܵܡܸܪ ܐܸܠܵܝܗܝ ܝܼܫܘܿܥ: ܐܸܢ ܗܵܘܹܝܬܘܿܢ ܗ݇ܘܵܘ ܒܢܘܿܢܹ̈ܐ ܕܐܲܒ̣ܪܵܗܵܡ: ܦܘܼܠܚܵܢܹ̈ܐ ܕܐܲܒ̣ܪܵܗܵܡ ܒܸܬ ܥܵܒ̣ܕܝܼܬܘܿܢ ܗ݇ܘܵܘ. 40ܐܝܼܢܵܐ ܐܵܕܝܼܵܐ ܒܸܛܲܥܝܵܐ ܝܬܘܿܢ ܠܸܩܛܵܠܝܼ: ܠܐ݇ܢܵܫܵܐ ܕܣܲܪܲܣܬܘܼܬܵܐ ܗܘܼܡܙܸܡܠܝܼ ܥܲܡܵܘܟ̣ܘܿܢ ܗ̇ܝ ܕܫܡܸܥܠܝܼ ܡ̣ܢ ܐܲܠܵܗܵܐ. 41ܐܵܗܵܐ ܠܵܐ ܥܒܸܕܠܹܗ ܐܲܒ̣ܪܵܗܵܡ. ܐܲܚܬܘܿܢ ܟܹܐ ܥܵܒ̣ܕܝܼܬܘܿܢ ܦܘܼܠܚܵܢܹ̈ܐ ܕܒܵܒܵܘܟ̣ܘܿܢ. ܐَܡܸܪܗܘܿܢ ܐܸܠܹܗ: ܐܲܚܢܲܢ ܡ̣ܢ ܙܵܢܝܘܼܬܵܐ ܠܵܐ ܗَܘܹܐܠܲܢ: ܚܲܕَ ܒܵܒܵܐ ܐܝܼܬ ܠܲܢ: ܐܲܠܵܗܵܐ. 42ܐَܡܝܼܪܹܗ ܐܸܠܵܝܗܝ ܝܼܫܘܿܥ: ܐܸܢ ܐܲܠܵܗܵܐ ܗܵܘܹܐ ܗ݇ܘܵܐ ܒܵܒܵܘܟ̣ܘܿܢ: ܒܸܬ ܡܲܚܸܒܝܼܬܘܿܢ ܗ݇ܘܵܘ ܠܝܼ: ܣܵܒܵܒ ܐܵܢܵܐ ܡ̣ܢ ܐܲܠܵܗܵܐ ܦܠܸܛܠܝܼ ܘܐَܬܹܐܠܝܼ: ܘܡ̣ܢ ܓܵܢܝܼ ܠܵܐ ܐَܬܹܐܠܝܼ: ܐܸܠܵܐ ܗ̇ܘ ܫܘܼܕܪܸܢܹܗ. 43ܩܵܡܘܿܕܝܼ ܠܹܐ ܝܬܘܿܢ ܒܝܼܕܵܥܝܵܐ ܗܹܡܸܙܡܵܢܝܼ: ܣܵܒܵܒ ܠܹܐ ܡܵܨܹܝܬܘܿܢ ܠܸܫܡܲܥܝܵܐ ܗܹܡܸܙܡܵܢܝܼ. 44ܐܲܚܬܘܿܢ ܡ̣ܢ ܒܵܒܵܐ ܐܵܟܹܠܩܲܪܨܵܐ ܝܬܘܿܢ: ܘܫܲܗَܘܲܬܝܵܬܹ̈ܐ ܕܒܵܒܵܘܟ̣ܘܿܢ ܪܸܙܵܝܵܘܟ̣ܘܿܢ ܝܼܠܹܗ ܠܸܥܒ̣ܵܕܵܐ: ܗ̇ܘ ܕܡ̣ܢ ܒܪܵܫܝܼܬ ܩܵܛܸܠ. ܐ݇ܢܵܫܹ̈ܐ ܝܠܹܗ: ܘܒܣܲܪܲܣܬܘܼܬܵܐ ܠܹܐ ܟܵܠܹܐ: ܣܵܒܵܒ ܕܣܲܪܲܣܬܘܼܬܵܐ ܠܲܝܬ ܒܝܹܗ. ܐܝܼܡܲܢ ܕܗܲܡܙܸܡ ܕܵܓܵܠܘܼܬܵܐ: ܡ̣ܢ ܓܵܢܹܗ ܟܹܐ ܗܲܡܙܸܡ: ܣܵܒܵܒ ܕܵܓܵܠܵܐ ܝܠܹܗ: ܐܘܼܦ ܒܵܒܘܼܗ̇. 45ܐܝܼܢܵܐ ܐܵܢܵܐ: ܣܵܒܵܒ ܕܣܲܪܲܣܬܘܼܬܵܐ ܒܹܐܡܵܪܵܐ ܝܘܸܢ: ܠܹܐ ܝܬܘܿܢ ܗܲܡܘܼܢܹܐ ܐܸܠܝܼ. 46ܡܵܢܝܼ ܡܸܢܵܘܟ̣ܘܿܢ ܒܸܥܒ̣ܵܕܝܼ ܝܠܹܗ ܓܘܼܢܵܗܟܵܪ ܥܲܠ ܚܛܝܼܬܵܐ: ܐܸܢ ܣܲܪܲܣܬܘܼܬܵܐ ܒܹܐܡܵܪܵܐ ܝܘܸܢ: ܐܲܚܬܘܿܢ ܩܵܡܘܿܕܝܼ ܠܹܐ ܝܬܘܿܢ ܗܲܡܘܼܢܹܐ ܐܸܠܝܼ. 47ܡ̇ܢ ܕܡ̣ܢ ܐܲܠܵܗܵܐ ܝܠܹܗ: ܗܹܡܸܙܡܵܢܹ̈ܐ ܕܐܲܠܵܗܵܐ ܟܹܐ ܫܵܡܹܥ. ܣܵܒܵܒ ܕܐܵܗܵܐ ܐܲܚܬܘܿܢ ܠܹܐ ܝܬܘܿܢ ܒܸܫܡܲܥܝܵܐ: ܣܵܒܵܒ ܠܹܐ ܝܬܘܿܢ ܡ̣ܢ ܐܲܠܵܗܵܐ. 48ܓ̰ܘܼܘܸܒܠܗܘܿܢ ܝܗَܘܼܕܵܝܹ̈ܐ ܘܐَܡܸܪܗܘܿܢ ܐܸܠܹܗ: ܠܹܐ ܝܘܵܚ ܨܦܵܝܝܼ ܒܹܐܡܵܪܵܐ: ܕܫܵܡܪܵܝܵܐ ܝܘܸܬ: ܘܕܲܝܘܵܐ ܐܝܼܬ ܠܘܼܟܼ. 49ܓ̰ܘܼܘܸܒܠܹܗ ܝܼܫܘܿܥ: ܐܵܢܵܐ ܕܲܝܘܵܐ ܠܲܝܬ ܠܝܼ: ܐܸܠܵܐ ܠܒܵܒܝܼ ܡܝܵܩܘܿܪܹܐ ܝܘܸܢ: ܘܐܲܚܬܘܿܢ ܡܲܒܨܘܼܪܹܐ ܝܬܘܿܢ ܐܸܠܝܼ. 50ܐܝܼܢܵܐ ܐܵܢܵܐ ܠܹܐ ܒܵܥܹܝܢ ܚܸܩܪܵܐ ܕܓܵܢܝܼ: ܐܝܼܬ ܗ̇ܘ ܕܒܵܥܝܹܐ ܘܕܵܝܸܢ. 51ܬܪܘܿܨܵܐ: ܬܪܘܿܨܵܐ: ܒܹܐܡܵܪܵܐ ܝܘܸܢ ܐܸܠܵܘܟ̣ܘܿܢ: ܐܸܢ ܐ݇ܢܵܫܵܐ ܢܵܛܸܪ ܗܹܡܸܙܡܵܢܝܼ: ܡܵܘܬܵܐ ܠܹܐ ܚܵܙܹܐ ܠܥܵܠܲܡ. 52ܐَܡܸܪܗܘܿܢ ܐܸܠܹܗ ܝܗَܘܼܕܵܝܹ̈ܐ: ܐܵܕܝܼܵܐ ܝܕܸܥܠܲܢ ܕܕܲܝܘܵܐ ܐܝܼܬ ܠܘܼܟܼ. ܐܲܒ̣ܪܵܗܵܡ ܡܝܼܬܠܹܗ ܘܢܒ̣̈ܝܹܐ: ܘܐܲܢَܬ ܒܹܐܡܵܪܵܐ ܝܘܸܬ: ܐܸܢ ܐ݇ܢܵܫܵܐ ܢܵܛܸܪ ܗܹܡܸܙܡܵܢܝܼ: ܡܵܘܬܵܐ ܠܹܐ ܛܵܥܸܡ ܠܥܵܠܲܡ. 53ܐܲܢَܬ ܓܘܼܪܵܐ ܝܘܸܬ ܡ̣ܢ ܒܵܒܲܢ ܐܲܒ̣ܪܵܗܵܡ ܕܡܝܼܬܠܹܗ: ܘܢܒ̣̈ܝܹܐ ܡܝܼܬܠܗܘܿܢ. ܡܵܢܝܼ ܒܸܥܒ̣ܵܕܵܐ ܝܘܸܬ ܓܵܢܘܼܟ. 54ܓ̰ܘܼܘܸܒܠܹܗ ܝܼܫܘܿܥ: ܐܸܢ ܐܵܢܵܐ ܒܸܚܩܵܪܵܐ ܝܘܸܢ ܓܵܢܝܼ: ܚܸܩܪܝܼ ܡܸܢܕܝܼ ܠܹܐ ܝܠܹܗ. ܒܵܒܝܼ ܝܠܹܗ ܕܒܸܚܩܵܪܝܼ ܝܠܹܗ: ܗ̇ܘ ܕܒܹܐܡܵܪܵܐ ܝܬܘܿܢ ܕܐܲܠܵܗܵܘܟ̣ܘܿܢ ܝܼܠܹܗ. 55ܘܠܹܐ ܝܬܘܿܢ ܝܕܸܥܝܘܼܗ: ܐܝܼܢܵܐ ܐܵܢܵܐ ܟܹܐ ܝܵܕܥܸܢܗ: ܘܐܸܢ ܐܵܡܪܸܢ ܗ݇ܘܵܐ ܠܹܐ ܝܵܕܥܸܢܗ: ܒܸܬ ܗܵܘܸܢ ܐܲܝܟܼ ܕܝܼܵܘܟ̣ܘܿܢ ܕܵܓܵܠܵܐ: ܐܸܠܵܐ ܟܹܐ ܝܵܕܥܸܢܗ: ܘܗܹܡܸܙܡܵܢܹܗ ܟܹܐ ܢܵܛܪܸܢ. 56ܒܵܒܵܘܟ̣ܘܿܢ ܐܲܒ̣ܪܵܗܵܡ ܦܨܸܚܠܹܗ ܕܚܵܙܹܐ ܗ݇ܘܵܐ ܝܵܘܡܝܼ؛ ܘܚܙܹܐܠܹܗ: ܘܚܕܹܠܹܗ. 57ܐَܡܸܪܗܘܿܢ ܐܸܠܹܗ ܝܗَܘܼܕܵܝܹ̈ܐ: ܗܵܠܵܐ ܒܲܪ ܚܲܡܫܝܼ ܫܸܢܹ̈ܐ ܠܹܐ ܝܘܸܬ: ܘܠܲܐܒ̣ܪܵܗܵܡ ܚܸܙܝܵܐ ܝܘܸܬ. 58ܐَܡܝܼܪܹܗ ܐܸܠܵܝܗܝ ܝܼܫܘܿܥ: ܬܪܘܿܨܵܐ: ܬܪܘܿܨܵܐ: ܒܹܐܡܵܪܵܐ ܝܘܸܢ ܐܸܠܵܘܟ̣ܘܿܢ: ܗܵܠܵܐ ܠܵܐ ܗَܘܵܝܵܐ ܐܲܒ̣ܪܵܗܵܡ ܐܵܢܵܐ ܝܘܸܢ. 59ܘܫܩܸܠܗܘܿܢ ܟܹܐܦܹ̈ܐ ܗܲܕܟ̣ܵܐ ܕܪܵܓ̰ܡܝܼ ܠܹܗ: ܘܝܼܫܘܿܥ ܛܘܼܫܝܼܠܹܗ ܓܵܢܹܗ: ܘܦܠܸܛܠܹܗ ܡ̣ܢ ܗܲܝܟܠܵܐ: ܘܥܒܸܪܹܗ ܡ̣ܢ ܓܵܘܵܝܗܝ ܘܐَܙܸܠܹܗ.