0:00
/
1ܘܟܲܕ ܒܸܥܒ̣ܵܪܵܐ ܗ݇ܘܵܐ: ܚܙܹܐܠܹܗ ܚܲܕَ ܐ݇ܢܵܫܵܐ ܣܸܡܝܵܐ ܕܡ̣ܢ ܟܹܪَܣܵܐ ܕܝܸܡܹܗ. 2ܘܒܘܼܩܸܪܗܘܿܢ ܡܸܢܹܗ ܬܲܠܡܝܼܕܘܼ̈ܗܝ ܘܐܵܡܪܝܼ: ܪܵܒܝܼ: ܡܵܢܝܼ ܚܛܹܠܹܗ: ܐܵܗܵܐ ܝܲܢ ܐܲܒ̣ܵܗܘܼ̈ܗܝ: ܕܣܸܡܝܵܐ ܦܵܐܹܫ ܗ݇ܘܵܐ ܝܠܝܼܕܵܐ. 3ܓ̰ܘܼܘܸܒܠܹܗ ܝܼܫܘܿܥ: ܠܵܐ ܐܵܗܵܐ ܚܛܹܠܹܗ ܘܠܵܐ ܐܲܒ̣ܵܗܘܼ̈ܗܝ: ܐܸܠܵܐ ܕܦܵܝܫܝܼ ܚܸܙܝܹܐ ܒܝܹܗ ܦܘܼܠܚܵܢܹ̈ܐ ܕܐܲܠܵܗܵܐ. 4 ܘܐܸܠܲܢ ܘܵܓ̰ܸܒ ܝ݇ܠܵܗ̇ ܠܸܥܒ̣ܵܕܵܐ ܦܘܼܠܚܵܢܹ̈ܐ ܕܗ̇ܘ ܕܫܘܼܕܪܸܢܹܗ ܗܵܠܵܐ ܕܐܝܼܡܵܡܵܐ ܝܠܹܗ. ܒܹܐܬܵܝܵܐ ܝܠܹܗ ܠܲܝܠܹܐ: ܕܐ݇ܢܵܫܵܐ ܠܹܐ ܡܵܨܹܐ ܠܸܦܠܵܚܵܐ. 5ܟܡܵܐ ܕܓܵܘ ܥܵܠܡܵܐ ܝܘܸܢ: ܒܲܗܪܹܗ ܕܥܵܠܡܵܐ ܝܘܸܢ. 6ܘܟܲܕ ܐَܡܝܼܪܹܗ ܐܲܢܹܐ: ܪܸܩܠܹܗ ܥܲܠ ܐܲܪܥܵܐ: ܘܓܒܸܠܹܗ ܛܝܼܢܵܐ ܡ̣ܢ ܪܘܼܩܹܗ: ܘܫܸܥܠܹܗ ܛܝܼܢܵܐ ܥܲܠ ܥܲܝܢܘܼ̈ܗܝ. 7ܘܐَܡܝܼܪܹܗ ܐܸܠܹܗ: ܙܹܠَܐ: ܚܲܠܸܠ ܓܵܘ ܗܵܘܘܿܣ ܕܫܝܼܠܘܿܚܵܐ: ܕܦܵܝܫܵܐ ܦܘܼܫܸܩܬܵܐ: ܫܘܼܕܪܵܐ. 8ܘܐَܙܸܠܹܗ ܚܘܼܠܹܠܹܗ: ܘܐَܬܹܐܠܹܗ ܟܲܕ ܒܸܚܙܵܝܵܐ. ܐܝܼܢܵܐ ܫܒ̣ܵܒ̣ܘܼ̈ܗܝ ܘܐܵܢܝܼ ܕܚܸܙܝܹܗ ܗ݇ܘܵܘ ܡ̣ܢ ܩܵܕَܡܵܝܬܵܐ ܕܓܹܒ̣ܵܝܵܐ ܗ݇ܘܵܐ: ܐَܡܸܪܗܘܿܢ: ܠܹܐ ܝܠܹܗ ܐܵܗܵܐ ܗ̇ܘ ܕܝܵܬܸܒ̣ ܗ݇ܘܵܐ ܘܓܵܒܹܐ. 9ܐ݇ܚܹܪ̈݇ܢܹܐ ܐَܡܸܪܗܘܿܢ: ܐܵܗܵܐ ܝܠܹܗ: ܘܐ݇ܚܹܪ̈݇ܢܹܐ ܐَܡܸܪܗܘܿܢ: ܠܵܐ: ܐܸܠܵܐ ܒܸܕܡܵܝܵܐ ܝܠܹܗ ܐܸܠܹܗ. 10ܗ̇ܘ ܐَܡܝܼܪܹܗ: ܐܵܢܵܐ ܝܘܸܢ. ܐَܡܸܪܗܘܿܢ ܗܲܕܟ̣ܵܐ ܐܸܠܹܗ: ܕܵܐܟ̣ܝܼ ܦܸܫܠܗَܘܿܢ ܦܬܝܼܚܹܐ ܥܲܝܢܘܼ̈ܟ. 11ܓ̰ܘܼܘܸܒܠܹܗ ܐܸܠܵܝܗܝ: ܐ݇ܢܵܫܵܐ ܕܫܸܡܹܗ ܝܼܫܘܿܥ: ܬܘܼܪܸܨܠܹܗ ܛܝܼܢܵܐ: ܘܫܸܥܠܹܗ ܥܲܠ ܥܲܝܢܝܼ̈: ܘܐَܡܝܼܪܹܗ ܐܸܠܝܼ: ܙܹܠَܐ ܠܫܝܼܠܘܿܚܵܐ ܘܚܲܠܸܠ. ܘܐܙܸܠܝܼ ܚܘܼܠܸܠܝܼ: ܘܚܙܹܠܝܼ. 12ܐَܡܸܪܗܘܿܢ ܐܸܠܹܗ: ܐܲܝܟܵܐ ܝܠܹܗ ܗ̇ܘ: ܐَܡܝܼܪܹܗ ܐܸܠܵܝܗܝ: ܠܹܐ ܝܘܸܢ ܒܝܼܕܵܥܝܵܐ. 13ܘܡܘܼܬَܝܹܠܗܘܿܢ ܠܟܸܣ ܦܪ̈ܝܼܫܹܐ ܠܗ̇ܘ ܕܡ̣ܢ ܩܵܕَܡܵܝܬܵܐ ܣܸܡܝܵܐ ܗ݇ܘܵܐ. 14ܐܝܼܢܵܐ ܫܲܒܬܵܐ ܗ݇ܘܵܐ ܝܵܘܡܵܐ ܕܬܘܼܪܸܨܠܹܗ ܛܝܼܢܵܐ ܝܼܫܘܿܥ: ܘܦܬܸܚܠܹܗ ܥܲܝܢܹ̈ܗ. 15ܘܡܸܢَܕܪܸܫَ ܒܘܼܩܸܪܗܘܿܢ ܐܘܼܦ ܦܪ̈ܝܼܫܹܐ ܡܸܢܹܗ: ܕܵܐܟ̣ܝܼ ܚܙܹܐܠܹܗ. ܘܗ̇ܘ ܐَܡܝܼܪܹܗ ܐܸܠܵܝܗܝ: ܛܝܼܢܵܐ ܡܘܼܬܸܒ̣ܠܹܗ ܥܲܠ ܥܲܝܢܝܼ̈: ܘܚܘܼܠܸܠܝܼ: ܘܒܸܚܙܵܝܵܐ ܝܘܸܢ. 16ܘܐَܡܸܪܗܘܿܢ ܗܲܕܟ̣ܵܐ ܐ݇ܢܵܫܹ̈ܐ ܡ̣ܢ ܦܪ̈ܝܼܫܹܐ: ܐܵܗܵܐ ܐ݇ܢܵܫܵܐ ܠܹܐ ܝܠܹܗ ܡ̣ܢ ܐܲܠܵܗܵܐ: ܣܵܒܵܒ ܫܲܒܬܵܐ ܠܹܐ ܝܠܹܗ ܒܸܢܛܵܪܵܐ. ܐܝܼܢܵܐ ܐ݇ܚܹܪ̈݇ܢܹܐ ܐَܡܸܪܗܘܿܢ: ܕܵܐܟ̣ܝܼ ܡܵܨܹܐ ܐ݇ܢܵܫܵܐ ܚܲܛܵܝܵܐ ܐܲܢܹܐ ܢܝܼܫܲܢܩܹ̈ܐ ܠܸܥܒ̣ܵܕܵܐ: ܘܕܘܼܒܵܪܘܼܬܵܐ ܐܝܼܬ ܗ݇ܘܵܐ ܓܵܘܵܝܗܝ. 17ܐܵܡܪܝܼ ܡܸܢَܕܪܸܫَ ܠܣܸܡܝܵܐ: ܐܲܢܬ ܡܘܼܕܝܼ ܒܹܐܡܵܪܵܐ ܝܘܸܬ ܒܘܼܬ ܕܗ̇ܘ ܕܦܬܸܚܠܹܗ ܥܲܝܢܘܼ̈ܟ: ܐَܡܝܼܪܹܗ ܐܸܠܵܝܗܝ: ܢܒ̣ܝܼܵܐ ܝܠܹܗ. 18ܐܝܼܢܵܐ ܠܵܐ ܗܘܼܡܸܢܗܘܿܢ ܝܗَܘܼܕܵܝܹ̈ܐ ܒܵܗَܣܹܗ ܕܣܸܡܝܵܐ ܗ݇ܘܵܐ ܘܚܙܹܐܠܹܗ: ܗܲܠ ܕܩܪܹܐܠܗܘܿܢ ܠܐܲܒ̣ܵܗܹ̈ܐ ܕܗ̇ܘ ܕܚܙܹܐܠܹܗ. 19ܘܒܘܼܩܸܪܗܘܿܢ ܡܸܢܵܝܗܝ: ܒܹܐܡܵܪܵܐ: ܐܵܗܵܐ ܝܠܹܗ ܒܪܘܼܢܵܘܟ̣ܘܿܢ: ܗ̇ܘ ܕܐܲܚܬܘܿܢ ܒܹܐܡܵܪܵܐ ܝܬܘܿܢ ܣܸܡܝܵܐ ܦܸܫܠܹܗ ܝܠܝܼܕܵܐ: ܒܲܣ ܕܵܐܟ̣ܝܼ ܐܵܕܝܼܵܐ ܒܸܚܙܵܝܵܐ ܝܠܹܗ. 20ܓ̰ܘܼܘܸܒܠܗܘܿܢ ܐܲܒ̣ܵܗܘܼ̈ܗܝ ܘܐَܡܸܪܗܘܿܢ: ܒܝܼܕܵܥܝܵܐ ܝܘܵܚ ܕܐܵܗܵܐ ܝܠܹܗ ܒܪܘܿܢܲܢ: ܘܕܣܸܡܝܵܐ ܦܸܫܠܹܗ ܝܠܝܼܕܵܐ. 21ܐܝܼܢܵܐ ܕܵܐܟ̣ܝܼ ܐܵܕܝܼܵܐ ܒܸܚܙܵܝܵܐ ܝܠܹܗ: ܠܹܐ ܝܘܵܚ ܒܝܼܕܵܥܝܵܐ: ܝܲܢ ܡܵܢܝܼ ܦܬܸܚܠܹܗ ܥܲܝܢܘܼ̈ܗܝ: ܠܹܐ ܝܘܵܚ ܒܝܼܕܵܥܝܵܐ: ܗ̇ܘ ܥܒܼܝܼܪܵܐ ܝܠܹܗ ܒܫܸܢܹ̈ܐ: ܡܸܢܹܗ ܒܲܩܪܘܿܢ. ܗ̇ܘ ܡܒܵܕܵܠ ܕܓܵܢܹܗ ܗܲܡܙܸܡ. 22ܐܲܢܹܐ ܐَܡܸܪܗܘܿܢ ܐܲܒ̣ܵܗܘܼ̈ܗܝ: ܣܵܒܵܒ ܕܒܸܙܕܵܥܝܵܐ ܗ݇ܘܵܘ ܡ̣ܢ ܝܗَܘܼܕܵܝܹ̈ܐ: ܣܵܒܵܒ ܝܗَܘܼܕܵܝܹ̈ܐ ܡܩܵܕَܡ ܐܵܕܝܼܵܐ ܥܒ̣ܝܼܕܹܐ ܗ݇ܘܵܘ ܪܵܐܝܝܼ: ܕܐܸܢ ܐ݇ܢܵܫܵܐ ܡܵܘܕܹܐ ܒܝܹܗ ܕܡܫܝܼܚܵܐ ܝܠܹܗ: ܦܵܠܛܝܼ ܗ݇ܘܵܘ ܠܹܗ ܡ̣ܢ ܟܢܘܼܫܬܵܐ. 23ܣܵܒܵܒ ܕܐܵܗܵܐ ܐَܡܸܪܗܘܿܢ ܐܲܒ̣ܵܗܘܼ̈ܗܝ: ܥܒܼܝܼܪܵܐ ܝܠܹܗ ܒܫܸܢܹ̈ܐ: ܒܲܩܪܘܿܢ ܡܸܢܹܗ. 24ܘܩܪܹܐܠܗܘܿܢ ܓܵܗܵܐ ܕܬܲܪ̈ܬܹܝ ܠܗ̇ܘ ܐ݇ܢܵܫܵܐ ܕܝܼܗ݇ܘܵܐ ܣܸܡܝܵܐ: ܘܐَܡܸܪܗܘܿܢ ܐܸܠܹܗ: ܫܵܒܸܚ ܠܐܲܠܵܗܵܐ. ܐܲܚܢܲܢ ܒܝܼܕܵܥܝܵܐ ܝܘܵܚ ܕܐܵܗܵܐ ܐ݇ܢܵܫܵܐ ܚܲܛܵܝܵܐ ܝܠܹܗ. 25ܓ̰ܘܼܘܸܒܠܹܗ ܗ̇ܘ ܗܲܕܟ̣ܵܐ ܐܸܠܵܝܗܝ: ܐܸܢ ܚܲܛܵܝܵܐ ܝܠܹܗ ܠܹܐ ܝܘܸܢ ܒܝܼܕܵܥܝܵܐ: ܚܲܕَ ܡܸܢܕܝܼ ܒܝܼܕܵܥܝܵܐ ܝܘܸܢ: ܕܣܸܡܝܵܐ ܝܘܸܢ ܗ݇ܘܵܐ: ܘܐܵܕܝܼܵܐ ܒܸܚܙܵܝܵܐ ܝܘܸܢ. 26ܐَܡܸܪܗܘܿܢ ܐܸܠܹܗ ܡܸܢَܕܪܸܫَ: ܡܘܼܕܝܼ ܥܒܸܕܠܹܗ ܐܸܠܘܼܟܼ: ܕܵܐܟ̣ܝܼ ܦܬܸܚܠܹܗ ܥܲܝܢܘܼ̈ܟ. 27ܓ̰ܘܼܘܸܒܠܹܗ ܐܸܠܵܝܗܝ: ܡܩܵܕَܡ ܐܵܕܝܼܵܐ ܐَܡܸܪܝܼ ܐܸܠܵܘܟ̣ܘܿܢ: ܘܠܵܐ ܫܡܸܥܠܵܘܟ̣ܘܿܢ. ܩܵܡܘܿܕܝܼ ܡܸܢَܕܪܸܫَ ܒܸܒܥܵܝܵܐ ܝܬܘܿܢ ܠܸܫܡܲܥܝܵܐ: ܐܘܼܦ ܐܲܚܬܘܿܢ ܒܵܥܹܝܬܘܿܢ ܠܸܗܘܵܝܵܐ ܬܲܠܡܝܼܕܹ̈ܗ. 28ܐܝܼܢܵܐ ܐܵܢܝܼ ܨܘܼܥܸܪܗܘܿܢ ܐܸܠܹܗ ܘܐَܡܸܪܗܘܿܢ: ܐܲܢَܬ ܝܼܘܸܬ ܬܲܠܡܝܼܕܵܐ ܕܗ̇ܘ: ܐܝܼܢܵܐ ܐܲܚܢܲܢ ܬܲܠܡܝܼܕܹ̈ܐ ܕܡܘܼܫܹܐ ܝܘܵܚ. 29ܘܟܹܐ ܝܲܕܥܵܚ ܕܥܲܡ ܡܘܼܫܹܐ ܐܲܠܵܗܵܐ ܗܘܼܡܙܸܡܠܹܗ: ܐܝܼܢܵܐ ܠܐܵܗܵܐ ܠܹܐ ܝܘܵܚ ܒܝܼܕܵܥܝܵܐ ܡܐܲܝܟܵܐ ܝܠܹܗ. 30ܓ̰ܘܼܘܸܒܠܹܗ ܗ̇ܘ ܐ݇ܢܵܫܵܐ ܘܐَܡܝܼܪܹܗ: ܐܸܠܵܝܗܝ: ܒܲܣ ܒܐܵܗܵܐ ܝ݇ܠܵܗ̇ ܥܵܓ̰ܸܒܘܼܬܵܐ: ܕܐܲܚܬܘܿܢ ܠܹܐ ܝܬܘܿܢ ܒܝܼܕܵܥܝܵܐ ܡܐܲܝܟܵܐ ܝܠܹܗ: ܘܥܲܝܢܹ̈ܐ ܕܝܼܝܼ ܦܬܸܚܠܹܗ. 31ܟܹܐ ܝܲܕܥܵܚ ܕܐܲܠܵܗܵܐ ܠܚܲܛܵܝܹ̈ܐ ܠܹܐ ܫܵܡܹܥ: ܐܸܠܵܐ ܐܸܢ ܐ݇ܢܵܫܵܐ ܗܵܘܹܐ ܙܵܕܥܝܵܢܵܐ ܡ̣ܢ ܐܲܠܵܗܵܐ ܘܥܵܒܸܕ ܪܸܙܵܝܹܗ: ܠܗ̇ܘ ܟܹܐ ܫܵܡܹܥ. 32ܡ̣ܢ ܥܵܠܲܡ ܠܵܐ ܦܸܫܠܵܗ̇ ܫܡܥܝܼܬܵܐ ܕܦܬܸܚܠܹܗ ܐ݇ܢܵܫܵܐ ܥܲܝܢܹ̈ܐ ܕܗ̇ܘ ܕܦܸܫܠܹܗ ܝܠܝܼܕܵܐ ܣܸܡܝܵܐ. 33ܐܸܢ ܠܹܐ ܗ݇ܘܵܐ ܡ̣ܢ ܐܲܠܵܗܵܐ ܐܵܗܵܐ: ܠܹܐ ܡܵܨܹܐ ܗ݇ܘܵܐ ܡܸܢܕܝܼ ܠܸܥܒ̣ܵܕܵܐ. 34ܓ̰ܘܼܘܸܒܠܗܘܿܢ ܘܐَܡܸܪܗܘܿܢ ܐܸܠܹܗ: ܐܲܢَܬ ܬܲܡܵܡ ܒܚܛܝܼܵܬܹ̈ܐ ܦܸܫܠܘܿܟ ܝܠܝܼܕܵܐ ܘܐܲܢَܬ ܡܵܠܘܿܦܲܢ ܝܼܘܸܬ: ܘܦܘܼܠܸܛܠܗܘܿܢ ܐܸܠܹܗ ܠܒܲܕܲܪ. 35ܘܫܡܸܥܠܹܗ ܝܼܫܘܿܥ ܕܦܘܼܠܸܛܠܗܘܿܢ ܐܸܠܹܗ ܠܒܲܕܲܪ: ܘܡܘܼܫَܟ̰ܸܚܠܹܗ: ܘܐَܡܝܼܪܹܗ ܐܸܠܹܗ: ܐܲܢَܬ ܗܲܡܘܼܢܹܐ ܝܘܸܬ ܒܒܪܘܿܢܹܗ ܕܐܲܠܵܗܵܐ. 36 ܓ̰ܘܼܘܸܒܠܹܗ ܗ̇ܘ ܘܐَܡܝܼܪܹܗ: ܡܵܢܝܼ ܝܠܹܗ: ܡܵܪܝܼ: ܕܗܲܡܸܢܸܢ ܒܝܹܗ. 37ܐَܡܝܼܪܹܗ ܐܸܠܹܗ ܝܼܫܘܿܥ: ܐܘܼܦ ܚܸܙܝܹܗ ܝܘܸܬ: ܘܗ̇ܘ ܝܼܠܹܗ ܕܗܲܡܙܘܼܡܹܐ ܝܠܹܗ ܥܲܡܘܼܟ. 38ܘܗ̇ܘ ܐَܡܝܼܪܹܗ: ܗܲܡܘܼܢܹܐ ܝܘܸܢ: ܡܵܪܝܼ ܘܣܓܸܕܠܹܗ ܐܸܠܹܗ. 39ܘܐَܡܝܼܪܹܗ ܝܼܫܘܿܥ: ܠܕܝܼܘܵܢ ܐܵܢܵܐ ܐَܬܹܐܠܝܼ ܠܐܵܗܵܐ ܥܵܠܡܵܐ: ܕܐܵܢܝܼ ܕܠܹܐ ܝܢܵܐ ܒܸܚܙܵܝܵܐ ܚܵܙܝܼ: ܘܐܵܢܝܼ ܕܒܸܚܙܵܝܵܐ ܝܢܵܐ ܗܵܘܝܼ ܣܸܡܝܹ̈ܐ. 40ܘܫܡܸܥܠܗَܘܿܢ ܠܐܲܢܹܐ ܐܵܢܝܼ ܡ̣ܢ ܦܪ̈ܝܼܫܹܐ ܕܥܲܡܹܗ ܗ݇ܘܵܘ: ܘܐَܡܸܪܗܘܿܢ ܐܸܠܹܗ: ܐܘܼܦ ܐܲܚܢܲܢ ܣܸܡܝܹ̈ܐ ܝܘܵܚ. 41ܐَܡܝܼܪܹܗ ܐܸܠܵܝܗܝ ܝܼܫܘܿܥ: ܐܸܢ ܗܵܘܹܝܬܘܿܢ ܗ݇ܘܵܘ ܣܸܡܝܹ̈ܐ: ܠܲܝܬ ܗ݇ܘܵܐ ܠܵܘܟ̣ܘܿܢ ܚܛܝܼܬܵܐ: ܐܝܼܢܵܐ ܐܵܕܝܼܵܐ ܒܹܐܡܵܪܵܐ ܝܬܘܿܢ: ܒܸܚܙܵܝܵܐ ܝܘܵܚ: ܚܛܝܼܬܵܘܟ̣ܘܿܢ ܦܝܵܫܵܐ ܝ݇ܠܵܗ̇.